ഇത്തിയാറ്റിറമ്പിലൊരു
ലന്തമരത്തണലത്ത്
തണലുണ്ണാന്‍ വന്ന കൂമന്‍
മിഴി പൂട്ടിത്തലയാട്ടി
ആട്ടിയ രാക്കണ്ണിലുണ്ട്
നാടുവാഴിക്കഥയൊന്ന്
ഒന്നുകൊണ്ടൊരായിരത്തെ
വിഴുങ്ങുന്ന മുളനാഴി
നാഴികയായ് മണി കണ്ട
മണലിന്റെ ഭൂതകാലം
കാലത്തിന്‍റെ ഘടികാരം
കാത്തുവച്ചൂ പുഴയോര്‍മ്മ
ഓര്‍മ്മയുടെ വെള്ളപ്പൊക്കം
കരപ്പാടം കണ്ടുകെട്ടി
കെട്ടുമട പൊട്ടിയപ്പോള്‍
നീന്തിച്ചെന്നോനാണൊരുത്തന്‍
ഒരുത്തന്‍റെ കരുത്തോടെ
പദം വച്ചോനാണ്‍ കരിങ്ങന്‍
കരിങ്ങന്‍റെയൂരില്‍ നിന്നും
ചെണ്ടമുട്ടിപ്പടയോട്ടം
ഓട്ടക്കാരില്‍ കുന്തക്കാരും
പന്തക്കാരും കോലുകാരും
കാരമുള്ളിന്‍ ചട്ടയിട്ട്
വെളിയന്‍റെ ഊരു പൊത്തി
പൊത്തിയോരെ കാണുവാനായ്
ആളുകുന്നില്‍ ആലു പൊങ്ങി
പൊങ്ങമരം കാവല്‍ നിന്ന
വാലിക്കുന്നില്‍ വാളു പൊന്തി
പൊന്തിയപാടവിടത്തെ
യുവറാണി പാട്ടിലായി
ആയിമാരും തോഴിമാരും
ചെപ്പെടുത്ത് കൂടെപ്പോയി
പോയ വഴി മാറിപ്പോയി
ഇത്തിയാറ്റിന്‍ തെക്കേക്കര
കരവാഴും നീലമയില്‍
പകല്‍ പോലെ കുറി വച്ചു
വച്ച കുറി നോക്കി നിന്നു
വാക്കര്‍ത്ഥം വണങ്ങി വന്നു
വന്നവരോ കരിങ്ങന്‍റെ
ഊരിലെത്തി കുടി കൂടി
കൂടിയോരെ തേടിയെത്തി
വെളിയന്‍റെ നായപ്പട
പടനീക്കം ചെറുക്കാനായ്
ചെറുപ്പത്തിന്‍ ചുണയെത്തി
എത്തിയവരിത്തിയാറ്റില്‍
രക്തക്കറ കണ്ടു ഞെട്ടി
ഞെട്ടടര്‍ന്ന നാടുവാഴി-
പ്പാട്ടുക്കഥ പൊഴിയുന്നു.
പൊഴി തിന്നു പോയകാലം
കുഴങ്ങുന്നു ലന്തമരം
ലന്തമരക്കൊമ്പിലൊരു
പുതുകൂമത്തലയാട്ടം.
------------------------------------------------------------
കരിങ്ങന്നൂര്‍, വെളിനല്ലൂര്‍, പകല്‍ക്കുറി ഇവ
ഇത്തിക്കരയാറിന്റെ സമീപപ്രദേശങ്ങള്‍
No comments:
Post a Comment