പാട്ടുകൾ

പാട്ടുകൾ എന്നോ മരിച്ച കിനാവിന്റെ
പാട്ടുകൾ ചിന്തയിൽ ചൂളയൊരുക്കുന്ന
പാട്ടുകൾ നീണ്ട നിശകളിൽ നീറുന്ന
പാട്ടുകൾ ഞാനും മനസ്സും വിയർക്കുന്ന
പാട്ടുകൾ കൈവെള്ളയിൽ തറഞ്ഞീടുന്ന
ചാട്ടകൾ ചോരച്ചുവയുള്ള ചിന്തുകൾ

പാട്ടുകൾ പച്ചിലപ്പാമ്പായ് പിടയ്ക്കുന്നു
പാട്ടുകൾ താളക്കുടത്തിൽ തിളയ്ക്കുന്നു
പാട്ടുകൾ തേങ്ങലിൽ തേനായ് തുളുമ്പുന്നു
പാട്ടുകൾ പമ്പമേളത്തിൽ പറക്കുന്നു
കാറ്റിന്റെ തോളത്തിരിക്കുന്നു, നൊമ്പര
പൂക്കളിൽ പോയുറങ്ങുന്നു നിരന്തരം
തോൽക്കുന്നൊരെന്നിൽ തുടിക്കൊപ്പമാടുന്നു
ഞാറ്റുവേലയ്ക്കു വിരുന്നിനായെത്തുന്നു

പാട്ടുകൾ ഉത്തരം ചൊല്ലും ഉടുക്കുകൾ
പാട്ടുകൾ ഉൾക്കരുത്തിന്റെ ഉടുപ്പുകൾ
പാട്ടുകൾ തീവ്രാനുരാഗത്തുടിപ്പുകൾ
പാട്ടുകൾ പൗണ്ഡ്രം മുഴക്കിപ്പടയ്ക്കുള്ളി-
ലാർത്തിരമ്പുന്ന മിടുക്കുകൾ ചോമന്റെ-
രാത്രികൾ തോറും വിറയ്ക്കുന്ന താളത്തി-
ലോർത്തു നിൽക്കാറുള്ള പാട്ടുകൾ, പൊള്ളുന്നൊ-
രാഗ്രഹങ്ങൾക്കുള്ളിൽനിന്നും പിറക്കുന്നൊ-
രാഗ്നേയമായി ജ്വലിക്കുന്ന പാട്ടുകൾ.

പാട്ടുകൾ നീലക്കിളിയുടെ നെഞ്ചിലെ
തീക്കനലായി ചുടുന്നു കണ്ണീരിന്റെ -
നീലക്കയങ്ങളിൽ നീരവം നീന്തുന്ന-
വേദനയിൽനിന്നു വിങ്ങുന്നു-
നോവുമീ
പാട്ടുകൾ പാടാതിരിക്കുവാനാവാത്ത-
പാട്ടുകൾ പാടിക്കരഞ്ഞുവേവുന്നു ഞാൻ