കൂലി

മരിച്ചവരുടെ കോന്തലയില്‍ 

കടത്തുകൂലിയായി 

നാണയം  കെട്ടിവച്ചാല്‍ പോര.

കടവിലെല്ലാം പാലമായി.

കുറെ ഗാന്ധിത്തലകള്‍ 

കൊടുത്തയക്കണം 

ടോള്‍ കൊടുക്കാന്‍.

സ്വര്‍ഗ്ഗയാത്ര

സ്വര്‍ഗ്ഗത്തില്‍ പോകുന്നവര്‍ 

കോണ്ടം കൊണ്ടുപോകാന്‍ 

മറക്കരുത്.

പലരുമായും രമിച്ച 

സുന്ദരീസുന്ദരന്മാരാണ്‌

കരുതല്‍ വേണം.

പ്രവാസി മലയാളികള്‍ ഭാരതീയരാണ്‌

ലോകത്തെവിടെയും മരണമണി മുഴക്കുന്ന കൊറോണ എന്ന മഹാരോഗം ഓരോ ദിവസം കഴിയും തോറും സമ്പന്ന രാഷ്ട്രങ്ങളില്‍ നിയന്ത്രണാതീതമാവുകയാണ്. അതിനനുസരിച്ച് വിദേശങ്ങളില്‍ പണിയെടുക്കുന്ന കേരളീയരുടെ ജീവിതവും തുലാസ്സില്‍ തൂങ്ങുകയാണ്. ചാനലുകളില്‍ പ്രവാസി മലയാളികള്‍ പൊട്ടിക്കരഞ്ഞു കൊണ്ടാണ് അവരുടെ ആശങ്കകള്‍ പങ്കു വയ്ക്കുന്നത്.

പ്രവാസി മലയാളിയെന്നാല്‍ എല്ലാവര്ക്കും പെട്ടെന്ന് ഓര്‍മ്മ വരുന്നത് ഗള്‍ഫ് നാടുകളില്‍ പണിയെടുക്കുന്ന മലയാളികളെയാണ്.

ആടുജീവിതം മുതല്‍ ആനന്ദജീവിതം വരെയുള്ള വിവിധ ജീവിതക്രമങ്ങളില്‍ പെട്ടവരായി അവര്‍ ഒറ്റപ്പെടുന്നില്ല. കേരളത്തില്‍ നിന്നും തൊഴില്‍ തേടി പോയ മനുഷ്യര്‍,തൊഴില്‍ ചെയ്യുക മാത്രമല്ല, സാംസ്ക്കാരിക പ്രവര്‍ത്തനങ്ങള്‍ സംഘടിപ്പിക്കുക കൂടി ചെയ്തു. കേരളത്തിലെ വലിയ പാട്ടുകാരെയും നാടകക്കാരെയും പ്രഭാഷകരെയും മിമിക്രിക്കാരെയും എല്ലാം അവര്‍ അവിടെ കൂട്ടിക്കൊണ്ടു പോയി.

സൗഹൃദവും ധനവും നല്‍കി അംഗീകരിച്ചു.രാഷ്ട്രീയ പാര്‍ട്ടികള്‍ക്ക് വിയര്‍പ്പിന്റെ വില വാരിക്കോരിക്കൊടുത്തു.

ജീവകാരുണ്യ പ്രവര്‍ത്തനങ്ങളിലും അവര്‍ മുന്‍പന്തിയിലാണ്.

ഗള്‍ഫ് മേഖലയിലും അമേരിക്ക,ഓസ്ട്രേലിയ,സിങ്കപ്പൂര്‍ തുടങ്ങിയ രാജ്യങ്ങളിലും മലയാളികള്‍ സംഘടിപ്പിച്ച ക്ലബ്ബുകളും ഗ്രന്ഥശാലകളും പ്രതിമാസ സാഹിത്യ ചര്‍ച്ചകളും, വ്യാപകമായി നടത്തിയ മലയാളം ക്ലാസ്സുകളും കേരളവുമായും അത് വഴി ഭാരതവുമായുമുള്ള അവരുടെ രക്ത ബന്ധത്തെ കൂടുതല്‍ ഊര്‍ജ്ജമുള്ളതാക്കി.

