മലയാളത്തിൽ കയ്യൊപ്പിട്ട മഹാകവി

 മലയാളത്തിൽ കയ്യൊപ്പിട്ട മഹാകവി

-----------------------------------------------

മഹാകവി പി.കുഞ്ഞിരാമൻ നായരുടെ കവിത അടിമുടി കേരളീയമാണ്.പ്രണയം, ജീവിതം, മരണം,പ്രകൃതി, രാഷ്ട്രം എന്നൊക്കെയുള്ള കള്ളികളിൽ നിന്നുകൊണ്ട് പിയുടെ കവിതയിലേക്ക് ആസ്വാദനവിമാനം പറപ്പിക്കാമെങ്കിലും അതെല്ലാം സഞ്ചരിക്കുന്നത് കേരളീയതയുടെ ആകാശത്തിലൂടെത്തന്നെയാണ്. പുഴകളെയും മലകളെയും കുറിച്ചുപറഞ്ഞാൽ കേരളീയമാവുകയില്ല. നിളാനദി, സഹ്യപർവ്വതം എന്നുതന്നെ അടയാളപ്പെടുത്തേണ്ടതുണ്ട്. നദികൾ, കായലുകൾ തുടങ്ങിയ മനോഹാരിതകൾ പേരെടുത്തുതന്നെ പറയേണ്ടതുണ്ട്. മഹാകവി പി.അതു ഭംഗിയായി നിർവഹിച്ചു.

മഹാകവി പി.കുഞ്ഞിരാമൻ നായർ, ഓണത്തെക്കുറിച്ചുമാത്രം അമ്പതോളം കവിതകളാണ് എഴുതിയിട്ടുള്ളത്. ഓണസ്പർശമുള്ള കവിതകൾക്ക് കണക്കില്ല. ഓണം മാത്രമല്ല, വിഷുവും തിരുവാതിരയും മകരക്കൊയ്ത്തും കൊച്ചിക്കായലും വള്ളംകളിയും പൂക്കളവും എഴുത്തച്ഛനും പൂന്താനവും വള്ളത്തോളും കുമാരനാശാനും ചങ്ങമ്പുഴയും കൊടുങ്ങല്ലൂർ കുഞ്ഞിക്കുട്ടൻ തമ്പുരാനും ശ്രീ നാരായണഗുരുവും അബ്ദുൽ റഹ്മാൻ സാഹിബും കേളപ്പനും പുന്നശ്ശേരി നമ്പിയും എ ഡി ഹരിശർമ്മയും മൂർക്കോത്ത് കുമാരനും കുറ്റിപ്പുറത്ത് കേശവൻ നായരും സഞ്ജയനും ജാലവിദ്യക്കാരൻ വാഴക്കുന്നവും കുറൂരമ്മയും അടക്കം തലങ്ങും വിലങ്ങും കേരളീയമാണ് പി യുടെ കാവ്യനിരീക്ഷണങ്ങൾ. കേരളത്തിനു പുറത്തേക്ക് കണ്ണുപായിച്ചപ്പൊഴെല്ലാം അദ്ദേഹം കേരളത്തിലെ ഏതെങ്കിലും പുഴയോരത്തു നിൽക്കുകയായിരുന്നു.അതെ ചന്ദ്രഗിരി മുതൽ നെയ്യാർ വരെയുള്ള എല്ലാ പുഴകളും മഹാകവി പി.കുഞ്ഞിരാമൻ നായരുടെ ഉറ്റബന്ധുക്കൾ ആയിരുന്നു.

മാതൃഭാഷയുടെ മഹത്ത്വം ഉയർത്തിപ്പിടിച്ച മഹാകവി മറുനാടൻ ഭാഷകളെ വിരുന്നുകാരികളായിട്ടാണു കണ്ടത്. മാതൃഭാഷ വീട്ടമ്മയും. വിരുന്നുകാരികൾക്ക് മുറ്റമടിക്കേണ്ട ഗതികേടിലെത്തിയ മാതൃഭാഷയെന്ന വീട്ടമ്മയെകുറിച്ച് മഹാകവി രോഷാകുലൻ ആകുന്നുണ്ട്.കയ്യൊപ്പുപോലും മലയാളത്തിലിട്ട തനി കേരളീയനായിരുന്നു അദ്ദേഹം. ഒപ്പിടേണ്ടിവരുന്ന ചെറുക്ലാസ്സുകളിൽ മലയാളം പാടില്ലെന്നൊരു ബോധംതന്നെ കുട്ടികളിൽ സൃഷ്ടിക്കാൻ കേരളീയസമൂഹത്തിനു കഴിഞ്ഞിട്ടുണ്ട്. ഇതിനെതിരെയുള്ള ചില ചെറുത്തുനിൽപ്പ് ബോധവൽക്കരണങ്ങൾ ചിലയിടങ്ങളിൽ നടക്കുന്നുമുണ്ട്. എന്നാൽ മഹാകവിക്ക് അക്കാര്യത്തിൽ ലേശവും സംശയവും ഉണ്ടായില്ല.

