ഫാത്തിമത്തുരുത്ത്

 ഫാത്തിമത്തുരുത്ത് 

-------------------------------

ഫാത്തിമത്തുരുത്തിലൊന്നു പോകണം 

രാത്രിവഞ്ചിയില്‍ നിലാവ് കാണണം 

പൂക്കളോടു പൂക്കളെ തിരക്കണം 

രാക്കിളിക്കു കൂട്ടുപാട്ട് പാടണം 

കായലില്‍ കിനാവുകണ്ട് പായുമാ 

പായല്‍മാലയിട്ട കൊപ്ളിമീനിനെ 

പൂനിലാ വല വിരിച്ചിണക്കുവാന്‍ 

ഫാത്തിമത്തുരുത്തിലൊന്നു പോകണം 

മുള്ളുവേങ്ങകള്‍ മഴപ്പെരുമ്പറ

മുന്നണിച്ചെടിക്കു ചൊല്ലിയാടുമ്പോള്‍ 

പട്ടണം പറന്നുകണ്ട പക്ഷിയായ് 

ഫാത്തിമത്തുരുത്തിലൊന്നു പോകണം

രോഗബാധിതര്‍ കിടന്നലറുമാ 

കൂരകള്‍ക്ക് കൈവിളക്ക് ന്ല്‍കുവാന്‍ 

ജീവിതൌഷധം നിറച്ച സ്നേഹമേ 

ഫാത്തിമത്തുരുത്തിലൊന്നു പോകണം 

അര്‍ദ്ധപട്ടിണിപ്പതാക പാറുമാ-

ദു:ഖമണ്‍പ്രദേശമാകെയൊപ്പുവാന്‍ 

നിദ്രവിട്ട ക്യാമറക്കരുത്തുമായ് 

ഫാത്തിമത്തുരുത്തിലൊന്നു പോകണം 

നൂറുനൂറു പ്രാണികള്‍ വസിക്കുമാ 

സ്നേഹരാജ്യമൊന്നടുത്തു കാണണം 

കന്യകാത്വമുള്ള കാട്  തീണ്ടണം   

ഫാത്തിമത്തുരുത്തിലൊന്നു പോകണം 

ജൈവലാസ്യവിസ്മയം  പഠിക്കുവാന്‍ 

തൈകള്‍ കാട്ടുമാംഗ്യഭാഷയേല്‍ക്കുവാന്‍ 

ചെങ്കരിക്ക് ചുണ്ടില്‍ വച്ചിരിക്കുവാന്‍ 

ഫാത്തിമത്തുരുത്തിലൊന്നു പോകണം

ക്ഷാമ വന്‍മുതലകള്‍ ജലത്തിന്‍റെ

ആടകളുരിഞ്ഞു ദ്വീപിന്‍ ജീവനെ 

വായിലാക്കും മുന്‍പൊരിക്കലെങ്കിലും

ഫാത്തിമത്തുരുത്തിലൊന്നു പോകണം

പാറിവന്ന സെപ്തംബര്‍മുകിലുകള്‍ 

നാലുദിക്കിലും കറുത്തകോട്ടയായ് 

തീക്കുടുക്കകളുടയ്ക്കുമന്തിയില്‍

ഫാത്തിമത്തുരുത്തിലൊന്നു പോകണം

പൂച്ചകള്‍, അനാഥരായ നായകള്‍ 

കാത്തിരിക്കുമീര്‍പ്പമുള്ള പൊന്തയില്‍ 

രാത്രി മഞ്ഞുമാക്സിയില്‍ വിറയ്ക്കുമ്പോള്‍  

ഫാത്തിമത്തുരുത്തിലൊന്നു പോകണം

വേനലിന്റെ മുഷ്ടിയില്‍ കയ്യോന്നികള്‍

പാനശീലവും ത്യജിച്ചുറങ്ങുമ്പോള്‍ 

കാട്ടുമുല്ല വേരുണങ്ങി വീഴുമ്പോള്‍ 

ഫാത്തിമത്തുരുത്തിലൊന്നു പോകണം

ഭൂമിയെ പുണര്‍ന്ന കുഞ്ഞുപുല്ലുകള്‍

പൂവണിഞ്ഞു തേനുറഞ്ഞു നില്‍ക്കുമ്പോള്‍

പ്രാണനില്‍ മുഖം പതിച്ച വേവുമായ്  

ഭാവനത്തുരുത്തിലൊന്നു പോകണം..

കുട്ടിത്തെയ്യം തീമല കയറുമ്പോള്‍

കുട്ടിത്തെയ്യം തീമല കയറുമ്പോള്‍ 

-------------------------------------------------------

ദൈവപ്രീതിക്കു വേണ്ടി കുട്ടികളെ ഉപയോഗിയ്ക്കുന്ന രീതി പണ്ടേ ഉണ്ട്. കുഞ്ഞുങ്ങള്‍ നിസ്സഹായരാണല്ലോ. പലതരം പീഡിപ്പിക്കലുകള്‍ മാത്രമല്ല കാളീപ്രീതിക്കുള്ള ശിശുബലിക്കും കുഞ്ഞുമക്കളെ ഇരയാക്കിയിട്ടുണ്ട്. 

 അഴകേശന്‍ എന്ന നരാധമന്‍ കാളിപ്രീതിക്കായി  ഏഴു വയസ്സുള്ള ഒരു ബാലനെ കളരിമുറ്റത്ത് കഴുത്തറുത്ത് കൊന്ന പഴയകഥ ഇലന്തൂരില്‍ നടന്ന നരബലിക്കാലത്ത് ഓര്‍മ്മിക്കപ്പെട്ടിരുന്നല്ലോ. ശിശുവധം കൂടാതെ എത്രയോ പുണ്യപീഡനങ്ങളാണ് അരങ്ങേറുന്നത്.

കവിളുകളിലൂടെയും നാവിലൂടെയും  ശൂലം കുത്തിയിറക്കിയും തീകൂട്ടി കാവടിനൃത്തം നടത്തിയും കുഞ്ഞുങ്ങളെ പീഡിപ്പിക്കുന്നത് കേരളത്തില്‍ സാധാരണമാണല്ലോ. കുത്തിയോട്ടക്കാലത്തു ചൂരല്‍ കൊണ്ട് കുഞ്ഞുങ്ങളെ മുറിവേല്‍പ്പിക്കുന്നതും വ്രതാനുഷ്ഠാനങ്ങളുടെ പേരില്‍ പട്ടിണിക്കിടുന്നതും ഭാരിച്ച പാഠ്യപദ്ധതിക്കു പുറമെ വേദപാഠങ്ങള്‍ കൂടി കുഞ്ഞുമനസ്സുകളില്‍ കുത്തിച്ചെലുത്തുന്നതും അഗ്രചര്‍മ്മം ഛേദിക്കുന്നതുമെല്ലാം മതപരമായി സാധൂകരിക്കപ്പെട്ടിട്ടുണ്ട്.

