മഹാഭാരതം - വ്യാസന്‍റെ സസ്യശാല ആസ്വാദനക്കുറിപ്പ് 

------------------------------------------------------------------------------------------

മോഹനൻ ചേനോളി

കഥകളും ഉപകഥകളും ആയിരത്തിലധികം കഥാപാത്രങ്ങളും കൊണ്ട് സമ്പന്നമാണല്ലോ വിശ്വമഹാകവി വേദവ്യാസ വിരചിതമായ മഹാഭാരതം: ഇതിലുള്ളത് മറ്റ് പലേടത്തുമുണ്ടാവാമെങ്കിലും ഇത് പോലൊന്ന് വേറെയില്ല തന്നെ.

കുഞ്ഞിക്കുട്ടൻ തമ്പുരാൻ എത്ര അയത്നലളിതമായാണ് ആ മഹത് ഗ്രന്ഥം പദാനുപദം മലയാളമാക്കിയതെന്ന്‌ നമുക്ക് നന്നായറിയാം. സാമാന്യ സംസാരത്തിൽപ്പോലും കവിതയുള്ള കവി തന്നെയായിരുന്നല്ലോ തമ്പുരാൻ.

ഓരോ ഭാരത കഥാപാത്രവും നമുക്കുള്ളിലുണ്ട്: ഓരോ അനുഭവത്തിൽ, ഓരോ രൂപത്തിൽ, ഭാവത്തിൽ... ചിലപ്പോൾ സ്വീകാര്യമായി, മറ്റു ചിലപ്പോൾ അസ്വീകാര്യമായി....

കലഹങ്ങളിൽ ഐക്യപ്പെട്ടും ചില ഐക്യങ്ങളിൽ കലഹപ്പെട്ടുമങ്ങനെ കൂടെത്തന്നെയുണ്ട് പലരും.

ഭൂരിഭാഗം പേരുകളും നാം ഓർക്കാറേയില്ല: ഇങ്ങനെയൊരു പേര് അവർക്കുണ്ടെന്നു പോലുമോർക്കാറില്ല: ആ അറിയാപ്പേരുകാരുടെ അന്തസ്സംഘർഷങ്ങളുടെ കഥ കൂടിയാണ് ഈ ഇതിഹാസമെന്ന് ഓർമ്മിപ്പിക്കുകയാണ് പ്രിയ കവി കുരീപ്പുഴ ശ്രീകുമാർ 'മഹാഭാരതം- വ്യാസൻ്റെ സസ്യശാല' എന്ന കൃതിയിലൂടെ.

മഹാഭാരതമെന്ന വടവൃക്ഷത്തിലൊട്ടിയോ അരികുപറ്റിയോ വേരുറച്ച എണ്ണൂറോളം കഥാപാത്രങ്ങളെ സൂക്ഷ്മവൽക്കരിക്കുകയാണ് ഈ സസ്യ ശാലയിൽ. അവരെയൊക്കെ സൂക്ഷ്മമായ കുറുങ്കവിതകളാക്കി കവി മാറ്റുന്നു.

ഒരു നാടൻ പാട്ടുണ്ടല്ലോ സൂക്ഷ്മവൽക്കരണത്തിന് നിദർശനമായി:

''രാമായണമൊരു

പെണ്ണുകഥ

ഭാരതമൊരു -

പിടി മണ്ണുകഥ'' എന്ന്.

കുരീപ്പുഴ പറയുന്നുണ്ട്: യുദ്ധവും സമാധാനവും ഈ പുസ്തകത്തിലുണ്ട്. കുറ്റവും ശിക്ഷയുമതെ. നിന്ദിതരും പീഡിതരുമുണ്ട്.

അഗമ്യഗമനം, സ്ത്രീ അപഹരണം, ബലാൽസംഗം, ശവഭോഗം, നരഹത്യ, മൃഗ ഹത്യ, യാഗം, സവർണ്ണാധിപത്യം, സ്വയംവരം, ചാർവാക ദർശനം, സാംഖ്യം, യാഗനിഷേധം, പ്രണയം, മാതൃകാ ദാമ്പത്യം, പ്രാണിസ്നേഹം, ആദിവാസി ജീവിതം... ഇവയൊക്കെ ഈ കൃതിയിലുണ്ട്. ഒപ്പം ഭാവനയുടെ അനന്തവിഹായസ്സുമാണ് മഹാഭാരതം..

ദൃശ്യവും അദൃശ്യവുമായ വൻ മരങ്ങളുടെ മഹാവനമായ ഈ കൃതിയെ പുതിയ കാലത്തു നിന്നു കൊണ്ട് നോക്കിക്കാണുകയാണ് കവി, ഈ സസ്യ ശാലയിൽ..

ഭാരത കഥയിൽ ഏറെ കണ്ണീർ വീണത് അഭിമന്യു എന്ന കൗമാരക്കാരന് വേണ്ടിയാവും:

ഭദ്രേ സുഭദ്രേ

സമാശ്വാസ വാക്കുകൾ -

ക്കപ്പുറത്തേക്കിഴ പൊട്ടി

വീഴുന്നു ഞാൻ.

അച്ഛനില്ല, അമ്മാവനില്ല

രക്ഷിക്കുവാൻ

നിസ്സഹായത്വമേ

മർത്യൻ്റെ ജീവിതം.. എന്ന് കുരീപ്പുഴ എഴുതുമ്പോൾ ആ അശരണ കൗമാരത്തിൻ്റെ ധർമ്മസങ്കടങ്ങൾ നമ്മിലേയ്ക്കരിച്ചിറങ്ങും.

തൊട്ടപ്പുറത്ത് ഗർഭിണിയായ ഉത്തരയെ നോക്കൂ..

അടിവയറ്റിൽ

മൃദുസ്പന്ദനം

ജീവൻ്റെ കണിക.

പരീക്ഷിതമെൻ്റെ ഭൂതാലയം.

പ്രിയനേ

പുരുഷാഹങ്കാരമീ യുദ്ധം

അതിൽ വെന്തു

വീഴുന്ന പ്രാണികൾ സ്ത്രീകൾ..

ഉള്ളുവെന്ത വാക്കുകൾ തീയായി കവിതയാവുന്നത് കാണൂ.

ഇതിനെച്ചേർത്ത് സുഭദ്രയെക്കൂടി വായിച്ച് നമുക്ക് നിർത്താം:

അകത്തും പുറത്തും

മഹോത്സവം, തേർ -

വിട്ടൊടുക്കം നടുക്കുന്ന

യുദ്ധപ്പറമ്പിൽ.

മകൻ, തെറ്റു ചെയ്യാതെ

കൊല്ലപ്പെടുമ്പോൾ

പ്രിയൻ വെന്ന രാജ്യ -

മമ്മയ്ക്കോ ശ്മശാനം

ഈ സസ്യ ശാലയിലേക്കൊന്ന് കയറി നോക്കൂ. ചിലപ്പോൾ നിങ്ങൾക്ക് കൈവിട്ടു പോയ നിങ്ങളെത്തന്നെയും കണ്ടെത്താൻ കഴിഞ്ഞേക്കും... ഇവരിൽപ്പലരും നിങ്ങൾ തന്നെയായേക്കാം.

സ്നേഹം പ്രിയ കവീ@kureeppuzha sreekumar

മോഹനൻ ചേനോളി

11/02/23

ലോകാ സമസ്താ സുഖിനോ ഭവന്തു - ഏതു ലോകം?

 ലോകാ സമസ്താ സുഖിനോ ഭവന്തു - ഏതു ലോകം?