കേരളീയ ഗ്രാമവും കൃഷിയും കൃഷിക്കാരനും കേരളസംസ്ക്കാരമെന്ന ചെന്തെങ്ങിൻ കരിക്കും മഹാകവി മനസ്സിൽ സൂക്ഷിച്ചു. ആ വികാരം വരുംതലമുറയ്ക്ക് പകരാനും അദ്ദേഹത്തിന് കഴിഞ്ഞു. റഷ്യയെയും ചീനയെയും നോക്കി, സ്വന്തസംസ്ക്കാരം തിളയ്ക്കുന്ന ഭാഷയാലാണ് അവർ ചിന്തകൾ കൊയ്തേറ്റിയതെന്ന് അദ്ദേഹം ചൂണ്ടിക്കാട്ടി. ഭാരതത്തെ കുറിച്ച് അഭിമാനം കൊണ്ടകവി എപ്പോഴും കേരളീയതയിൽ കാലൂന്നി നിൽക്കുകയായിരുന്നു.

കേരളീയത വിവിധ ഭാവങ്ങളിൽ മഹാകവിയുടെ രചനകളിൽ ഇഴയൊരുക്കുന്നുണ്ട്. പ്രാണനും പ്രാണനാമോണപ്പൂവ്, കേരള കർഷകഗ്രാമം, പച്ചസ്സാരിയുടുത്ത വയൽ, ചിങ്ങപ്പൊൻവെയിൽ നാളങ്ങൾ, മഞ്ഞ പിഴിഞ്ഞ ഓണപ്പുടവ, പ്രാണനിൽ തേൻ തുടിക്കാൻ വരുന്ന ഓണനാളുകൾ, ജാലകത്തിൽ വന്ന ഓണനിലാവ്, ഇങ്ങനെ നീളുന്നതാണ് മഹാകവിയുടെ കേരളസ്പർശം.

ഇതിനുമപ്പുറം കേരളീയത മുഖ്യവിഷയമാകുന്ന അമ്പതിലേറെ കവിതകൾ മഹാകവി പി കുഞ്ഞിരാമൻ നായർ എഴുതിയിട്ടുണ്ട്. നഗ്നകേരളം എന്ന കവിത, ഇന്ത്യയേയും കേരളത്തേയും വിമർശനത്തിന്റെ മുൾമുനയിൽ നിർത്തുന്നതാണ്. കേരളീയതയുടെ അപചയങ്ങളിൽ ദുഃഖിക്കുകയും ഉൽക്കർഷങ്ങളിൽ സന്തോഷിക്കുകയും ചെയ്ത കവിയായിരുന്നു പി.കുഞ്ഞിരാമൻ നായർ. ഇന്ത്യൻ ദേശീയതയിൽ എത്രത്തോളം കേരളീയതയുണ്ട്? മദ്രാസികളെന്നും ലുങ്കിവാലകളെന്നുംവിളിച്ച് പരിഹസിക്കുന്നവർക്ക് അതു തിരിച്ചറിയാൻ കഴിയില്ല. മനസ്സിലാക്കാനുള്ള സന്നദ്ധതയില്ലാത്തവർക്കും കണ്ണടച്ച് ഇരുട്ടാക്കുന്നവർക്കുമുള്ള അഭയഗുഹയാണ് പരിഹാസം. ദേശീയതയിൽ അടിയുറച്ചു നിന്നുകൊണ്ടുതന്നെ കേരളീയതയുടെ മഹിമയും മഹാബലിത്വവും ഉയർത്തിപ്പിടിക്കാൻ നമുക്ക് മഹാകവി പിയെ മാതൃകയാക്കാവുന്നതാണ്.

• കുരീപ്പുഴ ശ്രീകുമാർ

 ഗണേശോത്സവവും ജലമലിനീകരണവും 

---------------------------------------------------

പാലക്കാട് നഗരസഭയക്കുമുന്നിൽ ഈയിടെ ഒരു ഒറ്റയാൾ സമരം നടന്നു. രാമനാഥപുരം ഗിരിധരൻ എന്നയാളാണ് പ്ലക്കാർഡും പിടിച്ച് സമരം ചെയ്തത്. വിനായകചതുർത്ഥി ആഘോഷങ്ങളുടെ പരിസമാപ്തിയിൽ കൂറ്റൻ ഗണപതിവിഗ്രഹങ്ങൾ ജലാശയങ്ങളിൽ നിമജ്ജനം ചെയ്ത് ജലം അശുദ്ധമാക്കരുത് എന്നായിരുന്നു അദ്ദേഹത്തിന്റെ ആവശ്യം. ഈ ഒറ്റയാൾ സമരഭടൻ, ഒരു പരിസ്ഥിതി തീവ്രവാദിയോ കക്ഷിരാഷ്ട്രീയക്കാരനോ ഒന്നുമല്ല. ആരും സ്പോൺസർ ചെയ്ത സമരവുമല്ല. ഗിരിധരൻ ഒരു പൂജാരിയാണ്. ബ്രാഹ്മണഗൃഹങ്ങളിൽ വിവാഹത്തിനും ഗൃഹപ്രവേശനത്തിനും മറ്റും പൂജാകർമ്മങ്ങൾ ചെയ്യുന്നു. ഗണപതിയെ പൂജിച്ചു പ്രസാദിപ്പിച്ചാൽ പോലും ചതുർത്ഥി ജലമലിനീകരണം തടയാൻ കഴിയില്ലെന്നു ബോധ്യമായതുകൊണ്ടാവാം അദ്ദേഹം സമരത്തിനിറങ്ങിയത്. എന്തായാലും അദ്ദേഹം ഉയർത്തിയ വിഷയം വളരെ പ്രധാനപ്പെട്ടതാണ്. സംസ്ഥാന സർക്കാരിന്റെയും പ്രാദേശികഭരണകൂടങ്ങളുടെയും അടിയന്തിരശ്രദ്ധ ഇക്കാര്യത്തിൽ ഉണ്ടാകേണ്ടതുമാണ്.