കുട്ടികളെ പീഡിപ്പിക്കുന്നത് തടയുവാന്‍ കര്‍ശനമായ നിയമവ്യവസ്ഥ നിലവിലുണ്ട്. കൂടാതെ ബാലാവകാശക്കമ്മീഷനും പ്രവര്‍ത്തിക്കുന്നുണ്ട്. ബാലാവകാശക്കമ്മീഷന്റെ മുന്നില്‍ ഇപ്പോള്‍ എത്തിയിരിക്കുന്ന ഒരു പ്രശ്നം പതിമൂന്നു വയസ്സുള്ള ഒരു ബാലനെക്കൊണ്ട് തീച്ചാമുണ്ഡിത്തെയ്യം കെട്ടിച്ചതാണ്.

തീച്ചാമുണ്ഡി അഥവാ ഒറ്റക്കോലം, അത്ഭുതവും ഭയവും ആശങ്കയും ജനിപ്പിക്കുന്ന ഒരു അനുഷ്ഠാനമാണ്. ഇതിനായി തീക്കനലുണ്ടാക്കി മലപോലെ കൂട്ടിയിടുന്നു. ഈ മേലേരിയിലൂടെ തെയ്യക്കോലം കെട്ടിയ പാവം മനുഷ്യന്‍ ഓടുകയും ചാടുകയും കിടന്നുരുളുകയും ഒക്കെ ചെയ്യുന്നതാണ്  കനലാട്ടത്തിന്റെ രീതി. കനലിലൂടെ അതിവേഗം ഓടിപ്പോയാല്‍ പാദം പൊള്ളുകയില്ല. തീനാളത്തിലൂടെ വേഗം വിരലോടിച്ചാല്‍ വിരല്‍ പൊള്ളുകയില്ലല്ലോ.പക്ഷേ പരിചയസമ്പന്നരല്ലെങ്കില്‍ അപകടം സുനിശ്ചിതം. ഒപ്പം ആളുകള്‍ നിന്നു പിടിച്ചുമാറ്റിയില്ലെങ്കില്‍  ഏത് മഹാവിഷ്ണുവിന്റെ നേരെയും ശിവനേത്രം തുറക്കും.

ഇതിനൊരു പുരാണകഥയുടെ പിന്‍ബലവുമുണ്ട്.അഗ്നിയുടെ അഹങ്കാരം ശമിപ്പിക്കുവാന്‍ മഹാവിഷ്ണു എന്ന സങ്കല്‍പ്പ കഥാപാത്രം നടത്തിയ തീക്കളിയാണത്രെ ഇത്. മഹാവിഷ്ണു നരസിംഹത്തിന്റെ വേഷംകെട്ടി ഹിരണ്യകശിപുവിനെ കൊന്നപ്പോള്‍ പരിഹസിച്ച അഗ്നിഭഗവാനുള്ള പ്രഹരശിക്ഷ. സങ്കല്‍പ്പം യാഥാര്‍ഥ്യമാക്കാന്‍ ശ്രമിച്ചാല്‍ പൊള്ളലേല്‍ക്കാനുള്ള സാധ്യത കൂടുതലാണ്. ഒരു കോപം കൊണ്ട് അങ്ങോട്ടു ചാടിയാല്‍ ഇരുകോപം കൊണ്ട് ഇങ്ങോട്ട് .പോരാമോ എന്ന കവിവാക്യമാണ് പ്രസക്തമാകുന്നത്.

ചിറക്കല്‍ കോവിലകത്തെ ചാമുണ്ഡിക്കോട്ടത്തിലാണ് എട്ടാം ക്ലാസ്സ് വിദ്യാര്‍ഥി ഒറ്റക്കോലം കെട്ടി തീയില്‍ ചാടിയത്. സാമൂഹ്യമാധ്യമങ്ങളിലും പത്രങ്ങളിലും ഇത് ചര്‍ച്ചയായപ്പോള്‍ ബാലാവകാശക്കമ്മീഷന്‍ ഇടപെട്ട് കേസെടുത്തു.

ഇതിനെതിരെ ശക്തമായി പ്രതികരിച്ചുകൊണ്ട് കാസര്‍കോട്ടുനിന്നുള്ള ലേറ്റസ്റ്റ് പത്രം മുഖപ്രസംഗം തന്നെ പ്രസിദ്ധീകരിച്ചു. കവിയും വെള്ളൂര്‍ ജവഹര്‍ ലൈബ്രറിയുടെ ഭാരവാഹിയുമായ കെ. വി പ്രശാന്തകുമാറിന്‍റെ പ്രതികരണത്തില്‍ തൃക്കരിപ്പൂരെ സജീ പണിക്കര്‍ കോറോത്തെ ശശി പണിക്കര്‍ എന്നീ തെയ്യംകെട്ട് കലാകാരന്മാര്‍ അകാലചരമം അടഞ്ഞതിനെക്കുറിച്ച് സൂചിപ്പിക്കുന്നുണ്ട്. തെയ്യക്കോലങ്ങള്‍ ഏല്‍പ്പിച്ച പരിക്കുകളായിരുന്നു കാരണം.ഈ മരണങ്ങള്‍ അനുസ്മരിച്ചുകൊണ്ട് കുട്ടിത്തെയ്യം കെട്ടലിനെ വിമര്‍ശിച്ച കവി, ഫോക് ലോര്‍, കലാഗവേഷണം എന്നൊക്കെ പറഞ്ഞ് ഈ പ്രാകൃതാചാരങ്ങളെ പ്രോത്സാഹിപ്പിക്കരുതെന്നും അഭിപ്രായപ്പെടുന്നു.