---------------------------------------------------------------------------------

സ്വാമി വിവേകാനന്ദന്‍റെ, ഭ്രാന്താലയം എന്ന പുരസ്ക്കാരത്തിന് കേരളത്തെ അര്‍ഹമാക്കിയത് അയിത്തം ആയിരുന്നല്ലോ. അയിത്തം ഹിന്ദുമതത്തിന്റെ സംഭാവനയാണ്.കേരളത്തില്‍ നിന്നും പ്രത്യക്ഷത്തില്‍ അതുമാറിയെങ്കിലും കേരളീയന്റെ മനസ്സില്‍ അത് കൊട്ടാരം കെട്ടിയിട്ടുണ്ട്. വിവാഹാലോചനയുടെ സമയത്തും പൂജാകാര്യങ്ങളിലും എല്ലാം കേരളീയര്‍ ഇന്നും അത് അനുഷ്ഠിക്കുന്നുണ്ടല്ലോ.

അങ്ങനെയുള്ള ഹിന്ദുമതത്തിന്റെ ഒരു അത്യുന്നതസമ്മേളനം കഴിഞ്ഞയാഴ്ച തിരുവനന്തപുരത്ത് ഒരു ശീതീകരിച്ച പോഷ് ഓഡിറ്റോറിയത്തില്‍ നടന്നല്ലോ.വര്‍ഷങ്ങള്‍ക്കുമുന്‍പ്, അവിടെ കേന്ദ്രസാഹിത്യ അക്കാദമിയുടെ നേതൃത്വത്തില്‍  യുവകവി സമ്മേളനം നടത്തിയതും  അയിത്തം കല്‍പ്പിച്ച യുവകവികള്‍ അതിന്റെ മുന്നില്‍  കരിങ്കൊടി പ്രകടനം നടത്തിയതും ഓര്‍ത്തുപോകുന്നു. ഞാനവരെ അഭിസംബോധന ചെയ്തതും അന്നു മുതല്‍ ഇന്നുവരെ കേന്ദ്രസാഹിത്യ അക്കാദമി  എനിക്കു അയിത്തം കല്‍പ്പിച്ചതുമൊക്കെ ഓര്‍ക്കുമ്പോള്‍ ചിരിവരുന്നുണ്ട്.

ലോകാസമസ്താ സുഖിനോ ഭവന്തു!

ജാതിവ്യവസ്ഥയെന്ന മനുഷ്യവിരുദ്ധ പ്രക്രിയയുടെ സര്‍വകലാശാലയായ ഹിന്ദുമതവിശ്വാസികള്‍ സംഘടിപ്പിച്ച കോണ്‍ക്ലേവില്‍ പങ്കെടുത്തുകൊണ്ട് ഒരു മലയാള സാഹിത്യകാരന്‍ ലോകാസമസ്താ സുഖിനോ ഭവന്തു എന്നതിനപ്പുറം ഒന്നുമില്ല എന്നു പ്രസംഗിച്ചിരിക്കുന്നു. അറിയാന്‍ വയ്യാതെ പറഞ്ഞതല്ല, ഒരാവേശത്തിന് തട്ടിവിട്ടതാകും. 

കമ്മ്യൂണിസവും സോഷ്യലിസവും സനാതന ധര്‍മ്മത്തിന് മുന്നില്‍ ഒന്നുമല്ലെന്നും അദ്ദേഹം സിദ്ധാന്തിച്ചു. സനാതന ധര്‍മ്മത്തെക്കുറിച്ചും അതിലെ വേല ചെയ്യണം കൂലി ദൈവം തരും എന്ന സനാതനമായ ആശയത്തെക്കുറിച്ചും കാള്‍ മാര്‍ക്സിനും എംഗല്‍സീനും ധാരണയില്ലാതെ പോയതു ലോക തൊഴിലാളി വര്‍ഗ്ഗത്തിന് ഗുണമായി ഭവിച്ചു.

നമ്മുടെ സാഹിത്യകാരന് ഇങ്ങനെയൊക്കെ വിശ്വസിക്കാനുള്ള  അവകാശം , ഡോ.അംബേദ് ക്കറിന്റെ നേതൃത്വത്തില്‍ രൂപപ്പെടുത്തിയ ഭരണഘടന നല്കുന്നുണ്ട്. അദ്ദേഹത്തിന്റെ വിശ്വാസം സംരക്ഷിച്ചുകൊണ്ട് കേരളത്തില്‍ ജീവിക്കാനൊരു തടസ്സവുമില്ല. ആരെങ്കിലും തടസ്സപ്പെടുത്തിയാല്‍ പുരോഗമനവാദികള്‍ പോലും മുന്നില്‍ നിന്നു അദ്ദേഹത്തെ സംരക്ഷിക്കുകയും ചെയ്യും.

അങ്ങനെയാണെങ്കിലും ലോകാസമസ്താ സുഖിനോ ഭവന്തു എന്ന വരിയുടെ ആശയം പൂര്‍ണ്ണമായൊന്നു മനസ്സിലാക്കുന്നത് നന്നായിരിക്കും.

"സ്വസ്തി പ്രജാഭ്യാം പരിപാലയന്താം

ന്യായേണ മാർഗേണ മഹിം മഹീശാ

ഗോ ബ്രാഹ്മണേഭ്യ: ശുഭമസ്തു നിത്യം

ലോകാ സമസ്താ സുഖിനോ ഭവന്തു." എന്നാണല്ലോ ശ്ലോകം. ഈ ശ്ലോകത്തിന്റെ ആശയം ബഹുഭാഷാപണ്ഡിതനും ദേവസ്വം ബോര്‍ഡ് കോളജിലെ അദ്ധ്യാപകനുമായിരുന്ന ഡോ. എം.എസ്.ജയപ്രകാശ് വിശദീകരിക്കുന്നുണ്ട്. അന്ധമായ മതവിശ്വാസം പുലര്‍ത്താതിരുന്ന ഒരു അന്വേഷകന്‍ എന്ന നിലയില്‍ അദ്ദേഹത്തിന്റെ വ്യാഖ്യാനം നിഷ്പക്ഷമതികള്‍ക്ക് സ്വീകരിക്കാവുന്നതാണ്.

"സമസ്ത ലോകത്തിനും ക്ഷേമമുണ്ടാകട്ടെ എന്നാണല്ലോ അവസാനത്തെ വരിയുടെ അർത്ഥം. മറ്റു വരികളുടെ അർത്ഥമിതാണ്.' സ്വസ്തി' എന്നത് പൂജകഴിഞ്ഞ് ബ്രാഹ്മണർ അനുഗ്രഹ രൂപത്തിൽ പറയുന്ന പദമാണ്. ന്യായമായ മാർഗ്ഗത്തിലൂടെ രാജാവ് പ്രജകളെ ഭരിക്കട്ടെയെന്നാണ് അടുത്ത വരിയിൽ പറഞ്ഞിരിക്കുന്നത്.ഇവിടെ ന്യായമായ മാർഗ്ഗമെന്നു പറഞ്ഞിരിക്കുന്നത് വിശദീകരിക്കേണ്ടതുണ്ട്. ചാതുർവർണ്ണ്യ വ്യവസ്ഥയിൽ ജനങ്ങളെ ഭരിക്കുന്നത് ക്ഷത്രിയനാണല്ലോ. ക്ഷത്രിയൻ എങ്ങിനെ ഭരിക്കണമെന്ന് മനു വ്യക്തമാക്കുന്നുണ്ട്.

