ഡി പി.ഇ. പി കേരളത്തിന്റെ വിദ്യാഭ്യാസരംഗത്തിന് നല്കിയ ഏറ്റവും വലിയ സംഭാവന, മലയാളം അക്ഷരങ്ങളെ മായിച്ചു കളഞ്ഞതാണ്.
മറ്റൊരു ഇടതുപക്ഷ സര്ക്കാര് വന്നാണ് മലയാളത്തിളക്കത്തിലൂടെ അക്ഷരമാലയെ തിരിച്ചു പിടിക്കാന് ശ്രമിച്ചത്.എന്നാല് ഇപ്പൊഴും മലയാള അക്ഷരമാല പാഠപുസ്തകത്തിനു പുറത്താണ്!
അതെ. ചെറുശ്ശേരിയുടെ കാലം തൊട്ടേ എഴുതിപ്പോരുന്ന അമ്മമലയാളം വീട്ടിന്റെ പിന് വേലിക്കല് വന്നുനിന്ന് അടുക്കളത്തിണ്ണയിലെങ്കിലും മഴ നനയാതെ ഒന്നു കേറിനിന്നോട്ടേ എന്നു യാചിക്കുകയാണ്.
മനുഷ്യനെയോ മൃഗത്തെയോ പക്ഷിയെയോ കൊന്നാല് കേസെടുക്കാം. ഭാഷയെ കൊന്നാല് കേസെടുക്കാന് കഴിയുമോ?
അക്ഷരങ്ങള് ക്രമേണ കുഞ്ഞുമനസ്സുകളില് പ്രവേശിച്ചുകൊള്ളും എന്ന സമീപനത്തിന് ഒരു യുക്തിയൊക്കെയുണ്ട്. അപ്പോഴും അവശേഷിക്കുന്ന ഒരു ചോദ്യം പരിചയപ്പെടാന് സാധ്യത തീരെയില്ലാത്ത അക്ഷരങ്ങളോ?
വയലാറിന്റെ സര്ഗ്ഗസംഗീതം വായിച്ചു പഠിക്കുന്ന കാലത്ത് മാത്രമേ ഝ എന്ന അക്ഷരം മനസ്സില് കയറൂ എന്നാണെങ്കില് ശാസ്ത്രീയസംഗീതം വരെ കേട്ടു പഠിച്ചു സമ്മാനം നേടുന്ന ഇക്കാലത്ത് ഇത്തരം അക്ഷരങ്ങള് മരണപ്പെടുമെന്നുറപ്പ്. എല്ലാ അക്ഷരവും എക്കാലവും ജീവിച്ചിരിക്കണമെന്ന് വല്ല നിര്ബ്ബന്ധവും വേണോ? എത്രയോ അക്ഷരങ്ങള് ഉപയോഗപ്രദം അല്ലാതാവുകയും ഉപേക്ഷിക്കുകയും ചെയ്തു. അക്കൂട്ടത്തില് ഇനിയും കുറെ ആട്ടുകല്ലുകളെയും അരകല്ലുകളെയും ഈര്ക്കില്ചൂലുകളെയും പനയോലവിശറികളെയും കൂടി വലിച്ചെറിയാമെന്ന് വച്ചാല് ഒരു മറുചോദ്യം ഉയര്ന്നു വരും.
മലയാളഅക്കങ്ങളുടെ മ്യൂസിയം സര്ക്കാര് കലണ്ടറിലും ഗൂഗിളിലുമല്ലാതെ എവിടെയെങ്കിലും ഉണ്ടോ?
ബേബിക്ലാസ്സില് വച്ച് പരിചയപ്പെടുത്തിയാല് ആ കുസൃതിക്കുടുക്കകള് ഈ ജിലേബിച്ചിത്രങ്ങള് മറക്കുമെന്നുറപ്പ്.
പ്രൈമറി ക്ലാസ്സിലെ പാഠപുസ്തകത്തിന്റെഅവസാനപേജില് ഒരു അലങ്കാരമെന്ന പരിഗണനയില് പെടുത്തിയെങ്കിലും മലയാള അക്ഷരങ്ങള് അച്ചടിക്കുന്നതില് എന്താണ് കുഴപ്പം?
വൈസ് ചാന്സലര് നിയമനം മുതല് സ്ത്രീധനദുര്മ്മരണം വരെയുള്ള എല്ലാ കാര്യങ്ങളിലും അഭിപ്രായം പറയുന്ന ആദരണീയനായ ഗവര്ണര്ക്ക് ഇക്കാര്യത്തില് എന്താണഭിപ്രായം.
അദ്ദേഹത്തിന് വായുവും വെള്ളവും കൊടുത്തു പുലര്ത്തിപ്പോരുന്ന നാട്ടുകാരുടെ അമ്മമൊഴിക്കാര്യമല്ലേ.