കാരക്കുളിയന്‍ തുടങ്ങിയ കഥകളിലൂടെയും മറ്റും തെയ്യംകെട്ടിലെ അപകടസാധ്യതകളെ ചൂണ്ടിക്കാട്ടിയ അംബികാസുതന്‍ മാങ്ങാട്,   കാഞ്ഞങ്ങാട്ടെ യുവകവിയും അദ്ധ്യാപകനുമായ ബാലഗോപാലന്‍ കാഞ്ഞങ്ങാട് ,   കവി ശരത് ബാബു പേരാവൂര്‍, പ്രകാശന്‍ കരിവെള്ളൂര്‍, സീതാദേവി കരിയാട്ട്,വി.കെ.അനില്‍ കുമാര്‍, ടി.പ്രേംലാല്‍ തുടങ്ങിയവരെല്ലാം കുട്ടിത്തെയ്യത്തിന്റെ തീമലകയറ്റത്തെ അപലപിച്ചിട്ടുണ്ട്.

വയനാട്ടുകുലവന്റെ ബപ്പിടല്‍ ചടങ്ങിന് വേണ്ടി മൃഗവേട്ട നടത്തുന്നതിന് എതിരെയുള്ള പ്രകൃതി സ്നേഹികളുടെ വാക്കുകള്‍ ഇനിയും അന്തരീക്ഷത്തില്‍ നിലകൊള്ളുകയാണ്. അപ്പോഴാണ് ഈ ബാലപീഡനത്തിന്റെ  അരങ്ങേറ്റവും നടക്കുന്നത്.

മനുഷ്യവിരുദ്ധവും പ്രകൃതി വിരുദ്ധവുമായ ദുരാചാരങ്ങള്‍ അനുഷ്ടിക്കാനുള്ളതല്ല,ലംഘിക്കാനുള്ളതാണ്.ദുരാചാര ലംഘനത്തിന്റെ ആള്‍രൂപങ്ങളായിരുന്ന വാഗ്ഭടാനന്ദനും സ്വാമി ആനന്ദതീര്‍ഥനും മറ്റും ജീവിച്ചിരുന്ന മണ്ണില്‍ ക്രൂരമായ അനാചാരങ്ങള്‍ ജീവിച്ചിരിക്കുന്നത് ശരിയുള്ള കാര്യമല്ല.

- കുരീപ്പുഴശ്രീകുമാര്‍ 

 രാക്കെണി

----------
മലയുടെ ചുണ്ടത്ത്‌
ബീഡിപ്പുകമേഘം
മേഘത്തുമ്പത്ത്‌
ചന്ദ്രപ്പൂവാല്‌.
താഴത്തെ പുഴയിൽ
മത്സ്യക്കമിതാക്കൾ
ചുണ്ടുകൾ മുട്ടുന്നു
കണ്ടതു വേങ്ങമരം.
വേങ്ങക്കൊമ്പത്ത്‌
രാപ്പാടിക്കൂട്ടം
പ്രണയം പാടുന്നു
ഹൃദയം പൂക്കുന്നു.
ഇരുളിൻ മറയത്ത്‌
നിറതോക്കുയരുന്നു.

കേരളത്തിന്‍റെ നിറം പച്ച

 കേരളത്തിന്‍റെ നിറം പച്ച 

----------------------------------------

കേരളത്തിന്റെയും പഞ്ചാബിന്റെയും നിറം പച്ചയാണ്. സമൃദ്ധമായ ജലസാന്നിധ്യം. എവിടേയും പച്ചനിറം. പഞ്ചാബില്‍ വയലുകളും മാവുകളും പേരമരങ്ങളും ചേര്‍ന്നാണ് പച്ച ചാര്‍ത്തുന്നതെങ്കില്‍ കേരളത്തില്‍ ഇവകൂടാതെ തെങ്ങുകളും റബര്‍മരങ്ങളും ഉണ്ട്.മാമലകള്‍ക്കപ്പുറത്ത് മരതകപ്പട്ടുടുത്ത് മലയാളമെന്നോരു നാടുണ്ട് എന്നാണല്ലോ നമ്മുടെ പൊഞ്ഞാറുപാട്ട്. കേരളത്തിന്‍റെ അവശിഷ്ട വനസാന്നിധ്യം പോലും കടുംപച്ചയുടെ വിസ്മയദൃശ്യം നല്കുന്നുണ്ട്.

ജര്‍മ്മന്‍ കാരനായ ഹെര്‍മ്മന്‍ ഗുണ്ടര്‍ട്ടിനെ അത്ഭുതപ്പെടുത്തിയതും ഈ പച്ചത്വമാണ്. അദ്ദേഹം പറഞ്ഞത്, എവിടേയും മലനിരകള്‍. എവിടേയും പച്ചപ്പ്, ഇതാണ് പറുദീസ.

ഈ പറുദീസ കണ്ട അദ്ദേഹം കേരളത്തില്‍ തന്നെ താമസിക്കുകയും മലയാളഭാഷയ്ക്ക് നിഘണ്ടുവടക്കം പല പുസ്തകങ്ങള്‍ രചിക്കാനും വേണ്ടി ഭാഷാജ്ഞാനി ആവുകയും ചെയ്തു. അര്‍ണ്ണോസ് പാതിരിമുതല്‍ ലാറി ബേക്കര്‍ വരെയുള്ളവരെ കേരളത്തിന്‍റെ പച്ചപ്പും കേരളീയരുടെ ശാന്തസ്വഭാവവും ആകര്‍ഷിച്ചു നിറുത്തി.

മലയാള കവികളില്‍ പ്രധാനിയായ മഹാകവി ചങ്ങമ്പുഴക്കു ഏറ്റവും ഇഷ്ടപ്പെട്ടനിറം പച്ചയായിരുന്നു. മഴവില്ലില്‍ പോലും പച്ചയാണ് നടുക്കുള്ളത്.മുമ്മൂന്നു നിറങ്ങള്‍ പച്ചയ്ക്ക് അപ്പുറവും ഇപ്പുറവുമായി നില്‍ക്കുകയാണ്

പച്ചയെകുറിച്ചു കെ ടി മുഹമ്മദെഴുതി കെ.രാഘവന്‍ സംഗീതം ചെയ്ത് വി.ടി.മുരളി പാടിയ പ്രസിദ്ധമായൊരു പാട്ടുമുണ്ട്. പച്ചയെന്ന പദത്തിന്റെ വിവിധ അര്‍ഥങ്ങളെ അന്വേഷിക്കുകയാണ് ആ പാട്ട്.

പച്ച സമ്മതത്തിന്‍റെ നിറമാണ്. ആ നിറം, കടന്നുവരൂ എന്നു നമ്മളെ സ്വാഗതം ചെയ്യുന്നു. 