എന്നാലിന്ന് പ്രവാസിമലയാളികള്‍ രോഗവും അരക്ഷിതാവസ്ഥയും നല്‍കിയ ഭീതിയുടെ തോക്കിന്‍ തുമ്പിലാണ്.പല രാജ്യങ്ങളില്‍ നിന്നും ശരിയായ വാര്‍ത്തകള്‍ പുറത്തേക്കു വരുന്നില്ല. ഇരുമ്പുമറ എന്ന പ്രയോഗം പണ്ട് കമ്മ്യൂനിസ്റ്റ് രാജ്യങ്ങളെ ആക്ഷേപിക്കാനുപയോഗിച്ചതായിരുന്നുവെങ്കില്‍ ഇന്ന് ആ പ്രയോഗം എല്ലാ രാജ്യങ്ങള്‍ക്കും യോജിക്കുന്നത് ആയിരിക്കുന്നു.

ഗള്‍ഫില്‍ ഒറ്റമുറിയില്‍ ഒന്‍പതു പേര്‍ ജീവിക്കുന്ന തൊഴിലിടങ്ങളുണ്ട്. ലേബര്‍ ക്യാമ്പുകളില്‍ വലിയ ഹാളില്‍ നൂറിലധികം പേര്‍ ഖുബൂസും കറിയും മാമലകള്‍ക്കപ്പുറത്ത് 

 എന്ന സിനിമാപ്പാട്ടും പാടി കഴിയുന്നുണ്ട്. ഇവരൊക്കെ സാമൂഹിക അകലം പാലിക്കാന്‍ കഴിയാതെ വിഷമിക്കുന്നുണ്ട്.

ഫ്രാന്‍സ്,ഈജിപ്റ്റ്, ഫിലിപ്പൈന്‍സ് തുടങ്ങിയ രാജ്യങ്ങളില്‍ നിന്നുള്ള നഴ്സുമാര്‍ ഒഴിവായതിനെ തുടര്‍ന്നു മലയാളി നഴ്സുമാര്‍ മാത്രം പണിയെടുക്കുന്ന ആശുപത്രികളുണ്ട്. കൊറോണ ബാധിതരെന്നു സംശയമുള്ളവരുമായി ഇടപഴകേണ്ട മറ്റു തൊഴിലാളികള്‍ ഉണ്ട്.

ഇവരുടെ ആശങ്ക അകറ്റേണ്ടത് അത്യാവശ്യമാണ്. പോകണമെന്ന് വിദേശ സര്‍ക്കാരും എവിടെയാണോ അവിടെ തുടരുക എന്ന് കുഞ്ചന്‍ നമ്പ്യാരുടെ വായു പണിമുടക്കിയ  കാലത്തെ കുറിച്ചുള്ള തുള്ളല്‍ക്കഥ പോലെ നമ്മളും പറഞ്ഞാല്‍ ആ പാവം മനുഷ്യരുടെ ആശങ്കകള്‍ ഒഴിവാകുകയില്ല.

രോഗമുള്ളവര്‍ എത്തിയാല്‍ നിരീക്ഷിക്കാനും ചികിത്സിക്കാനും ഉള്ള എല്ലാ സൗകര്യങ്ങളും ഉണ്ട് എന്നു കേരളം ഉറപ്പു പറയുന്നുണ്ട്. അവരെ ഇവിടെ എത്തിക്കുക എന്ന കൃത്യമാണ് കേന്ദ്രസര്‍ക്കാര്‍ ചെയ്യേണ്ടത്. കുവൈറ്റ് ആക്രമണകാലത്ത് കെ.പി.ഉണ്ണികൃഷ്ണന്‍ എന്ന കേന്ദ്രമന്ത്രി വിമാനസംവിധാനമുണ്ടാക്കി മലയാളികളെ നാട്ടിലെത്തിച്ച ചരിത്രം നമ്മുടെ മുന്നിലുണ്ട്.ഐ.കെ.ഗുജ്റാള്‍ വിദേശകാര്യചുമതല ഉണ്ടായിരുന്ന കാലത്ത് സദ്ദാം ഹുസൈനുമായി നേരിട്ടു ചര്‍ച്ച നടത്തി മലയാളികളെ നാട്ടില്‍ എത്തിച്ചതും ചിലര്‍ക്കെങ്കിലും ഓര്‍മ്മയുണ്ടാകും. 