" ബ്രാഹ്മണാൻ പയ്യുപാസീത

പ്രാതരുത്ഥായ പാർത്ഥീവ

ത്രൈ വിദ്യാവിദ്ധാൻ വിദുഷ

സ്തിഷ്ഠേത്തേ ഷാഞ്ച ശാസനേ"

രാജാവ് എന്നും രാവിലെ ഉണർന്ന് മൂന്നു വേദങ്ങളും നീതിശാസ്ത്രങ്ങളും പഠിച്ച ബ്രാഹ്മണരെ വന്ദിച്ച് അവർ പറയുന്നതുപോലെ ഭരണം നടത്തണം. ബ്രാഹ്മണന്റെ ശാസനയനുസരിച്ചു മാത്രമേ ഭരിക്കാവൂ എന്നതാണ് ന്യായമായ മാർഗ്ഗം. അങ്ങനെ ആയാൽ അടുത്ത വരിയിലെ 'ഗോ ബ്രാഹ്മണേഭ്യ: ശുഭമസ്തു നിത്യം' സാദ്ധ്യമാകും. അതായത് പശുവിനും ബ്രാഹ്മണനും എന്നെന്നും സുഖംഭവിക്കട്ടെയെന്നു സാരം. മാംസാഹാരം ഉപേക്ഷിച്ചിട്ടുള്ള ബ്രാഹ്മണനെ നിലനിർത്തുന്നത് പാലും, തൈരും, വെണ്ണയും, നെയ്യും മറ്റുമാണല്ലോ. ആ നിലയ്ക്ക് ബ്രാഹ്മണന്റെ പ്രാധാന്യം ഒരു മൃഗമായ പശുവിനും ഉണ്ടായിരിക്കണമല്ലോ. ഇങ്ങനെ ബ്രാഹ്മണനും പശുവിനും നിത്യസുഖം വന്നാൽ ലോകത്തിനു മുഴുവൻ സുഖം വന്നു എന്നു കരുതിക്കൊള്ളണം. ഭൂരിപക്ഷം വരുന്ന ജനങ്ങളെ ചൂഷണത്തിനു വിധേയമാക്കുന്ന ചാതുർവർണ്ണ്യ വ്യവസ്ഥ നിലനിർത്തിക്കൊണ്ട് സമസ്തലോകത്തിനും സുഖംഭവിക്കട്ടെ എന്നു പറയുമ്പോൾ ബ്രാഹ്മണന്റെ സുഖമാണ് ലോകത്തിന്റെ സുഖം എന്നു സ്ഥാപിക്കുകയാണ് ചെയ്യുന്നത്.''

ഇതാണ് എം.എസ്.ജയപ്രകാശിന്റെ വിശ്വസനീയമായ വ്യാഖ്യാനം. ഈ വ്യാഖ്യാനം അദ്ദേഹം ഡോ.അംബേദ്ക്കര്‍ സ്റ്റഡി സെന്ററില്‍ അവതരിപ്പിക്കുകയും നിരവധി പ്രസംഗവേദികളില്‍ വിശദീകരിക്കുകയും ചെയ്തിട്ടുണ്ട്.

ഏത് മനുഷ്യനും പരസ്പരബഹുമാനം അര്‍ഹിക്കുന്നു എന്നതല്ലാതെ ബ്രാഹ്മണന് മാത്രമായി ഒരു ബഹുമാനാര്‍ഹതയുമില്ല. ആ ചിന്ത ശരീരമനങ്ങാതെ ഭക്ഷണം ലഭ്യമാക്കാനുള്ള ഒരു കുതന്ത്രം മാത്രമാണു. ഇന്ത്യയില്‍ പരീക്ഷിച്ചു വിജയിച്ച കുതന്ത്രം. അത് ഹംസയുടെ പ്രത്യശാസ്ത്രമാണ്. പ്രാചീനതയുടെ ഈ പ്രവര്‍ത്തന രീതിക്കെതിരെയാണ് ഭാരതത്തില്‍ ബുദ്ധ ജൈന ചിന്തകളുണ്ടായത്.

സനാതനധര്‍മ്മത്തിന്‍റെ കര്‍മ്മപദ്ധതി ജാതിവ്യവസ്ഥകൊണ്ട് മനുഷ്യവിരുദ്ധമാകയാല്‍ ആധുനിക സമൂഹത്തിനു അത് അംഗീകരിക്കാന്‍ സാധ്യമല്ല. യുക്തിബോധത്തിന്റെ അടിത്തറയുള്ള ചാര്‍വാക ദര്ശനത്തെയും മറ്റും അസഹിഷ്ണുതയും ഹിംസയും കൊണ്ട് നേരിടുമ്പോഴാണ് ആര്‍ഷഭാരതസംസ്ക്കാരം ആഭാസം എന്ന ചുരുക്കപ്പേരിന് അര്‍ഹമാകുന്നത്. ഇന്ത്യ അങ്ങനെയാകുന്നത് അഭിലഷണീയമല്ല.

സാറാ അബൂബേക്കറും ഡോ.ആര്‍.ഇ.ആഷറും

 സാറാ അബൂബേക്കറും ഡോ.ആര്‍.ഇ.ആഷറും

---------------------------------------------------------------------------

കേരളത്തിനുണ്ടായ രണ്ടു പ്രധാന നഷ്ടങ്ങളാണ് സാറാ അബൂബേക്കറിന്റെയും പ്രൊഫ.ആര്‍.ഇ.ആഷറിന്റെയും മരണം.

ഒരാള്‍ കേരളത്തില്‍ ജനിച്ച് കന്നഡഭാഷയെ സ്നേഹിച്ചു. ആ അയല്‍മൊഴിയില്‍ മരണമില്ലാത്ത പുസ്തകങ്ങളെഴുതി.സാറാ അബൂബേക്കര്‍.

ആഷറാകട്ടെ യൂറോപ്പില്‍ ജനിച്ച് മലയാളത്തെ സ്നേഹിച്ചു. മലയാളത്തിലെ എണ്ണം പറഞ്ഞ കൃതികള്‍ ഇംഗ്ലീഷിലാക്കി.മലയാളം ഡോ.റൊണാള്‍ഡ് ഇ.ആഷറെന്ന സാഹിത്യാസ്വാദകനെ ഏറെ ബഹുമാനിച്ചു. മലയാളത്തോട് കാട്ടിയ അസാധാരണമായ സ്നേഹത്തിന് പ്രതിഫലമായി കേരള സാഹിത്യ അക്കാദമി സ്വര്‍ണ്ണമെഡല്‍ നല്കി ബഹുമാനിച്ചു.

വിവാഹാനന്തരമാണ് സാറാ കന്നഡ ഭാഷയില്‍ അന്വേഷണങ്ങള്‍ നടത്തിയത്. ഹിന്ദു വര്‍ഗീയവാദികളുടെ വെടിയേറ്റുമരിച്ച ഗൌരി ലങ്കേഷിന്റെ പിതാവ് പി.ലങ്കേഷ് നടത്തിയിരുന്ന  ലങ്കേഷ് പത്രികയിലാണ് ചന്ദ്രഗിരിയ തീരദള്ളിയെന്ന പ്രസിദ്ധ നോവല്‍ അച്ചടിച്ചു വന്നത്. മതാതീത സംസ്ക്കാരത്തെയും മനുഷ്യത്വത്തെയും വാരിപ്പുണര്‍ന്ന പ്രസിദ്ധീകരണമായിരുന്നു അത്.. ചന്ദ്രഗിരിയുടെ തീരമെന്ന സാറയുടെ കഥയും മനുഷ്യപക്ഷത്തു നിന്നുകൊണ്ടു മതവിചാരണ നടത്തുന്നതായിരുന്നു. മുത്തലാഖിന് ഇരയായി കുടുംബജീവിതം നഷ്ടപ്പെട്ട ഒരു പാവം പെണ്‍കുട്ടി പള്ളിക്കുളത്തില്‍ ചാടിമരിക്കുന്നത് ചിത്രീകരിച്ചതിലൂടെ യാഥാസ്ഥികരുടെ മതബോധത്തെ സാറാ ഞെട്ടിച്ചു. ഈ പുസ്തകം മലയാളപ്പെടുത്തിയത് സി.രാഘവന്‍ ആയിരുന്നു. അദ്ദേഹം സുപ്രധാനമായൊരു മാറ്റം പുസ്തകത്തിലെ പ്രമേയത്തില്‍ വരുത്തി. ആത്മഹത്യ ചന്ദ്രഗിരിപ്പുഴയിലാക്കി. ഇത് പരിഭാഷകന്‍റെ അധൈര്യം മൂലം ഉണ്ടായതാണെന്ന് കാസര്‍കോട്ടെ കവി രവീന്ദ്രന്‍ പാടിയും മറ്റും അഭിപ്രായപ്പെട്ടിരുന്നു.