രാജാ രവിവര്‍മ്മയുടെ അത്യാകര്‍ഷകമായ ഒരു ചിത്രം കൃഷ്ണനും രാധയുമാണല്ലോ. അതില്‍ രാധയുടെ കുപ്പായത്തിന് നല്കിയിട്ടുള്ള നിറം പച്ചയാണ്. കൃഷ്ണന് ഇഷ്ടമില്ലായിരുന്നെങ്കില്‍ രാധ ആ കുപ്പായം അണിയുമായിരുന്നില്ലല്ലോ. വീണമീട്ടുന്ന സരസ്വതിയുടെ കുപ്പായത്തിന്റെ നിറം കടുംചുവപ്പ്. മേല്‍മുണ്ട്  സമരമൊന്നും നടത്താതെതന്നെ  ദൈവങ്ങളുടെ നഗ്നത മറച്ചത് രാജാരവിവര്‍മ്മയായിരുന്നല്ലോ.

ദേശീയതലത്തില്‍ നോക്കിയാല്‍ നമ്മുടെ ദേശീയ പതാകയുടെ അടിത്തറയാണ് പച്ചനിറം അതിനു മുകളിലാണ് മറ്റ് നിറങ്ങള്‍.

വസ്തുതകള്‍ ഇങ്ങനെയൊക്കെയാണെങ്കിലും കേരളത്തിലെ ലോകസഭാതെരഞ്ഞെടുപ്പ് വേദിയില്‍ പച്ച തൊടാത്ത ഒരു  വര്‍ഗീയ രാഷ്ട്രീയ കക്ഷിയുടെ മതസംഘടനാ വിഭാഗത്തിന് പച്ച നിറം അലര്‍ജിയാണ്.

കേരളത്തില്‍ ചരിത്ര പ്രസിദ്ധമായ  വെളിനല്ലൂര്‍ ശ്രീരാമസ്വാമി ക്ഷേത്രമടക്കം പലക്ഷേത്രങ്ങളിലും തെയ്യത്തറകളിലും പള്ളികളിലും ഹിന്ദു മുസ്ലിം മൈത്രിയുടെ വലിയ തെളിവുകളുണ്ട്. ശ്രീരാമ സ്വാമി ക്ഷേത്രപരിസരത്ത്  രോഹിണി മഹോത്സവത്തിന് മുസ്ലിം സഹോദരന്മാരുടെ മത്സ്യക്കച്ചവടം പോലുമുണ്ട്.

കാര്യങ്ങള്‍ ഇങ്ങനെയൊക്കെയാണെങ്കിലും ഹിന്ദുമത തീവ്രവാദികള്‍  പച്ചനിറത്തെ മുസ്ലിങ്ങളുടെ നിറമായും ആ നിറം അനഭിലഷണീയമായുമാണ് കാണുന്നത്..

ആ വര്‍ണ്ണഭ്രാന്തിന്‍റെ തെളിവാണ് തിരുമാന്ധാംകുന്നില്‍ ഉണ്ടായത്. തിരുമാന്ധാംകുന്ന് കേരളത്തിലെ ശാലീനസുന്ദരമായ ഒരു പ്രദേശമാണ്. കൃപകൂടാതെ പീഡിപ്പിച്ചീടുന്ന നൃപന്‍ ചത്ത് ഒരു കൃമിയായ് പിറക്കുന്നു എന്ന് ഭരണാധികാരികളെ വിമര്‍ശിച്ച പൂന്താനത്തിന്റെയും ദൈവത്തിനു സ്വകാര്യമായി കേള്‍ക്കാനുള്ള സോപാനസംഗീതത്തെ എല്ലാ മലയാളികളുടെയും മുന്നിലെത്തിച്ച ഞെരളത്ത് രാമപ്പൊതുവാളിന്റെയും നന്തനാരുടെയുമൊക്കെ ഓര്മ്മ നിറഞ്ഞു നില്‍ക്കുന്ന സ്ഥലമാണ്.
അവിടെയുള്ള ചില തൂണുകളില്‍ ഈയിടെ പച്ചച്ചായം പുരട്ടി. അതോടെ തീവ്ര ഹിന്ദുമത വ്രണം വികാരപ്പെട്ടു. ഏകപക്ഷീയമായ ഗോഗ്വാ വിളികളുണ്ടായി. എന്തായാലും മലപ്പുറം ജില്ലയിലുള്ള ആ ക്ഷേത്രക്കമ്മിറ്റി പച്ച പെയിന്‍റ് മാറ്റി മറ്റൊരു നിറം ചാര്‍ത്തി.

നിറങ്ങളോടുപോലും മതതീവ്രവാദികള്‍ക്ക് അസഹിഷ്ണുതയാണ്. ദേശീയപതാക മാറ്റി കബന്ധാകൃതിയിലുള്ള കാവിപ്പതാകയാക്കണമെന്നുള്ള ആക്രോശം ഉയര്‍ന്നു കഴിഞ്ഞു.

ഇനി മഴവില്ലില്‍ നിന്നും പച്ചനിറം ഒഴിവാക്കാനുള്ള ബില്ലും ഉണ്ടായേക്കാം. 

നോക്കൂ, ഖത്തര്‍, ബഹറൈന്‍ തുടങ്ങിയ ഇസ്ലാം രാഷ്ട്രങ്ങളുടെ ദേശീയപതാകകളില്‍ പച്ച നിറമേയില്ല.

നാഗാലാന്‍ഡിലെ അവസാനത്തെ അത്താഴം

 നാഗാലാന്‍ഡിലെ അവസാനത്തെ അത്താഴം 

-----------------------------------------------------------------------

നമ്മുടെ രാജ്യത്തിന്‍റെ വടക്കുകിഴക്കേ ഭാഗത്തുള്ള ജനത ശരീരഭാഷകൊണ്ടും ആഹാരരീതികൊണ്ടും വേഷം കൊണ്ടും ഭാഷ കൊണ്ടുമെല്ലാം തികഞ്ഞ വ്യത്യാസം പുലര്‍ത്തുന്നവരാണ്. പട്ടിമാംസത്തോട് പ്രിയമുള്ളവര്‍ അധിവസിക്കുന്ന ആ നാട്ടില്‍ മനേകഗാന്ധിയുടെ ശ്വാനസംരക്ഷണ പോരാട്ടത്തെ തുടര്ന്ന് പട്ടിവധം നിരോധിച്ചതും ഈ നിരോധനത്തെ ഗുവാഹത്തി കോടതി റദ്ദാക്കിയതും അടുത്തകാലത്ത് ആയിരുന്നല്ലോ. സ്നേഹമുള്ളവരും സംഗീതപ്രിയരുമാണ് ആ ജനത. അവര്‍ വലിയൊരു ആപത്തിലെത്തിയേക്കുമെന്ന സൂചനയാണ് ദിവസങ്ങള്‍ക്ക് മുന്പ് നടന്ന നാഗാലാന്‍ഡ് മന്ത്രിസഭാ സത്യപ്രതിജ്ഞ ചടങ്ങ് നല്കിയത്.