മഹാരാഷ്ട്രയിൽ നിന്നും കൊങ്കൺ പാതവഴി ഉത്തരകേരളത്തിൽ എത്തിയതാണ് ഗണേശോത്സവം. വളരെ അടുത്തകാലത്താണ് അത് തെക്കൻ കേരളത്തിലെത്തിയത്. ഉത്സവങ്ങളെ രാഷ്ട്രീയവൽക്കരിച്ച് അധികാരത്തിലെത്താമെന്ന ഹിന്ദുമതതീവ്രവാദികളുടെ അജണ്ട തന്നെയാണ് ഇതിന്റെ പിന്നിലുമുള്ളത്. കൃഷ്ണാഷ്ടമിയിലേക്ക് കുട്ടികളെയും അതുവഴി വോട്ടുള്ളവരെയും ആകർഷിക്കാമെന്ന പാഠം അവർ പഠിച്ചുകഴിഞ്ഞല്ലൊ. അത്തരത്തിലുള്ള ഒരു ലക്ഷ്യമാണ് ഗണേശവിഗ്രഹങ്ങളുടെ പെരുവഴിപ്പൂജയും ഘോഷയാത്രയും നിമജ്ജനവുമെല്ലാം നടത്തുന്നതിന്റെ പിന്നിലുള്ളത്. മഹാരാഷ്ട്രയിൽ ബാലഗംഗാധരതിലകൻ, ഗണേശോത്സവത്തെ ബ്രിട്ടീഷുകാർക്കെതിരേയുള്ള ഒരു ജനസമാഹരണോദ്യമമായി കണ്ടു വിജയിപ്പിച്ചെങ്കിൽ ഇപ്പോഴത് ഹിന്ദുമതാധിപത്യത്തെ നിലനിർത്തുവാനുള്ള ഒരു ഉപാധിയായി മാറിക്കഴിഞ്ഞു.

പടുകൂറ്റൻ ഗണപതി വിഗ്രഹങ്ങൾ പ്ലാസ്റ്റർ- ഒഫ് - പാരീസുകൊണ്ടും മറ്റും ഉണ്ടാക്കി, മാരകവിഷമുള്ള ചായങ്ങൾ പുരട്ടി കൊട്ടും പാട്ടും പൂജയുമായി ദിവസങ്ങൾ പൊലിപ്പിച്ചിട്ടൊടുവിൽ കുളത്തിലോ കായലിലോ പുഴയിലോ കടലിലോ വിശ്വാസത്തോടെ ഉപേക്ഷിക്കുമ്പോൾ വിഷം ജലത്തിൽ കലരുകയാണ്. കുടിക്കാനും കുളിക്കാനും മറ്റും ഉപയോഗിക്കുന്ന ശുദ്ധജലമാണ് ഇങ്ങനെ മലിനമാക്കപ്പെടുന്നത്. പ്ലാസ്റ്റിക്, പ്ലാസ്റ്റർ ഒഫ് പാരിസ് ഗണപതിവിഗ്രഹങ്ങൾ മത്സ്യങ്ങൾ ഭക്ഷിക്കുകവഴി അവയിൽ വിഷാംശം കലരുന്നു. മീൻ കഴിക്കുന്നവരെയും ഈ വിഷാംശം ബാധിക്കുന്നു. പക്ഷിമൃഗാദികളെയും ഈ വിഷം ബാധിക്കുന്നു. പുഴയിൽ കുളിക്കുന്നവർക്ക് വിവിധ ചർമ്മരോഗങ്ങൾ ഉണ്ടാകുന്നു. അങ്ങനെ ജീവി  ദ്രോഹപരമായ ഒരു ആചാരമായി ഗണേശോത്സവം മാറുന്നു.

