Saturday, 24 June 2017

കൃഷി


പതിനാലുകാരി
പെണ്‍കുട്ടീ
അടുത്ത കൊല്ലം
നിന്നെ കെട്ടിക്കട്ടെ?

ശ്ശൊ, നിക്ക്
സ്കൂളില്‍ പോണം.

പതിനഞ്ചെത്തിയ
മൊഞ്ചത്തീ
അടുത്ത ആഴ്ച
നിന്നെ കെട്ടിക്കട്ടെ?

ശ്ശൊ, നിക്ക്
ട്യൂഷനു പോണം

മതങ്ങളും കോടതികളും
മീശപിരിച്ചു
വയലിനോടു ചോദിച്ചിട്ടു വേണോ
കൃഷിയിറക്കാന്‍!

വിവാഹമഹോത്സവം


നഗരത്തില്‍
ധനികരുടെ
വിവാഹമഹോത്സവം.

വധു
ആഭരണശാല
വരന്‍
പട്ടാംബരധാരി.

കര്‍മ്മിയോ
കാവി പുതച്ച
സന്യാസിപ്പൂച്ച.

ഹാരം പകരും മുന്‍പ്
മൈക്കിലൂടെ
സൗമ്യഭാഷണം.

- ഇനി
കന്യാദാനം.
ആശീര്‍വദിക്കുക-

വധു ഒന്ന് ഊറിച്ചിരിച്ചു
വരന്‍റെ മുഖത്ത് ആശ്വാസം
കന്യകനെന്നു
പറഞ്ഞില്ലല്ലോ.

കാര്യമറിഞ്ഞ
കരിങ്കുഴലുകള്‍
അടിച്ചുപൊളിച്ചു.

പെപ്പേപെപ്പേപെപ്പേ
പേപെപെപെപ്പേപെപ്പേ,,,


കല്ല്യാണം

 
മാറ്റിനി കഴിഞ്ഞ്
ഹോട്ടല്‍ മുറി വിട്ട്
കാറ്റുകൊള്ളാനിരുന്നപ്പോള്‍ 
കടല്‍ പറഞ്ഞു.

ഇത്രേമൊക്കെയായില്ലേ 
ഇനി കല്യാണിച്ചൂടെ?

ഇണകളുടെ മുഖം ചുവന്നു.
ക്യാഷും കാറും 
ജാതിയും ജാതകവും 
നോക്കാതെയോ?

കടലമ്മേ കടലമ്മേ 
കളിയല്ല കല്ല്യാണം.

മാര്യേജ് ബ്യൂറോ


പള്ളിക്കല്യാണം.
ആകാശത്തേക്കു നോക്കി
പുരോഹിതന്‍ പറഞ്ഞു.

വധൂവരന്മാരെ
കണ്ടെത്തിയതും
കൂട്ടിച്ചേര്‍ത്തതും
ദൈവമാകുന്നു.

പിന്‍നിരയിലിരുന്ന്
ഒരാള്‍ ഊറിച്ചിരിച്ചു
മാര്യേജ് ബ്യൂറോ നടത്തുന്ന
ജോര്‍ജുകുട്ടിച്ചായന്‍.

ഗുവാഹട്ടി എക്സ്പ്രസ്


കൃത്യസമയം പാലിക്കുന്നു
ഗുവാഹട്ടി എക്സ്പ്രസ്.
അതിനാലിന്ന്
ഗണപതിയുടെ കല്ല്യാണം.

സത്യം തേടിപ്പോയ ഗണപതി
റയില്‍വേ സ്റ്റേഷനില്‍ നിന്നും
തുമ്പി ചുരുട്ടി തുമ്പിച്ചു വന്നു.

കൃത്യസമയം തന്നെ.
ഒരു ദിവസം
വൈകിയെന്നേയുള്ളൂ.

Friday, 23 June 2017

വിധവന്‍


വിധവയെ കാണാന്‍
നിലാവു വന്നു
കഥയുമായ് പൂമണം
കൂടെ വന്നു
ഇരുളിന്‍റെ കമ്പിയില്‍
രാക്കിളിക്കൂട്ടങ്ങള്‍
നുണയുടെ തിരക്കഥ
നെയ്തിരുന്നു.

വിധവയെ കേള്‍ക്കുവാന്‍
കാറ്റു വന്നു
വിധവന്റെ നെടുവീര്‍പ്പി-
ലേറി വന്നു
ഒരു തിരിച്ചറിവിന്‍റെ സാക്ഷിയായി
പുരയില്‍ ശലഭങ്ങള്‍
കാത്തിരുന്നു.

വിധവയുടെ നെഞ്ചിലെ
പിഞ്ചുകുഞ്ഞ്
പുരുഷന്‍റെ താരാട്ടു
കേട്ടുറങ്ങി.

പുതിയ സായാഹ്നത്തില്‍
കടലോരത്ത്
ഇരു കുടുംബങ്ങളും
ചേര്‍ന്നിരുന്നു.

വിധവന്‍ സഭാര്യനായ്
സന്തുഷ്ടനായ്‌
വിധവ സനാഥയായ്
സംതൃപ്തയായ്.

തിരകളില്‍ നുരകളില്‍
മുങ്ങി നീര്‍ന്നു
വിധിയുടെ ചീഞ്ഞ
മൃതശരീരം.


Monday, 19 June 2017

പെണ്‍പതാക


അടിമപ്പെണ്ണാക്കി മാറ്റിയ
മംഗലത്താലി
വലിച്ചു പൊട്ടിച്ചെറിഞ്ഞി-
ട്ടാര്‍ച്ചയെത്തുന്നേ
മനസ്സിന്‍റെ പെരുംകൊമ്പില്‍
കടിച്ച കാറ്റേ
ഇവള്‍ക്കായി മാമ്പഴങ്ങള്‍
നിരത്തേണമേ.

വയല്‍ത്തുണ്ടില്‍ പാട്ടു മിന്നിയ
പകല്‍നേരത്ത്
മുലക്കണ്ണില്‍ കയ്പുതേച്ചോ-
രമ്മയാണിവള്‍
അറയ്ക്കുള്ളില്‍ വിളക്കിന്റെ
തലകൊയ്തപ്പോള്‍
വിറച്ചും കൊണ്ടടിപ്പെട്ട
മൂര്‍ഛയാണിവള്‍
കിനാവിന്‍റെ വള്ളിതോറും
പിടിച്ച കാറ്റേ
ഇവള്‍ക്കായി പിച്ചകപ്പൂ
നിവര്‍ത്തേണമേ

അമാവാസിപ്പര്‍ദ്ദയിട്ട
പകലാണിവള്‍
മൊഴിചൊല്ലിക്കലാശിച്ച
മലര്‍ക്കൂമ്പിവള്‍
കിടാങ്ങളെ പോറ്റുവാന്‍
കൈ നീട്ടിയോളിവള്‍
ബിരിയാണിച്ചെമ്പില്‍ വീണു
പഴുത്തോളിവള്‍
അദൃശ്യ മക്കനയിട്ട
വെളുമ്പിക്കാറ്റേ
ഇവള്‍ക്കായി തെളിപാഠം
പകര്‍ത്തേണമേ

മനസ്സമ്മതം കൊടുത്ത
മാരനെക്കൊന്ന്
ഒരു വ്യാജന്‍ സ്യൂട്ടിലേറി
സമീപിച്ചപ്പോള്‍
പിതാവിന്‍റെ കനല്‍ക്കണ്ണി-
ലെരിഞ്ഞൊടുങ്ങി
ഒരു കുഞ്ഞാടായി കൂടെ
നടന്നോളിവള്‍
ഹൃദയത്തില്‍ കൂടുകൂട്ടും
തണുത്ത കാറ്റേ
ഇവള്‍ക്കായി മുകില്‍ഛത്രം
വിടര്‍ത്തേണമേ

വാളുകള്‍ തൂക്കി നില്‍ക്കുന്ന
വാകയെപ്പോലെ
വേനല്‍ തിന്നു തണല്‍പ്പായ
വിരിച്ചോളിവള്‍
മരിക്കാനായ് ഒതളങ്ങ
കടിച്ചു തുപ്പി
മരണത്തിന്‍ വിഷക്കൂട്
പൊളിച്ചോളിവള്‍
പലദേശം കണ്ടുവന്ന
കറുമ്പന്‍ കാറ്റേ
ഇവള്‍ക്കായി സുരക്ഷാവീ-
ടൊരുക്കേണമേ

ഇടംകയ്യില്‍ പെണ്‍‌പതാക
മുദ്ര സ്വാതന്ത്ര്യം
വലംകാലില്‍ കാരിരുമ്പു-
കടിച്ച ദൈന്യം
വയറ്റത്ത് ചവിട്ടേറ്റ
കരിനീലിപ്പ്
പുറത്താകെ ബീഡിത്തീയാല്‍
വരഞ്ഞൊരിന്ത്യ
വാക്കില്‍ ബ്ലെയ്ഡ്, വെളിപാട്
നോക്കിലോ തോക്ക്
നേര്‍ക്കുനേര്‍ക്ക് വരുന്നോര്‍ക്ക്
പേക്കിനാച്ചോറ്.

തീരമാകെ ചീറി വന്ന
തകര്‍പ്പന്‍ കാറ്റേ
ഇവള്‍ക്കായി ചെമ്പന്‍പട്ട്
വിരിക്കേണമേ.

Thursday, 15 June 2017

Mx.

മിസ്സല്ല,മിസ്സിസ്സുമല്ല
മിസ്റ്ററുമല്ലെന്റെ ചങ്ങാതി
പേടയില്‍ കലയാണ്‌
പൂവനില്‍ പിടയാണ്
പൂര്‍ണതയാണിത്‌ മിക്സ്.