പലതരത്തിലും അവഗണന അനുഭവിച്ചിരുന്ന നാഗവംശജരിലേക്കും മറ്റും ക്രൈസ്തവമതപരിവര്‍ത്തന സംഘങ്ങള്‍ ഇരച്ചുകയറി. വിശപ്പിന് പരിഹാരം കാണാനായി വില്ലേന്തി നിന്ന അവര്‍ക്ക് ഭക്ഷണവും വസ്ത്രവും ഇംഗ്ലീഷ് വിദ്യാഭ്യാസവും വേദപുസ്തകവും പുതിയ പേരുകളും നല്കി. ഫലം പലപ്രദേശങ്ങളും ക്രൈസ്തവര്‍ക്ക് ഭൂരിപക്ഷമുള്ളതായി.

ഇക്കഴിഞ്ഞ നിയമസഭാ തെരഞ്ഞെടുപ്പില്‍ അത് പ്രതിഫലിക്കുകയും ചെയ്തു.

ഇത് മനസ്സിലാക്കിയ മേഘാലയയിലെ കോണ്‍ഗ്രസ്സുകാര്‍ കേരളത്തില്‍ നിന്നു ക്രിസ്ത്യാനികളായ പാര്‍ട്ടിപ്രവര്‍ത്തകരെയും നേതാക്കളെയും ഇറക്കുമതി ചെയ്യുകയും കേരളമോഡല്‍ ഭവന സന്ദര്‍ശനങ്ങളും വീട്ടുമുറ്റ സദസ്സുകളും ഉഷാറാക്കുകയും ഒരു വിധം പിടിച്ചു നില്‍ക്കുകയും ചെയ്തു.

നാഗാലാന്‍ഡില്‍ നിഫിയു റിയോ സര്ക്കാര്‍ പിന്നേയും അധികാരത്തില്‍ വന്നു. ചരിത്രത്തിലാദ്യമായി വനിതാ പ്രാതിനിധ്യവും അവിടെയുണ്ടായി. സത്യപ്രതിജ്ഞാ ചടങ്ങില്‍ ഭാരതത്തിന്‍റെ ആദരണീയനായ പ്രധാനമന്ത്രിയും പങ്കെടുത്തു. ഇന്ത്യാ ചരിത്രത്തില്‍ കേട്ടുകേള്‍വിപോലും ഇല്ലാത്ത രീതിയില്‍ ഒരു  ഗായകസംഘം ഹല്ലേലൂയ്യാ പാടിയാണ് ചടങ്ങ് ആരംഭിച്ചത്.

പിന്നീട് ഒരു പാസ്റ്ററുടെ അനുഗ്രഹപ്രഭാഷണം. അദ്ദേഹം പ്രധാനമന്ത്രിയെവരെ അനുഗ്രഹിച്ചു.

മന്ത്രിസഭയുടെ സത്യപ്രതിജ്ഞാ ചടങ്ങുകള്‍ മതപ്രാര്‍ഥനയോടും പുരോഹിതന്‍റെ അനുഗ്രഹപ്രഭാഷണത്തോടും ആരംഭിക്കണമെന്ന് നമ്മുടെ ഭരണഘടന അനുശാസിക്കുന്നില്ല.പ്രധാനമന്ത്രിയുടെ സാന്നിധ്യത്തില്‍ നഗ്നമായ ഭരണഘടനാ ലംഘനമാണ് നാഗാലാന്‍ഡില്‍ നടന്നത്. ഈശ്വരനാമത്തിലല്ല ഇന്ത്യന്‍ ഭരണഘടന ആരംഭിക്കുന്നത്. വിശ്വസിക്കുന്നവര്‍ക്ക് വിശ്വസിക്കാമെന്നല്ലാതെ നിയമനിര്‍മ്മാണ സഭകള്‍ ആരംഭിക്കുന്നത് മതദൈവപ്രാര്‍ഥനയോടെ ആയിരിക്കണമെന്ന് പറഞ്ഞിട്ടേയില്ല.

കമ്മ്യൂണിസ്റ്റ് കാരെയും ക്രിസ്ത്യാനികളെയും മുസ്ലീങ്ങളെയും എല്ലാ അഹിന്ദുജീവിതരീതികളെയും ഇന്ത്യയില്‍ നിന്നും തുടച്ചു നീക്കുകയെന്നത് സംഘപരിവാറിന്റെ ലക്ഷ്യമാണ്. ഈ ലക്ഷ്യപ്രാപ്തിയിലേക്കുള്ള കുതന്ത്രം എന്ന നിലയ്ക്കാണ് അവര്‍ മറ്റ് മതക്കാരുമായി ചങ്ങാത്തം നടിക്കുന്നത്.

കൊല്ലാന്‍ വേണ്ടി നിറുത്തിയിരിക്കുന്ന കോഴിക്ക് നെല്ലുകൊടുക്കുന്നതുപോലെയോ അറവുമാടിന് കുടിവെള്ളം കൊടുക്കുന്നതുപോലെയോ ഉള്ള ഒരു കാരുണ്യപ്രവര്‍ത്തനമാണ് സംഘപരിവാര്‍ പ്രധാനമന്ത്രിയുടെ സാന്നിധ്യത്തില്‍ നാഗാലാന്‍ഡില്‍ നടത്തിയത്. അതുവഴി പാര്‍ലമെന്റിലേക്കും സംഘപരിവാറിനു സ്വാധീനമുള്ള നിയമസഭകളിലേക്കും ഭൂരിപക്ഷ വര്‍ഗ്ഗീയതയുടെ ഈശ്വര പ്രാര്‍ഥനകള്‍ അടിച്ചേല്‍പ്പിക്കാം. ഒരു ദിവസം ഗണപതിപൂജയോടെ പാര്‍ലമെന്‍റ് ആരംഭിച്ചേക്കാം. അതുവഴി, മതവാദികളുടെ അപ്രിയപദമായ മതേതരത്വം കുഴിച്ചുമൂടുകയും ചെയ്യാം. പിന്നെയാണ്, ദൈവസംസ്ഥാപനത്തിന് വേണ്ടിയുള്ള ന്യൂനപക്ഷ മതങ്ങളുടെ മുറവിളി ആരംഭിക്കാന്‍ പോകുന്നത്. ഹിന്ദു മതതീവ്രവാദികളാല്‍ കൊല ചെയ്യപ്പെടുകയോ ബലാല്‍ഭോഗത്തിന് വിധേയരാവുകയോ ചെയ്തവരുടെ വലിയ നിലവിളികള്‍ ഓര്‍മ്മയില്‍ നിന്നും ഉയരുകതന്നെ ചെയ്യും.

