Friday, 20 May 2016

പ്രവേശനോത്സവഗാനവും ഈശ്വരപ്രാർഥനയും



കേരള വിദ്യാഭ്യാസ ചട്ടങ്ങൾ സംബന്ധിക്കുന്ന പുസ്തകത്തിൽ ഈശ്വരപ്രാർഥനയെക്കുറിച്ച്‌ പറഞ്ഞിട്ടില്ല. എന്നാൽ എല്ലാ ദിവസവും ഈശ്വരപ്രാർഥനയോടുകൂടിയാണ്‌ നമ്മുടെ വിദ്യാലയങ്ങൾ പ്രവർത്തനം തുടങ്ങുന്നത്‌.

മഹാകവി കുമാരനാശാന്റെ ചന്തമേറിയ പൂവിലും പന്തളം കെ പി രാമൻപിള്ളയുടെ അഖിലാണ്ഡമണ്ഡലവും ആണ്‌ മുമ്പൊക്കെ ആലപിച്ചിരുന്നതെങ്കിൽ ഇന്ന്‌ പല പാട്ടുകൾ പ്രാർഥനയ്ക്കായി ഉപയോഗിക്കുന്നുണ്ട്‌. പന്തളം കേരളവർമയുടെ ദൈവമേ കൈതൊഴാം കേൾക്കുമാറാകണം എന്ന ഗാനം ഇപ്പോഴും അപൂർവമായിട്ടെങ്കിലും ആലപിക്കുന്നുണ്ട്‌.

വിവിധ മതങ്ങൾക്ക്‌ വിവിധ ദൈവങ്ങളും വ്യത്യസ്തമായ പ്രാർഥനാരീതികളുമാണുള്ളത്‌. ഒരു മതവിശ്വാസി അന്യമത ദൈവങ്ങളെയോ ആചാരങ്ങളെയോ ആരാധിക്കുകയോ അനുഷ്ഠിക്കുകയോ ചെയ്യുകയില്ല. ശാസ്ത്രബോധത്തിൽ കെട്ടിപ്പടുത്തിട്ടുള്ള ഒരു പാഠ്യപദ്ധതിയാണ്‌ ലോകത്തെവിടെയുമുള്ളത്‌. നമ്മുടെ പാഠപുസ്തകത്തിലും പ്രപഞ്ചത്തെ സൃഷ്ടിച്ചത്‌ ദൈവമല്ല. പ്രകൃതിയെയും മനുഷ്യനെയും സൃഷ്ടിച്ചത്‌ ഈശ്വരനാണെന്ന്‌ കേരളത്തിലെ ഒരു പാഠപുസ്തകത്തിലും പറയുന്നില്ല. അതിനാൽ പാഠങ്ങളുടെ ആമുഖമായി ഒരു അബദ്ധപാഠം ആലപിച്ചുകൊണ്ട്‌ വിദ്യാലയ പ്രവർത്തനം ആരംഭിക്കുന്നത്‌ ശരിയല്ല.

വിദ്യാർഥികളിൽ ദേശാഭിമാനവും ഭാഷാഭിമാനവും പരിസ്ഥിതി സംരക്ഷണ ബോധവും പഠനം ലളിതമാണ്‌ എന്ന ചിന്തയുമൊക്കെയുണ്ടാക്കുവാൻ കഴിയുന്ന രീതിയിലുളള ഒരു ഗീതത്തോടുകൂടി പഠന ദിവസം ആരംഭിക്കുന്നത്‌ നന്നായിരിക്കും.

മദിരാശി കേരള സമാജത്തിന്റെ മലയാളം മാധ്യമമായുള്ള സ്കൂളിൽ വിദ്വാൻ പി കേളുനായരുടെ സ്മരിപ്പിൻ ഭാരതീയരെ എന്ന ദേശഭക്തിഗാനമാണ്‌ പ്രാർഥനയായി ആലപിക്കുന്നത്‌. കേരളീയ സംസ്കാരത്തിന്റെ മഹനീയത ബോധ്യപ്പെടുത്തുന്ന തരത്തിലുള്ള ഒരു ഗീതമാണ്‌ നമുക്കാവശ്യം.

മനസുനന്നാവട്ടെ മതമേതെങ്കിലുമാവട്ടെ എന്ന ഗാനം കുട്ടികളിൽ മതാതീതമായ സ്നേഹം വിതയ്ക്കുന്നതാണ്‌. സ്കൂളുകളിൽ പ്രാർഥനയായി ഈ പാട്ട്‌ പരിഗണിക്കാവുന്നതാണ്‌. അല്ലെങ്കിൽ മലയാള ഭാഷയെ പ്രകീർത്തിക്കുന്ന ഒഎൻവിക്കവിതയോ പ്രകൃതിയെ പ്രകീർത്തിക്കുന്ന സുഗതകുമാരിക്കവിതയോ പ്രഭാതഗീതമായി ആലപിക്കാവുന്നതാണ്‌.
വിവിധ മത ഭവനങ്ങളിൽ നിന്നും മതരഹിത ഭവനങ്ങളിൽ നിന്നും വരുന്ന കുട്ടികൾക്ക്‌ മനഃപ്രയാസമില്ലാതെ തന്നെ ഈ പ്രഭാതഗീതാലാപനത്തിൽ പങ്കെടുക്കാവുന്നതാണ്‌.

ഇത്തവണ പ്രവേശനോത്സവത്തിനായി തിരഞ്ഞെടുത്തിട്ടുള്ളത്‌ ശ്രദ്ധേയനായ യുവകവിയും മുണ്ടശേരി അവാർഡ്‌ ജേതാവുമായ ശിവദാസ്‌ പുറമേരിയുടെ രചനയാണ്‌. ഡോ. മണക്കാല ഗോപാലകൃഷ്ണന്റെ സ്വരസംവിധാനത്തിൽ പി ജയചന്ദ്രൻ ഈ പാട്ട്‌ ഭംഗിയായി പാടിയിട്ടുമുണ്ട്‌.