പുഴയിലും കടലിലുമല്ലെങ്കിൽ പിന്നെ എവിടെ നിമജ്ജനം ചെയ്യും? ദീർഘകാലം ഇത്തരം ഗണപതിനിമജ്ജനം ഇല്ലാതിരുന്നിട്ടും കേരളത്തിനു പ്രത്യേകിച്ച് അപകടമൊന്നും ഉണ്ടായില്ലല്ലൊ. ഗണേശവഴിപൂജ തുടങ്ങിയതിനുശേഷമാണ് കേരളത്തിൽ വലിയ പ്രളയവും മലയിടിച്ചിലും മറ്റും ഉണ്ടായത്. ഗണേശോത്സവം സംബന്ധിച്ച് ചില നിർദ്ദേശങ്ങൾ അധികൃതർ  പുറപ്പെടുവിച്ചിരുന്നു. വിഗ്രഹം പരമാവധി ചെറുതായിരിക്കുക, മണ്ണുകൊണ്ട് നിർമ്മിക്കുക, രാസവിഷ പദാർത്ഥങ്ങൾ അടങ്ങിയ പെയിന്റ് ഉപയോഗിക്കാതിരിക്കുക തുടങ്ങിയവയായിരുന്നു ആ നിർദ്ദേശങ്ങൾ. അക്കൂട്ടത്തിൽ രാത്രി പത്തുമണിമുതൽ രാവിലെ ആറുമണിവരെ ഉച്ചഭാഷിണി ഉപയോഗിക്കരുതെന്നും പറഞ്ഞിരുന്നു. ഇതൊന്നും ആരും അനുസരിക്കുന്നില്ല. അനുസരിച്ചില്ലെങ്കിൽ കേസെടുക്കാനും ആരുമില്ല. അധികൃതരുടെ ഈ അലംഭാവമാണ് കുറ്റകൃത്യങ്ങൾ ആവർത്തിക്കാനുള്ള ധൈര്യം കുറ്റവാളികൾക്ക് നൽകുന്നത്.

ഒറ്റയാൾ സമരം നടത്തിയ രാമനാഥപുരം ഗിരിധരൻ മറ്റൊരു പരിഹാരം നിർദ്ദേശിക്കുന്നുണ്ട്. കുളങ്ങൾ കണ്ടെത്തി വൃത്തിയാക്കി അതിൽ നിമജ്ജനം നടത്തുക. നിമജ്ജനത്തിനു ശേഷം കുളം വൃത്തിയാക്കുക. പ്രായോഗികമാക്കാൻ അൽപ്പം ബുദ്ധിമുട്ടുള്ള നിർദ്ദേശമാണ് ഇതെങ്കിലും പരിശോധിക്കാവുന്നതാണ്. അതിനേക്കാൾ നല്ലത്, മണ്ണുപയോഗിച്ച്  ചെറുഗണപതി വിഗ്രഹങ്ങളുണ്ടാക്കി, താൽപര്യമുള്ളവർ അവരവരുടെ വീടുകളിൽ പൂജിക്കുന്നതാണ്. ഗണപതിയടക്കം മതദൈവങ്ങളും പള്ളിപ്പടങ്ങളുമെല്ലാം ഇപ്പോൾ വാങ്ങാനും കിട്ടും.ഇത് എല്ലാവർക്കും വേണ്ടകാര്യമല്ലല്ലൊ. പലവിശ്വാസികളും അവിശ്വാസികളുമൊക്കെ ഒന്നിച്ചു താമസിക്കുന്ന നമ്മുടെ നാട്ടിൽ ഗണേശകവലപ്പൂജയും ഗതാഗതക്കുരുക്കുണ്ടാക്കുന്ന നിമജ്ജന ഘോഷയാത്രയും ഒഴിവാക്കുന്നതാണ് ഉചിതം.

ഈ വിഷയം സംബന്ധിച്ച്, പുഴകളും തണ്ണീർത്തടങ്ങളും മതാചാര ഉത്സവങ്ങളാൽ നശിപ്പിക്കപ്പെടരുത് എന്ന് സാംസ്ക്കാരിക പ്രവർത്തകർ  കേരള മുഖ്യമന്ത്രിയോട് ആവശ്യപ്പെട്ടിട്ടുണ്ട്.. കെ.സച്ചിദാനന്ദൻ, എം.എൻ.കാരശ്ശേരി, വൈശാഖൻ,ഖദീജ മുംതാസ്,മുരുകൻ കാട്ടാക്കട, ഉമാദേവി തുരുത്തേരി, സതീഷ് കൊയിലത്ത് തുടങ്ങിയവരാണ് ഈ ആവശ്യം ഉന്നയിച്ചിട്ടുള്ളത്.

കടലോരത്ത് അടിഞ്ഞുകിടക്കുന്ന ഗണപതിവിഗ്രഹങ്ങളുടെ ചിത്രത്തോടുകൂടി കവി സി.എസ്.രാജേഷ് ഫേസ്ബുക്കിലിട്ട ഒരു പോസ്റ്റിന് വലിയ സ്വീകാര്യതയാണ് ഉണ്ടായത്. അതിങ്ങനെയാണ്:

കൈവേറെ കാൽ വേറേ 
ഉടൽ വേറേ തലവേറെ 

ചത്ത ദൈവങ്ങ-
ളടിഞ്ഞു കേറിയെൻ

സ്വസ്ഥതീരം നിറഞ്ഞു 

യുദ്ധമായിരുന്നോ കടലിൽ 

ആരെന്റെ ദൈവത്തെ 

പീസുപീസാക്കി?