കേരളത്തിനു പുറത്തുനിന്നും വരുന്ന ഐ എ എസ്,ഐ പി എസ് ഉദ്യോഗസ്ഥരെല്ലാം മണിമണി പോലെ മലയാളം പറയും. ഗവര്ണ്ണറും മലയാളം പഠിച്ചു കാണുമെന്നു നമുക്ക് കരുതാം. ആ പരിഗണനയിലെങ്കിലും കുഞ്ഞുങ്ങളെ അക്ഷരം പഠിപ്പിക്കണമെന്നൊരു അഭിപ്രായപ്രകടനം അദ്ദേഹത്തില് നിന്നുണ്ടാകുമോ?
രാം ദുലാരി സിന്ഹ എന്നൊരു ഗവര്ണ്ണറെ ഒരിക്കല് കേന്ദ്രം നമുക്ക് സംഭാവന തന്നിരുന്നു. സര്ക്കാര് വിരുദ്ധപ്രതികരണങ്ങളാല് കേരളത്തിന്റെ അപ്രീതി നേടിയ ഒരു വ്യക്തിയായിരുന്നു ആ ഗവര്ണ്ണര്. സര്ക്കാരിനെ ജനങ്ങള് തെരഞ്ഞെടുക്കുന്നതും ഗവര്ണ്ണറെ മുകളില് നിന്നും ഇറക്കുന്നതും ആണല്ലോ. അവരെ ആദരണീയനായ ഇപ്പോഴത്തെ ഗവര്ണ്ണര് ഓര്മ്മിപ്പിക്കുന്നുണ്ട്. ഇങ്ങനെയൊക്കെ പറഞ്ഞാലത് ഗവര്ണ്ണര്നിന്ദയോ മറ്റോ ആകുമോ?
കേന്ദ്രത്തോടുള്ള കടപ്പാട് ഗവര്ണ്ണര്മാര്ക്ക് ഉണ്ടാവുക സ്വാഭാവികം. ബ്രിട്ടീഷ് രാജ്ഞി പണ്ട് നിയമിച്ച വൈസ്രോയിമാരെ ആണല്ലോ ഗവര്ണ്ണര്മാര് ഓര്മ്മിപ്പിക്കുന്നത്. ഗവര്ണ്ണര് നിയമനങ്ങള് രാഷ്ട്രീയ നിയമനങ്ങള് തന്നെയാണ്. .പാര്ട്ടിയുടെ സംസ്ഥാന പ്രസിഡന്റിനെ ഗവര്ണ്ണര് ആക്കാമെന്ന കീഴ്വഴക്കം തുടങ്ങിയത് കോണ്ഗ്രസ്സ് ആണ്. കെ.പി.സി.സി പ്രസിഡന്റ് കെ.കെ.വിശ്വനാഥനെ ഗുജറാത്ത് ഗവര്ണ്ണര് ആക്കിക്കൊണ്ടായിരുന്നു തുടക്കം. കോണ്ഗ്രസ്സിന്റെ ഇളയ സഹോദരസംഘടനയായ ബി.ജെ.പിയും അവരുടെ സംസ്ഥാന പ്രസിഡന്റുമാരെ ഗവര്ണ്ണര്മാര് ആക്കിക്കൊണ്ട് ആ മാതൃക പിന്തുടര്ന്നുവെന്നേയുള്ളൂ.
കേന്ദ്രത്തിന്റെ ഇഷ്ടഭാഷകള് സംസ്കൃതവും ഹിന്ദിയുമൊക്കെയായതിനാല് ഹിന്ദി അക്ഷരമാല നിര്ബ്ബന്ധം ആക്കണമെന്നാവുമോ ഗവര്ണ്ണറുടെ അഭിപ്രായം?
ഗവര്ണറോ മുഖ്യമന്ത്രിയോ ആരെങ്കിലും ഇക്കാര്യത്തില് ഇടപെട്ട്
പാഠപുസ്തകത്തിന്റെ അവസാനതാളിലെങ്കിലും മലയാളത്തിനൊരു ഇടം കൊടുക്കേണ്ടതാണ്.
കഴിഞ്ഞ യു.ഡി.എഫ് ഭരണകാലത്ത് എസ് എസ് എല് സി ബുക്കില് നിന്നും മലയാളത്തില് പേരെഴുതാനുള്ള ഇടം ഒഴിവാക്കിയിരുന്നു. ഈ പംക്തിയിലെഴുതിയ എസ്.എസ്.എല്.സി ബുക്കില് ശ്രദ്ധയുമില്ല ശിഹാബുമില്ല എന്ന ലേഖനം മലയാളം തിരിച്ചു കൊണ്ടുവരാനൊരു കാരണമായിരുന്നു. മലയാള അക്ഷര മാലയും തിരിച്ചുവരും എന്നുതന്നെ പ്രതീക്ഷിക്കുന്നു. എന്തായാലും അക്ഷരമാല ചേര്ക്കുമെന്ന വിദ്യാഭ്യാസമന്ത്രിയുടെ വാക്ക് പാലിക്കപ്പെടട്ടെ.
കുരീപ്പുഴ ശ്രീകുമാര്