രോഗബാധിതരെ വിമാനത്തില്‍ കൊണ്ട് വരികയും നാട്ടിലെത്താന്‍ തിടുക്കപ്പെട്ടു നില്‍ക്കുന്ന രോഗമില്ലാത്തവരെ കപ്പല്‍ മാര്‍ഗം എത്തിക്കുകയും ചെയ്യാമല്ലോ എന്നൊരു നിര്‍ദ്ദേശം ചില മലയാളികള്‍  മുന്നോട്ടു വയ്ക്കുന്നുണ്ട്‌. കപ്പലില്‍ നാട്ടിലെത്താന്‍ പതിനാലു ദിവസമാണ് വേണ്ടത്. അപ്പോഴേക്കും അവരുടെ നിരീക്ഷണ കാലയളവ്‌ അവസാനിക്കുകയും ചെയ്യും.

ഗള്‍ഫ് മലയാളികള്‍ അധ്വാനിക്കുന്നത് ഗള്‍ഫ് രാജ്യങ്ങള്‍ക്ക് വേണ്ടിയാണ്. കിട്ടുന്ന കൂലിയില്‍ കുറച്ചു തുക മാത്രമാണ് ജന്മനാട്ടിലേക്ക് അവര്‍ അയക്കുന്നത്. ബാക്കിയെല്ലാം അവിടെ ചെലവഴിക്കുന്നവരാണ്. അവരെ വിയര്‍പ്പിന്റെ ഫലമായി ഉണ്ടാകുന്ന രമ്യ ഹര്‍മ്മ്യങ്ങളും നിരത്തുകളും പൂന്തോട്ടങ്ങളും അടുക്കളയില്‍ വേവുന്ന കറികളും ഓടിക്കുന്ന വണ്ടികളും എല്ലാം സ്നേഹധനരായ അറബികളുടെതാണ്. അതിനാല്‍ ഗള്‍ഫ് ഭരണകൂടത്തിന്റെ ഉത്തരവാദിത്തം വളരെ വലുതാണ്‌.

പ്രവാസി മലയാളികള്‍ അഭിമാനികളായ ഭാരതീയരാണ്‌.വക്കം ഖാദറിന്റെയും ക്യാപ്റ്റന്‍ ലക്ഷ്മിയുടെയും പാരമ്പര്യമുള്ളവര്‍. അവരുടെ ആശങ്ക അകറ്റുവാനുള്ള ഭാരത സര്‍ക്കാരിന്റെ ഉത്തരവാദിത്തവും വളരെ വലുതാണ്‌.

- കുരീപ്പുഴ ശ്രീകുമാര്‍ 

യുദ്ധതന്ത്രം

തന്ത്രപൂര്‍വ്വം തിരിച്ചു പോയാലോ
വന്ന വാക്കിലെ മൈനുകള്‍ പൊട്ടും

തന്ത്രപൂര്‍വ്വം പിടിച്ചു നിന്നാലോ
നെഞ്ചിലേക്ക് തീയുണ്ടകള്‍ പായും

തന്ത്രപൂര്‍വ്വം സ്വയം വധിച്ചാലോ
ജന്മഭൂവിലവാസ്തവം ചൊല്ലും

തന്ത്രമെന്തിനി, യുദ്ധരംഗത്തെ
ബോമ്മയാം ഭടന്‍ വിശ്വാസിയായി

ശത്രുവിന്‍ യന്ത്രത്തോക്കു ഗര്‍ജ്ജിച്ചു
വിശ്വസിച്ചോനരക്ഷിതനായി.