അക്ഷരസൂര്യനുദിച്ചു നമുക്കിന്നറിവിൻ ഉത്സവഘോഷം/ പുസ്തകമധുരം നുകരാമിനിയും പൂമ്പാറ്റകളായ്‌ പാറാം/ കളിചിരിനിറയും തിരുമുറ്റങ്ങളിലാടിപ്പാടി രസിക്കാം/ അറിയാക്കഥയുടെ ചെപ്പുതുറക്കാനാവഴിയീവഴിവായോ- ഈ പാട്ടിലെ അടുത്ത രണ്ടു ഖണ്ഡങ്ങൾ ഇതുപോലെ തന്നെ മധുരതരവും ഉത്സാഹഭരിതവുമാണ്‌. കുട്ടികളിൽ ഭയരഹിതമായ ഒരു പഠനബോധം സൃഷ്ടിക്കാൻ ഈ രചനയ്ക്കു സാധിക്കും. അന്ധവിശ്വാസത്തിന്റെ അണുപോലും പുതിയ പ്രവേശനോത്സവ ഗീതത്തിലില്ല. സ്നേഹത്തെക്കുറിച്ചും നന്മയെക്കുറിച്ചും മനുഷ്യരെല്ലാം ഒന്നാണെന്ന മഹനീയ ചിന്തയെക്കുറിച്ചും ഈ പാട്ടിൽ പരാമർശിക്കുന്നുണ്ട്‌. കണ്ടു നടന്ന കിനാവുകളെ കൈകൾ കൊണ്ട്‌ വരയ്ക്കാം എന്ന ഇച്ഛാശക്തി സമ്മാനിക്കുന്ന മനുഷ്യപക്ഷ നിലപാടും ഈ ഗീതത്തിലുണ്ട്‌.

സംസ്ഥാനത്തിന്റെ വിവിധ ഭാഗങ്ങളിൽ നിന്നും ലഭിച്ച അഞ്ഞൂറോളം രചനകളിൽ നിന്നും ഭാഷാപണ്ഡിതനും സാഹിത്യകാരനുമായ എഴുമറ്റൂർ രാജരാജവർമയുടെ നേതൃത്വത്തിലുള്ള ഒരു വിദഗ്ധ സമിതിയാണ്‌ ഈ രചനയുടെ മഹത്വം കണ്ടെത്തിയത്‌.

ഒറ്റ പ്രഭാതം കൊണ്ട്‌ അവസാനിപ്പിക്കാതെ കേരളത്തിലെ എല്ലാ സ്കൂളുകളിലേയും പ്രഭാതഗീതമായി ഈ ഗാനം എല്ലാ പ്രവൃത്തിദിവസവും ആലപിക്കുന്നത്‌ നന്നായിരിക്കും.

മതങ്ങളുടെ മുന്നിൽ പരാജയപ്പെട്ട്‌ മതമില്ലാത്ത ജീവൻ പിൻവലിക്കേണ്ടിവന്നതുപോലെയുള്ള അനുഭവം പുതിയ സർക്കാരിന്‌ ഉണ്ടാകാതെയിരിക്കണമെങ്കിൽ കുട്ടികളിൽ മതാതീത സംസ്കാരത്തിന്റെ വിത്തുകൾ വിതയ്ക്കേണ്ടതുണ്ട്‌. വിദ്യാലയങ്ങളിൽ നിന്നു മാത്രമേ ഈ മനുഷ്യാവബോധം ലഭിക്കുകയുള്ളു.

Tuesday, 10 May 2016

പെൺകുട്ടികൾക്കുമുണ്ട്‌ ജീവിക്കാനുള്ള അവകാശം



പിന്നെയും ഒരു പെൺവേട്ടയുടെ വാർത്തയിൽ കേരളം ഞെട്ടിത്തെറിച്ചിരിക്കുന്നു. സൗമ്യ സംഭവം അടക്കം കേരളം കണ്ട ക്രൂരമായ പെൺവേട്ടകൾക്കുശേഷം ഇതാ പെരുമ്പാവൂരിലും ഒരു പെൺകുട്ടി കൊല്ലപ്പെട്ടിരിക്കുന്നു.

ജിഷ എന്ന ദളിത്‌ പെൺകുട്ടിയെ നരാധമന്മാർ പട്ടാപ്പകലാണ്‌ കൊലപ്പെടുത്തിയത്‌. ഇരുപതിലധികം മുറിവുകൾ ഏൽപ്പിച്ചാണ്‌ ആ കൂട്ടിയെ കൊന്നത്‌. സംഭവത്തിൽ അയൽവാസികൾ പോലും നിസംഗതയോടെയാണ്‌ പെരുമാറിയതത്രെ. നിയമ വിദ്യാർഥിയായിരുന്ന ജിഷ വിദ്യാഭ്യാസാനന്തരം പാവങ്ങൾക്ക്‌ നിയമസഹായം നൽകുക എന്ന ലക്ഷ്യത്തിലായിരുന്നു.
സംസ്കാരസമ്പന്നരും സമ്പൂർണ സാക്ഷരരും എന്ന്‌ കീർത്തികേട്ട കേരളത്തിൽ ഇത്തരം സംഭവങ്ങളുണ്ടാകുന്നത്‌ എന്തുകൊണ്ട്‌? സംസ്കാരത്തിന്റെയും അക്ഷരജ്ഞാനത്തിന്റെയും അർഥം മാറ്റിയെടുക്കേണ്ടിയിരിക്കുന്നു.

ഇന്ത്യയിലെ വൻ നഗരങ്ങളിലെല്ലാം ഏത്‌ രാത്രികളിലും സ്ത്രീകൾക്ക്‌ സഞ്ചരിക്കാൻ സാധിക്കും. നാലു മണിക്കു തന്നെ ഉണർന്ന്‌ പത്രക്കെട്ടുകൾ ഏറ്റുവാങ്ങി എണ്ണി തിട്ടപ്പെടുത്തി സഹപ്രവർത്തകരെ ഏൽപ്പിക്കുന്ന സ്ത്രീകൾ കൽക്കത്തയിലെ തെരുവുകളിൽ സാധാരണ കാഴ്ചയാണ്‌. പലവിധ ജോലികളിൽ ഏർപ്പെട്ടിട്ട്‌ തിരിച്ച്‌ വീടുകളിലേയ്ക്ക്‌ ഇരുചക്ര വാഹനങ്ങളിൽ പോകുന്ന സ്ത്രീകളെ ബംഗളൂരുവിലും ഹൈദരാബാദിലും ബോംബെയിലുമൊക്കെ നമുക്ക്‌ കാണാവുന്നതാണ്‌. ഇവരൊക്കെ ആക്രമിക്കപ്പെട്ടിട്ടുള്ള സംഭവങ്ങൾ തീർത്തും വിരളം. ഡൽഹി പെൺകുട്ടിയുടെ ദാരുണമായ അന്ത്യമാണ്‌ ഇന്ത്യയെ ഞെട്ടിച്ച അറിയപ്പെട്ട ഒരു കൊലപാതകം. അറിയപ്പെടാത്ത കൊലപാതകങ്ങൾ ധാരാളമായി നടക്കുന്നുണ്ട്‌ എന്ന്‌ വിവിധ സർക്കാരുകളുടെ കണക്കുകൾ സൂചിപ്പിക്കുന്നുണ്ടല്ലോ.