ആണിന്നധീശത്വമില്ല
പെണ്ണിന്‍ വിധേയത്വമില്ല
വീട്ടുഗുഹയില്‍ കരഞ്ഞും ഭയന്നും
ഉള്ളിലെ അങ്കക്കളത്തില്‍ കിതച്ചും
സ്നേഹവും സമ്മതം ചൊല്ലലും പൂക്കുന്ന
ശീതളച്ഛായകള്‍ തേടി
മല്ലികപ്പൂവായ് വിടര്‍ന്ന, തീ മിക്സ്.

കാമന്റെ മുന്നിലും
മാമന്റെ പിന്നിലും
കുണ്ടനിടവഴിതോറും കുനിയാതെ
ആണിനും പെണ്ണിനുമപ്പുറത്തായൊരു
ധീരപതാകയായ് പാറുമീ മിക്സ്.

നോവുണ്ട്,രോഗങ്ങളുണ്ട്
ദാഹം,വിശപ്പ്‌,ഭയം
അനാരോഗ്യം
മോഹമഹാനദി പായും മനസ്സ്
ഏതൊരാള്‍ക്കും ഒപ്പമാകുന്നു മിക്സ്.

നെറ്റിയിലൊന്നു ചുംബിച്ചു ഞാനെന്‍റെ
മുദ്രകള്‍ പങ്കു വെക്കുന്നു
മിക്സിന്റെ ജീവിതയുദ്ധത്തിലെന്റെ
പട്ടണം തീ പിടിക്കട്ടെ.

Wednesday, 14 June 2017

കണ്ടവരുണ്ടോ?

കണ്ടവരുണ്ടോ നിലാവിനെ
പാവത്തി,
ഉണ്ടായിരിക്കാം ഭയന്നും പകച്ചും
കണ്ടുപിടിച്ചെന്നു വേർത്തും വിയർത്തും
രണ്ടും കഴിച്ച് മുകിൽപ്പൊന്തക്കുള്ളിൽ

ക്രൂരവെളിച്ചം സ്രവിക്കും നഗരമേ
കണ്ടുവോ നീ പണ്ടു നിന്നെ-
പ്പുതച്ചുമ്മ വച്ച നിലാവിനെ?

നിന്നെക്കുളിപ്പിച്ചു തോർത്തി
അമ്മക്കയ്യാൽ
നുള്ളുരാസ്നാദി തിരുമ്മിയുരുമ്മി
നിന്നെയുറക്കിയുറങ്ങാതരികത്ത്
നിന്നുറക്കം തൂങ്ങി വീണ നിലാവിനെ?

കണ്ടവരുണ്ടോ സുഗന്ധിപ്പൂങ്കാറ്റിനെ?
പെൺകൊടി
ഉണ്ടായിരീക്കാം അനങ്ങാതെ മൂളാതെ
ശ്വാസം വിണ്ടാതെ മിണ്ടാതെ
കണ്ണടച്ചാകെ നിലച്ചു
പുകക്കുഴൽക്കണ്ണിൽ
പൂക്കളെയൊക്കെ മറന്ന്
ഉണ്ണാതിരിക്കുകയാവാം മനസ്സിനെ
കൊന്നു മരിച്ചു മരവിച്ച്

ചണ്ടിക്കാറ്റൂതി രസിക്കും നഗരമേ
കണ്ടുവോ നീയിളം പിച്ചകക്കാറ്റിനെ?

കണ്ടവരുണ്ടോ പച്ചവെള്ളത്തെ?
പൂച്ചക്കുട്ടി
ഉണ്ടായിരിക്കാം മുതുമുത്തിതന്നോർമ്മയിൽ
പണ്ടു ചിലച്ചു ചലിച്ച വഴികളെ
നെഞ്ചോടു ചേർത്തൊളി-
ച്ചേതോ വിദൂര ഗ്രാമത്തിലെ
കുന്നിന്റെയോരത്ത്
രാക്കണ്ണടയ്ക്കാതെ
ഒളിനഖം കാട്ടാതെ
പമ്മിപ്പതുങ്ങി-
യിരുട്ടിന്റെ ഊട്ടയിൽ
ഉണ്ടായിരിക്കാം
വീട്ടുകാരിതന്നോമന.

ഭൂഗർഭലായനിയൂറ്റിക്കുടിക്കുന്ന
ഭീകരരൂപിയാം നഗ്നനഗരമേ
നീ കണ്ടുവോ അമൃതായ വെള്ളത്തിനെ?

കണ്ടവരുണ്ടോ
കരുണയെ സത്യത്തെ
ചങ്ങാതിയെ പ്രണയത്തെ
വിശ്രാന്തിയെ
കൊമ്പത്തു കണ്ണുരസും ഇണമാനിനെ
അന്യരെ സ്നേഹിച്ചുണരും മനുഷ്യരെ?

മെഡിക്കൽ കോളജിലെ മൃതദേഹ പാഠപുസ്തകങ്ങൾ


യുക്തിബോധമുള്ള മനുഷ്യസ്നേഹികൾ പുതിയ തലമുറയ്ക്ക്‌ പഠിക്കാനായി നൽകിയ മൃതശരീരങ്ങൾ കൈകാര്യം ചെയ്യുന്നതിലെ കെടുകാര്യസ്ഥതയിൽ കോഴിക്കോട്‌ മെഡിക്കൽ കോളജ്‌ പ്രസിദ്ധമാണ്‌. മൃതദേഹങ്ങൾ സ്വാശ്രയ മെഡിക്കൽ കോളജിന്‌ വിറ്റതിനെത്തുടർന്നുണ്ടായ വിദ്യാർഥി പ്രക്ഷോഭം അവിടെ ശ്രദ്ധയാകർഷിച്ചിട്ടുണ്ട്‌.

ഇപ്പോൾ മീഡിയവൺ ചാനൽ ലോകത്തെ അറിയിച്ച വാർത്ത മൃതദേഹങ്ങളെ അനാദരിക്കുന്നു എന്നതാണ്‌. പഠനത്തിനുപയോഗിച്ചു കഴിഞ്ഞ മൃതശരീരങ്ങൾ മാന്യമായി സംസ്കരിക്കുന്നതിന്‌ പകരം തെരുവുനായ്ക്കൾ കടിച്ചുകീറത്തക്ക വിധം ഉപേക്ഷിക്കുകയാണുണ്ടായത്‌.

മെഡിക്കൽ കോളജിൽ കൊടുത്തിട്ടുള്ള മൃതശരീരങ്ങൾ കടലിൽ ഒഴുകി വന്നതൊന്നുമല്ല. മനുഷ്യരാശിയെക്കുറിച്ച്‌ കരുതലുള്ള മഹാമനസ്കർ അവരുടെ അച്ഛനമ്മമാരുടെ ആഗ്രഹം നിറവേറ്റാനായി നൽകിയതാണ്‌. ചന്ദനമുട്ടികൾ അടുക്കി കത്തിച്ചുകളയുകയോ ഈട്ടിത്തടിയാൽ പെട്ടികൂട്ടി കുഴിച്ചിടുകയോ ചെയ്യുന്നതിന്‌ പകരം മനുഷ്യർക്ക്‌ പ്രയോജനപ്പെടട്ടെ എന്ന്‌ കരുതിയാണ്‌ മൃതശരീരങ്ങൾ നൽകിയിട്ടുള്ളത്‌.

മൃതദേഹങ്ങളെ സംബന്ധിച്ച്‌ രജിസ്റ്റർ സൂക്ഷിക്കണമെന്നും അനാട്ടമി വകുപ്പ്‌ മേധാവിയുടെ ചുമതലയിൽ പഠനാനന്തരം സംസ്കരിക്കണമെന്നും ചട്ടമുണ്ട്‌. ഇതൊന്നും പാലിക്കാതെയാണ്‌ കോഴിക്കോട്‌ മെഡിക്കൽ കോളജിലെ അനാട്ടമി വകുപ്പ്‌ മൃതശരീരങ്ങൾ വലിച്ചെറിഞ്ഞത്‌.

മൃതശരീരങ്ങളോടുള്ള അനാദരവ്‌ എന്നാൽ പട്ടാളക്കാരോട്‌ ശത്രുരാജ്യം കാണിക്കുന്ന ക്രൂരത മാത്രമല്ല. ഒരു മൃതശരീരത്തേയും ആരും അനാദരിക്കരുത്‌. ശരീരത്തിന്റെ സ്വകാര്യതകളിലേക്ക്‌ ഒരാളുടെ സമ്മതമില്ലാതെ കടന്നുകയറുന്ന കുളിപ്പിക്കൽ ചടങ്ങു മുതൽ അനാദരവ്‌ ആരംഭിക്കുന്നു. മാലിന്യം നീക്കം ചെയ്യാൻ വയറ്റത്തു ചവിട്ടുന്നതും വീർത്തു തുടങ്ങുന്നതുവരെ പ്രാർഥിക്കുന്നതും അനാദരവു തന്നെയാണ്‌.

മൃതശരീരങ്ങൾ പഠനാവശ്യത്തിന്‌ വേണ്ടി ദാനം ചെയ്യുന്നതിനെ എതിർക്കുന്നത്‌ മതങ്ങളാണ്‌. പരലോകം എന്ന അബദ്ധവിശ്വാസമാണ്‌ ശാസ്ത്രവിരുദ്ധമായി പ്രവർത്തിക്കാൻ മതങ്ങളെ പ്രേരിപ്പിക്കുന്നത്‌. മതാതീതമായി ചിന്തിച്ചവരാണ്‌ സ്വന്തം മൃതശരീരം പഠിക്കാനായി നൽകണമെന്ന്‌ അവകാശികളോട്‌ പറഞ്ഞിട്ടുള്ളത്‌.