- കുരീപ്പുഴ ശ്രീകുമാർ 

കൃപാസനസ്ഥരുടെ ദിവ്യാനുഭവങ്ങൾ

 കൃപാസനസ്ഥരുടെ ദിവ്യാനുഭവങ്ങൾ

-------------------------------------------------------

ഡോ. എ.ടി.കോവൂരിന്റെ ഡയറിക്കുറിപ്പുകളിലൂടെ കേരളീയസമൂഹത്തെ അന്ധവിശ്വാസവിമോചനത്തിന്റെ പാതയിലെത്തിച്ചത് കാമ്പിശ്ശേരി പത്രാധിപരായിരുന്ന ജനയുഗം വാരികയായിരുന്നു. പിന്നീട് പ്രഭാത് ബുക്ക് ഹൗസ് പുസ്തകമാക്കിയപ്പോൾ കേരളീയയുവത്വം അത് സ്വന്തമാക്കാൻ മത്സരിക്കുകയായിരുന്നു. ആ പുസ്തകം കേരളീയരിലുണർത്തിയ സത്യാന്വേഷണാവേശം അത്ഭുതകരമായിരുന്നു. അക്കാലത്ത് റിലീസ് ചെയ്ത പുനർജ്ജന്മം എന്ന സിനിമ, ഡോ.എ.ടി.കോവൂരിന്റെ ഡയറിക്കുറിപ്പിനെ അവലംബിച്ചായിരുന്നു. ഇന്നും പ്രസക്തമായ ഒരു മനഃശാസ്ത്രപ്രമേയമായിരുന്നു അതിന്റെ ഉള്ളടക്കം. നിഴലിനു നാഡീസ്പന്ദനമുണ്ടോ നിഴലിനു ഹൃദയമുണ്ടോ തുടങ്ങിയ ലാവണ്യരശ്മികൾ അടങ്ങിയ ചോദ്യങ്ങൾ വയലാർ ഗാനരൂപേണ ഉയർത്തിയത് ആ ചിത്രത്തിലൂടെയായിരുന്നു. അത്തരം ശാസ്ത്രാവബോധമുള്ള പുസ്തകങ്ങളെയും മറ്റുകലാരൂപങ്ങളെയും മറികടന്നു കൊണ്ടാണ് കൃപാസനം പോലുള്ള പ്രസിദ്ധീകരണങ്ങളുടെ വളർച്ച .

കൃപാസനം വഴി, മാതാവുമായി നടത്തിയ ഉടമ്പടികൾ വലിയ ചില രാഷ്ട്രീയകാലുമാറ്റങ്ങൾക്കുവരെ ഇടയായിട്ടുണ്ടല്ലോ. ഉന്നത ഉദ്യോഗസ്ഥരും രാഷ്ട്രീയ നേതാക്കളുമെല്ലാം ആൾദൈവങ്ങളുടെ മുന്നിൽ കുമ്പിട്ടുനിൽക്കുന്ന ഈ കാലത്ത് കൃപാസനപ്രസക്തി വർധിച്ചുവരുന്നതിൽ അത്ഭുതപ്പെടേണ്ട കാര്യമില്ല. പക്ഷെ അത്, ഭരണഘടനാപരമായി ശാസ്ത്രാവബോധം വളർത്തേണ്ടുന്ന പൗരന്റെ കർത്തവ്യങ്ങളെയാണ് അപ്രസക്തമാക്കുന്നത്. ഒരു ദൈവം കൂടി എന്ന കവിതയിൽ വയലാർ പറയുന്നതുപോലെ പുതുതായി ഉദിച്ചുയരുന്ന അമാനുഷികപ്രഭാവങ്ങളുടെ വാണിജ്യരീതി അത്ഭുതപ്രകടനങ്ങളാണല്ലോ. സമീപഭൂതകാലത്ത് ജീവിച്ചുപോയ നവോത്ഥാനനായകരിൽ പോലും ഈ അത്ഭുതങ്ങൾ അടിച്ചേൽപ്പിച്ചിട്ടുണ്ട്. വിശ്വാസത്തിന്റെ തട്ടിന്മേൽ പാവപ്പെട്ട മനുഷ്യരെ കയറ്റണമെങ്കിൽ ചുരുങ്ങിയപക്ഷം അന്തരീക്ഷത്തിൽ നിന്നും ഒരു നുള്ളു ഭസ്മമെങ്കിലും എടുത്തുകാണിക്കണമെന്ന് ആത്മീയവ്യവസായികൾക്ക് നന്നായിട്ടറിയാം.