കൊറോണക്കാലത്തെ മരണങ്ങള്‍

ആരോഗ്യമേഖലയിലും സുരക്ഷാമേഖലയിലും പ്രവര്‍ത്തിക്കുന്നവരും  സന്നദ്ധസൈനികരും ഒഴിച്ച് എല്ലാവരും വീട്ടിലിരിപ്പാണ്. വായന,അടുക്കളപ്പണി, ചെറു കൃഷിപ്പണി,വീട്ടിലെ  ബാലലോകവുമായുള്ള ഇടപെടല്‍ ഇതൊക്കെയുണ്ടെങ്കിലും എല്ലാവരും ദു:ഖിതരാണ്. 

നമുക്ക് നേരിട്ട് പരിചയമില്ലാത്ത എത്രയോ സഹോദരരാണ് വിവിധരാജ്യങ്ങളിലായി മരിച്ചത്.നമുക്കേറെ പ്രിയപ്പെട്ട നെരൂദയുടെയും ദാന്തെയുടെയും  കവാബത്തയുടെയും ഷെല്ലിയുടെയും മറ്റും ഭാഷ സംസാരിക്കുന്നവര്‍. എത്രയോ ദു:ഖകരമായ അനുഭവമാണിത്.

നേരിട്ട് പരിചയം ഉണ്ടായിരുന്ന പലരും ചെന്നെത്താവുന്ന ദൂരത്തില്‍ പല അസുഖങ്ങളാല്‍ മരിച്ചു. അവിടെയും ഒന്ന് പോകാന്‍ കഴിയുന്നില്ല.

കൊല്ലത്ത്, ഇസ്ലാം മതം വേണ്ടെന്നു വച്ച് പത്രപ്രവര്‍ത്തകനായ തുളസിയുമായി ചേര്‍ന്നു കുടുംബജീവിതം വിജയകരമായി നയിച്ച ലൈലയുടെ മരണം.കോട്ടാത്തല സുരേന്ദ്രനും തെങ്ങമം ബാലകൃഷ്ണനും കെ.തങ്കപ്പനും തോപ്പില്‍ രവിയും കെ.പി.അപ്പനും ഡോ.ബലരാമനും അന്ത്യവിശ്രമം കൊള്ളുന്ന കൊല്ലം പൊതു ശ്മശാനത്തില്‍ മതപരമായ ചടങ്ങുകളില്ലാതെ സംസ്ക്കരിച്ചപ്പോള്‍ മാത്രമാണ് അവിടെ എത്താന്‍ കഴിഞ്ഞത്.പിന്നീട് കര്‍ശനമായ വീട്ടുസുരക്ഷയില്‍.

ജനകീയ ചിത്രകാരന്‍ കെ.പ്രഭാകരന്‍റെ മരണം. ചിന്ത രവിയുടെ സഹോദരനെന്ന നിലയിലല്ല, ആശയപരമായി ഒരേ തൂവല്‍ പക്ഷികളെന്ന നിലയിലായിരുന്നു പ്രഭാകരനുമായുള്ള അടുപ്പം.കൊല്‍ക്കത്ത, കോഴിക്കോട് തുടങ്ങിയ സ്ഥലങ്ങളില്‍ വച്ച് കണ്ടപ്പോള്‍ ആ നനുത്ത സ്നേഹത്തിന്‍റെ പൊട്ടാത്ത വേരുകള്‍ അറിഞ്ഞതാണ്. അദ്ദേഹവും ജീവിത പങ്കാളിയായ കബിതാ മുഖര്‍ജിയും ചിത്രകലയുടെ ക്യാന്‍വാസില്‍ വരഞ്ഞിട്ട വ്യത്യസ്ത ബിംബങ്ങള്‍ ഓര്‍ത്ത് കൊണ്ട് ഫേസ്ബുക്കില്‍ ഒരു പോസ്റ്റ് ഇടാനെ കഴിഞ്ഞുള്ളു.