സ്ത്രീകൾക്ക്‌ വീട്ടിൽപ്പോലും രക്ഷയില്ല എന്നാണ്‌ ജിഷയുടെ മരണം നമ്മോട്‌ പറയുന്നത്‌. തെരഞ്ഞെടുപ്പ്‌ പ്രമാണിച്ച്‌ കേരളം മുഴുവൻ ഉണർന്നിരിക്കുന്ന സമയത്താണ്‌ ഈ ക്രൂരകൃത്യം നടത്തിയിട്ടുള്ളത്‌.
കേരളത്തിലെ എല്ലാ സ്ത്രീകൾക്കും അടിയന്തരമായി കായിക പരിശീലനം നൽകേണ്ടതാണ്‌. കൂട്ടമായ ആക്രമണത്തിൽ നിന്നും രക്ഷപ്പെടാൻ ഈ പരിശീലനം സഹായകരം അല്ലെങ്കിൽകൂടിയും അക്രമികളെ നേരിടാനുള്ള മാനസിക ബലം നൽകാൻ ഇത്‌ സഹായിക്കും. കേരളത്തിലെ പല കുടുംബശ്രീ യൂണിറ്റുകളും പെൺകുട്ടികൾക്ക്‌ കായിക പരിശീലനം നൽകുന്നതിൽ ശ്രദ്ധിക്കുന്നുണ്ട്‌.

ഒരു പെൺകുട്ടിയെ വീടുകയറി ആക്രമിച്ച്‌ കൊല്ലുമ്പോൾ ജീവിക്കുവാനുള്ള അവകാശമാണ്‌ നിഷേധിക്കപ്പെടുന്നത്‌. കൃത്യമായ നിയമവ്യവസ്ഥകൾ നിലവിലുള്ള ഒരു രാജ്യത്ത്‌ നിയമമോ നിയമലംഘനമോ കയ്യാളുവാൻ ആരെയും അനുവദിക്കരുത്‌.

ഒരു നിയമവിദ്യാർഥിനി സ്വന്തം കുടുംബത്തിനു മാത്രമല്ല ഒരു സമൂഹത്തിനാകെ വിലപ്പെട്ട സേവനം നൽകുവാനുള്ള വാഗ്ദാനമാണ്‌. ആ വാഗ്ദാനത്തെയാണ്‌ നശിപ്പിച്ചുകളഞ്ഞത്‌. പരിഷ്കൃത സമൂഹത്തിന്റെ മുഖത്ത്‌ പറ്റിയ കടുത്ത ചോരപ്പാടാണ്‌ ജിഷയുടെ കൊലപാതകം.

എല്ലാ സ്ത്രീകൾക്കും സുരക്ഷിതമായി വസിക്കുവാനും സഞ്ചരിക്കുവാനുമുള്ള അവകാശം പാലിക്കപ്പെടേണ്ടതാണ്‌. സഹദുഃഖത്തിന്റെയും അമർഷത്തിന്റെയും അഗ്നിലായനിയിൽ കൈമുക്കി ജീവിക്കുവാനുള്ള അവകാശം സംരക്ഷിക്കുമെന്ന്‌ കേരളീയസമൂഹം തീരുമാനിക്കേണ്ടതുണ്ട്‌. എത്രയും പെട്ടെന്ന്‌ കുറ്റവാളികളെ പിടികൂടി നിയമപാലകർ അവരുടെ ഉത്തരവാദിത്തവും നിർവഹിക്കേണ്ടതാണ്‌.

Tuesday, 26 April 2016

മറഞ്ഞൊരാൾ


കാഞ്ഞിരച്ചോട്ടിലാര്
പാത്തിരിക്കുന്നു രാവേ
അമ്പിളിക്കൊമ്പു നോക്കീ
മുന്തിരിക്കള്ളു മോന്തീ

എന്റെ നെല്ലെന്തിയേടീ
എന്റെയെള്ളെന്തിയേടീ
എന്റടുക്കെന്തിയേടീ
എന്റെ പാട്ടെന്തിയേടീ

ഏപ്പിൽ പിടിച്ചുകൊണ്ടേ
ഏങ്ങലടിച്ചുകൊണ്ടേ
ഏഴിലം പാലമൂട്ടിൽ
ഏറ്റിരിക്കുന്നതാര്

എന്റെ തെങ്ങെന്തിയേടീ
എന്റെ തേറെന്തിയേടീ
എന്റെ ക്ടാവെന്തിയേടീ
എന്റെ ന്ലാവെന്തിയേടീ

മുണ്ടകൻ ചുണ്ടു ചോന്നോ
മൂവാണ്ടൻ മാവു പൂത്തോ
വേറ്റേമ്മാനെന്തിയേടീ
കറ്റകെട്ടെന്തിയേടീ

ആറ്റെറമ്പത്തിരുന്ന്
കാറ്റുകൊള്ളുന്ന കല്ലേ
എന്റെയാറെന്തിയേടീ
എന്റെ മീനെന്തിയേടീ

നെഞ്ചത്തു കൈപിണച്ചേ
കൊങ്ങയിൽ വാക്കുടഞ്ഞേ
കന്നാരക്കാട്ടിൽ നിന്ന്
കോട്ടുവായിട്ടതാര്

മൺകൂജയെന്തിയേടീ
കൺമഷിയെന്തിയേടീ
മെത്തപ്പായെന്തിയേടീ
പുത്തരിയെന്തിയേടീ

രാമച്ചമെന്തിയേടീ
രാപ്പാടിയെന്തിയേടീ
കാവുകളെന്തിയേടീ
മാവുകളെന്തിയേടീ

ചുറ്റുമതിൽപ്പുറത്ത്
ചുറ്റിനടന്നുകൊണ്ട്
തെക്കെപ്പുറത്തുവന്ന്
ചൂളമടിച്ചതാര്?..

ചാണകമെന്തിയേടീ
ചാരവുമെന്തിയേടീ
നഞ്ചില്ലാത്തക്കാളിയും
വെണ്ടയുമെന്തിയേടീ

വഴുതനയെന്തിയെടീ
പയർവള്ളിയെന്തിയേടീ
ചെഞ്ചീരയെന്തിയേടീ
കാന്താരിയെന്തിയേടീ

പുളിമരമെന്തിയേടീ
തണുവെള്ളമെന്തിയേടീ
കളിവള്ളമെന്തിയേടീ
മഴമേഘമെന്തിയേടീ

മുറ്റത്തുവന്നുനിന്ന്
മൂത്രമൊഴിച്ചതാര്
കാണാമറ ചമച്ച്
കാര്യം പറഞ്ഞതാര്.