അച്ചടിമാധ്യമത്തിൽ മാത്രമല്ല, സാമൂഹികമാധ്യമങ്ങളിലും കൃപാസനം സജീവമാണ്. അന്ധവിശ്വാസം പ്രചരിപ്പിക്കാൻ വേണ്ടി അവർ ഫേസ്‌ബുക്ക്, യൂട്യൂബ് തുടങ്ങിയ മാധ്യമങ്ങൾ ഉപയോഗിക്കുകയും കേവലമതവിശ്വാസത്തിനപ്പുറത്തെ ദൈവീക അത്ഭുതങ്ങളിലേക്ക് ആളുകളെ നയിക്കുകയും ചെയ്യുന്നു. അനുഭവസാക്ഷ്യങ്ങളാണ് ചൂണ്ടയായി ഉപയോഗിക്കുന്നത്. കൃപാസനം എന്ന പ്രസിദ്ധീകരണം മതപരിവർത്തനം ലക്ഷ്യമാക്കിയുള്ളതല്ലെന്ന് അവർ ഉറപ്പിച്ചു പറയുന്നുണ്ട്. അതിനേക്കാൾ അപകടകരമാണല്ലോ സയൻസിന്റെ വെളിച്ചത്തിൽ നിന്നും മനുഷ്യനെ ഇരുട്ടിലേക്ക് മാറ്റി നിർത്തുന്നത്.

അനുഭവസാക്ഷ്യങ്ങൾ ശ്രദ്ധിച്ചാൽ, കേരളത്തിൽ ആശുപത്രികളും കോടതികളും ഒന്നും വേണ്ടെന്നു തോന്നിപ്പോകും. ആശുപത്രികൾ ഇന്ന് വ്യവസായസ്ഥാപനങ്ങൾ ആണെന്നും രോഗികളെ പിഴിഞ്ഞ് പണമുണ്ടാക്കുകയാണ് ലക്ഷ്യമെന്നും, ഈ സ്ഥാപനങ്ങളുടെ ഉടമകൾ ദൈവാത്ഭുതങ്ങൾ പ്രചരിപ്പിക്കുന്നവർ ആണെന്നുമുള്ളത് പരസ്യമായകാര്യമാണല്ലോ. രോഗങ്ങൾ മാത്രമല്ല, ഏത് ആഗ്രഹങ്ങളും മാതാവുമായി കൃപാസനം വഴിയുള്ള ഉടമ്പടിയിലൂടെ നടത്തിക്കിട്ടുമത്രേ. കൃപാസനത്തിന്റെ ഒരു ലക്കത്തിൽ, ഒരു അമേരിക്കൻ മലയാളി വനിത പറഞ്ഞിട്ടുള്ളത്, ഈ ഉടമ്പടിയിലൂടെയാണ് അവർക്ക് അമേരിക്കയിൽ ജോലികിട്ടിയത് എന്നാണ്! കൃപാസനത്തിലെ ഉടമ്പടിയെടുത്ത് വെഞ്ചരിച്ച നേർച്ചവസ്തുക്കൾ ഉപയോഗിച്ച് പ്രവർത്തിച്ചപ്പോൾ കുട്ടികളുണ്ടായ അനുഭവം ഒന്നിലധികം ആളുകൾ സാക്ഷ്യപ്പെടുത്തിയിട്ടുണ്ട്. ഷാർജയിലെത്തിയ കൃപാസനവികാരിയെ കണ്ടുപ്രാർത്ഥിച്ചപ്പോൾ കൊള്ളാവുന്ന ജോലിലഭിച്ചെന്നും ബാങ്കിൽ നിന്നെടുത്ത വായ്പയുടെ അടവുതുക കുറച്ചുകിട്ടിയെന്നും മുട്ടിൽ നിന്നു കരഞ്ഞുകൊണ്ട് വിശ്വാസപ്രമാണം ചൊല്ലി പ്രാർത്ഥിക്കുകയും വെഞ്ചരിച്ച ഉപ്പും ഉടമ്പടിത്തൈലവും പുരട്ടുകയും ചെയ്തപ്പോൾ കൊഴിച്ചിൽ മാറി സമൃദ്ധമായി മുടി കിളിർത്തെന്നുമൊക്കെ പലരും ഇതിനകം സാക്ഷ്യപ്പെടുത്തിയിട്ടുണ്ട്. ഈ വിശ്വാസങ്ങൾ മൂത്തുമൂത്ത്, കൃപാസനത്തിലിരുന്നാൽ മൂലക്കുരു മാറുമെന്നുവരെ പ്രചരിപ്പിക്കപ്പെടുന്നുണ്ട്. ഇത്തരം ദൈവമാജിക്കുകളുടെ ഉറവിടം ഫഹദ് ഫാസിൽ അഭിനയിച്ച ട്രാൻസ് എന്ന സിനിമയിൽ തുറന്നു കാട്ടുന്നുണ്ട്.

ഇങ്ങനെയുള്ള ദൈവികഅത്ഭുതങ്ങളിലൂടെ രോഗങ്ങൾ മാറുകയും കേസുകൾ തീർപ്പാക്കപ്പെടുകയും ചെയ്യുന്നത് അസാധ്യമാണെന്നാണ് ഡോ.എ.ടി. കോവൂർ അദ്ദേഹത്തിന്റെ ജീവിതത്തിൽ ഉടനീളം നടത്തിയ അന്വേഷണങ്ങളിലൂടെ തെളിയിച്ചിട്ടുള്ളത്. നമ്മൾ പിന്തുടരേണ്ടത് സയൻസിന്റെ മാർഗമാണ്. അന്ധവിശ്വാസത്തിന്റെ മാർഗ്ഗങ്ങളല്ല.