കാസർകോട്ടെ മുൻ ഇടതുപക്ഷ ലോകസഭാംഗം രാമണ്ണറെയുടെയും, സാഹിത്യ അക്കാഡമി അവാർഡ്‌ ജേതാവ്‌ ഇടമറുകിന്റേയും, ഡോ. എൻ എം മുഹമ്മദാലിയുടേയും, ഫാദർ അലോഷ്യസ്‌ ഫെർണാണ്ടസിന്റേയും, ക്യാപ്റ്റൻ ലക്ഷ്മിയുടേയും, ഡോ. എ ടി കോവൂരിന്റെയും തെരുവത്ത്‌ രാമന്റേയും മറ്റും ശരീരദാനം മാതൃകാപരം ആയിരുന്നു.

അത്തരം വലിയ മനുഷ്യരെ ജീവിതത്തിൽ പകർത്താൻ ശ്രമിച്ച അനന്തര തലമുറയുടെ മൃതദേഹങ്ങളാണ്‌ അപമാനിക്കപ്പെട്ടിരിക്കുന്നത്‌. സാക്ഷര കേരളത്തിന്റെ മുഖത്ത്‌ പറ്റിയ മാലിന്യമായിപോയി ഈ പ്രവൃത്തി. കുറ്റക്കാരെ കണ്ടെത്തി ശിക്ഷിക്കുവാൻ മന്ത്രിസഭാ തലത്തിൽ അതിവേഗ നടപടികളുണ്ടാവേണ്ടതാണ്‌.

ശരീരദാനത്തിന്‌ പേരു രജിസ്റ്റർ ചെയ്തവരുടെ ഒരു വലിയ നിര ഇന്നു കേരളത്തിലുണ്ട്‌. മൃതശരീരം പഠനത്തിന്‌ വിട്ടുകൊടുത്തവരുടെ  ബന്ധുക്കളെ മാത്രമല്ല,   സമ്മതപത്രം നൽകിയവരെക്കൂടി കോഴിക്കോട്‌ മെഡിക്കൽ കോളജിന്റെ ഈ നടപടി ഞെട്ടിച്ചിരിക്കുകയാണ്‌.

ഡോക്ടർമാരാരും മൃതദേഹം കൊടുക്കാത്തതെന്ത്‌ എന്ന്‌ ചോദിച്ചപ്പോൾ വിദേശത്തു ജോലി ചെയ്യുന്ന മലയാളിയായ ഒരു ലേഡി ഡോക്ടർ പറഞ്ഞത്‌ അസ്ഥികൾ തട്ടിക്കളിച്ചാണ്‌ ഞങ്ങൾ പഠിച്ചത്‌. അതുപോലെ ഞങ്ങളുടെ അസ്ഥി മറ്റാരും തട്ടിക്കളിക്കേണ്ട എന്നു കരുതിയാണ്‌ എന്നായിരുന്നു. ഡോക്ടർമാരുടെ ഈ മനോഭാവവും മാറേണ്ടതുണ്ട്‌.

Monday, 5 June 2017

പെരുങ്കള്ളൻ


രാത്രി..
കുത്തിച്ചുട് കുത്തിച്ചുടെന്നൊരു
പേപ്പക്ഷി തപ്പുകൊട്ടുമ്പോൾ
ഘോരവിശപ്പാൽ കരിഞ്ഞ പാവം കള്ളൻ
പാതയോരത്തു പമ്മുന്നു
വീടാണ്, വീടിന്നടുക്കളയിൽ വെറും
ചോറെങ്കിലും കാണുമല്ലോ
വാതിൽ തുറക്കുന്നു കള്ളൻ അടുപ്പിലെ
ചേരത്തണുപ്പിൻ മുകളിൽ
വായിൽ ചിലന്തി വല കെട്ടിവച്ചൊരു
പാവം പഴങ്കലം മാത്രം
പത്താമ്പുറം തപ്പി കിട്ടിയ തീപ്പെട്ടി
കത്തിച്ചു കൈമറയ്ക്കുള്ളിൽ
മറ്റൊരു വാതിൽ, നിലത്തു കിടക്കുന്ന-
തച്ഛനുമമ്മയുമാകാം
മക്കളാകാം രണ്ടു കുട്ടികൾ മദ്ധ്യത്തു
സ്വപ്നങ്ങളുണ്ടുറങ്ങുന്നു
കള്ളനൊരൈഡിയ കമ്മലോ മാലയോ
ഉള്ളതെല്ലാം സ്വന്തമാക്കാം
ഹോട്ടലിൽച്ചെന്നവനൽകി,വയർനിറ-
ച്ചാഹരിക്കാം യാത്രയാകാം
അച്ഛന്റെ കൈവിരൽ ശൂന്യം മക്കൾക്കില്ല
മിഞ്ചിയോ പാദസരമോ
അമ്മയെ തപ്പാൻ തുടങ്ങി, മൂക്കുത്തിയോ
പൊൻവളയോ തടഞ്ഞില്ല
എന്നാലരയിലെ നൂലിൽകരുതിയ
നാലായ് മടക്കിയ നോട്ട്
കൂരിരുൾ പോത്തുകൾ മേയുന്ന പാതയി-
ലോടിക്കിതയ്ക്കുന്നു കള്ളൻ
പാതവിളക്കിൻ വെളിച്ചത്തിൽ നിന്നയാൾ
നോട്ടു നിവർത്തിനോക്കുന്നു

നോട്ടല്ല നോട്ട് ബുക്കു കീറിയ പേപ്പറിൽ
കാട്ടുറുമ്പായ് മലയാളം

പട്ടിണി, വയ്യ ജീവിക്കുവാൻ, പോകുന്നു
ഞങ്ങൾ സ്വയം മരിക്കുന്നു
കള്ളൻ ഭയപ്പാമ്പു തീണ്ടിവിറയ്ക്കുന്നു
മുന്നിലൊരു പെരുങ്കള്ളൻ.

Thursday, 1 June 2017

കേരളത്തിലെ കാവുകളും കോൺക്രീറ്റ്‌ ദൈവസൗധങ്ങളും


  യുവകലാസാഹിതിയുടെ ചടയമംഗലം മണ്ഡലം സമ്മേളനം കാഞ്ചനമാലയുടെ സാന്നിധ്യത്താൽ ശ്രദ്ധേയമായിരുന്നു. കേരളത്തിൽ ഇന്ന്‌ ജീവിച്ചിരിക്കുന്ന അസാധാരണ പ്രണയിനിയാണല്ലോ കാഞ്ചനമാല.

കോഴിക്കോട്‌ ജില്ലയിൽ താമസിക്കുന്ന അവർ രാവിലെ തന്നെ കൊല്ലത്തെത്തി. എന്നു നിന്റെ മൊയ്തീൻ എന്ന സിനിമയിലൂടെ കാഞ്ചനമാലയുടെ ജീവിതം ഹൃദിസ്ഥമാക്കിയ സ്ത്രീജനങ്ങൾ രാവിലെ മുതൽ തന്നെ അവരെ കാണാനും ഫോട്ടോയെടുക്കാനും എത്തിത്തുടങ്ങി. കരിങ്ങന്നൂർ ജങ്ങ്ഷനിൽ അവർ പങ്കെടുത്ത സമ്മേളനം സ്ത്രീസാന്നിധ്യം കൊണ്ട്‌ ശ്രദ്ധേയമായിരുന്നു. സമ്മേളനത്തോട്‌ അനുബന്ധിച്ച്‌ നടന്ന കവിയരങ്ങിലും എഴുത്തുകാരികൾക്കായിരുന്നു പ്രാമുഖ്യം.

പ്രണയിച്ച കുറ്റത്തിന്‌ ആറ്റിൽച്ചാടി മരിക്കുകയോ തല്ലിക്കൊന്ന്‌ പുഴയിലെറിയപ്പെടുകയോ ചെയ്യുന്ന കേരളത്തിൽ ജലം കൊണ്ടു മുറിവേറ്റ കാഞ്ചനമാലയുടെ സാന്നിധ്യം സമാനതകളില്ലാത്തതാണ്‌.

രാവിലെ കരിങ്ങന്നൂരിലെത്തിയ കാഞ്ചനമാലയ്ക്കും കൂട്ടുകാരിക്കും ഒരു ക്ഷേത്രത്തിൽ പോകാൻ ആഗ്രഹമുണ്ടായി. അവരെ വെളിനല്ലൂർ ശ്രീരാമ ക്ഷേത്രത്തിൽ കൊണ്ടുപോവുകയും ചെയ്തു. വൈകിട്ട്‌ കാഞ്ചനമാലയെ കണ്ടപ്പോൾ വെളിനല്ലൂർ ശ്രീരാമക്ഷേത്രത്തിന്റെ ചരിത്രപരമായ പ്രാധാന്യത്തെക്കുറിച്ച്‌ അവരോട്‌ പറയുകയും ചെയ്തു. നൂറ്റാണ്ടുകൾക്ക്‌ മുമ്പ്‌ സ്ഥാപിക്കപ്പെട്ട ക്ഷേത്രമാണിത്‌. ഓയൂർ മുതൽ ചെറിയവെളിനല്ലൂർ വരെയുള്ള വിശാലമായ പ്രദേശത്തിന്റെ കേന്ദ്രബിന്ദുവായിരുന്നു വെളിനല്ലൂർ. പാറക്കൂട്ടങ്ങളിൽ നിന്ന്‌ എടുത്തുചാടി സ്വപ്നത്തിലെന്നപോലെ ചിരിക്കുന്ന ഇത്തിക്കരയാറിന്റെ തീരത്താണ്‌ ഈ ക്ഷേത്രം. ആര്യാധിനിവേശത്തിന്റെ ആരംഭഘട്ടത്തിൽ ഉണ്ടായ ക്ഷേത്രമാകയാൽ ഇണ്ടിളയപ്പൻ എന്ന ഒരു ദ്രാവിഡ ദൈവത്തേയും ഇവിടെ കുടിയിരുത്തിയിട്ടുണ്ട്‌. കഥകളിക്ക്‌ പ്രാധാന്യമുള്ള ഇവിടെ ബാലിവിജയം ആടാൻ പാടില്ല.
കാർഷിക പ്രദേശമായിരുന്നതിനാൽ ചെറിയ കതിരുകാളകളെ കെട്ടി ചുമലിൽ വച്ച്‌ നൃത്തം ചെയ്യുമായിരുന്നു. വിപുലമായ കാളച്ചന്തയും മണൽ വാണിഭവും ദളിതരുടെ മുടിയാട്ടവും മരം കൊട്ടിയുള്ള പാട്ടും ഇസ്ലാം മതവിശ്വാസികളുടെ മത്സ്യക്കച്ചവടവും എല്ലാം ഈ ക്ഷേത്രവുമായി ബന്ധപ്പെട്ടിരിക്കുന്നു.