കഥാകൃത്തും പ്രസംഗകനും ലേ ഔട്ട്‌ ആര്‍ട്ടിസ്റ്റും ഒക്കെയായ ബേബി തോമസിന്റെ മരണം. എണ്‍പതുകളില്‍ കാഞ്ഞിരപ്പള്ളിയില്‍ നിന്നും തുടങ്ങിയ എലുക എന്ന കുഞ്ഞുമാസികയാണ് അദ്ദേഹത്തെ സാംസ്ക്കാരിക ലോകവുമായി അടുപ്പിച്ചത്. അദ്ദേഹവുമായി ചേര്‍ന്ന് കുറെ    കാര്യങ്ങള്‍ ചെയ്യാന്‍ കഴിഞ്ഞതില്‍ പ്രധാനം പി.കെ റോസിയെ കുറിച്ചുള്ള അന്വേഷണമാണ്. തലസ്ഥാനനഗരം അവഗണിച്ച വെട്ടിയാര്‍ പ്രേം നാഥ്, കവിയൂര്‍ മുരളി,കല്ലട ശശി, ഭവാനി പ്രേംനാഥ് തുടങ്ങിവയവരെ ഓര്‍മ്മിക്കാന്‍ വേണ്ടി നടത്തിയ സമ്മേളനങ്ങള്‍. മതത്തെ തള്ളിക്കളഞ്ഞ ബേബിച്ചന്റെ മൃതശരീരം ആ വഴിയേ മുന്‍പേ സഞ്ചരിച്ച അബു എബ്രഹാം അടക്കമുള്ളവരെ യാത്രയാക്കിയ  ശാന്തികവാടത്തില്‍ സര്‍ക്കാരിന്റെ കര്‍ശന നിയന്ത്രണത്തില്‍ സംസ്ക്കരിക്കുകയായിരുന്നു.

മലയാളത്തിന്റെ എക്കാലത്തെയും പ്രിയകവി വയലാര്‍ രാമവര്‍മ്മയുടെ ജീവിതത്തിലെ ഏതു മുഹൂര്‍ത്തത്തെ കുറിച്ചും ഏതു കവിതയെ കുറിച്ചും അറിയാവുന്ന ഒരാള്‍  അത് സാഹിത്യകാരന്മാരോ പ്രൊഫസര്‍ മാരോ ആയിരുന്നില്ല. ആലപ്പുഴയിലെ കമ്മ്യൂനിസ്റ്റ് നേതാവായിരുന്ന ടി.പുരുഷോത്തമന്‍ ആയിരുന്നു. എല്ലാ വര്‍ഷവും ഒക്ടോബര്‍ 27നു വയലാറില്‍ അദ്ദേഹം നടത്തിയിരുന്ന മണിക്കൂറുകള്‍ നീണ്ട വയലാര്‍ കാവ്യപ്രസംഗം അത്ഭുതത്തോടെയാണ് സദസ്യര്‍ കേട്ടിരുന്നത്. ഈ സൗഹൃദനിഷേധിയായ കൊറോണക്കാലത്ത് വൃക്കരോഗം ബാധിച്ചു ആ സഖാവും യാത്രപറഞ്ഞു.