മന്ത്രിസഭയുടെ സത്യപ്രതിജ്ഞാ വേളയില്‍  ക്രിസ്ത്യന്‍ പ്രാര്‍ഥന അനുവദിച്ചവര്‍ എന്ന പേരില്‍ കേരളമടക്കമുള്ള സംസ്ഥാനങ്ങളിലെ ക്രൈസ്തവരുടെ വോട്ട് തട്ടാമെന്ന വ്യാമോഹവും നാഗാലാന്‍ഡ് ഹലേലുയ്യക്ക് പിന്നിലുണ്ടാകാം.

ഭാരതമേ ഭ്രാന്താലയമേ

 ഭാരതമേ ഭ്രാന്താലയമേ

-------------------------------------- 

മലയാളനാടിനെ സ്വാമി വിവേകാനന്ദന്‍ ഭ്രാന്താലയമെന്ന് വിളിക്കുമ്പോള്‍ കേരളം ഉണ്ടായിട്ടില്ല. മലബാറിലൂടെ സഞ്ചരിച്ചു മദ്രാസിലെത്തിയ അദ്ദേഹം ഭാരതത്തിന്റെ ഭാവി എന്ന വിഷയത്തില്‍ ട്രിപ്ലിക്കന്‍  ലിറ്റററി സൊസൈറ്റിയില്‍ സംസാരിക്കുമ്പോഴാണ്, മലബാറുകാരെല്ലാം ഭ്രാന്തരാണ്, അവരുടെ വീടുകള്‍ ഭ്രാന്താലയങ്ങളാണ് എന്നു അഭിപ്രായപ്പെട്ടത്. ബ്രിട്ടീഷ് ഭരണത്തിലായിരുന്ന മലബാര്‍ പ്രദേശം താരതമ്യേന പുരോഗതി പ്രാപിച്ചിരുന്നു.എന്നാല്‍  പത്തൊമ്പതാം നൂറ്റാണ്ടിലെ കൊച്ചിയും തിരുവിതാകൂറും മുഴുഭ്രാന്താലയം തന്നെയായിരുന്നു.

കേരളം ഭ്രാന്താലയകിരീടം ഉപേക്ഷിച്ചു. തീണ്ടാരി സമരത്തിലൂടെയും നരബലിയിലൂടെയും നഗ്നനാരീ പൂജയിലൂടെയും കൃപാസനത്തിലൂടെയും മുടിപ്പള്ളി നിര്‍മ്മാണത്തിലൂടെയുമൊക്കെ ആ കിരീടം തിരിച്ചു പിടിക്കാന്‍ ചിലര്‍ സമീപകാലത്ത് ശ്രമിച്ചിരുന്നെങ്കിലും പ്രബുദ്ധകേരളം സമ്പൂര്‍ണ്ണമായി  വഴങ്ങിയിട്ടില്ല.

ഇന്ന് കേരളത്തില്‍  ആദിവാസി മേഖലയിലാണ് അപൂര്‍വമായി അയിത്തം അടിച്ചേല്‍പ്പിക്കപ്പെടുന്നത്. മധു അടക്കമുള്ള പലരുടേയും കൊലപാതകങ്ങള്‍ മനസ്സാക്ഷിയുള്ളവരെയെല്ലാം നടുക്കിയിട്ടുണ്ട്. ആള്‍ക്കൂട്ടക്കൊലപാതകങ്ങള്‍ മനുഷ്യനെതിരെയുള്ള മനുഷ്യരുടെ തന്നെ ഭീകരപ്രവര്‍ത്തനമായിട്ടാണ് കാണേണ്ടത്.

എന്നാല്‍ ഇന്ത്യയിലെ മറ്റു സംസ്ഥാനങ്ങളിലെ  സ്ഥിതിയോ? അതീവ ദയനീയമാണ്. ഭരണഘടനാപരമായ തുല്ല്യതാ ബോധമെല്ലാം കീറിയെ റിയപ്പെട്ടിരിക്കുന്നു. അയിത്തം തുടങ്ങിയിട്ടുള്ള ദുരാചാരമെല്ലാം അംബേദ്കറിനും മുന്‍പുള്ള കാലത്തേക്ക് കൊണ്ടുപോയിരിക്കുന്നു. ഒരു മതേതര ഭരണകൂടം ഭാരതത്തിലില്ലെന്നാണ് ഓരോ സംഭവവും തെളിയിക്കുന്നത്.

അടുത്തകാലത്തുണ്ടായ ഞെട്ടിക്കുന്ന സംഭവം ഒരു വിളംബരം ആയിരുന്നല്ലോ. കിണറിന്റെ സമീപത്തേക്ക് വരുന്ന താഴ്ന്ന ജാതിക്കാര്‍ക്ക് പിഴയും ചെരുപ്പടിയും ശിക്ഷയായി ലഭിക്കുമെന്നായിരുന്നു ചെണ്ടകൊട്ടി വിളംബരം ചെയ്തത്.

മാട്ടിറച്ചി സൂക്ഷിച്ചു എന്ന സംശയത്താല്‍ ഒരാളെ കൊന്നുകളഞ്ഞത് മറക്കാറായിട്ടില്ല. ഹിന്ദു ക്ഷേത്രത്തില്‍ വച്ച് ഒരു ബാലികയെ ബലാല്‍സംഗം ചെയ്തു കൊന്നത് ഇന്ത്യന്‍ മനസ്സാക്ഷിയെ ഞെട്ടിച്ച സംഭവമായിരുന്നു. ഗുജറാത്തിലും മറ്റും നടന്ന കൂട്ടക്കൊലയും ബാബറിപ്പള്ളി തകര്‍ത്തതിനെ തുടര്‍ന്നുണ്ടായ കൂട്ടക്കൊലകളും മറ്റുമായി താരതമ്യം ചെയ്താല്‍ 

വര്‍ഗ്ഗീയശക്തികളുടെ ആസൂത്രണത്തില്‍ നടന്നതാണെങ്കിലും മാറാട് കലാപവും മറ്റും എത്രയോ ചെറുതാണ്.