സ്നേഹലത റെഡ്ഡിയും മിസയും

സ്നേഹലത റെഡ്ഡിയും മിസയും ------------------------------------------------ 1947 നു ശേഷം ഇന്ത്യ കണ്ട ഏറ്റവും ക്രൂരമായ കാലമായിരുന്നു അടിയന്തരാവസ്ഥക്കാലം. ജയപ്രകാശ് നാരായണനെ പോലെയുള്ള സമാദരണീയരായ രാഷ്ട്രീയനേതാക്കൾ മാത്രമല്ല, കലാ സാഹിത്യരംഗത്തു പ്രവർത്തിച്ചവർപോലും ഭരണകൂടത്താൽ ആക്രമിക്കപ്പെടുകയും അപമാനിക്കപ്പെടുകയും ചെയ്തു. കേരളത്തിൽ പാട്ടുപാടിയ കുറ്റത്തിന് ഉരുട്ടിക്കൊലയ്ക്ക് വിധേയനാക്കപ്പെട്ട രാജനും കവിതയെഴുതിയ കുറ്റത്തിന് ജയിലടക്കപ്പെട്ട എം.കൃഷ്ണൻ കുട്ടിയും കഥാപ്രസംഗം നടത്തിയ കുറ്റത്തിന് തുറുങ്കിലടക്കപ്പെട്ട വി.സാംബശിവനും എല്ലാം അടിയന്തരാവസ്ഥയുടെ ഇരകളായിരുന്നു. വിവിധതരത്തിലുള്ള പീഡനങ്ങളാണ് അന്ന് പോലീസ് നടത്തിയിരുന്നത്. കൊല്ലത്തെ കൈലാസ് ഗോപാലകൃഷ്ണൻ അടക്കമുള്ള ഗാനമേളസംഘാംഗങ്ങളെ പിടികൂടി, ശബ്ദവും വാദ്യവുമില്ലാതെ ഗാനമേള നടത്തിപ്പിക്കുകയായിരുന്നു. മുടി നീട്ടിവളർത്താനുള്ള സ്വാതന്ത്ര്യം പോലും അന്ന് നിഷേധിക്കപ്പെട്ടു, അഷ്ടമുടിക്കായലിൽ ഒളിവിൽ കഴിഞ്ഞതുകൊണ്ടു മാത്രമാണ് ഞാനടക്കമുള്ള അന്നത്തെ യുവാക്കൾ പിടിക്കപ്പെടാതിരുന്നത്. ഇന്നത്തെപ്പോലെയുള്ള ഗതാഗതസൗകര്യങ്ങൾ അന്നില്ലാതിരുന്നതിനാൽ പൊലീസിന് എല്ലാ ഭാഗത്തും എത്താൻ കഴിഞ്ഞിരുന്നില്ല. അന്നത്തെ കൊടിയ പീഡനങ്ങളാൽ ഇന്ത്യക്ക് നഷ്ടപ്പെട്ടുപോയ അതുല്യ കലാകാരിയാണ് സ്നേഹലതാ റെഡ്ഢി. അവർ ഡോ.രാം മനോഹർ ലോഹ്യയുടെയും ജയപ്രകാശ് നാരായണന്റെയും മറ്റും സോഷ്യലിസ്റ്റ് ആശയങ്ങളിൽ ആകൃഷ്ടയായിരുന്നു. സോഷ്യലിസ്റ്റു നേതാവായിരുന്ന ജോർജ്ജ് ഫർണാണ്ടസിന്റെ അനുയായി എന്നനിലയിൽ ബറോഡ ഡൈനാമിറ്റ് കേസിൽ ഈകലാകാരിയെ അറസ്റ്റു ചെയ്തു കർണ്ണാടകത്തിലെ ജയിലിലടച്ചു. കലാകാരി എന്ന നിലയിൽ വലിയ ജനശ്രദ്ധ ഇക്കാലത്തിനിടയിൽ സ്നേഹലത ആര്ജ്ജിച്ചിരുന്നു. യു.ആർ.അനന്തമൂർത്തിയുടെ സംസ്ക്കാര എന്ന, ജാതീയതയുടെ പൊള്ളത്തരങ്ങളെ തുറന്നുകാട്ടുന്ന നോവൽ സിനിമയായപ്പോൾ അതിലെ അഭിസാരികാകഥാപാത്രമായ ചന്ദ്രിയെ അവതരിപ്പിച്ചത് സ്നേഹലതയായിരുന്നു. ആ ചിത്രത്തിന് ഏറ്റവും മികച്ച കന്നഡ സിനിമയ്ക്കുള്ള പ്രസിഡന്റിന്റെ പുരസ്‌ക്കാരവും ലഭിച്ചിരുന്നു. മദ്രാസ് പ്ലെയേഴ്‌സിന്റെ നാടകങ്ങളിലൂടെയും