Friday, 22 April 2016

പ്രകൃതിക്കൊരു കൂട്ട്‌; പ്രസാദിന്‌ ഒരു വോട്ട്‌



തെരഞ്ഞെടുപ്പുകാലത്ത്‌ കേരളത്തിലൂടെ സഞ്ചരിക്കുന്നത്‌ കൗതുകകരമാണ്‌. ചുമരായ ചുമരുകളിലെല്ലാം സ്ഥാനാർഥികൾ ചിരിച്ചുല്ലസിച്ച്‌ ഇരിക്കുന്നത്‌ കാണാം. ജീവിതത്തിലൊരിക്കലും ചിരിച്ചിട്ടില്ലാത്തവർ പോലും സ്ഥാനാർഥിയായാൽ ചിരിക്കും. ക്യാമറയ്ക്ക്‌ മുന്നിൽ ഇവരെങ്ങനെയാണ്‌ ചിരി അഭിനയിക്കുന്നത്‌. ഒരുപക്ഷേ ടൂത്ത്‌ ബ്രഷിന്റെ നാരുകൾക്കിടയിൽ ചെറിയ ക്യാമറ ഒളിപ്പിച്ചുവച്ച്‌  പല്ല് തേക്കുമ്പോൾ ക്ലിക്ക്‌ ചെയ്യുന്നതാകാം.

ചില സ്ഥാനാർഥികളുടെ ചുമരെഴുത്തുകൾ കണ്ടാൽ ഇവർ ജനിച്ചതുതന്നെ തെരഞ്ഞെടുപ്പിൽ മത്സരിക്കാനാണോ എന്നു തോന്നിപ്പോകും. പത്തിലധികം തെരഞ്ഞെടുപ്പുകളിൽ മത്സരിച്ച്‌ പതിവായി തോറ്റവരും ഇക്കുറി ഭാഗ്യപരീക്ഷണത്തിനുണ്ട്‌.

പുതുമയുള്ള ഒരു കാര്യവും ചുമരുകളിലെങ്ങും എഴുതിക്കാണാറില്ല. കലാഭവൻമണിയുടെ പാട്ടുകൾക്കുവരെ ഇക്കുറി പാരഡികൾ ഇറങ്ങിയിട്ടുണ്ട്‌. അഭ്യർഥിക്കുകയാണ്‌, അപേക്ഷിക്കുകയാണ്‌ എന്ന്‌ ഉച്ചഭാഷിണിയിലൂടെ അലറിവിളിക്കാനും തുടങ്ങിയിട്ടുണ്ട്‌.

ആലപ്പുഴയിൽ ഒരു മതാതീത വിവാഹത്തിൽ പങ്കെടുക്കാൻ പോയപ്പോഴാണ്‌ വളരെ വ്യത്യസ്തമായ മുദ്രാവാക്യം ശ്രദ്ധയിൽപ്പെട്ടത്‌. മുഖത്തും മുടിയിലും പെയിന്റടിക്കാത്ത സ്ഥാനാർഥി. ചൂണ്ടുവിരൽ ഉയർത്തിനിൽക്കുന്ന ആകർഷകമായ ചിത്രം. അതിനോടൊപ്പം എഴുതിയിട്ടുള്ളതാണ്‌ വളരെ വ്യത്യസ്തമായി തോന്നിയത്‌. പ്രകൃതിക്ക്‌ ഒരു കൂട്ട്‌, പ്രസാദിന്‌ ഒരു വോട്ട്‌. ഹരിപ്പാട്‌ വച്ചാണ്‌ ഈ മനോഹര മുദ്രാവാക്യം ഞാൻ കണ്ടത്‌.

എല്ലാ പ്രസംഗവേദികളിലും കോഴയും സരിതയും വർഗീയതയും അലറിവിളിക്കുമ്പോൾ പാരിസ്ഥിതിക അവബോധം മുന്നോട്ടുവയ്ക്കുകയാണ്‌ ഈ മുദ്രാവാക്യത്തിലൂടെ. പ്രകൃതിക്ക്‌ കൂട്ടായി നിന്ന്‌ അതിനെ സംരക്ഷിച്ചില്ലെങ്കിൽ വരാൻ പോകുന്ന വിപത്ത്‌ വളരെ വലുതായിരിക്കും. ആഗോളതാപനത്തിന്‌ മരംകൊണ്ടു മാത്രമേ മറുപടി പറയാൻ കഴിയൂ എന്ന്‌ കേരളം തിരിച്ചറിഞ്ഞു തുടങ്ങിയിരിക്കുന്നു.

പണ്ടെങ്ങുമില്ലാത്തതുപോലെ കേരളം വറചട്ടിയിൽ നിന്നും അടുപ്പിലേക്ക്‌ വീണിരിക്കുകയാണ്‌. പുഴയായ പുഴയെല്ലാം വറ്റിത്തുടങ്ങിയിരിക്കുന്നു. കിളികൾ ചത്തുവീഴുന്നു. പനകൾ തനിയെ കത്താൻ തുടങ്ങുന്നു. മരുവൽക്കരണത്തിന്റെ നാന്ദിയായി കേരളത്തിൽ ഈന്തപ്പനകൾ കുലച്ചുതുടങ്ങിയിരിക്കുന്നു. ഇനിയുള്ള രാഷ്ട്രീയ സാമൂഹിക സാംസ്കാരിക പ്രവർത്തനങ്ങൾ എല്ലാംതന്നെ പ്രകൃതിയെ സംരക്ഷിക്കണം എന്ന ആശയം മുന്നോട്ടുവയ്ക്കുന്നത്‌ ആയിരിക്കണം.

കുടിവെള്ളം ശേഖരിക്കുന്നതിനിടയിലുണ്ടായ സംഘട്ടനത്തെ തുടർന്നാണ്‌ ലാത്തൂരിൽ 144 പ്രഖ്യാപിച്ചത്‌ എന്നത്‌ വരാൻ പോകുന്ന വലിയ സംഘർഷങ്ങളുടെയും യുദ്ധങ്ങളുടെയും സൂചനയാണ്‌.