അങ്കമാലിയിലെ കമ്മ്യൂനിസ്റ്റ് നേതാവായ പി.ഏ. മത്തായി.രാഷ്ട്രീയ സൈദ്ധാന്തിക മേഘലയിലെ അന്വേഷകനും തൊഴിലാളി നേതാവും ആയിരുന്നു. വനിതാ കമ്മിഷന്‍ അദ്ധ്യക്ഷ എം.സി.ജോസഫിനിന്റെ ജീവിത പങ്കാളിയായ അദ്ദേഹത്തിന്‍റെ ആഗ്രഹപ്രകാരം മൃതദേഹം എറണാകുളം മെഡിക്കല്‍ കോളജിനു നല്‍കുകയായിരുന്നു. നാല്‍പ്പത്തഞ്ചു വര്‍ഷം മുന്‍പായിരുന്നു അദ്ദേഹത്തെ പരിചയപ്പെട്ടത്.അദ്ദേഹവും വീടടച്ച ഈ കൊറോണക്കാലത്ത് ഹൃദ്രോഗം മൂലം വിട പറഞ്ഞു.

എത്ര നഷ്ടങ്ങള്‍.എത്ര ദുഃഖങ്ങള്‍.മരിച്ചവരുടെ മുഖം അവസാനമായി കാണാന്‍ കഴിയാതെ മുറികളിലിരുന്നു വിങ്ങിപ്പൊട്ടിയവര്‍.കൊറോണ തന്ന പാര്‍ശ്വദുഃഖങ്ങള്‍ അനവധിയാണ്.

മനുഷ്യപ്പാട്ട്
--------------------
https://www.youtube.com/watch?v=imAPQoOchPc&feature=share&fbclid=IwAR3ZkrWEoIaLJHFC12kQwcxP7TO2BGvwdgQYruuQ3J5EQznG2ML80lDxlr8

മിശ്രവിവാഹം അഭിമാനകരം

മിശ്രവിവാഹം അധികവും സംഭവിക്കുന്നത് പ്രണയത്തിന്റെ സ്വാധീനം മൂലമാണ്. പ്രകൃതിയില്‍ ജാതിയും മതവും ഒന്നും ഇല്ലാത്തതിനാല്‍ ജാതിമതങ്ങള്‍ക്ക് അതീതമായി പ്രണയം സംഭവിക്കും. അത് വിവാഹത്തില്‍ കലാശിക്കുകയും ചെയ്യും.വിവാഹത്തില്‍ കലാശിക്കുമ്പോഴാണ്‌ ജാതിയും മതവും വാളും  കത്തിയുമായി എത്തുന്നത്. നിന്നെപ്പോലെ നിന്റെ അയല്‍ക്കാരനെയും സ്നേഹിക്കണമെന്ന വാചകമേളയൊക്കെ സിമിത്തേരിയില്‍ മറവു ചെയ്യപ്പെടും.

ആദ്യമൊക്കെ പിന്തിരിപ്പിക്കാന്‍ നോക്കും. മാതാപിതാക്കളുടെ ആത്മഹത്യാ ഭീഷണിവരെ ഉണ്ടാകും. എന്നിട്ടും പിരിയുന്നില്ലെങ്കില്‍ മതം മാറ്റാനുള്ള പ്രലോഭനങ്ങള്‍ ആരംഭിക്കും. പ്രണയികള്‍ക്ക് മതത്തെക്കാള്‍ വലുത് പ്രണയം ആയതിനാല്‍ മതം മാറ്റത്തെ പുല്ലുപോലെ സ്വീകരിച്ച് അവര്‍ പ്രണയസാഫല്യം നേടും.

അറിയാതെ പെട്ടുപോയ ജാതിയില്‍ നിന്നും മതത്തില്‍ നിന്നും ജീവിത പങ്കാളിയെ സ്വീകരിക്കുല്ലെന്നു ഉറപ്പിച്ച ചിലരുണ്ട്.അവര്‍ വളരെ ശ്രദ്ധയോടെ വിജാതീയ വിവാഹം നടത്തുക തന്നെ ചെയ്യും.

പ്രണയികളോട് മതം ക്രൂരമായാണ് പെരുമാറുന്നത്. കൊല്ലാനും അവര്‍ മടിക്കില്ല. കാസര്‍കോട്ടെ ബാലകൃഷ്ണനെ കൊന്നത് ഇന്നും ജനങ്ങള്‍ മറന്നിട്ടില്ല. മലപ്പുറം, കോട്ടയം ജില്ലകളില്‍  സമീപകാലത്തുണ്ടായ  ദുരഭിമാന നരഹത്യ കേരളത്തിന്റെ മുഖത്ത് പുരണ്ട ചോരയാണ്.