ചന്ദ്രഗിരിയുടെ തീരത്തെന്ന നോവലിന്‍റെ പിറവിയെ കുറിച്ച് സാറാ അബൂബേക്കര്‍ അനുസ്മരിച്ചിട്ടുണ്ട്. അതിങ്ങനെയാണ് "കഥാപാത്രം സത്യമല്ല.എന്നാല്‍ കഥ സത്യമാണ്.ഞാന്‍ പത്തില്‍ പഠിക്കുമ്പോഴാണ് ആ സംഭവം അറിഞ്ഞത്.അവള്‍ക്കെന്‍റെ പ്രായമായിരുന്നു."

തന്നെക്കൂടി സിനിമയ്ക്കു കൊണ്ടുപോകുന്നില്ലെങ്കില്‍ നിങ്ങളും സിനിമയ്ക്കു പോകരുതെന്നു ഭര്‍ത്താവിനോട് ശഠിച്ച സാറ പുരോഗമന നിലപാടുകളുടെ പേരില്‍ പുട്ടൂരില്‍ വച്ച് ആക്രമിക്കപ്പെട്ടു. ഈ സംഭവത്തില്‍ കേസ് കൊടുത്തു വിജയിക്കുകയായിരുന്നു സാറാ അബൂബേക്കര്‍.

പന്ത്രണ്ടു നോവലുകളും കുറെ ചെറുകഥകളും യാത്രാവിവരണവും സാറ എഴുതിയിട്ടുണ്ട്.മാധവിക്കുട്ടിയുടെയും പി.കെ.ബാലകൃഷ്ണന്റെയും ബി.എം.സുഹറയുടെയും കൃതികള്‍ സാറ കന്നഡയിലേക്ക് മൊഴിമാറ്റി. വീട്ടിലിരിക്കേണ്ടി വരുന്ന സ്ത്രീകളുടെ എക്കാലത്തെയും സ്വകാര്യ സുഹൃത്ത് റേഡിയോ ആണല്ലോ. റേഡിയോ പ്രോഗ്രാമുകള്‍ സ്ഥിരമായി കേട്ടിരുന്ന സാറ നിരവധി റേഡിയോ നാടകങ്ങളുമെഴുതി .കര്‍ണ്ണാടക സാഹിത്യ അക്കാദമി അവാര്‍ഡ് അടക്കം നിരവധി പുരസ്ക്കാരങ്ങള്‍ പുരോഗമനവാദിയായ സാറാ അബൂബേക്കറിന് ലഭിച്ചിട്ടുണ്ട്. കേരളത്തിന്‍റെ അഭിമാനഭാജനമായ ഈ വീരപുത്രി മതഭയം ഇല്ലാതെ മനുഷ്യത്വത്തിന് വേണ്ടി എക്കാലവും വാദിച്ചു.

വിവര്‍ത്തനത്തിനു വഴങ്ങാത്ത മലയാളത്തിന്റെ ഓമനവാക്കുകള്‍ക്കായി പുതിയ വാക്കുകള്‍ പോലും സൃഷ്ടിച്ചാണ് പ്രൊഫ.ആഷര്‍ ബേപ്പൂര്‍ സുല്‍ത്താന്‍റെ കൃതികള്‍ ആംഗലപ്പെടുത്തിയത്. ബഷീറിന്‍റെ വീട്ടില്‍ പലവട്ടം വന്നു താമസിച്ചും കുഴിയാനകളെ നേരില്‍ കണ്ടുമൊക്കെയാണ് ആഷര്‍ ആ കൃതികളിലിറങ്ങിയത്. തണുത്തുറഞ്ഞ ഇംഗ്ലണ്ടില്‍ ജനിച്ചു വളര്‍ന്ന ആഷറിന് ആനയും കുഴിയാനയും അട്ടയും കുളയട്ടയും സുപരിചിതമായിരുന്നില്ല. ഹെര്‍മന്‍ ഗുണ്ടര്‍ട്ടിനെപ്പോലെ അപരിചിതവാക്കുകളുടെ അന്വേഷകനായി മാറുകയായിരുന്നു ആഷര്‍. കോട്ടയത്തെ മഹാത്മാ ഗാന്ധി സര്‍വകലാശാലയില്‍ ബഷീര്‍ ചെയര്‍ ആരംഭിച്ചപ്പോള്‍ പ്രഥമമേധാവിയായതും ആഷറായിരുന്നു. തകഴിയുടെ തോട്ടിയുടെ മകനും ആഷര്‍ ആംഗലപ്പെടുത്തിയിട്ടുണ്ട്. 

എന്‍സൈക്ലോപീഡിയ ബ്രിട്ടാനിക്കയിലും മറ്റും മലയാള സാഹിത്യത്തെ കുറിച്ചെഴുതിയതും ഡോ.ആഷര്‍ ആയിരുന്നു.

സാറാ  അബൂബേക്കറിന്റെയും ഡോ.ആര്‍.ഇ.ആഷറിന്റെയും വേര്‍പാടില്‍ കേരളത്തിനുള്ള ദു:ഖം അഗാധമാണ്.

കേരളകവിതയില്‍ പെണ്‍പടയുടെ മുന്നേറ്റം

 കേരളകവിതയില്‍ പെണ്‍പടയുടെ മുന്നേറ്റം 

-----------------------------------------------------------------------

രണ്ടായിരത്തി ഇരുപത്തിരണ്ടിലെ കേരളകവിത പെണ്ണെഴുത്തിനാല്‍ സമ്പന്നമായിരുന്നു. എഴുത്തമ്മയില്ലാത്ത മലയാള കാവ്യചരിത്രത്തെ പുതിയ എഴുത്തുകാരികള്‍ സ്ഫോടനാത്മകമായ രചനകളിലൂടെ തിരസ്ക്കരിച്ചു. അഭിമാനകരമായ കാവ്യമുന്നേറ്റമാണ് സംഭവിച്ചത്.

ചരിത്രം സ്ത്രീവിരുദ്ധമാണ്. ദളിത് സമൂഹത്തെ അക്ഷരങ്ങളില്‍ നിന്നും അകറ്റി നിറുത്തിയിരുന്നത് പോലെ സ്ത്രീ സമൂഹത്തെയും അകറ്റി നിറുത്തി. അക്ഷരവും കലാപ്രകടനങ്ങളും അവര്‍ക്ക് നിരോധിച്ചു. നവോത്ഥാന പരിശ്രമങ്ങള്‍ക്ക് ശേഷവും ഈ നിലപാട് തുടര്‍ന്നു. ഹൃദയത്തിലെ കവിതയെ തുറന്നുവിടാന്‍ ഇപ്പോള്‍ സഹായിച്ചത് നവമാധ്യമങ്ങളാണ്. കവിതയെഴുതിയാല്‍ സ്വന്തം വീട്ടിലെ പുരുഷാധിപത്യം സ്ത്രീരൂപം പോലുമണിഞ്ഞു നിറയൊഴിക്കുമെന്നതിനാല്‍ എഴുത്തുകാരികള്‍ മൊബൈല്‍ ഫോണിന്‍റെ സഹായത്തോടെ ഗറില്ലകളായി.അവരുടെ ചിന്തകളും കിനാവുകളും അക്ഷരവല്‍ക്കരിക്കുകയും ഒറ്റ ക്ലിക്കില്‍ ഭൂഖണ്ഡങ്ങളെ അപ്രസക്തമാക്കി പരസ്യപ്പെടുകയും ചെയ്തു. സരസ്വതീദേവിയല്ല, സോഷ്യല്‍ മീഡിയയാണ് പെണ്ണെഴുത്തിനെ അനുഗ്രഹിച്ചത്.