കേരളം കാവുകളിലെ ആരാധനകളാൽ ഗ്രാമീണ ചാരുതയുള്ളതായിരുന്നു. എന്നാലിന്ന്‌ കോൺക്രീറ്റ്‌ ദൈവസൗധങ്ങളുടെ നാടായി കേരളം മാറിയിരിക്കുന്നു.

പണച്ചാക്കുകളുമായി വരുന്ന ദൈവവ്യവസായികൾ ഇന്നലെ പെയ്ത മഴയിൽ കുരുത്ത തകരക്ഷേത്രങ്ങൾക്ക്‌ സിന്ധുനദീതട സംസ്കാരം മുതലുള്ള കള്ളച്ചരിത്രം ചമയ്ക്കും. വമ്പൻ പൊങ്കാലകൾ സ്പോൺസർ ചെയ്യും. നൂറു കൊമ്പനാനകളേയും ഒരു കുഴിയാനയേയും അണിനിരത്തി ഗജമേള സംഘടിപ്പിക്കും. ദൈവരൂപങ്ങളുടെ കൂറ്റൻ പ്രതീകങ്ങളുണ്ടാക്കി വൈദ്യുതി ദുർവിനിയോഗം ചെയ്യും. കിലോമീറ്ററുകൾ ചുറ്റളവിൽ ഉച്ചഭാഷിണികൾ ഘടിപ്പിച്ച്‌ വിദ്യാർഥികളുടെ പഠനത്തിലുള്ള ഏകാഗ്രത നശിപ്പിക്കും. രോഗികളേയും വയോജനങ്ങളേയും ബുദ്ധിമുട്ടിക്കും. വെടിക്കെട്ടുകൾ പൊട്ടിച്ച്‌ നിരപരാധികളെ കാലപുരിക്ക്‌ അയയ്ക്കും. കുബേരപ്പിരിവ്‌ നടത്തും. ധനികര്‍, ധനികര്‍ക്കായി അന്നദാനം പോലും ഏര്‍പ്പാടാക്കും. ഇടയിലക്കാടിലും ഒണ്ടിക്കാവിലും മറ്റും കണ്ടിരുന്ന ശാന്തതയോ ശാലീനതയോ ഈ ഭക്തിവ്യവസായ കേന്ദ്രങ്ങളിൽ ഇല്ല.

സ്തൂപങ്ങളിൽ പരതിയാൽ ബുദ്ധരൂപങ്ങൾ പോലും കണ്ടെത്താവുന്ന വെളിനല്ലൂർ ക്ഷേത്രത്തിലെ സന്ദർശനം സന്തോഷകരമായിരുന്നെന്ന്‌ കാഞ്ചനമാല പറഞ്ഞപ്പോൾ പുതുമയും പഴമയും തമ്മിലുള്ള താരതമ്യത്തിലേയ്ക്കുകൂടി അവർ വിരൽചൂണ്ടുകയായിരുന്നു.ചരിത്ര സ്മാരകങ്ങള്‍ ആക്കാവുന്ന ആരാധനാലയങ്ങളില്‍ നിന്നും ആധുനിക ധനനിക്ഷേപകേന്ദ്രങ്ങളിലേക്കുള്ള ദൈവവ്യവസായികളുടെ മാറ്റം ആശങ്കാജനകമാണ്.

Saturday, 27 May 2017

ചുവന്ന പെണ്ണ്


നിലാസ്സോപ്പാൽ വെളുപ്പിക്കാൻ
കറുത്തപെണ്ണ്
പഴഞ്ചൊല്ലിന്‍ കതിരുമായ്
വെളുത്തപെണ്ണ്
ഇവർക്കു രണ്ടാൾക്കുമെന്നും
ഇരുനേരത്തും
കിടക്കപ്പാ വിരിക്കുന്ന
ചുവന്നപെണ്ണ്

എനിക്കിഷ്ടം പണിക്കാരി
ചുവന്നപെണ്ണ് 

അവള്‍ക്കൊപ്പം ചിരിക്കുന്നു
ജലപുഷ്പങ്ങൾ.

ഗൃഹപാഠം

പാടുകയാണു പഠിച്ചവ നാം
കാട്ടിലെ ആനത്താരകളിൽ
തേടുകയാണ് വെടിഞ്ഞവനാം
വീട്ടിൻ കട്ടിയിരുട്ടറയിൽ
താവളമില്ലാതലയുന്നൂ
ചൂളക്കാരൻ തീവണ്ടി
പാളിപ്പോയ സമൃദ്ധികളിൽ
നീലവിഷപ്പുക ചായുന്നു
ഏതൊരു സിനിമാപ്പാട്ടിന്റെ
ഈരടി വെന്ത നിശ്ശബ്ദതയിൽ
നാദം കാവലിരുന്ന മൃദംഗം
താളക്കൈവിരൽ മോഹിപ്പൂ
ചാരക്കുന്നിൽ താഴുന്നൂ
ചീർത്തകിനാവിൻ ഗുസ്തിക്കാർ
മൂരിക്കൊമ്പിൽ കാണുന്നൂ
കാരണമില്ലാക്കാര്യങ്ങൾ
കുപ്പായത്തിൽ ചുംബിച്ച്
മുത്തം നേടിയ റോസാപ്പൂ
മുത്തും കാശും കാമിച്ച്
സ്വപ്നം കൊത്തി വിയർക്കുന്നൂ
അറിവിൽ നിന്ന് തിരിച്ചറിവ്
മുറിവിൽനിന്നൊരു ഗൃഹപാഠം
ഇവിടെ തുടരാം കാൽനടകൾ
തെളിയുന്നില്ലൊരു നക്ഷത്രം.

Wednesday, 24 May 2017

ഗോഡ്സേ നഗർ


പച്ചവെളിച്ചം തെളിഞ്ഞൂ
സീബ്രാവരയ്കിപ്പുറം വന്നു
നിലച്ച നാൽക്കാലികൾ
നിശ്ശബ്ദമങ്ങനെ നീങ്ങി
വലത്തേക്കു മറ്റൊരു പാത
തുടങ്ങി ഗോഡ്സേ നഗർ

ഒന്നാംതെരുവ്
മുഖത്തു പുച്ഛത്തിന്റെ 
മഞ്ഞച്ചെടികൾ പടർത്തിയ മേടകൾ
ചില്ലുനേത്രത്തിന്റെയുള്ളിൽ നിരത്തിയ
ചന്ദനക്കിണ്ണവും സോഡയും മാംസവും
കള്ളക്കറൻസികൾ കൈമാറുകയാണ്
കണ്ണിൽ കനത്ത കാവൽപ്പടയുള്ളവർ
ഭിത്തി പറഞ്ഞു ബഹുമാന്യ ജീവിതം
വൃത്തികേടിന്റെ വിളവെടുപ്പുൽസവം

രണ്ടാംതെരുവ്
പുറത്തു വാതിൽമണി
വന്ദിച്ചുനിൽക്കും പ്രഭുക്കൾ പ്രധാനികൾ
വന്നുപോകുന്നു
പിരമിഡു പൊട്ടിച്ചു മമ്മികൾ
നെഞ്ചിൽ കണക്കിന്റെ ചൂതുകൾ
സൽക്കാരശാലയ്കടുത്തു കിടപ്പറ
സ്വപ്നങ്ങൾ വാങ്ങിനിറച്ച നടുപ്പുര
ഛർദ്ദീച്ചുറങ്ങുന്നു കോടീശ്വരൻ
രോഗസിദ്ധിയിൽ പുഞ്ചിരിക്കുന്നൂ ഭഗവതി
ആളനക്കങ്ങൾ നിലക്കുമ്പൊളൊക്കെയും
ആംഗലത്തിൽ കുരയ്കുന്നുണ്ടു നായകൾ
കാറ്റു പറഞ്ഞു
കമനീയ ജീവിതം
കാർക്കിച്ചു തുപ്പേണ്ട വാർത്തയ്കുറവിടം.

