മദ്ധ്യം

ഇനിയെനിക്കു ജീവിതം
പകുതി വെന്ത ഭുപടം

തുടരെയോടിയാടിവന്നു
കുതറിനിന്നു തീ പിടിച്ചു
നിലവിളിച്ചു കരിപുതച്ചു
പതറിവീണ വാഹനം

ഇനിയെനിക്കു ജീവിതം
സിനിമപോലെ ദാരുണം

മുഖമടച്ചു മുനയൊടിഞ്ഞു
മുറികൾ കത്തി മുടിയെരിഞ്ഞു
മിഴിയുടഞ്ഞു സിരതകർന്നു
വികൃതമായൊരാലയം

ഇനിയെനിക്കു ജീവിതം
കിണറുപോലെ ഭീതിദം

കൊടിപിടിച്ചു വിരലൊടിഞ്ഞു
നട നടന്നു നടു തളർന്നു
കനവിൽനിന്നു കയറു തിന്നു
വിഫലമായ യൗവ്വനം

ഇനിയെനിക്കു ജീവിതം
പുലിപിടിച്ച ജാതകം

അടിതകർന്നു ജനലുടഞ്ഞു
പൊടി തളിച്ചു പുകപൊതിഞ്ഞു
കനലുവീണു തൊലിചുളിഞ്ഞു
തലചെരിഞ്ഞ ഗോപുരം

ഇനിയെനിക്കു ജീവിതം
ശ്രുതിയഴിഞ്ഞ ഗീതകം

സ്വരമടഞ്ഞു ലയമൊഴിഞ്ഞു
കഠിനജീവരയമയഞ്ഞു
മൃദുലവാക്കു പെയ്തകന്നു
ശിഥിലമായ മദ്ദളം

ഇനിയെനിക്കു ജീവിതം
ഉടൽ വെടിഞ്ഞ ശീർഷകം

നരകഗോളയാത്രയർദ്ധ-
ദൂരവൂം നടന്നു തീർത്തു
വെയിൽകുടിച്ചു വഴിതിര-
ഞ്ഞമർഷമാർന്ന വിപ്ളവം

ഇനിയുമെന്റെ ജിവിതം
മരണമിട്ട പാദുകം