പുഴയുടെ മനസ്സ്

പുഴയുടെ മനസ്സിൽ
പുരാണങ്ങൾ പുഷ്പങൾ
പഴയ വീഞ്ഞിൻ ലഹരി നുരയും നിലാവുകൾ
വിപിനക്കിനാവുകൾ
ജീവിതാസക്തികൾ
പ്രണയമധുരം നുകർന്നലയുന്ന ജിപ്സികൾ
പിതൃഗോത്രസംഗീതസാന്ദ്രമാം സന്ധ്യകൾ
രതിരയം രാകിവെളുപ്പിച്ച രാവുകൾ

പുഴയുടെ മനസ്സിൽ
വനത്തിലേക്കോടുന്ന യുവനൃപൻ
മണ്ണിന്റെ പെൺകുട്ടി, അമ്പുകൾ
കന്യകയുപേക്ഷിച്ചൊരാൺകുട്ടി
മൃത്യുവിൽ ധന്യതനേടുന്ന നൈരാശ്യരാശികൾ
കുതിരയോട്ടത്തിൽ തെറിച്ച ചെങ്കോലുകൾ
പതിരുവിളഞ്ഞു പാൽവറ്റിയ ബന്ധങ്ങൾ

പുഴയുടെ മനസ്സിൽ മഹാനാഗമസ്തകം-
കുസൃതിനൃത്തത്താൽ തളർത്തിയൊരുണ്ണിതൻ
കഥകൾ പറഞ്ഞു പോകുന്ന വാർദ്ധക്യങ്ങൾ
നെടുകെ പിളർന്ന കലപ്പകൾ, കാലങ്ങൾ
ബലിഘട്ടമണിയുന്ന പച്ചപ്പവിത്രങ്ങൾ
ഹിമപാളികൾ, ചോരയുറയുന്ന ശൈത്യങ്ങൾ

പുഴയുടെ മനസ്സിലൊരു ചക്രവര്‍ത്തി
സ്നേഹദുരിതങ്ങൾ കൽപിച്ച മണിമന്ദിരം
വെറുംജനതയുടെ രക്തമുണ്ണാറുള്ള കല്ലുകൾ
വസുദേവവീഥികൾ
പ്രളയപ്രതീക്ഷകൾ
മതിലുകെട്ടും മഞ്ഞമോഹങ്ങൾ
ഭൂമിയെ പ്രണയിച്ചവർതീർത്ത
നഗരസന്നാഹങ്ങൾ.

പുഴയുടെ മനസ്സിൽ
കൊടുങ്കാറ്റിൽ വീഴുന്ന ഭരണകൂടങ്ങൾ
മുന്നേറുന്ന രോഷങ്ങൾ
കടവത്തു മൂകനായ് നിന്ന സിദ്ധാർത്ഥന്റെ
കദനങ്ങൾ
കവി വാഴുമുടജങ്ങൾ ഉൺമകൾ
എരിതീയിലഭയമില്ലാതസ്തമിക്കുന്ന
നിലവിളികൾ
ആദിത്യഗായത്രിതൻ പൊരുൾ

പുഴയുടെ മനസ്സിലിരു കവികൾ
ശവങ്ങളായുയരുന്നു
കവിതകൾ സമയമായ്മാറുന്നു
പുഴയിൽ ഓർഫ്യൂസിന്റെ നാദം ലയിക്കുന്നു
പുതിയൊരാൾ ഓളങ്ങളിൽ താമസിക്കുന്നു
പുഴയുടെ മനസ്സിന്‍ ചരിത്രവ്യാസത്തിലെൻ
ഹൃദയവും ദു:ഖഘടികാരവും മുങ്ങുന്നു