മൂന്നാംതെരുവ്
ഉടഞ്ഞുകിടക്കുന്ന ശാന്തിപ്രതിമ
അശാന്തമാണുൾത്തടം
ആരൊക്കെയാണീ വിശുദ്ധവീഥി
യ്കിരുപാടും വസിച്ചു രസിച്ചു ജയിച്ചവർ
ജീർണവസ്ത്രങ്ങളിൽ വർണം പുതപ്പിച്ചു
ജീവിച്ചിടുന്നു മുഖംമൂടിയുള്ളവർ
ആദരവോടെ നമിച്ചു നെഞ്ചത്തേയ്ക്കു
തീയുണ്ട പായിച്ചു നിശ്ശബ്ദരാകുവോർ
പൊട്ടിയ ശിൽപമെടുത്തുയർത്തിക്കൊണ്ട്
ചിത്തഭ്രമത്താൽ പറഞ്ഞു ദേശാടകൻ
വെച്ച വിഷത്താൽ സ്വയം മരിച്ചോനിവൻ

നാലാം തെരുവ്
സിമന്റ്കൂടാരത്തിൽ
ആരെയോ കൊല്ലുകയാണിന്നു മാന്ത്രികർ
ഗൂഢച്ചിരികൾ രഹസ്യസംഭാഷണം
കാലൊച്ചകൾ തലയോട്ടിയും ശൂലവും
കാഞ്ഞിരംകൊണ്ടൊരാൾരൂപം
തലയ്കുമേൽ പൂഴിയുരുട്ടിയ മുട്ടയും ധൂമവും
പേടമാനിന്റെ ചെവിയും കുറേ
ചാരവും കുങ്കുമച്ചാന്തും വിഭൂതിയും

പങ്കപറഞ്ഞു
മൃഗങ്ങളേക്കാൾ ദുഷ്ട
ജന്തുക്കളെക്കണ്ടു ചുറ്റുകയാണു ഞാൻ

ഓരോ തെരുവും അരാജകപ്പേമാരി
തോരാതെ
പെയ്യും ചതുപ്പ്
ഭവനങ്ങൾ നീരാളിവാഴും കടൽപ്പൊയ്ക
പാതകൾ പ്രേതവിരിപ്പ്
അഴുക്കുചാൽ ജീവിതം.


നൂറാംതെരുവിനും അപ്പുറം കോളനി
നീറിയുണർന്ന പ്രതികാരവാഹിനി.

Thursday, 18 May 2017

സ്കൂൾ പ്രവേശം, ജാതി നിർബന്ധമല്ല


  വിദ്യാലയ പ്രവേശനത്തിന്‌ ജാതി രേഖപ്പെടുത്തുന്ന കാര്യത്തിൽ നിർബന്ധം ഉണ്ടാവുകയില്ല എന്ന മുഖ്യമന്ത്രിയുടെ വാഗ്ദാനം സാംസ്കാരിക കേരളം പ്രതീക്ഷയോടെയാണ്‌ കേട്ടത്‌. കുട്ടികളെ ഒന്നാം ക്ലാസിൽ ചേർക്കാൻ കൊണ്ടുവരുന്ന രക്ഷകർത്താവിനോട്‌ അപേക്ഷാ ഫോറത്തിൽ കുട്ടിയുടെ ജാതി ചേർക്കണമെന്ന്‌ സ്കൂൾ അധികൃതർ നിർബന്ധിക്കുകയില്ല എന്നാണ്‌ ഈ വാഗ്ദാനത്തിന്റെ അർഥം. കുറച്ചുകൂടി വ്യക്തമായിപ്പറഞ്ഞാൽ കൊല ചെയ്യപ്പെട്ട മതമില്ലാത്ത ജീവൻ എന്ന പാഠത്തിലെ അൻവർ റഷീദിനും ലക്ഷ്മീദേവിക്കും ഉണ്ടായ അനുഭവം പുരോഗമന വാദികളായ അച്ഛനമ്മമാർക്ക്‌ ഈ വർഷം മുതൽ ഉണ്ടാവുകയില്ല.

ഈ വാഗ്ദാനം പാലിക്കാൻ സാധിക്കുമോ? വെളിച്ചമുണ്ടാകട്ടെ എന്ന്‌ ദൈവം പറഞ്ഞപ്പോൾ ഭൂമിയിൽ എല്ലായിടവും വെളിച്ചം ഉണ്ടായില്ല. പകുതി ഭാഗത്ത്‌ മാത്രമേ വെളിച്ചം വന്നുള്ളു. അതിന്റെ കാരണം ഉൽപത്തി പുസ്തകം കൽപിച്ചുണ്ടാക്കിയവർക്ക്‌ ഭൂമി ഉരുണ്ടതാണെന്ന്‌ അറിയാൻ പാടില്ലാത്തതുകൊണ്ടായിരുന്നു. ദൈവത്തിന്റെ കൽപന പോലും പൂർണമായി നടന്നില്ലെന്നും വ്യാഖ്യാനിക്കാവുന്നതാണ്‌. അങ്ങനെയാണെങ്കിൽ പച്ചമനുഷ്യനായ നമ്മുടെ മുഖ്യമന്ത്രിയുടെ പുരോഗമനപരമായ ആശയത്തെ എങ്ങനെ നടപ്പിലാക്കാൻ കഴിയും?

കുട്ടികളെ സ്കൂളിൽ ചേർക്കുമ്പോൾ ജാതി രേഖപ്പെടുത്തേണ്ടതില്ല എന്ന ഉത്തരവ്‌ ഇപ്പോഴും നിലവിലുണ്ട്‌. പഴയ ആ ഉത്തരവ്‌ ഇംഗ്ലീഷിലുള്ളതാണ്‌. പുതുക്കിയതും വ്യക്തതയുള്ളതുമായ ഉത്തരവ്‌ ഇക്കാര്യത്തി ൽ ഉണ്ടാകേണ്ടതുണ്ട്‌. ആ ഉത്തരവിന്റെ വലിയ പകർപ്പുകൾ വിദ്യാലയത്തിന്റെ ചുമരിൽ പതിക്കേണ്ടതാണ്‌.

കഴിഞ്ഞ ഇടതുപക്ഷ സർക്കാരിന്റെ കാലത്ത്‌ കൈത്തറി വസ്ത്രം ധരിക്കുന്നത്‌ പ്രോത്സാഹിപ്പിക്കുന്നതിനുവേണ്ടി പുറപ്പെടുവിച്ച ഉത്തരവ്‌ അനാഥശിലകളായി സംസ്ഥാനത്തിന്റെ വിവിധ ഭാഗങ്ങളിൽ അവശേഷിക്കുന്നുണ്ട്‌. ആരും കൈത്തറി വസ്ത്രം ധരിച്ചില്ല എന്നു മാത്രമല്ല കൈത്തറി മേഖലയിലെ തൊഴിലാളികളുടെ സ്ഥിതി കൂടുതൽ പരിതാപകരവുമായി. സർക്കാരിന്റെ ആത്മാർത്ഥതയെ തിരിച്ചറിയാൻ സർക്കാരിന്‌ വോട്ട്‌ ചെയ്തവർക്ക്‌ പോലും കഴിയാതെ പോയതാണ്‌ ഇതിനുകാരണം. അങ്ങനെ ഒരു അവസ്ഥ പുതിയ ഉത്തരവിന്‌ ഉണ്ടാകരുത്‌.

മാധ്യമങ്ങളുടെ പരിപൂർണ സഹകരണം സർക്കാരിന്‌ ഉണ്ടാകണം
കേരളത്തിലെ നവോത്ഥാന പരിശ്രമങ്ങളിൽ പ്രധാനപ്പെട്ടത്‌ ജാതീയതയ്ക്കെതിരെയുള്ള സമരമായിരുന്നല്ലോ. ഇന്നുള്ള ഭൂരിപക്ഷം പത്രങ്ങളും നവോത്ഥാന പരിശ്രമങ്ങൾക്ക്സാക്ഷ്യം വഹിച്ചവയാണ്‌. അതിനാൽ സ്കൂളിൽ ചേർക്കുമ്പോൾ ജാതി എഴുതേണ്ടതില്ല എന്ന സർക്കാർ നിലപാടിന്‌ വ്യാപകമായ പ്രചരണം നൽകാൻ മാധ്യമങ്ങൾ സന്നദ്ധരാകണം.

കേരളത്തിലെ പതിനായിരക്കണക്കിന്‌ വരുന്ന മിശ്രവിവാഹിതർക്കും ഇടതുപക്ഷ രാഷ്ട്രീയബോധമുള്ളവർക്കും യുക്തിവാദികൾക്കും എല്ലാ പുരോഗമന വാദികൾക്കും ഈ നിർദേശം പ്രയോജനപ്പെടുത്തണമെന്ന്‌ താൽപര്യമുണ്ട്‌. ഉത്തരവിലെ അവ്യക്തതയും സ്കൂൾ അധികൃതരുടെ നിർബന്ധവുമാണ്‌ ജാതി മാലിന്യം രേഖപ്പെടുത്തുവാൻ അവരെ പ്രേരിപ്പിക്കുന്നത്‌.

കുട്ടിയെ സ്കൂളിൽ ചേർക്കാന്‍ ചെന്ന ഒരു യുവസാംസ്കാരിക പ്രവർത്തകന്റെ അനുഭവം വിചിത്രമായിരുന്നു. കുട്ടിക്ക്‌ ജാതിയും മതവും ഇല്ല എന്നു പറഞ്ഞപ്പോൾ അച്ഛനമ്മമാരുടെ പേരുകളിൽ നിന്ന്‌ ഹിന്ദുവാണെന്ന്‌ തെളിയുന്നുണ്ടല്ലോ എന്ന്‌ പറഞ്ഞു ഹെഡ്മിസ്ട്രസ്‌. ഹിന്ദുമതത്തിൽ തീരെ വിശ്വാസമില്ലെന്ന്‌ പറഞ്ഞപ്പോൾ ക്രൈസ്തവ മാനേജ്മെന്റിലുള്ള ആ സ്കൂളിന്റെ ഹെഡ്മിസ്ട്രസ്‌ പറഞ്ഞത്‌ എങ്കിൽ ക്രിസ്ത്യാനി എന്ന്‌ വയ്ക്കട്ടെ എന്നായിരുന്നു. അവർ അതു സമ്മതിച്ചില്ല. പകരം ബുദ്ധമതം എന്ന്‌ രേഖപ്പെടുത്തുകയായിരുന്നു. അങ്ങനെ ജാതി എഴുതുന്നതിൽ നിന്നും അവർ രക്ഷപ്പെട്ടു. ഇത്തരം പ്രതിസന്ധികൾ ഒരു രക്ഷകർത്താവിനും ഈ വർഷം ഉണ്ടാവരുത്‌.