പ്രകൃതി സ്നേഹിയായ സ്ഥാനാർഥി പ്രസാദിന്റെ ചിഹ്നത്തിലേയ്ക്ക്‌ കുറേനേരം ഞാൻ നോക്കി നിന്നു. ചിഹ്നങ്ങളുടെ ചരിത്രത്തിൽ ഏറ്റവും പഴക്കം അവകാശപ്പെടാവുന്നത്‌ അരിവാളും ധാന്യക്കതിരും. ഈ ചിഹ്നത്തോടൊപ്പം ഉണ്ടായിരുന്ന നുകം വച്ച കാള, കുടിൽ, ആൽമരം, ദീപം ഇവയൊന്നും ഇപ്പോഴില്ല. എ കെ ഗോപാലൻ ലോക്സഭയിലെ പ്രതിപക്ഷ നേതാവായതും ഇഎംഎസ്‌ നമ്പൂതിരിപ്പാട്‌ കേരളത്തിലെ ആദ്യ മുഖ്യമന്ത്രിയായതും ഈ ചിഹ്നത്തിൽ ജനങ്ങൾ വോട്ടുചെയ്തതുകൊണ്ട്‌ ആയിരുന്നല്ലോ.

Saturday, 9 April 2016

ന്യൂനപക്ഷക്കണ്ണുകളിൽ ഭയത്തിന്റെ പതാകകൾ


മതാതീത സാംസ്കാരിക യാത്ര മലപ്പുറത്തെത്തിയപ്പോൾ ചില ആശങ്കകളൊക്കെയുണ്ടായിരുന്നു. മതാതീത സംസ്കാരം എന്ന ആശയത്തെ അനുകൂലിക്കുവാൻ സാധ്യതയില്ലാത്ത ന്യൂനപക്ഷ സമൂഹത്തിന്‌ ഭൂരിപക്ഷമുള്ള പ്രദേശമാണല്ലോ മലപ്പുറം.

ഇവിടെയുള്ളവരിൽ നിന്ന്‌ മതാതീത സംസ്കാരത്തിന്റെ വിളംബര ചിത്രങ്ങൾ ആലേഖനം ചെയ്ത വാഹനത്തിന്‌ ഇന്ധനം വാങ്ങി ഒഴിക്കുവാനുള്ള പണം ശേഖരിക്കാൻ പറ്റുമോ? ഞങ്ങൾ ലഘുലേഖകളും ശബ്ദകങ്ങളും നൽകി സംഭാവനകൾ സ്വീകരിക്കാൻ ശ്രമിച്ചു. ഒഴിഞ്ഞ ബക്കറ്റുമായി ജനങ്ങളുടെ മുന്നിൽ നിശ്ചയദാർഢ്യത്തോടെ നിന്നു.

അത്ഭുതകരമായിരുന്നു ജനങ്ങളുടെ പ്രതികരണം. അവർ ആവശ്യത്തിന്‌ പണം തന്ന്‌ ഞങ്ങളെ സഹായിച്ചു. അവരുടെ കണ്ണുകളിൽ ഞങ്ങൾ വായിച്ചെടുത്തത്‌ ഭയത്തിന്റെയും നിസഹായതയുടെയും സഹകരണ മനോഭാവത്തിന്റെയും കവിതകളായിരുന്നു. പലരുമായും ഞങ്ങൾ സ്വകാര്യ സംവാദങ്ങൾ നടത്തി.

ഹിന്ദുവർഗീയതയെ എന്നതുപോലെ ഇസ്ലാം-ക്രൈസ്തവ വർഗീയതയേയും പ്രതിസ്ഥാനത്ത്‌ നിർത്തിക്കൊണ്ടായിരുന്നല്ലോ ഞങ്ങളുടെ പ്രസംഗങ്ങളും പ്രയാണങ്ങളും. ജനങ്ങളുടെ പ്രതികരണത്തിൽ നിന്നും ഞങ്ങൾ മനസിലാക്കിയത്‌ ഹിന്ദുമത വർഗീയവാദികൾക്ക്‌ കേരള രാഷ്ട്രീയത്തിൽ മേൽക്കൈ നേടാൻ കഴിഞ്ഞാൽ ന്യൂനപക്ഷ സമൂഹങ്ങൾ ശാരീരികമായി ആക്രമിക്കപ്പെടും എന്ന ഭയം നിലനിൽക്കുന്നു എന്നതാണ്‌.

ഈ ഭയത്തിന്‌ എന്തെങ്കിലും അടിസ്ഥാനമുണ്ടോ? വംശഹത്യ ലക്ഷ്യമാക്കി ഗുജറാത്തിൽ നടന്ന നരനായാട്ടും ഇപ്പോൾ ഭരണകൂടത്തിന്റെ കുടക്കീഴിൽ മറ്റു സംസ്ഥാനങ്ങളിൽ നടക്കുന്ന ന്യൂനപക്ഷ വേട്ടയും ഈ ഭയത്തിന്‌ അടിസ്ഥാനമുണ്ടെന്ന്‌ നമ്മളോട്‌ പറയുന്നുണ്ട്‌. അതിനാൽ ന്യൂനപക്ഷസമൂഹങ്ങളുടെ രക്ഷയ്ക്ക്‌ മതാതീത സംസ്കാരം എന്ന ആശയം പ്രയോജനപ്പെടും എന്ന്‌ അവർ പറഞ്ഞു. മനുഷ്യസംഗമ സംഘാടകരുടെ കൈയിൽ ചുവന്ന ഗാന്ധിനോട്ടുകൾ വച്ചു കൊടുത്തുകൊണ്ട്‌ നിസ്കാരത്തഴമ്പുള്ള ഒരു വന്ദ്യ വയോധികൻ പറഞ്ഞത്‌ ഈ ആശയം കൂടി കേരളത്തിൽ ഉണ്ടെങ്കിലേ ഞങ്ങൾക്കും കൂടി ഇവിടെ ജീവിക്കാൻ കഴിയൂ എന്നതാണ്‌.

ഹിന്ദുമത ഭീകരതയ്ക്ക്‌ ഉദാഹരണമായി രോഹിത്‌ വെമുല ഉൾപ്പെടെയുള്ളവരുടെ രക്തസാക്ഷിത്വം മാത്രമല്ല ചേകന്നൂർ മൗലവിയുടെ വധം, കൈവെട്ടുകേസ്‌, മുടിപ്പള്ളി വിവാദം, മദ്രസകളിലെ ബാലപീഡനം തുടങ്ങിയ ഇസ്ലാമിക വിഷയങ്ങളും ഞങ്ങൾ ഉന്നയിച്ചിട്ടും ന്യൂനപക്ഷ സമൂഹം ഞങ്ങളെ അഭിവാദ്യം ചെയ്തു.