മിശ്രവിവാഹം അഭിമാനകരമാണ്. ഒരിക്കല്‍ എറണാകുളത്ത്  മിശ്രവിവാഹിതരുടെ ഒരു യോഗത്തില്‍ പങ്കെടുക്കാനിടയായി. എറണാകുളം ജില്ലയിലെ അന്നത്തെ വനിതാ കളക്ടറും ജില്ലാ പോലീസ് മേധാവിയുമാണ് വിശിഷ്ട അതിഥികളായി പങ്കെടുത്തത്. മിശ്രവിവാഹിതര്‍. മാത്രമല്ല ഞങ്ങള്‍ മിശ്രവിവാഹിതര്‍ ആണെന്ന് അവര്‍ അഭിമാനത്തോടെ അവിടെ പറയുകയും ചെയ്തു.

അതെ. മിശ്രവിവാഹം അഭിമാനകരമാണ്. അന്തസ്സോടെ തല ഉയര്‍ത്തിനിന്നു പറയാവുന്ന കാര്യം.

ഐതിഹ്യത്തിലെ കേരളത്തിന്‍റെ വംശപരമ്പര വരരുചിയുടെ മിശ്രദാമ്പത്യത്തില്‍ നിന്നും ആരംഭിക്കുന്നു. കഥ അങ്ങനെയുണ്ടെങ്കിലും കേരളം ജാതിപ്പിശാചിന്റെ കരാളഹസ്തത്തില്‍ പെടുകയും ജാതിയും മതവും മാറിയുള്ള വിവാഹം അനുവദിക്കാത്ത ഒരു സമൂഹമായി മാറുകയും ചെയ്തിരുന്നു. മനുഷ്യവിരുദ്ധവും പ്രകൃതി വിരുദ്ധവുമായ ഒരു അപമാനിത കേരളം. മിതവാദി കൃഷ്ണന്‍, പോത്തേരി കുഞ്ഞമ്പു തുടങ്ങിയവര്‍ സ്വന്തം കുടുംബങ്ങളില്‍ മിശ്രവിവാഹം അനുവദിച്ചുകൊണ്ട്  മാറ്റത്തിന്‍റെ പച്ചക്കൊടി പറപ്പിച്ചു. ഇന്ന് ലക്ഷക്കണക്കിന്‌ മിശ്രവിവാഹിതരാണ് കേരളത്തില്‍ ഉള്ളത്.

സമുന്നത രാഷ്ട്രീയ പ്രതിഭകളായ ടി.വി. തോമസ്സും കെ.ആര്‍.ഗൗരിയും ഏ.കെ.ഗോപാലനും സുശീലാഗോപാലനും ജോര്‍ജ്ജ്  ചടയന്‍മുറിയും  വി.വി.രാഘവനും ബിനോയ്‌ വിശ്വവും തോപ്പില്‍ ഗോപാലകൃഷ്ണനും വയലാര്‍ രവിയും   മറ്റും ഈ വഴിയേ സഞ്ചരിച്ചവരാണ്.

സമുന്നത സാഹിത്യ സാംസ്കാരിക പ്രതിഭകളായ തിരുനല്ലൂര്‍ കരുണാകരനും ഓ.വി.വിജയനും കെ.ഇ.എന്നും  ഇടമറുകും തെങ്ങമം ബാലകൃഷ്ണനും പെരുമ്പുഴ ഗോപാലകൃഷ്ണനും  കെ.ജി.എസും സക്കറിയയും മറ്റും  വഴികാട്ടികളാണ്.