2022 ജനുവരിയില്‍ ഒറ്റ ദിവസംകൊണ്ട് നാനൂറ്റിയെഴുപത്തിയേഴു പേര്‍ വായിച്ച കവിതയാണ് എസ്.പാര്‍വതിയുടെ പെണ്ണി റങ്ങിപ്പോകുന്നു. സ്ത്രീ സ്വാതന്ത്ര്യത്തിലേക്ക് കിലുകിലെ കവിയാനായി  ഇറങ്ങിപ്പോകുന്നതായിരുന്നു കവിതയുടെ പ്രമേയം.

ഫെബ്രുവരിയില്‍ ഒറ്റ ദിവസം കൊണ്ട് നാനൂറ്ററുപതില്‍ പരം പേര്‍ വായിച്ച കവിത ലതാ ഉണ്ണിത്താന്‍റെ ജാരന്റെ ചുംബനം ആയിരുന്നു. തെറ്റാണെന്നറിഞ്ഞു ചെയ്യുന്ന തെറ്റിനെ കിതപ്പോടെ ചുംബിച്ചു കൂമ്പിപ്പോയ കണ്ണുകള്‍ ഈ കവിതയില്‍ രതിസ്വാതന്ത്ര്യത്തിന്റെ പതാക പാറിപ്പിക്കുന്നു.  

മാര്‍ച്ചില്‍ മുന്നൂറ്ററുപത്തഞ്ചിലധികം വായനക്കാര്‍ ചേര്‍ത്തുപിടിച്ചകവിത ചിത്രകാരി കൂടിയായ ശ്രീദേവി മധുവിന്റെ തുന്നല്‍ക്കാരിയായിരുന്നു. നിറനൂലുകള്‍ സൂചിയില്‍ കൊരുത്ത് പീതനിറമാര്‍ന്ന പകലില്‍ നൃത്തം വയ്ക്കുന്ന സ്ത്രീയാണ് കവിതയുടെ കേന്ദ്രം.

ഏപ്രിലില്‍ മുന്നൂറ്റെണ്‍പതില്‍ പരം വായനക്കാര്‍ ഒറ്റ ദിവസം  കൊണ്ടു സ്വീകരിച്ച കവിത സി.സി.പൂര്‍ണ്ണിമയുടെ കണിവെള്ളരിയാണ്. കണിവെള്ളരി പോലുള്ള രണ്ടമ്മിഞ്ഞ റൌക്കയില്‍ നിന്നും പുറത്തേക്ക് ചാടിച്ച് മീന്‍ വെട്ടാന്‍ കുന്തിച്ചിരുന്ന അമ്മമ്മയെ ഈ കവിത അടയാളപ്പെടുത്തി.

മേയില്‍ ഒറ്റ ദിവസം കൊണ്ട് നാനൂറ്റിമുപ്പതിലധികം വായനക്കാരെ സ്വാധീനിച്ചത് ചിത്രകാരി കൂടിയായ പ്രസന്ന പാര്‍വതിയുടെ മേഘമെന്ന ചെറുകവിതയാണ്. സ്വന്തം സംഭരണിയിലേക്ക് വെള്ളം വീഴ്ത്താനായി അയലത്തുകാരന്റെ വീടിന് മുകളിലെ ആകാശം വാങ്ങി മേഘം നട്ടു വളര്‍ത്തുന്നതായിരുന്നു കവിതയുടെ പ്രമേയം.

ജൂണില്‍ എണ്ണൂറ്ററുപതില്‍ പരം വായനക്കാരെ ആകര്‍ഷിച്ച കവിതയാണ് റുബീന മന്‍സൂറിന്‍റെ മൂത്തമകള്‍. താഴെയുള്ളവര്‍ പിറക്കുന്നതോടെ അനാഥയായിപ്പോകുന്ന മൂത്തമകളെയാണ് റുബീന കാവ്യവല്‍ക്കരിച്ചത്. പ്രധാനപ്പെട്ട ഒരു മനശാസ്ത്ര വിഷയമായിരുന്നു അത്.

ജൂലൈയില്‍ ഏറെ വായനക്കാരെ ആകര്‍ഷിച്ചത് നീതു സി.സുബ്രഹ്മണ്യന്‍റെ കറുത്തകുട്ടിയായിരുന്നു.ക്ളാസ്സില്‍ കരഞ്ഞു നില്‍ക്കുന്ന കറുത്തകുട്ടിയുടെ ഹൃദയഭേദകമായ ചിത്രം ആ കവിതയിലുണ്ടായിരുന്നു. ഇരുപത്തിനാല് മണിക്കൂറിനകം അഞ്ഞൂറ്റി ഇരുപതിലേറെ വായനക്കാരാണ് കറുത്ത കുട്ടിയെ ചേര്‍ത്തുപിടിച്ചത്.

ഓഗസ്റ്റില്‍ കെ. അനാമികയുടെ പച്ച ഏറെ ശ്രദ്ധിക്കപ്പെട്ടു.പള്ളിക്കാട്ടിലെ മൈലാഞ്ചിച്ചെടി ഉമ്മയെയോര്‍ത്തു കരയുന്ന അക്ഷരചിത്രം ഈ കവിതയെ ശ്രദ്ധേയമാക്കി. നാനൂറിലധികം മലയാളികള്‍ ഓണ്‍ ലൈനില്‍ ഈ കവിത വായിച്ചു.

സെപ്തംബറില്‍ ആതിര മുരളീധരന്റെ മ്യാവൂ എന്ന കവിത തൊള്ളായിരത്തോളം വായനക്കാരെ കൊണ്ട് ലൈക്ക് ബട്ടണ്‍ അമര്‍ത്തിച്ചു. ഭര്‍ത്താവും ഭാര്യയും പൂച്ചയും ചേര്‍ന്ന് സ്ത്രീയുടെ ആത്മാഭിമാനത്തിന്‍റെ ചിത്രം വരയ്ക്കുകയാണ് ഈ കവിതയില്‍.

ഒക്ടോബറില്‍ ജലജ പ്രസാദിന്‍റെ, ടീച്ചറിപ്പോള്‍ കുട്ടികളെക്കാള്‍ ചെറുതാണെന്ന കവിത അറുന്നൂറ്റിരുപത്തഞ്ചിലധികം വായനക്കാരെ ആകര്‍ഷിച്ചു. ഫാത്തിമ അഹല്യയും ഫസല്‍ കൃഷ്ണയും ആ പേരുകളിലൂടെ സൃഷ്ടിക്കുന്ന നിഷ്ക്കളങ്കമായ മാനുഷികബോധം ഈ കവിതയെ ശ്രദ്ധേയമാക്കി.