സാംസ്കാരിക സംഘടനകൾ ഈ പ്രഖ്യാപനം നടപ്പിലാക്കുന്നതിനുള്ള മുന്നണിപ്പോരാളികളായി പ്രവർത്തിക്കുന്നത്‌ നന്നായിരിക്കും. രക്ഷകർത്താക്കളെ ബോധവൽക്കരിക്കുക എന്ന പ്രധാനപ്പെട്ട പ്രവർത്തനം അവർക്ക്‌ നടത്താവുന്നതാണ്‌.
സംവരണാനുകൂല്യങ്ങൾ ആവശ്യമുള്ള കുടുംബങ്ങളുണ്ട്‌, നൂറ്റാണ്ടുകളായി അടിച്ചമർത്തപ്പെട്ട ഒരു വിഭാഗം ജനങ്ങൾ. അവരില്‍ ഇനിയും രക്ഷപ്പെട്ടിട്ടില്ലാത്തവർക്കാണ്‌ ആ ആനുകൂല്യം വേണ്ടത്‌. അങ്ങനെയുള്ളവരുടെ ജാതി സംബന്ധിച്ച വിവരങ്ങ ൾ സ്കൂളുകളിൽ രഹസ്യസ്വഭാവത്തോടെ സൂക്ഷിക്കേണ്ടതാണ്‌. എസ്‌എസ്‌എൽസി ബുക്ക്‌ അടക്കമുള്ള രേഖകളിൽനിന്നും ഈ അപമാനം ഒഴിവാക്കുവാൻ അങ്ങനെ സാധിക്കും.

Thursday, 4 May 2017

ഹോണില്ലാദിനവും ഉച്ചഭാഷിണികളും


പല ദിനങ്ങളും സമുചിതമായി ആചരിച്ചതുപോലെ ഹോൺരഹിതദിനവും നമ്മൾ ഹോൺ അടിച്ചുതന്നെ ആഘോഷിച്ചു. ഹോൺരഹിതദിനം ഉത്സവമായി ആഘോഷിച്ചത്‌ കേരളത്തിലെ എഫ്‌എം റേഡിയോകളാണ്‌. അവർ ഹോണടിക്കേണ്ടുന്ന സന്ദർഭങ്ങൾ വിശദീകരിച്ചുകൊണ്ടാണ്‌ ഹോൺരഹിത ദിനത്തെ പൊലിപ്പിച്ചത്‌. നാടെമ്പാടും നിറഞ്ഞിരിക്കുന്ന ഉച്ചഭാഷിണികളുടെ കഠോരശബ്ദത്തിനിടയിൽ ഹോൺരഹിത ദിനാചരണം വെടിക്കെട്ടിനിടയിലെ പൊട്ടാസ്‌ വെടിപോലെ അപ്രസക്തമായിപ്പോയി.

ഹോണടിക്കുന്നതിൽ ഭ്രാന്തമായ ഒരു മാനസികാവസ്ഥ തന്നെ മലയാളികൾ പുലർത്തുന്നുണ്ട്‌. ആശുപത്രി പരിസരങ്ങളിൽ ഹോണടിക്കാൻ പാടില്ല എന്ന മുദ്രകൾ വച്ചിട്ടുണ്ടെങ്കിലും വാഹനങ്ങളുടെ മത്സര ഓട്ടത്തിൽ കമ്പമുള്ള മലയാളി അതൊന്നും കാര്യമാക്കാറില്ല.

ചെവിയും തലച്ചോറും തുളച്ചുകീറുന്ന രീതിയിലുള്ള മുഴക്കങ്ങളാണ്‌ വാഹനങ്ങളിൽ നിന്നും പുറത്തേക്ക്‌ വരുന്നത്‌. തീവണ്ടിച്ചൂളത്തേയും സൈറണുകളേയും പിന്നിലാക്കുന്ന വമ്പൻ ഹോണുകൾ കേരളത്തിലെ വാഹനങ്ങളിലുണ്ട്‌.

ഒരു നിശ്ചിത ഡെസിബലിനപ്പുറമുള്ള ശബ്ദം ആരോഗ്യത്തിന്‌ ഹാനികരമാണ്‌. മനുഷ്യൻ മാത്രമല്ല ഞെട്ടിത്തെറിക്കുന്നത്‌. ഗോമാതാവടക്കമുള്ള മൃഗങ്ങളും വിറളിപിടിച്ച്‌ ഓടുന്നത്‌ കാണാം. രോഗബാധിതർക്ക്‌ പൊടുന്നനെ ഉയരുന്ന ഹോൺ വിളി കൊലവിളിയായിട്ടാണ്‌ അനുഭവപ്പെടുന്നത്‌. നിരത്തുതോറും നിരന്നുനിൽക്കാറുള്ള നിയമപാലകർ ഇതൊന്നും കേട്ടഭാവം നടിക്കുന്നുമില്ല.

ശബ്ദമലിനീകരണം നിയന്ത്രിക്കുവാൻ ഇന്ത്യൻ പാർലമെന്ത്തന്നെ പാസാക്കിയ നിയമമുണ്ട്‌. ആ നിയമമനുസരിച്ച്‌ നീളൻ കോളാമ്പികൾ ഉപയോഗിക്കുവാൻ പാടില്ല. നിയമത്തെ മറികടക്കുവാനുള്ള ഉത്സാഹം നമ്മൾക്കുണ്ടല്ലോ. കോളാമ്പികൾക്കുള്ള സ്ഥാനം വലിയ പെട്ടികൾ കയ്യടക്കി. ഒരു പെട്ടിക്കുള്ളിൽ ഒന്നിലധികം സ്പീക്കറുകൾ ഘടിപ്പിച്ച്‌ കോളാമ്പി ഗർജനത്തെ പിന്നിലാക്കുന്ന രീതി കണ്ടുപിടിക്കപ്പെട്ടു. ഒരു സ്ഥലത്ത്‌ ഉത്സവമോ മതപ്രസംഗമോ നടക്കുകയാണെങ്കിൽ കിലോമീറ്റർ ചുറ്റളവിൽ ഉഗ്രപ്രഹരശേഷിയുള്ള ശബ്ദപ്പെട്ടികൾ സ്ഥാപിക്കുകയാണ്‌ ഇപ്പോൾ ചെയ്യുന്നത്‌. അവയ്ക്ക്‌ കാവൽനിൽക്കുക എന്ന ഭാരിച്ച ചുമതലയാണ്‌ ക്രമസമാധാനപാലകർ നിർവഹിക്കുന്നത്‌. മനുഷ്യന്റെ സമാധാന ജീവിതത്തിനുമേൽ നടത്തുന്ന അക്രമം എന്ന വ്യാഖ്യാനത്തിലേക്ക്‌ ക്രമസമാധാനം മാറിയിട്ടുണ്ട്‌.

ഹയർ സെക്കൻഡറി, എസ്‌എസ്‌എൽസി പരീക്ഷകൾ പ്രഖ്യാപിച്ചതിനു ശേഷമാണ്‌ പല സ്ഥലങ്ങളിലും ഉത്സവങ്ങൾ കൊണ്ടാടിയത്‌. ഉത്സവമെന്നാൽ പരിധിയില്ലാത്ത ശബ്ദശല്യം എന്നാണല്ലോ ഇപ്പോൾ അർഥം. ഉത്സവത്തോടനുബന്ധിച്ച്‌ നടത്തപ്പെട്ട പൊതുസമ്മേളനങ്ങളിൽ ജനപ്രതിനിധികൾ പോലും പങ്കെടുത്ത്‌ ശബ്ദമലിനീകരണത്തിന്റെ ആക്കം കൂട്ടുകയുണ്ടായി.
പൊതുപരീക്ഷയുടെ ഫലം മെച്ചപ്പെടുത്തുവാൻ എന്തെങ്കിലും ചെപ്പടി വിദ്യകൾ പരീക്ഷാഭവന്‌ നടത്തേണ്ടതായിവരും.
പരീക്ഷക്കാലത്ത്‌ അലറി വിളിക്കുന്ന ഉച്ചഭാഷിണികളുടെ സമീപത്തിരുന്ന്‌ പഠിക്കേണ്ടിവന്ന കുട്ടികളുടെ മാനസിക സംഘർഷം ആരും ശ്രദ്ധിച്ചതേയില്ല.

ഉത്സവങ്ങളും ആദ്ധ്യാത്മിക പ്രഭാഷണപരമ്പരകളും മാറ്റിവയ്ക്കുവാൻ മതാന്ധവിശ്വാസികൾ തയാറാകുന്നില്ലായെങ്കിൽ പരീക്ഷയെങ്കിലും മാറ്റിവയ്ക്കുവാൻ സർക്കാർ തയാറാകേണ്ടതായിരുന്നു. ഉച്ചഭാഷിണിയുടെ ഗർജനം നിറഞ്ഞ കേരളത്തിൽ ഹോണില്ലാ സംസ്കാരം വളർത്തിയെടുക്കുവാൻ ബുദ്ധിമുട്ടുതന്നെയാണ്‌.

