അപ്പുറം

പാളത്തിനപ്പുറം കുഞ്ഞിപ്പള്ളി 

പള്ളിക്കു നിഴലായി കന്യാമഠം

മഠത്തിന്‍റെയോരത്തനാഥാലയം 

അനാഥര്‍ക്കുമപ്പുറം ബാര്‍ ഹോട്ടല് 

ബാറിന്നയല്‍വാസി അംഗന്‍വാടി

അംഗന്‍വാടിക്കൂട്ടൊരാട്ടുമില്ല്

മില്ലിനുമപ്പുറം സുരതാലയം 

അവിടുന്നു നോക്കിയാല്‍ വെള്ളച്ചാട്ടം 

വെള്ളത്തിനപ്പുറം മണ്‍കുടില് 

കുടിലില്‍ പനിക്കുന്ന കുഞ്ഞുമക്കള്‍ 

മക്കള്‍ക്കു കാവലായ് പാവമമ്മ

അമ്മയ്ക്കു കൂട്ട് കറമ്പിനായ

നായയ്ക്കുമമ്മയ്ക്കും മക്കള്‍ക്കും കാവലായ് 

നാവു വരണ്ട മരണമൃഗം.