നവംബറില്‍ പുഷ്പഹരിദാസിന്റെ അന്തിക്കള്ള് നാനൂറ്റി എഴുപത്തിലധികം വായനക്കാരെ ആകര്‍ഷിച്ചു. ഭൂമി ഉരുണ്ടതാണെന്നും കറങ്ങുമെന്നും ജാന്വേടത്തി വിശ്വസിക്കാനിടയായ ജീവിതാനുഭവങ്ങളാണ് ഈ കവിതയെ വ്യത്യസ്ഥമാക്കിയത്.പെണ്ണെഴുത്തിന് കള്ളും പ്രമേയമാകാമെന്ന് ഈ കവിത ഉറപ്പിച്ച് പറഞ്ഞു.

ഡിസംബറില്‍ വി.കെ.ഷാഹിനയുടെ വാക്കെന്ന കവിതയാണ് കൂടുതല്‍ വായനക്കാരുടെ ശ്രദ്ധയിലെത്തിയത്. നാനൂറോളം വായനക്കാര്‍ വാക്ക് ആസ്വാദ്യകരമെന്ന് രേഖപ്പെടുത്തി. മുസ്ലിമിനെ കുറിച്ചു പറഞ്ഞപ്പോള്‍ വായപൊത്തുകയും ഹിന്ദുവിനെ കുറിച്ചു പറഞ്ഞപ്പോള്‍ നാടുകടത്തുകയും  മനുഷ്യനെക്കുറിച്ച് പറഞ്ഞപ്പോള്‍ മൃഗശാലയില്‍ അടയ്ക്കപ്പെടുകയും ചെയ്ത വാക്കാണ് കവിതയിലെ താരം.

ഈ കുറിപ്പില്‍ പറഞ്ഞിട്ടുള്ള എല്ലാ കവിതകളും ഫേസ്ബുക്കിലെ ഇന്ന് വായിച്ച കവിതയെന്ന പംക്തിയിലും അതേ പേരുള്ള വാട്ട്സാപ്പ് ഗ്രൂപ്പിലുമുണ്ട്. അതേ പോയവര്‍ഷം കേരളകവിതയില്‍ പെണ്ണെഴുത്തിന്റെ പടയോട്ടമായിരുന്നു. അഭിമാനകരമായ മുന്നേറ്റം.

2022ല്‍ തന്നെയാണ് ഒരു മത സംഘടന ഒറ്റ സ്ത്രീയെ പോലും പ്രവേശിപ്പിക്കാത്ത കവിയരങ്ങ് നടത്തിയത്.  സ്ത്രീ കൂടി ചേര്‍ന്നതാണ് മനുഷ്യസമൂഹമെന്ന തിരിച്ചറിവ് മതങ്ങള്‍ക്ക് എന്നാണുണ്ടാവുക!

- കുരീപ്പുഴശ്രീകുമാര്‍

പുണ്യവഴിയിലെ ശിശുപീഡനങ്ങള്‍

 പുണ്യവഴിയിലെ ശിശുപീഡനങ്ങള്‍

------------------------------------------------------

എല്ലാ മതങ്ങളിലും ശിശുപീഡനം ഒരു പുണ്യവൃത്തിയായോ മതപരമായ ആവശ്യകതയായോ കണക്കാക്കുന്നുണ്ട്. കുഞ്ഞുങ്ങളുടെ നിര്‍ബ്ബന്ധിത അഗ്രചര്‍മ്മ ഛേദനം മുതല്‍ കുത്തിയോട്ടത്തിന്‍റെ ചൂരല്‍ക്കുത്തും തീകൂട്ടി ചുറ്റും നടത്തുന്ന കുട്ടിക്കാവടിയാട്ടവും വരെ ഇതില്‍ പെടും.

കുട്ടികളുടെ തോളില്‍ കാവടിയും വച്ച് പൊരിവെയിലത്ത് ദീര്‍ഘദൂരം നടത്തിക്കുക, അഗ്നികുണ്ഠം ഒരുക്കി അതിനുചുറ്റും തീക്കാവടിയാട്ടം നടത്തിക്കുക, കുഞ്ഞുങ്ങളുടെ നാവില്‍ ശൂലം കുത്തിയിറക്കുക തുടങ്ങിയ ശിശുപീഡനങ്ങളെ ആചാരങ്ങളുടെ പേരിലാണ് സമൂഹം നടപ്പാക്കിക്കൊണ്ടിരിക്കുന്നത്.

കുത്തിയോട്ടത്തിന്‍റെ ജീവിതചര്യകള്‍ ഒരു പരിഷ്കൃത സമൂഹത്തിനു ഒരിയ്ക്കലും അംഗീകരിക്കാന്‍ കഴിയാത്തതാണ്.

ആ ശിശുപീഡനത്തെ ന്യായീകരിക്കാന്‍ ഒരു കഥയും ഉണ്ടാക്കിയിട്ടുണ്ട്. കോവലനെ തേടിയിറങ്ങിയ കണ്ണകിയെ കുട്ടികള്‍ കളിയാക്കുന്നു. അവര്‍ക്ക് വഴിതെറ്റുന്നു. സംഹാരരുദ്രയായ കണ്ണകി ഭദ്രകാളിയായി മാറി ശിശുബലി ആവശ്യപ്പെടുന്നു. രക്തപാനത്തില്‍ ഡ്രാക്കുളയെ പരാജയപ്പെടുത്തുന്ന ആസക്തിയാണ് എല്ലാ കെട്ടുകഥകളിലും ഭദ്രകാളിക്കുള്ളത്. കുട്ടികളുടെ മാതാപിതാക്കള്‍ കുറ്റം ഏല്‍ക്കുകയും പ്രായശ്ചിത്തമായി ശിശുരക്തം നിവേദിക്കാമെന്ന് 

ഉറപ്പുകൊടുക്കുകയും ചെയ്യുന്നു. കുട്ടികളെ പള്ളിക്കൂടത്തില്‍ വിടാതെ പട്ടുടുപ്പിച്ചു കുറെ ദിവസം നിറുത്തുകയും ഒടുവില്‍ ചൂരല്‍കൊണ്ട് കുട്ടികളുടെ വാരിയില്‍ കുത്തി ചോരചീറ്റിച്ച് കാളിയെ പ്രീതിപ്പെടുത്തുകയും ചെയ്യുന്നു.

ചൂരല്‍ മുറിയല്‍ അല്ലെങ്കില്‍ ചൂരല്‍ക്കുത്ത് എന്നാണ് ഭഗവതീക്ഷേത്രങ്ങളില്‍ നടന്നുവരുന്ന ഈ ദുരാചാരത്തിന്റെ പേര്.

കുഞ്ഞുങ്ങളുമായി അശ്ലീലസരസ്വതി പാടി കൊടുങ്ങല്ലൂര്‍ പോകുന്നതും സാംസ്ക്കാരികമായ ഒരു ശിശുപീഡനമാണ്. സി.കേശവന്‍ ബാല്യകാലത്ത് ഇങ്ങനെ പോയി വന്നിട്ട് ആ തെറിഭജന നിഷ്ക്കളങ്കമായി വീട്ടിലിരുന്ന് ആലപിച്ച് അമ്മയുടെ അടിവാങ്ങിച്ചത് രേഖപ്പെടുത്തിയിട്ടുണ്ടല്ലോ. സഹോദരന്‍ അയ്യപ്പനും മറ്റും ഈ പ്രാകൃതാചാരത്തെ അപലപിക്കുകയും പ്രതിഷേധ പ്രകടനം നടത്തുകയും ചെയ്തിട്ടുണ്ട്.കവിതയും എഴുതിയിട്ടുണ്ട്. ഈ അശ്ലീലസരസ്വതി ഫോക് ലോറിന്‍റെ ഭാഗമായി ഇപ്പോള്‍ ഗവേഷകര്‍ അടയാളപ്പെടുത്തുന്നുണ്ട്.