ആ അഭിവാദ്യത്തിനു പിന്നിൽ പ്രവർത്തിച്ച ചേതോവികാരം, മതാതീതമായി മനുഷ്യനെ സ്നേഹിക്കണമെന്ന ശ്രേഷ്ഠമായ ആശയമായിരുന്നു. ഹിന്ദുമത വർഗീയതയ്ക്ക്‌ മേൽക്കൈ ലഭിച്ചിടത്തെല്ലാം അവിശ്വാസികൾ മാത്രമല്ല ഇസ്ലാം, ക്രൈസ്തവ മത വിശ്വാസികളും വേട്ടയാടപ്പെടുകയാണ്‌. നരേന്ദ്ര ധബോൽക്കറേയും ഗോവിന്ദ്‌ പൻസാരെയെയും എം എം കൽബുർഗിയേയും വെടിവച്ചുകൊന്ന അതേ കൈകൾ തന്നേയാണ്‌ ഒഡിഷയിൽ പുരോഹിതന്മാരേയും കന്യാസ്ത്രീകളേയും ആക്രമിച്ചതും ഗുജറാത്തിലേയും മറ്റും ഇസ്ലാമിക സമൂഹത്തെ ഇല്ലാതാക്കാൻ ശ്രമിച്ചതും. കേരളത്തിൽ നിന്നും ന്യൂനപക്ഷ സമൂഹത്തിന്റെ ഭയവിഹ്വലതകൾ ഒഴിവാക്കപ്പെടേണ്ടതുണ്ട്‌.

യഥാർഥത്തിൽ ഹിന്ദു വർഗീയതയ്ക്ക്‌ മേൽക്കൈ ഉണ്ടായാൽ വേട്ടയാടപ്പെടുന്നത്‌ മുസ്ലിങ്ങളും ക്രിസ്ത്യാനികളും മാത്രമല്ല, യഥാർഥ ഇരകൾ കേരളത്തിലെ ദളിതർ തന്നെ ആയിരിക്കും. അബദ്ധങ്ങളിൽ നിന്നും അബദ്ധങ്ങളിലേക്ക്‌ ചാടിക്കൊണ്ടിരിക്കുന്ന ഗോത്രമഹാസഭാ നേതാവടക്കം കേരളത്തിലെ എല്ലാ കീഴാളരും ഈ വിപത്ത്‌ തിരിച്ചറിയേണ്ടതുണ്ട്‌.

Wednesday, 30 March 2016

അതിർത്തിയിലെ അപകർഷക്കൊടികൾ


ഇസ്ലാംമത വിരോധത്തിലാണ്‌ ചില ഹിന്ദു സംഘടനകൾ ഇന്ത്യയിൽ നിലനിൽക്കുന്നത്‌ എന്ന ഒരു ധാരണ പരക്കെ ഉണ്ടായിട്ടുണ്ട്‌ എന്ന്‌ തോന്നുന്നു. ബാബറിപ്പളളി പൊളിച്ചതും ഗുജറാത്തിലെ വംശീയഹത്യയുമൊക്കെ ഇതിന്‌ ശക്തമായ പിൻബലം നൽകുന്നുണ്ട്‌. കമ്യൂണിസ്റ്റുകൾ ഉളള സ്ഥലത്തൊക്കെ കമ്യൂണിസ്റ്റുകളാണ്‌ മുഖ്യശത്രു എന്ന തോന്നലും ബലപ്പെട്ടിട്ടുണ്ട്‌. അത്‌ ശരിയുമാണ്‌. കാരണം കമ്യൂണിസ്റ്റ്‌ പ്രസ്ഥാനങ്ങളിൽ ജാതിമത വ്യത്യാസങ്ങൾ ഇല്ലല്ലോ.

യഥാർഥത്തിൽ ഹിന്ദുസംഘടനകളുടെ ശത്രു ആരാണ്‌? സൂക്ഷ്മമായി പരിശോധിച്ചാൽ ഹിന്ദു സംഘടനകളുടെ മുഖ്യശത്രു ഇന്ത്യയിലെ ദളിതരാണെന്ന്‌ കാണാം. ഇന്ത്യയിൽ നടന്നിട്ടുളള ദളിത്‌ വേട്ടകൾക്ക്‌ നേതൃത്വം നൽകിയത്‌ അഹൈന്ദവ മതങ്ങളോ കമ്യൂണിസ്റ്റുകളോ അല്ല.

ദളിതർ ശത്രുപക്ഷത്ത്‌ വരാൻ കാരണമെന്താണ്‌? അവർ ഹിന്ദുക്കളല്ല എന്നതാണ്‌ പ്രധാന കാരണം. ഹിന്ദു മതത്തിൽ ബ്രാഹ്മണൻ, ക്ഷത്രിയൻ, വൈശ്യൻ, ശൂദ്രൻ എന്നീ നാല്‌ വിഭാഗങ്ങൾ മാത്രമല്ലേയുളളൂ. അതിനപ്പുറത്തുളളവരും ആര്യാധിനിവേശത്തിന്‌ മുൻപുതന്നെ ഇന്ത്യൻ ഉപഭൂഖണ്ഡത്തിൽ ഉണ്ടായിരുന്നവരുമായ ജനങ്ങളാണ്‌ ദളിതർ. അവർ പടുത്തുയർത്തിയ സാംസ്കാരിക മഹിമകൾ സിന്ധുനദീതട സംസ്കാരമെന്ന പേരിൽ പ്രസിദ്ധവുമാണ്‌.

പൂജ, യുദ്ധം തുടങ്ങി മനുഷ്യരാശിക്ക്‌ പ്രയോജനപ്രദമല്ലാത്ത ഒരു തൊഴിലും അവർ ചെയ്തില്ല എന്നാൽ മനുഷ്യർക്ക്‌ വിശപ്പടക്കുവാനും മാന്യമായി ജീവിക്കാനും പറ്റിയ പണികളൊക്കെ ഇന്ത്യയിലെ ദളിതരുടെ പാഠശാലകളായിരുന്നു. അവർ അത്‌ പഠിക്കുകയും അതിൽ വിജയിക്കുകയും ചെയ്തു.

എന്നാൽ പിന്നെ നാം കാണുന്നത്‌ തൊഴിലുകളെ കുലത്തൊഴിലുകളാക്കി മാറ്റുകയും അത്‌ ചെയ്യുന്ന തൊഴിലാളികളെ മാനുഷിക പരിഗണന അർഹിക്കാത്തവരായി മാറ്റിനിർത്തുന്നതുമാണ്‌. നൂറ്റാണ്ടുകളായി അപഹസിക്കപ്പെടുകയും മാറ്റിനിർത്തപ്പെടുകയും ചെയ്ത ഈ മനുഷ്യർ പാർക്കുന്ന അതിർത്തികളിൽ നിറയെ പാറിപ്പറക്കുന്നത്‌ അപകർഷതയുടെ കൊടികളാണ്‌.