അവർ ശ്രദ്ധിക്കപ്പെട്ടു. കലാകാരിയെന്ന നിലയിലുള്ള ഒരു പരിഗണനയും സ്നേഹലതയ്ക്ക് ജയിലിൽ ലഭിച്ചില്ല. അടിയന്തരാവസ്ഥയിലെ കരിനിയമമായ മിസ അനുസരിച്ച് തടവിലാക്കപ്പെട്ട അവരെ ക്രൂരമായി പോലീസ് പീഡിപ്പിച്ചു. പുറംവസ്ത്രങ്ങൾ ബലമായി അഴിച്ചുമാറ്റുകയും ആ ദുർബ്ബലസ്ത്രീ ശരീരത്തിലേക്ക് മർദ്ദനമുറകൾ അഴിച്ചുവിടുകയും ചെയ്തു. ശ്വാസകോശസംബന്ധമായ രോഗങ്ങളുണ്ടായിരുന്ന സ്നേഹലതയ്ക്ക് അമിതമായി ഔഷധം നൽകിയും, വേണ്ടത്ര പോഷകാഹാരങ്ങൾ നൽകാതെയും പീഡിപ്പിച്ചു. കസ്റ്റഡിയിൽ വച്ച് മരിക്കുമെന്ന് ഉറപ്പായപ്പോൾ പുറത്തുവിട്ടു. ദിവസങ്ങൾക്കുള്ളിൽ അവർ മരിച്ചു. സ്നേഹലതാറെഡ്ഢി, ഫാസിസ്റ്റു ഭരണകൂടത്തിനെതിരെ പോരാടിമരിച്ച കലാകാരിയാണ്. ഇന്ത്യൻ പോരാളികൾ അവരുടെ രക്തസാക്ഷിത്വത്തെ മാർഗ്ഗതാരകമായി കണക്കാക്കുന്നു. സ്നേഹലതാറെഡ്ഢിയുടെ ജീവിതമാണ് കോഴിക്കോട്ടെ ഫ്‌ളോട്ടിങ് തിയേറ്റർ അവതരിപ്പിക്കുന്ന മിസ ദി ലാസ്റ്റ് ബ്രീത്ത് എന്നനാടകം. അച്ഛനും മകളുമൊക്കെ ഫ്ലോട്ടിംഗ് തിയേറ്ററിന്റെ പ്രവർത്തകരാണ്. ബിച്ചൂസ് ചിലങ്കയാണ് മിസ എഴുതി സംവിധാനം ചെയ്തിട്ടുള്ളത്. ചിന്നു ചിലങ്ക എന്ന നടിയാണ് സ്നേഹലതയായി രംഗത്തെത്തുന്നത്. ഈ നാടകത്തിലെ അർദ്ധനഗ്നയായി മർദ്ദിക്കുന്ന ചിലരംഗങ്ങൾ ആഭാസമായിയെന്ന അർത്ഥത്തിലുള്ള സൈബർ ആക്രമണങ്ങൾ ഉണ്ടായിരിക്കുകയാണ്. കലയെ കുറിച്ച് ഒരു ധാരണയുമില്ലാത്തവരാണ് സദാചാരത്തിന്റെ ആട്ടിൻ തോലിട്ടു രംഗത്തെത്തിയിട്ടുള്ളത്. സ്നേഹലതയുടെ ജയിലനുഭവങ്ങൾ മലയാളത്തിൽ പ്രസിദ്ധീകരിച്ചിട്ടുണ്ട്. അതെങ്കിലും വായിച്ചിട്ടുള്ളവർ ഈ നാടകാവതരണത്തെ എതിർക്കുകയില്ല. മതപുസ്തകങ്ങൾ മാത്രമാണ് ശരിയെന്നു കരുതുന്നവർ, ശ്രീ പദ്മനാഭസ്വാമി ക്ഷേത്രത്തിലെ രതിശില്പങ്ങളെ ഗൂഢമായി ആസ്വദിക്കുന്നവരാണ്. ലിംഗവും ഭഗവും പോലും അവർക്ക് ആരാധനാവസ്തുക്കളാണ്. അവർ, മിസ് യൂണിവേഴ്‌സിന്റെ വസ്ത്രധാരണരീതിയെ ആസ്വദിക്കുന്നവരാണ്. അതൊക്കെ ആസ്വാദ്യകരമാണെങ്കിൽ ഒരു തരത്തിലുള്ള രതിബോധവും സൃഷ്ടിക്കാത്ത സ്നേഹലതാറെഡ്ഢി എന്ന കഥാപാത്രത്തെ അവതരിപ്പിച്ച നടിയെ ആദരിക്കുകയും അഭിനന്ദിക്കുകയും ചെയ്യേണ്ടതാണ്.നാടകത്തിന്റെ ഒടുവിൽ ഉയർത്തപ്പെടുന്നചോദ്യം അടിയന്തരാവസ്ഥ അവസാനിച്ചുവോ എന്നതാണ്. ഇന്ന് വളരെ പ്രസക്തമാണ് ആ ചോദ്യം.