പുണ്യസ്ഥലമെന്ന് കരുതപ്പെടുന്ന ഇടങ്ങളിലേക്ക് പിഞ്ചുകുഞ്ഞുങ്ങളുമായി പോകുന്ന പ്രവണത നിരുത്സാഹപ്പെടുത്തേണ്ടതാണ്. തിരിച്ചറിവില്ലാത്ത കാലത്ത് 

രക്ഷിതാവിന്‍റെ തോളില്‍ കിടന്ന് ഈ കുഞ്ഞുങ്ങള്‍ അനുഭവിക്കുന്ന അരക്ഷിതാവസ്ഥ ഒഴിവാക്കപ്പെടേണ്ടതാണ്.

ആലപ്പുഴ ജില്ലയിലെ ഒരു ഭക്തന്‍ ഒന്നരവയയ്യുള്ള കുഞ്ഞിനെ തോളിലിട്ട് അഞ്ചുമണിക്കൂറിലധികം ശബരിമലയില്‍ ക്യൂ നിന്ന ചിത്രം അടുത്ത ദിവസങ്ങളില്‍ പത്രങ്ങളിലുണ്ടായിരുന്നു. ചന്ദ്രാനന്ദന്‍ റോഡ് സംഗമിക്കുന്നിടത്ത് വടം പിടിച്ച് കാത്തുനില്‍ക്കുന്ന ഈ പിതാവിന്റെയും തോളിലുറങ്ങുന്ന നിരപരാധിയായ കുഞ്ഞിന്റെയും സചിത്ര വാര്‍ത്ത  ഹൃദയദ്രവീകരണ ശക്തിയുള്ളതായിരുന്നു.

ആലപ്പുഴയുടെ തെക്കേയറ്റത്തുനിന്നും നിലക്കല്‍ വരെയുള്ള വാഹനയാത്ര. പമ്പ വരെയുള്ള കഠിനയാത്ര. പിന്നെ പിതാവിന്റെ തോളില്‍ കിടന്ന്, കാല്‍ നടയ്ക്കനുസരിച്ച് കുലുങ്ങിക്കുലുങ്ങിയുള്ള മലകയറ്റവും ഇറക്കവും തുടര്ന്ന് വീടുവരെയുള്ള മടക്കയാത്ര. നല്ലമലയാളം പോലും പറയാനറിയാത്ത ആ കുഞ്ഞ് എത്ര വിഷമിച്ചിട്ടുണ്ടാകും. അമ്മയെകാണണമെന്നും മുലപ്പാല്‍ കുടിക്കണമെന്നും ആ പിഞ്ചു കുഞ്ഞിനു തോന്നിയിട്ടുണ്ടാകില്ലെ? അരയിലെ തുണിയിലവശേഷിപ്പിച്ച മലവും മൂത്രവുമായിട്ടല്ലേ പതിനെട്ടാം പടി കടന്നത്? 

തിരിച്ചറിവും മലകയറാനുള്ള ആരോഗ്യവുമുള്ള സഹോദരിമാരെ കയറാന്‍ അനുവദിക്കാത്ത പുണ്യയാത്രാക്രമം കുഞ്ഞുങ്ങളെ പുരുഷന്മാരോടൊപ്പം കൊണ്ടുപോകാന്‍ അനുവദിച്ചിട്ടുണ്ട്. ശബരിമലയാതകൊണ്ട് വിളിച്ചുപറയാന്‍ കഴിയാത്തത്ര വൈഷമ്യങ്ങള്‍ ആ കുഞ്ഞ് അനുഭവിച്ചതിന് ആരാണ് ഉത്തരവാദി. ശിശുസംരക്ഷണത്തിനും ബാലാവകാശ സംരക്ഷണത്തിനും എല്ലാ സംവിധാനങ്ങളും കോടതിയുമൊക്കെയുള്ള നാടല്ലേ നമ്മുടേത്? എന്തുകൊണ്ടാണ് ഇങ്ങനെ സംഭവിക്കുന്നത്? പുണ്യയാത്രകള്‍ക്ക് പോകുമ്പോള്‍ കുട്ടികളെ ഒഴിവാക്കാനുള്ള ഔചിത്യം സമൂഹം കാട്ടേണ്ടതുണ്ട്.

അങ്ങനെ കാട്ടിയില്ലെങ്കില്‍ കുട്ടികളുമായുള്ള യാത്രകളെ നിരുത്സാഹപ്പെടുത്താന്‍ നിയമസംവിധാനം ശ്രദ്ധിക്കേണ്ടതാണ്..

രാപ്പനി

 രാപ്പനി

-------------

ഇനിയുമൊരു ജന്മമുണ്ടെങ്കിലെൻ
കാമുകീ
അതിൽ നിന്റെ പെണ്ണു ഞാൻ
നീയെന്റെ ആൺകൊടി

ഇവിടെയീ കായലോരം മതി
നമ്മൾക്ക്‌
ഒരുവട്ടം കൂടി തിളയ്ക്കാൻ തണുക്കാൻ

ഒരു മകൾ
ദാരിദ്ര്യഭാരവും രോഗവും
വിരഹവുമില്ലാത്ത നാസ്തികജീവിതം

പൂക്കൾ വിടർത്തി നീയെഴുതും
അതിൽ എന്റെ പാട്ടുകൾ
പ്രണയവും മധുവുമായ്‌ തുള്ളിടും

രാത്രിയിലിങ്ങനെ
ക്‌നാക്കണ്ടു നീങ്ങവേ
ചീറ്റുന്നു സൈറൺ
തുടങ്ങി ദു:ഖായനം.

കാക്കിക്കുള്ളിലെ കരുണാര്‍ദ്ര ഹൃദയം

 കാക്കിക്കുള്ളിലെ കരുണാര്‍ദ്ര ഹൃദയം 

--------------------------------------------------------------

കൊല്ലം ജില്ലയില്‍ വെളിനല്ലൂര്‍ പഞ്ചായത്തിലെ പെരപ്പയം എന്ന സ്ഥലം.സമീപത്തുകൂടി കായല്‍വീട്ടിലേക്ക് ഓടിപ്പോകുന്ന ഇത്തിയാറ്. ജനപ്രതിനിധികളുടെയും അയല്‍വാസികളുടെയും 

മറ്റും സാന്നിധ്യത്തില്‍, അഭിവന്ദ്യയായ മൃഗസംരക്ഷണ വകുപ്പ് മന്ത്രി ജെ..ചിഞ്ചുറാണി ഒരു ചെറിയ വീടിന്റെ താക്കോല്‍ ഏല്‍പ്പിക്കുകയാണ്. വിറയ്ക്കുന്ന കൈകളോടെ താക്കോല്‍ ഏറ്റുവാങ്ങുമ്പോള്‍ വീട്ടുടമസ്ഥനായി മാറിയ പാവം മനുഷ്യന്റെ കണ്ണിലും   കൊല്ലം ക്രൈം ബ്രാഞ്ചിലെ എ എസ് ഐയായ ഡി.ശ്രീകുമാറിന്‍റെ കണ്ണിലും  അസാധാരണമായ ഒരു തെളിച്ചം.

സ്വന്തം ശമ്പളത്തില്‍ നിന്നു ഒരു ഭാഗം ഇതിനായി നീക്കിവച്ച മനുഷ്യസ്നേഹിയാണ് കേരള പോലീസ് സേനയിലെ അംഗമായ ഡി.ശ്രീകുമാര്‍.