മിശ്രവിവാഹിതര്‍ അനുഭവിക്കുന്ന പെട്ടെന്നുള്ള ഒരു പ്രതിസന്ധി സ്വന്തം വീടുകളില്‍ നിന്ന് പുറത്താക്കപ്പെടുമ്പോള്‍ രാപ്പാര്‍ക്കാന്‍ ഒരു കൂര എന്നതാണ്. മിശ്രവിവാഹിതര്‍ക്ക് ഒരു വര്ഷം വരെ സുരക്ഷിതമായി താമസിക്കാന്‍ സര്‍ക്കാര്‍ രക്ഷാവീടുകള്‍ ഒരുക്കുകയാണ്.ഒരു ലക്ഷം രൂപയില്‍ താഴെ വാര്‍ഷിക കുടുംബ വരുമാനമുള്ള മിശ്രവിവാഹിതര്‍ക്ക് മുപ്പതിനായിരം രൂപ സഹായധനം നല്‍കുന്നുണ്ട്.ഒരാള്‍ പട്ടികജാതിയില്‍ പെട്ട ആളാണെങ്കില്‍ എഴുപത്തയ്യായിരം രൂപയാണ് കുടുംബം സൃഷ്ടിച്ചു ജീവിക്കാനുള്ള സഹായധനം. ഉദ്യോഗസ്ഥരായ മിശ്രവിവാഹിതര്‍ക്ക് സ്ഥലം മാറ്റത്തിലും അനുകൂല പരിഗണനയുണ്ട്.

കോണ്‍ഗ്രസ് അംഗമായ പി.ടി തോമസ്സിന്റെ ചോദ്യത്തിനുള്ള മറുപടിയായി മന്ത്രി കെ.കെ.ശൈലജയാണ് ഈ വിവരം നിയമസഭയില്‍ പറഞ്ഞത്. മിശ്രവിവാഹം സമൂഹത്തിന്റെ ആരോഗ്യത്തിനു അത്യന്താപേക്ഷിതം ആകയാല്‍ കേരളത്തിന്‍റെ ആരോഗ്യവകുപ്പ് മന്ത്രിതന്നെ മറുപടി പറഞ്ഞത് നന്നായി.

കാര്യങ്ങള്‍ ഇതുകൊണ്ട് തീരുന്നില്ല. ജാതിക്കും മതത്തിനും അമിത  പ്രാധാന്യമില്ലാത്ത ഒരു സമൂഹത്തെയാണ് രാജ്യം ലക്‌ഷ്യം വയ്ക്കുന്നതെങ്കില്‍ മിശ്രവിവാഹിതര്‍ക്ക് ജോലിക്കാര്യത്തില്‍ സംവരണം നല്‍കേണ്ടതാണ്. ജാതിമതരഹിതരായി പഠിക്കുന്ന നിരവധി കുഞ്ഞുമക്കള്‍ കേരളത്തിലുണ്ട്. അവരുടെ ഭാവി സുരക്ഷിതം ആക്കേണ്ടതും ഭരണകൂടത്തിന്റെ ഉത്തരവാദിത്തമാണ്.

മിശ്രവിവാഹിതരുടെ സമ്മേളനത്തിനായി എഴുതിയ വി.കെ പവിത്രന്റെ കവിത ഇന്ന് ഇന്ന് പലരാഷ്ട്രീയകക്ഷികളും ഏറ്റു വിളിക്കുന്നുണ്ട്. ഞങ്ങളിലില്ലാ ഹൈന്ദവരക്തം/ ഞങ്ങളിലില്ലാ ഇസ്ലാം രക്തം/ ഞങ്ങളിലില്ലാ ക്രൈസ്തവ രക്തം/ ഞങ്ങളിലുള്ളത് മാനവരക്തം. ഈ മുദ്രാവാക്യം സാക്ഷാത്ക്കരിക്കണമെങ്കില്‍ 

മിശ്രവിവാഹത്തെ എല്ലാ പരിഗണനയും കൊടുത്ത് പ്രോത്സാഹിപ്പിക്കേണ്ടതുണ്ട്