ജാതിവ്യവസ്ഥയ്ക്കെതിരായുളള പോരാട്ടങ്ങൾ ശക്തിപ്പെടുകയും സാധ്യതകൾ മുന്നിൽ തെളിഞ്ഞുവരികയും ചെയ്തപ്പോൾ അവർ അപമാനിക്കപ്പെട്ട തൊഴിലുകളിൽ നിന്ന്‌ വിമുക്തരായി. എന്നാൽ അപകർഷതാബോധം ഒഴിവാക്കാനുളള ഔഷധം അവർക്ക്‌ ലഭിച്ചതുമില്ല.

ദളിതൻ മേൽമീശ വയ്ക്കുന്നത്‌ കുറ്റകൃത്യമായി കരുതിയിരുന്ന കാലത്താണ്‌ അയ്യങ്കാളി മീശ വച്ചു നടന്നത്‌. തലയിൽ കെട്ടുന്നത്‌ പാടില്ലെന്ന്‌ വിധിച്ച കാലത്താണ്‌ അയ്യാ വൈകുണ്ഠർ തലക്കെട്ട്‌ ധരിച്ച്‌ നടന്നതും കീഴാള ജനതയെ അതിന്‌ പ്രേരിപ്പിച്ചതും. പാശ്ചാത്യവേഷം ധരിച്ച പൊയ്കയിൽ അപ്പച്ചൻ വസ്ത്രവിരുദ്ധ നിയമം സൃഷ്ടിച്ച സവർണ ഹൈന്ദവതയ്ക്ക്‌ പരുക്കേൽപ്പിക്കുകയായിരുന്നു.

വേഷഭൂഷാദികളിലൂടെയുളള ഈ സമരമാർഗം സവർണ ഹിന്ദുക്കൾക്ക്‌ രുചിച്ചില്ല എന്നതിന്റെ തെളിവാണ്‌ പെരിനാട്‌ കലാപം. മേൽവസ്ത്രം ധരിക്കാൻ വേണ്ടി സ്ത്രീകൾ നടത്തിയ സമരമായിരുന്നല്ലോ അത്‌.

ദളിതന്റെ എല്ലാ പുരോഗമനങ്ങളിലും സവർണ ഹിന്ദു അതൃപ്തനായിരുന്നെന്ന്‌ കാണാം. വഴിനടക്കാനുളള അവകാശത്തിനുവേണ്ടി രൂപംകൊണ്ട വൈക്കം സത്യഗ്രഹവും ക്ഷേത്ര പ്രവേശനത്തിനോടുളള എതിർപ്പും ഉദാഹരണങ്ങളാണ്‌.

ക്ഷേത്രപ്രവേശനത്തെ അനുകൂലിച്ചുകൊണ്ട്‌ നോട്ടെഴുതിയ ഗവ. സെക്രട്ടറിയായിരുന്നു മഹാകവി ഉളളൂർ എസ്‌ പരമേശ്വരയ്യർ. അദ്ദേഹത്തെ ഹിന്ദുമതത്തിൽ നിന്നും പുറത്താക്കുകയായിരുന്നല്ലോ.

‘ഞാൻ ഇന്നലെ വരെ ഒരു ബ്രാഹ്മണനായിരുന്നു. ഇന്നുമുതൽ ഒരു മനുഷ്യനായി’- എന്താണ്‌ മഹാകവി ഉളളൂർ ഈ പുറത്താക്കലിനോട്‌ പ്രതിഷേധിച്ചത്‌.

അപകർഷതാബോധം ദളിതന്റെ കൂടെപ്പിറപ്പായി. സവർണ അവർണ പ്രണയങ്ങൾ ഏതാണ്ട്‌ അസാധ്യമായിത്തന്നെ ഇപ്പോഴും തുടരുന്നു. സാവിത്രി അന്തർജനവും ചാത്തൻ പുലയനും ചേർന്നുളള ജീവിതം ഇനിയും വ്യാപകമാക്കേണ്ട ഒരു മാനുഷിക പ്രശ്നമാണ്‌.

അതിനാൽ ഇന്ത്യയിലെ സവർണ ഹിന്ദു സംഘടനകളുടെ മുഖ്യശത്രു ദളിതരാണ്‌. ചരടും കുറിയും ധരിച്ച്‌ സവർണ ഹിന്ദു സംഘടനകളുടെ പ്രകടനത്തിൽ പിൻനിരയിൽ നടന്നുപോകുന്ന ഒരു ദളിതൻ യഥാർഥത്തിൽ നടക്കുന്നത്‌ തിരിച്ചറിവില്ലായ്മയുടെ പാതയിലൂടെയാണ്‌.

വെളിനല്ലൂരെ കാളയും ഓമല്ലൂരെ പാലയും


കേരളം പൂർണമായും കാർഷിക പ്രദേശമായിരുന്നകാലത്ത്‌ കൃഷിയിടങ്ങളിലായിരുന്ന കലയും കായിക പ്രകടനങ്ങളും എല്ലാം അരങ്ങേറിയിരുന്നത്‌. പോത്തോട്ടം, കാളയോട്ടം, മരമടി തുടങ്ങി ജനസഹസ്രങ്ങളുടെ സാന്നിധ്യത്തിൽ നടന്ന കായികവിനോദങ്ങൾ അന്യം നിന്നു കഴിഞ്ഞു. കൃഷിയുപേക്ഷിക്കുകയും തരിശിട്ട വയലുകളിൽ രൂപംകൊണ്ട തണ്ണീർത്തടങ്ങൾപോലും മണ്ണിട്ടു നികത്തുകയും ചെയ്തതോടെ ഇത്തരം വിനോദങ്ങളുടെ കൊടിയിറക്കം സംഭവിക്കുകയായി.