Wednesday, 19 April 2017

കായിക്കര തോന്നയ്ക്കൽ വഴി പല്ലന



പുതിയ കാലത്തെ അനിഷ്ട വാസ്തവങ്ങളിൽ ഒന്ന്‌ കുമാരനാശാന്റെ കവിതകൾ വായിക്കപ്പെടുന്നില്ല എന്നതാണ്‌. പത്തു വർഷം മുമ്പ്‌ ഒരു ലൈബ്രറിയിൽ വീണപൂവിന്റെ നൂറാം വയസ്‌ ആഘോഷിക്കുകയായിരുന്നു. വിദ്യാർഥികളും രക്ഷകർത്താക്കളുമടക്കം മുന്നൂറോളം പേർ വരുന്ന സദസ്‌. അവരാരും തന്നെ മഹാകവി കുമാരനാശാന്റെ വീണപൂവ്‌ വായിച്ചവരായിരുന്നില്ല. പദ്യപാരായണ മത്സരത്തിൽ പങ്കെടുക്കാൻ വേണ്ടി ചില കുട്ടികൾ വീണപൂവിലെ ചില ശ്ലോകങ്ങൾ മനഃപാഠമാക്കിയിരുന്നതാണ്‌ ഏക അപവാദം. അവരിൽ പലരും മലയാളം സ്കൂളിൽ പഠിക്കാത്തതിനാൽ മംഗ്ലീഷിൽ എഴുതിയെടുത്ത്‌ ഹൃദിസ്ഥമാക്കിയവർ ആയിരുന്നു. വർത്തമാനം മാറ്റിവച്ച്‌ ഞാൻ വീണപൂവ്‌ പൂർണമായും ചൊല്ലുകയായിരുന്നു.

ആശാന്റെ കൃതികളിൽ ഏറ്റവും ജനകീയതയാർന്ന വീണപൂവിന്റെ സ്ഥിതി ഇതാണെങ്കിൽ നളിനി, ലീല, പ്രരോദനം, ദുരവസ്ഥ, ചിന്താവിഷ്ടയായ സീത തുടങ്ങിയ കൃതികളുടെ വർത്തമാനകാല വായന ഊഹിക്കാവുന്നതേയുള്ളു.

പഴയ കവിതകൾ വൃത്തത്തിനനുസരിച്ച്‌ വായിക്കാനുള്ള പരിശീലനം ലഭിച്ചിരുന്നെങ്കിൽ വളരെ വേഗം അവ വായിച്ചെടുക്കാമായിരുന്നു. ആശാന്റെ കൃതികൾക്കെല്ലാം അടിക്കുറിപ്പ്‌ ഉള്ളതിനാൽ കവിതയിലെ കാര്യം മനസിലാക്കാൻ ഒരു ബുദ്ധിമുട്ടും ഉണ്ടാവുകയുമില്ല. വസന്തതിലകം, വിയോഗിനി, രഥോദ്ധത, ശാർദ്ദൂലവിക്രീഡിതം തുടങ്ങിയ വൃത്തങ്ങൾ പുതിയ തലമുറയ്ക്ക്‌ തീരെ അപരിചിതമാണ്‌. കവിതയെഴുതാൻ വൃത്ത നിർബന്ധം ആവശ്യമില്ലെങ്കിൽ കൂടി പഴയ കവിതകൾ വായിച്ചു പോകുവാൻ വൃത്തപഠനം സഹായിക്കുമായിരുന്നു. പരീക്ഷാ ചോദ്യങ്ങളെ ഒഴിവാക്കി വൃത്തത്തിന്റെ അടിസ്ഥാനരീതികൾ കുട്ടികൾക്ക്‌ പരിചയപ്പെടുത്തുന്നത്‌ നന്നായിരിക്കും.

കായിക്കര, തോന്നയ്ക്കൽ, പല്ലന എന്നീ സ്ഥലങ്ങളിലായി മൂന്ന്‌ ആശാൻ സ്മാരകങ്ങളാണ്‌ നിലവിലുള്ളത്‌. അതിൽ കായിക്കര, തോന്നയ്ക്കൽ സ്മാരകങ്ങൾ നിരവധി പരിപാടികളാൽ സജീവവുമാണ്‌. ആശാൻ സ്മാരകങ്ങളിൽ ഒരു വർഷക്കാലം നീണ്ടുനിൽക്കുന്ന ആശാൻ കവിതാസ്വാദന പാഠശാലകൾ സംഘടിപ്പിക്കുന്നത്‌ നന്നായിരിക്കും. പ്രായഭേദമെന്യേ എല്ലാവർക്കും അവിടെ പ്രവേശനവും നൽകാവുന്നതാണ്‌.

ബോധ്ഗയയിലും സിംലയിലും ചില വിദേശരാജ്യങ്ങളിലുമെല്ലാം പോകുമ്പോൾ ബുദ്ധസാഹിത്യ ഗ്രന്ഥശാലകൾ കണ്ട്‌ നമ്മൾ അത്ഭുതപ്പെടും. കേരളത്തിൽ അങ്ങനെയൊരു ഗ്രന്ഥശാല, വിപുലശേഖരത്തോടെ നിലനിൽക്കുന്നില്ല. ജപ്പാൻ, മ്യാൻമർ, തായ്‌ലന്റ്‌, ശ്രീലങ്ക തുടങ്ങിയ രാജ്യങ്ങളുമായി സഹകരിച്ച്‌ ബുദ്ധമത സൈദ്ധാന്തിക ഗ്രന്ഥങ്ങളും സാഹിത്യ ഗ്രന്ഥങ്ങളും ശേഖരിക്കാവുന്നതാണ്‌. ബുദ്ധദർശനത്തിന്റെ ആഴവും പരപ്പും മലയാളികളെ ബോധ്യപ്പെടുത്തിയ ആദ്യത്തെ കവി എന്നനിലയിൽ ഒരു ബുദ്ധസാഹിത്യ ഗ്രന്ഥശാല സ്ഥാപിക്കുവാൻ സർക്കാരിന്റെ സാമ്പത്തിക സഹായത്തോടെ പ്രവർത്തിക്കുന്ന തോന്നയ്ക്കൽ സ്മാരകത്തിന്‌ മുൻകൈയെടുക്കാവുന്നതാണ്‌. സവർണഹിന്ദുക്കൾ ആൺകുട്ടികൾക്കുവേണ്ടി നടത്തിയിരുന്ന വിദ്യാരംഭം ഹിന്ദുമത പീഡനങ്ങൾക്കെതിരെ പ്രതികരിച്ച കവിയുടെ വീട്ടിനുമുന്നിൽ നടത്തുന്നതിനേക്കാൾ ഉചിതമായിരിക്കും ബുദ്ധസാഹിത്യ പാഠാലയം.

തെലുങ്ക്‌ ഭാഷയിലെ കവിതകളുടെ ഒരു സമഗ്ര ശേഖരം മലയാളത്തിന്‌ തന്നത്‌ ഹൈദരാബാദിലെ തെലുഗ്‌ സർവകലാശാല മുൻകയ്യെടുത്താണ്‌. ഒഎൻവിയും പുതുശേരിയും അടക്കമുള്ള മുതിർന്ന കവികളെക്കൊണ്ട്‌ കവിതകൾ മലയാളീകരിച്ച്‌ പ്രസിദ്ധപ്പെടുത്തുവാൻ തെലുങ്കു സർവകലാശാലയ്ക്ക്‌ കഴിഞ്ഞു. വൈസ്‌ ചാൻസലറും പ്രമുഖ കവിയുമായ സി നാരായണറെഡ്ഡി തിരുവനന്തപുരത്ത്‌ വന്ന്‌ പുസ്തകം പ്രകാശിപ്പിക്കുകയും ചെയ്തു. മഹാകവി കുമാരനാശാന്റെ കവിതകൾ ഇന്ത്യയിലെ എല്ലാ ഭാഷകളിലേക്കും പൂർണരൂപത്തിൽ വിവർത്തനം ചെയ്ത്‌ പ്രസിദ്ധീകരിക്കുവാൻ കേരളം ഉത്സാഹപ്പെടേണ്ടതുണ്ട്‌. മലയാളം സർവകലാശാലയടക്കമുള്ള സ്ഥാപനങ്ങൾ ഇതിനു മുൻകൈയെടുക്കേണ്ടതാണ്‌. ആശാൻ സ്മാരകവും ഇക്കാര്യത്തിൽ ശ്രദ്ധ ചെലുത്തേണ്ടതാണ്‌.

തമിഴ്‌നാട്‌ സർക്കാരിന്റെ ഒരു വാഹനം ഒന്നാം നമ്പർ സംസ്ഥാന പാതയിലൂടെ ഓടുന്നുണ്ട്‌. അതിന്റെ ബോർഡ്‌ തലക്കുളം-മണ്ണടി എന്നാണ്‌. ചെന്നൈയിൽ നിന്നോ കോയമ്പത്തൂരിൽ നിന്നോ നാഗർകോവിലിൽ നിന്നോ കന്യാകുമാരിയിൽ നിന്നോ തിരുവനന്തപുരത്തേക്ക്‌ ബസ്‌ സർവീസ്‌ നടത്തുക സ്വാഭാവികമാണ്‌. എന്നാൽ ഈ ബസ്‌ സർവീസിന്റെ അർഥമെന്താണ്‌. അതാലോചിക്കുമ്പോഴാണ്‌ ഒരു ചരിത്രവൈദ്യുതതരംഗം നമ്മളിലൂടെ കടന്നുപോകുന്നത്‌. വേലുത്തമ്പി ദളവ ജനിച്ച സ്ഥലത്ത്‌ നിന്നും മരണപ്പെട്ട സ്ഥലത്തേക്കാണ്‌ ആ ബസ്‌ സർവീസ്‌. വലിയ ഒരു ഓർമപ്പെടുത്തലാണത്‌. ആ മാതൃകയിൽ കായിക്കരയിൽ നിന്നും ആരംഭിച്ച്‌ തോന്നയ്ക്കൽ വഴി പല്ലനയിൽ അവസാനിക്കുന്ന ഒരു ബസ്‌ സർവീസ്‌ സാക്ഷാത്കരിക്കാവുന്നതാണ്‌. ആറ്റിങ്ങൽ മുതൽ ഹരിപ്പാട്‌ വരെയുള്ള ഏതെങ്കിലും സ്റ്റേഷനിൽ നിന്നും ഈ സർവീസ്‌ ഓപ്പറേറ്റ്‌ ചെയ്യാവുന്നതേയുള്ളു. യാത്രാസൗകര്യം വർധിക്കുമെന്നു മാത്രമല്ല, ആശാൻ സ്മരണയോടുള്ള സഞ്ചരിക്കുന്ന ആദരവായും ഈ സർവീസ്‌ മാറും.