പുനര്‍ജ്ജനിക്കും എന്ന അന്ധവിശ്വാസത്താല്‍ മക്കളെ കൊല്ലുക, പ്രണയജീവിതത്തെ കൊലപ്പെടുത്തിക്കൊണ്ടുള്ള ദുരഭിമാനവിധിന്യായങ്ങള്‍ നടപ്പിലാക്കുക, തവളകളെ തമ്മില്‍ കല്ല്യാണം കഴിപ്പിക്കുക, കുരങ്ങുകളെ ദൈവമായി കരുതി ആരാധിക്കുക, എലികളെയും വിഷപ്പാമ്പുകളെയും ആരാധിക്കുക, കയ്യില്‍ പലവര്‍ണ്ണത്തിലുള്ള ചരടുകള്‍ മതചിഹ്നമായി കെട്ടുക, ഔറംഗാബാദ് പോലെയുള്ള പ്രസിദ്ധ സ്ഥലനാമങ്ങള്‍ മാറ്റി ചരിത്ര ധ്വംസനം ചെയ്യുക, പൌ രോഹിത്യത്തിന് മുന്നില്‍ താന്നുവണങ്ങി നില്‍ക്കുക, ദേവദാസികളെ പോറ്റി വളര്‍ത്തുക, സ്വാമി വിവേകാനന്ദന്‍റെ ബംഗാളില്‍ ഇപ്പോള്‍ പോലും നിലനില്‍ക്കുന്ന തീണ്ടാരിപ്പുര സംവിധാനം   തുടങ്ങിയ കാര്യങ്ങള്‍ ആലോചിച്ചാല്‍ ഭ്രാന്താലയം എന്ന കിരീടത്തിന് സംപൂര്‍ണ്ണ അര്‍ഹത ഭാരതത്തിനാണെന്ന് കാണാം. കന്നാലിയെ കെട്ടിപ്പുണരാനുള്ള സര്ക്കാര്‍ ഉത്തരവുകൂടി വന്നതോടെ ഭ്രാന്താലയ ബഹുമതിക്കുള്ള അര്‍ഹത പൂര്‍ണമായി.

ഈ അന്ധവിശ്വാസഭൂപടത്തിലെ ചെറിയൊരിടം മാത്രമാണു കേരളം. ഇവിടെ പ്രതികരണങ്ങളുണ്ടാകുന്നു എന്നതാണു പ്രധാന പ്രത്യേകത. ഒരു ദിവസം മുന്‍പു അവസാനിച്ച കേരള ശാസ്ത്ര സാഹിത്യ പരിഷത്തിന്റെ സംസ്ഥാന പദയാത്ര അന്ധവിശ്വാസ വൈറസ്സ് പടരാതിരിക്കാനുള്ള സാംസ്കാരിക ഔഷധ കവചമാണ് കേരളത്തെ അണിയിച്ചത്. സയന്‍സിന്റെ സഹായത്താല്‍ വൃദ്ധി പ്രാപിക്കുന്ന ഒരു കേരളം, ഭ്രാന്താലയ പരിവേഷമുള്ള ഭാരതത്തില്‍ വേറിട്ടൊരു സൌന്ദര്യം സൃഷ്ടിക്കുന്നുണ്ട്.

ഭരണകൂടത്തിന് ഭ്രാന്തുപിടിച്ചപ്പോള്‍

ഭരണകൂടത്തിന് ഭ്രാന്തുപിടിച്ചപ്പോള്‍ 

-----------------------------------------------------------

ഇന്ത്യന്‍ പുരാണങ്ങളില്‍ മൃഗങ്ങളും മനുഷ്യരുമായുള്ള ആലിംഗനവും രതിയും മറ്റും ആധികാരികരീതിയില്‍ത്തന്നെ ആവിഷ്ക്കരിച്ചിട്ടുണ്ട്. അതിലേറ്റവും രസകരം തവളരാജകുമാരിയുമായുള്ള പരീക്ഷിത്ത് രാജാവിന്റെ ദാമ്പത്യ ജീവിതമാണ്.

ഒരേ പേരുള്ള പല കഥാപാത്രങ്ങള്‍ മഹാഭാരതത്തില്‍ ഉണ്ടല്ലോ. അയോധ്യ വാണിരുന്ന ഒരു രാജാവാണ് തവളയെ കെട്ടിയ പരീക്ഷിത്ത്. ഒരു സഞ്ചാരത്തിനിടയിലാണ് പരീക്ഷിത്ത് തവളപ്പെണ്ണായ സുശോഭനയെ കണ്ടുമുട്ടുന്നത്. നല്ല പാട്ടുകാരിയാണ് ഈ തവളക്കുട്ടി. അവര്‍ തമ്മില്‍ വിവാഹിതരായി. ഒരു കരാര്‍ ഉണ്ടായിരുന്നു. സുശോഭനയെ വെള്ളം കാണിക്കരുത്. 

രാജാവ് അതീവരഹസ്യമായി സുശോഭനയുമായി മധുവിധു ആഘോഷിച്ചു. ഇത് മനസ്സിലാക്കിയ മന്ത്രി തന്ത്രപൂര്‍വം മറ്റൊരു കേളീഗൃഹം നിര്‍മ്മിച്ചു. അവിടെ ഒരു തടാകം ഉള്ളതായി തോന്നുകയില്ല. കേളീവാസത്തിന്റെ ഒരു ഘട്ടത്തില്‍ സുശോഭന വെള്ളം കാണുകയും അതില്‍ ഒരു പച്ചത്തവളയായി അപ്രത്യക്ഷമാവുകയും ചെയ്തു. കോപാകുലനായ രാജാവ് സകല തവളകളെയും കൊല്ലാന്‍ ഉത്തരവിട്ടു.

ആയുസ്സെന്നു പേരുള്ള തവളരാജാവ് ഹാജരാവുകയും തവളവധ ഉത്തരവ് പിന്‍വലിച്ചാല്‍ മകളെ തരാമെന്ന് ഉത്തരവിടുകയും ചെയ്യുന്നു. രാജാവ് സമ്മതിക്കുകയും സുശോഭന വീണ്ടും ശോഭയോടെ ഭാര്യാപദവിയിലെത്തുകയും ചെയ്യുന്നു.