കാക്കാരിശ്ശിനാടകം, വെള്ളരിനാടകം തുടങ്ങിയ കലാരൂപങ്ങളും തലപ്പന്ത്‌, കിളിമാസ്‌, കുട്ടിയും കോലും തുടങ്ങിയ കായിക വിനോദങ്ങളും അസ്തമിച്ചുകഴിഞ്ഞു. കതിരുകാളയും വണ്ടിക്കുതിരയും കെട്ടുകാളയും നെൽക്കതിരും വയ്ക്കോലും ഇല്ലാതെതന്നെ നിർമിക്കുവാൻ നമ്മൾ പഠിച്ചുകഴിഞ്ഞു. വയലിറമ്പിലെ മരത്തണലുകളിൽ വിശ്രമിച്ചിരുന്ന നാടൻ ദൈവങ്ങളെ കോൺക്രീറ്റുകൂടാരങ്ങളിലെ ഉഷ്ണമുറികളിലേക്ക്‌ മാറ്റിപാർപ്പിച്ചു. ദൈവമുണ്ടായിരുന്നെങ്കിൽ ഈ ചതിക്ക്‌ മനുഷ്യരെ ശപിക്കുമായിരുന്നു.

വയലിലും പുഴയോരങ്ങളിലും നടന്ന വലിയ കാളച്ചന്തകളും അവയോടനുബന്ധിച്ച്‌ സംഘടിപ്പിച്ചിരുന്ന വാണിഭമേളകളും വളരെ പ്രധാനപ്പെട്ടതായിരുന്നു. കൊല്ലം ജില്ലയിൽ ഇത്തിക്കരയാറിന്റെ തീരത്തുള്ള ദൃശ്യചാരുതയാർന്ന ഒരു ക്ഷേത്രമാണ്‌ വെളിനല്ലൂർ ശ്രീരാമസ്വാമിക്ഷേത്രം. കഥകളി സംസ്കാരം സമ്പുഷ്ടമായ പ്രദേശമാണ്‌ വെളിനല്ലൂർ. ഓയൂർ കൊച്ചുഗോവിന്ദപ്പിള്ള, കലാമണ്ഡലം ഗംഗാധരൻ, കലാമണ്ഡലം രാധാകൃഷ്ണൻ തുടങ്ങിയ വലിയ പ്രതിഭകൾക്കു ജന്മം നൽകിയ പ്രദേശം. എന്നാൽ അന്ധവിശ്വാസത്തിന്റെ ആധിക്യം കാരണം ബാലിവിജയം കഥകളി ഇവിടെ നടത്താറില്ല.

ഉണ്ണുനീലി സന്ദേശത്തിൽ പരാമർശിക്കപ്പെടുന്ന ഈ ക്ഷേത്രം ഒരു കാലത്ത്‌ ഓയൂർ, കരിങ്ങന്നൂർ തുടങ്ങിയ വലിയ ഒരു പ്രദേശത്തിന്റെ സാംസ്കാരിക കേന്ദ്രവുമായിരുന്നു. ഇതിന്റെ പരിസരത്താണ്‌ ആയിരക്കണക്കിന്‌ കന്നുകാലികളെ വിൽക്കുകയും വാങ്ങുകയും ചെയ്തിരുന്ന കാളച്ചന്ത നടന്നിരുന്നത്‌. പലവിധ കലാപരിപാടികളോടൊപ്പം ദളിതരുടെ ദ്രാവിഡത്തനിമയുള്ള മുടിയാട്ടവും കമ്പടികളിയും മറ്റും ഇവിടെ നടത്തിയിരുന്നു.

കാളച്ചന്ത കഴിഞ്ഞാൽ പിന്നെ ‘മണലിക്കച്ചോടം’ ആണ്‌. കാർഷികവിഭവങ്ങൾ മാത്രമല്ല ഗൃഹോപകരണങ്ങൾ, കരകൗശലവസ്തുക്കൾ, കൗതുകവസ്തുക്കൾ, മലരും പൊരിയും വളയും റിബണുമടക്കമുള്ള അലങ്കാര വസ്തുക്കൾ, സേമിയപ്പായസം… ഇങ്ങനെ നിരവധി കച്ചവടസാധനങ്ങളാണ്‌ അവിടെ സ്വരുക്കൂട്ടിയിരുന്നത്‌. ഇതിനോടനുബന്ധിച്ച്‌ കവിയരങ്ങുകളും സംഘടിപ്പിച്ചിരുന്നു. വെളിനല്ലൂരെ മണൽത്തിട്ടയിൽ, ഡി വിനയചന്ദ്രൻ, ബാലചന്ദ്രൻ ചുള്ളിക്കാട്‌, ഏഴാച്ചേരി രാമചന്ദ്രൻ തുടങ്ങിയവർ വരെ കവിതകൾ അവതരിപ്പിച്ചിട്ടുണ്ട്‌.

നൂറ്റാണ്ടുകൾക്ക്‌ മുൻപ്‌ വെളിനല്ലൂരെ ചന്തസ്ഥലത്ത്‌ പാലക്കുറ്റിയിൽ കെട്ടിയിട്ടിരുന്ന ഒരു കാള കുറ്റിയും പിഴുത്‌ കിഴക്കോട്ടോടി. അഴകും ആരോഗ്യവും തികഞ്ഞ ആ കാളക്കൂറ്റനെ പിടിച്ചുനിർത്തുവാൻ ആർക്കും സാധിച്ചില്ല. നാപ്പതോളം കിലോമീറ്റർ ഓടിയ ആ കാളയെ ഓമല്ലൂർ എന്ന പ്രദേശത്തെ ആരോഗ്യവാനായ ഒരു യുവാവ്‌ ബന്ധിച്ചു. കയറിന്റെ അറ്റത്ത്‌ ഉണ്ടായിരുന്ന പാലക്കുറ്റി തന്നെ വയലിൽ തറച്ച്‌ കാളയെ ബന്ധിച്ചു. ആ പാലക്കുറ്റി പൊട്ടിക്കിളിർത്ത്‌ വൻമരമാവുകയും അതിന്റെ തണലിൽ ഓമല്ലൂർ വയൽ വാണിഭം ആരംഭിക്കുകയും ചെയ്തു എന്നാണ്‌ ഐതിഹ്യം.

ചിരവ, കലപ്പ, മെതിയടി, അരിപ്പ തുടങ്ങിയ വയസേറെയുള്ള ഉപകരണങ്ങൾ പോലും ഓമല്ലൂർ വയൽ വാണിഭത്തിൽ വിൽക്കാൻ വച്ചിട്ടുണ്ട്‌. കവിയരങ്ങുകളും ചരിത്ര സെമിനാറുകളും ഓമല്ലൂരിൽ സംഘടിപ്പിക്കാറുണ്ട്‌. കൃഷിയെല്ലാം നശിച്ചെങ്കിലും ഓർമപ്പെടുത്തലിന്റെ സൗരഭ്യമുള്ള ഈ ഗ്രാമോത്സവങ്ങൾ സന്തോഷകരമാണ്‌.