ഭരണകൂടത്തിന്റെ മര്‍ദ്ദനോപകരണം എന്ന പ്രാകൃതാവസ്ഥയില്‍ നിന്നും നമ്മുടെ പോലീസ് സേന വളരെയധികം മാറിയിട്ടുണ്ട്. ചില അപവാദങ്ങള്‍ ഉണ്ടെങ്കില്‍ക്കൂടിയും ഈ മാറ്റം പോലീസ് സേനയുടെ അന്തസ്സും പ്രതിച്ഛായയും വര്‍ദ്ധിപ്പിച്ചിട്ടുണ്ട്. പോലീസുകാരില്‍ വായനാശീലം വര്‍ധിച്ചിരിക്കുന്നു. പല പോലീസ് ഓഫീസുകളിലും നല്ല നിലയില്‍ പ്രവര്‍ത്തിക്കുന്ന ലൈബ്രറികളുണ്ട്. അതിന്റെ പ്രതിഫലനം പോലീസില്‍ വ്യക്തമായി കാണാം.ബി.സന്ധ്യ മുതല്‍ സാദിര്‍ തലപ്പുഴ വരെയുള്ള കവികളും നിരവധി കഥാകാരന്മാരും നാടകക്കാരും മറ്റ് കലാഭിരുചിയുള്ളവരും പോലീസ് സേനയിലുണ്ട്. ഒറ്റപ്പെട്ട സംഭവങ്ങള്‍ മാറ്റി നിറുത്തിയാല്‍ പോലീസിന്റെ പെരുമാറ്റത്തില്‍ ജനസൌഹൃദത്തിന്റെ സുഗന്ധം കലര്‍ന്നിട്ടുണ്ട്. ഈ മാറ്റത്തിന്റെ സുന്ദരമായ ഉദാഹരണമാണ് സ്പെഷ്യല്‍  ബ്രാഞ്ചില്‍ പ്രവര്‍ത്തിക്കുന്ന ഡി.ശ്രീകുമാര്‍.

നിയമവിദ്യാര്‍ഥി ആയിരുന്ന ജിഷയുടെ ദാരുണമായ കൊലപാതകത്തിന് ശേഷം കേരളത്തിലെ അടച്ചുറപ്പില്ലാത്ത വീടുകളുടെ ഞെട്ടിക്കുന്ന വിവരങ്ങള്‍ പോലീസ് മേധാവികള്‍ തന്നെയാണ് പുറത്തുവിട്ടത്. കേരള സര്ക്കാര്‍ ലൈഫ് പദ്ധതിയിലൂടെയും സന്നദ്ധസംഘടനകള്‍ സമൂഹത്തോടുള്ള ഉത്തരവാദിത്ത നിര്‍വഹണത്തിലൂടെയും രാഷ്ട്രീയപാര്‍ട്ടികള്‍ നേതാക്കളുടെ പേരിലുമൊക്കെ നിരവധി വീടുകള്‍ നിര്‍മ്മിച്ചു നല്കി. വിദ്യാര്‍ഥികളും അദ്ധ്യാപകരും അധ്വാനശേഷിയും ധനശേഷിയും വിനിയോഗിച്ച് വഴിയാധാരമായവര്‍ക്ക് കൂരയുണ്ടാക്കിക്കൊടുത്തു. ഇത്രയുമൊക്കെയായിട്ടും ഇനിയും വീടില്ലാത്തവര്‍ കേരളത്തില്‍ അവശേഷിക്കുകയാണ്.

വ്യക്തിയെന്ന നിലയില്‍ പാവങ്ങള്‍ക്ക് ഏറ്റവും കൂടുതല്‍ വീടുകള്‍ നിര്‍മ്മിച്ചു നല്കിയത് കാസര്‍കോട്ടെ ഗോപാലകൃഷ്ണ ഭട്ട് എന്ന സായിറാം ഭട്ട് ആണ്. സീതാംഗോളിയിലെ അബ്ബാസ് അദ്ദേ ഹത്തെ സമീപിച്ചത് പെരുമഴയില്‍ തകര്‍ന്നു പോയ തന്റെ കൂര ഉയര്‍ത്തിനിറുത്താന്‍ ഒരു മുള ചോദിച്ചുകൊണ്ടാണ്. അബ്ബാസിന്റെ ദയനീയസ്ഥിതി സായിറാംഭട്ടിന്റെ മനസ്സലിയിച്ചു. അബ്ബാസിനും കുടുംബത്തിനും രാപ്പാര്‍ക്കാന്‍ ഒരു വീടുതന്നെ ഭട്ട് പണിയിച്ചു കൊടുത്തു. പിന്നീട് പാവങ്ങള്‍ക്ക് ഒരു രൂപപോലും പ്രതിഫലം വാങ്ങാതെ വീടുണ്ടാക്കിക്കൊടുക്കുന്നത് ഒരു ജീവിത ദൌത്യമായി ഭട്ട് സ്വീകരിച്ചു. നാട്ടുവൈദ്യവും അല്‍പ്പസ്വല്‍പ്പം കൃഷിയുമായി ജീവിച്ച അദ്ദേഹം അധ്വാനത്തിലൂടെ സമാഹരിച്ച പണം ഉപയോഗിച്ച് പാവങ്ങള്‍ക്ക് വീടുണ്ടാക്കി. ബദിയടുക്കയില്‍ വച്ച് എണ്‍പത്തഞ്ചാമത്തെ വയസ്സില്‍ മരിക്കുന്നതിനുള്ളില്‍ മുന്നൂറോളം പേര്‍ക്കാണ് അദ്ദേഹം വീടുണ്ടാക്കിക്കൊടുത്തത്. മറ്റ് ജീവകാരുണ്യ പ്രവര്‍ത്തനങ്ങളും അദ്ദേഹം നടത്തിയിരുന്നു.

പോലീസുദ്യോഗസ്ഥനായ ഡി.ശ്രീകുമാറിന്റെയും സുഹൃത്തുക്കളുടെയും ഉത്സാഹത്തില്‍ നീണ്ടകരയില്‍ മദര്‍ഹുഡ് എന്ന പേരിലൊരു ജീവകാരുണ്യ സങ്കേതവും പ്രവര്‍ത്തിക്കുന്നുണ്ട്.അവിടെ അന്തേവാസിയായി എത്തിയ അനന്തു എന്ന പാവം കുട്ടിക്ക് വേണ്ടിയാണ് പെരപ്പയത്ത് വീടൊരുങ്ങിയത്. മാനസികരോഗം വന്ന് വീടുവിട്ടലഞ്ഞ അമ്മയുടെ മകനാണ് അനന്തു. അവസാനകാലത്ത് വിളക്കുടിയിലെ അനാഥാലയത്തിലായിരുന്നു മനോനില തെറ്റിയ അനന്തുവിന്റെ അമ്മ. അനാഥത്വത്തിന്‍റെ കൊടും ചൂടില്‍നിന്ന അനന്തുവിന് രോഗിയായ അച്ഛനെയും ശ്രദ്ധിക്കണമായിരുന്നു.ഈ ചുറ്റുപാടിലാണ് അനന്തുവിനെ ശ്രീകുമാര്‍ കണ്ടെത്തുന്നത്.

താക്കോല്‍ നല്‍കിയശേഷം മന്ത്രിയടക്കമുള്ളവര്‍ അനന്തുവിനൊപ്പം ആഹാരം കഴിച്ചു. പെരപ്പയത്തെ കൊടും ചൂടിനെ സ്നേഹത്തിന്റെ നിലാവ് തഴുകിയ നട്ടുച്ചയായിരുന്നു അത്. പാമ്പുകള്‍ക്ക് മാളമുണ്ട് പറവകള്‍ക്കാകാശമുണ്ട് മനുഷ്യപുത്രനു തലചായ്ക്കാന്‍ മണ്ണിലിടമുണ്ട് എന്നു പറഞ്ഞു പോയ ഒരു നട്ടുച്ച.