കുതിരയുടെ മുഖമുള്ളവരും കുരങ്ങിന്‍റെ മുഖമുള്ളവരും പുരുഷബീജം ഏറ്റുവാങ്ങിയ മത്സ്യവും തത്തയും എല്ലാം പുരാണത്തിലുണ്ട്. മനുഷ്യരും സര്‍പ്പങ്ങളും തമ്മിലുള്ള ബന്ധങ്ങളും പുരാണത്തിലുണ്ട്.

ഇതൊക്കെ സങ്കല്‍പ്പം അല്ലെന്നും സത്യമാണെന്നും കരുതിയ പ്രാകൃത  ജനത ഈ മൃഗങ്ങളെയെല്ലാം ആരാധിക്കാന്‍ തുടങ്ങി.

ഉറുമ്പിനെയും മത്സ്യത്തെയും പ്ലേഗു പരത്തുകയും കൃഷിനാശം വരുത്തുകയും ചെയ്യുന്ന എലികളെയും ആനകളെയും പന്നിയെയും ആമയെയും സര്‍പ്പങ്ങളെയും കോഴിയെയും മയിലിനെയും ചിലന്തിയെയും  എല്ലാം  ആരാധിക്കാന്‍ തുടങ്ങി. അടുത്ത് ചെന്നു ആരാധിച്ചാല്‍ അപകടമാണെന്ന് തിരിച്ചറിഞ്ഞ  സിംഹം.പുലി,കടുവ തുടങ്ങിയവയെ ദൈവവാഹനങ്ങളാക്കി 

ചിത്രപ്പെടുത്തി ആരാധിക്കാന്‍ തുടങ്ങി. മനുഷ്യന്റെ ജ്ഞാന പരിമിതി കാരണം ദിനോസറുകള്‍ ഒരു ദൈവത്തിന്റെയും വാഹനമായില്ല.

പാവം മനുഷ്യന്റെ ഈ ഭക്തിപ്രവണതയെ മതവും പുരോഹിതവര്‍ഗ്ഗവും മുതലാക്കി. അവരുടെ കീശയും ശരീരവും പുഷ്ടിപ്പെട്ടു.

നിരര്‍ഥകമായ ഈ പൂജാ പ്രവണതയെ രാഷ്ട്രീയ വല്‍ക്കരിച്ചപ്പോഴാണ് പശുവിനെ കെട്ടിപ്പിടിക്കാമെന്ന ഉത്തരവുണ്ടായത്. കേന്ദ്രത്തിലെ യുക്തിരഹിത ഭരണകൂടം ഇച്ഛിച്ചതേയുള്ളൂ മൃഗക്ഷേമബോര്‍ഡ് കല്‍പ്പിച്ചു. അന്താരാഷ്ട്ര പ്രണയദിനത്തില്‍ ആലിംഗനം ചെയ്യണമെന്നായിരുന്നു കല്പ്പന.പശുവിനെ കെട്ടിപ്പിടിച്ചാല്‍ വൈകാരിക സമൃദ്ധിയുണ്ടാവുകയും സന്തോഷം വര്‍ധിക്കുകയും ചെയ്യുമത്രേ.

ലോകത്തിന്റെ മുന്നില്‍ ഭാരതീയര്‍ ലജ്ജിച്ചു തല താഴ്ത്തിയ ഒരു ഉത്തരവായിരുന്നു അത്. ഇത്രയ്ക്ക് പ്രാകൃതരാണോ ഇന്ത്യക്കാര്‍ എന്നോര്‍ത്തു ലോകം മൂക്കത്ത് വിരല്‍ വച്ചു. ആരാടാ എന്റെ ഭാര്യയെ കെട്ടിപ്പിടിക്കാന്‍ വരുന്നതെന്ന് ഒരു കാള ചോദിക്കുന്നതായുള്ള ഒരു കാര്‍ട്ടൂണും സാമൂഹ്യമാധ്യമങ്ങളില്‍ വൈറലായി. ലോകത്തിന്റെ പരിഹാസച്ചിരിക്കു മുന്നില്‍ തലകുനിക്കേണ്ടിവന്ന ഭരണകൂടം വലിയ വിശദീകരണമൊന്നും കൂടാതെ ആ ഉത്തരവ് പിന്‍ വലിച്ചു. ഭ്രാന്ത് പടര്‍ന്ന് പിടിച്ചവരാരെങ്കിലും കെട്ടിപ്പിടിച്ചിട്ടുണ്ടാവുകയും ചെയ്യും. നായ്ക്കളെ കല്ല്യാണം കഴിപ്പിച്ചുകൊണ്ട് ഒരു ഹിന്ദു സംഘടന പ്രതിഷേധിച്ചുകഴിഞ്ഞു. പ്രണയികളെ പട്ടികളായി കണ്ടെന്നാണല്ലോ അതിന്‍റെ അര്‍ത്ഥം. നായ ഭാരതപുരാണത്തില്‍ ഒരു മോശം മൃഗമല്ല. യുധിഷ്ഠിരനുമായി നായക്കുള്ള ബന്ധവും കിടപ്പുമുറിക്ക് മുന്നിലെ ചെരുപ്പിന്റെ കഥയും പ്രസിദ്ധമാണല്ലോ.

ഇതൊരു ടെസ്റ്റു ഡോസ് മാത്രമാണ്. കെട്ടുകഥകളെ മുന്‍ നിര്‍ത്തിയാല്‍ വോട്ടുകിട്ടുമെന്നു ബോധ്യമായ  ഭരണകൂടം ഇതിലപ്പുറവും ഇനി ചെയ്യും. പശുവിന് വോട്ടവകാശം കൊടുത്താല്‍ പോലും ആരും അത്ഭുതപ്പെടേണ്ടതില്ല.ഭരണമുറപ്പിച്ചു ജന്മനാടിനെ മതഭീകരവാദികള്‍ക്കും കുത്തക മുതലാളിമാര്‍ക്കും തീറെഴുതാന്‍ അത് സഹായിക്കും.

ഇനി ഇന്ത്യക്ക് സ്വന്തമായി ഒരു പ്രണയദിനം വേണമെന്നാണ് വാദമെങ്കില്‍ അനാര്‍ക്കലിയുടെയും ജഹാംഗീറിന്റെയും പ്രണയം ഓര്‍മ്മിപ്പിക്കുന്ന ഒരു ദിവസമോ പ്രണയത്തിന്റെ രക്തസാക്ഷിയായ ഇടപ്പള്ളി രാഘവന്‍ പിള്ളയുടെ ഓര്‍മ്മദിനമോ സ്വീകരിക്കാവുന്നതാണല്ലോ