Wednesday, 12 April 2017

ആയൂര്‍ റെയില്‍വേ സ്റ്റേഷന്‍


ചില മത്സ്യങ്ങള്‍
കടല്‍ വൃക്ഷത്തിന്‍
പൊത്തിലൊളിക്കും.

ചില സത്യങ്ങള്‍
പൊളിവാക്കിന്റെ
മറവില്‍ തൂങ്ങും

ചില ദൃശ്യങ്ങള്‍
വളരെക്കാലം
ഒളിവില്‍ പാര്‍ക്കും.

അങ്ങനെയൊരു ദൃശ്യം.

മൂടല്‍ മഞ്ഞു തുടച്ചും
ചൂടല്‍ക്കുന്നു തുളച്ചും
കണ്‍വെട്ടത്തായ്
നിന്നു തിമിര്‍ക്കുന്നു.

അത്ഭുതമത്ഭുതമത്ഭുതമേ
കണ്ടിട്ടില്ലാ നിന്നെ
പോയോര്‍ വന്നോര്‍ നിഴലുപതിച്ച
ആയൂര്‍ റെയില്‍വേ സ്റ്റേഷന്‍.

ചോപ്പ്
മഞ്ഞ
പച്ച
കണ്ണുകള്‍ മൂന്നും ചിമ്മുന്നുണ്ട്.

ലോക്കോ പൈലറ്റിന്റെ
കണ്ണിലുറക്കച്ചൂണ്ട.

ഏതോ വണ്ടി വരുന്നുണ്ട്
പാളക്കൈകള്‍ മാറുന്നുണ്ട്
ചൂളത്തിന്നാരോഹണമായി
വേലി നമിച്ചു ബലക്കുന്നുണ്ട്.

ഇരുമ്പുകുതിര
കിതച്ചു നില്‍ക്കെ
ഇറങ്ങിടുന്നൊരു യുവതി.

പൂക്കാലം പോല്‍ മഞ്ഞയുടുത്ത്
ഞാവല്‍ക്കണ്ണു തുടച്ച്
അഛനെ, മകനെ, ആങ്ങളയെ
ഭര്‍ത്താവിനെയോ നോക്കുന്നു.

ആളുകളെല്ലാം പാമ്പിന്‍കൂട്ടം
മാളം തേടി ചിതറുന്നു.

ഒറ്റയ്ക്കങ്ങനെയാധി പെരുത്ത്
നില്‍ക്കുംപോഴൊരു  നായ
കൂട്ടിനു വന്നു വിളിക്കുന്നു.

നായവയറ്റില്‍ വിശപ്പിന്‍ ജ്വാല
ആളിക്കത്തിയ നാളില്‍
ഇത്തിരിയന്നം നല്‍കിപ്പോറ്റിയ-
തിപ്പൊഴുമോര്പ്പൂ നായ.

നായക്കൊപ്പമിരുട്ടിന്‍ കാട്ടില്‍
പോയി മറഞ്ഞൂ യുവതി.

അത്ഭുതമത്ഭുതമത്ഭുതമേ
കാണുന്നില്ല
ആയൂര്‍ റെയില്‍വേ സ്റ്റേഷന്‍.

Monday, 10 April 2017

ചെയ്യേണ്ടത്


കണ്ടു നില്‍ക്കാനില്ല കാലം
കണ്ടതും കേട്ടതും
മണ്ടത്തരമെന്ന്
കണ്ടാല്‍ മടിക്കാതെ
കല്ലെടുത്തെറിയെടാ മോനേ.

പാഴാക്കുവാനില്ല നേരം
പോഴത്തരത്തില്‍
കുരുങ്ങിയ ചെയ്തികള്‍
നേരേ തിരിച്ചറിഞ്ഞെങ്കില്‍
ഇരിക്കാതെ
കമ്പൊടിച്ചെറിയെടാ മോനേ.

കാത്തിരിക്കാനില്ല പ്രായം
ഓര്‍ത്തതും കാത്തതും
ബോറായിരുന്നെന്നു തോന്നിയാല്‍
വൈകാതെ
വാക് ബോംബെറിയെടാ മോനേ.

അപ്പോള്‍
ക്ഷമിക്കുന്നതെപ്പോള്‍
ഇപ്പോള്‍
ക്ഷമക്ഷാമകാലം.

Saturday, 8 April 2017

ലങ്ങേര്


ആറാംപാഠം കീറിയെറിഞ്ഞ്
സാറമ്മാരെ തെറിയുംവിളിച്ച്
മഷിയും കുടഞ്ഞ്
പശയും തേച്ച്
കാശുണ്ടായപ്പോൾ പാടെ മറന്നു
ലവിടുത്തെ ലങ്ങേര്.
ആഢ്യന്മാരുടെ ക്ലബ്ബിൽകൂടീ
ശാഠ്യച്ചെക്കിൽ വിരലൊപ്പിട്ട്
പാസ്സില്ലാതെയകത്തുകടന്ന്
ഗ്ലാസുനിറച്ചുമൊഴിച്ചുകൊടുത്ത്
നാണക്കേടിൻ നായെക്കൊന്ന്
ലവിടുത്തെ ലങ്ങേര്.
സ്കൂൾത്തൈനട്ടുപെരുംസ്കൂളാക്കി
കാലിത്തൊഴുത്ത് പ്ലേസ്കൂളാക്കി
കോടതിമുറിയിൽ കോടിയെറിഞ്ഞ്
ഷോടതി കിട്ടിയപോലെ ഞെളിഞ്ഞ്
പാങ്ങായപ്പോൾ കൂടപ്പിറപ്പിൻ
തേങ്ങിക്കരച്ചിലുകൂടെ വെടിഞ്ഞ്
ലവിടുത്തെ ലങ്ങേര്.
സിനിമാനടിയെ നോട്ടിട്ടുപിടിച്ച്
പനിമാറാനായ് കൂടെ നടിച്ച്
പത്മശ്രീയുടെ കഴുതപ്പുറത്ത്
കുട്ടിത്തേവാങ്കായിയിരിക്കാൻ
കാണേണ്ടവരെ കാണാൻപോയി
ലവിടുത്തെ ലങ്ങേര്
കുടിവെള്ളത്തിനുവീടുംകാടും
കുടിലും മേടും കേഴുന്നേരം
മലവെള്ളത്തെ കുപ്പിയിലാക്കി
ചന്തയീലെത്തിച്ചർമ്മാദിച്ച്
കരയുന്നോരുടെ കീശകൾകീറി
പണമുണ്ടാക്കീട്ടാനയെ വാങ്ങി
കാറുംബസ്സുംലോറീംവാങ്ങി
ലവിടുത്തെ ലങ്ങേര്.
യുദ്ധത്തിന്റെ മണംവന്നെന്ന്
ചാനൽക്കുഞ്ഞ് ചിലച്ചപ്പോഴേ
ഉപ്പുംമുളകുംകൊത്തമ്പാലും
പച്ചരി കുച്ചരി ചാക്കിൽകെട്ടി
മദ്യക്കുപ്പികൾ കാവലിരിക്കും
മണ്ണറയിൽകൊണ്ടട്ടിച്ചമച്ച്
ഇല്ലാവിലയുടെ മൂർഖൻമൂപ്പനെ
വിപണിയിലാകെയൊരുക്കിയിറക്കീ
ലവിടുത്തെ ലങ്ങേര്
കായൽനികത്തി ടൂറിസ്റ്റുകളുടെ
നാഭിതിരുമ്മാൻ പുരയുണ്ടാക്കീ
ആയുർവ്വേദം,കളരി,പ്രകൃതി
ആയുസ്സിന്നു പ്രലോഭനമേറ്റി
കഞ്ഞിക്കാടിയിൽ മധുരം ചേർത്ത്
കേരളലസ്സി പേറ്റന്റാക്കീ
മണലുകടത്തി
ഇരുതലമൂരിയെ കടലുകടത്തീ
കപ്പലുവാങ്ങി വിമാനം വാങ്ങീ
ലവിടുത്തെ ലങ്ങേര്
സ്വർണ്ണപ്രശ്നം വെച്ചുകഴിഞ്ഞാൽ
അന്തിത്തിരിയനെ ആടക്കളഞ്ഞ്
തന്ത്രിയെവെച്ചുമന്ത്രമുരപ്പി-
ച്ചഞ്ചും പത്തുംലക്ഷാർച്ചനയുടെ
കുറ്റിയടിച്ചു പിരിച്ചുജയിച്ച്
കൊമ്പനെയൊന്നു നടക്കലിരുത്തി
ലവിടുത്തെ ലങ്ങേര്
ലവിടുത്തെ ലങ്ങേർക്കില്ലാ മരണം
ലവിടെയുമെവിടെയുമവരുടെ ഭരണം
ലങ്ങനെലിങ്ങനെലതുപോലിതുപോൽ
ലക്ഷണമൊത്ത വിരൂപാഭരണം
ലവിടുത്തെ ലങ്ങേര്
ലവിടുത്തെ ലങ്ങേര്

Wednesday, 5 April 2017

ഫറൂക്ക്‌, റിയാസ്‌ മൗലവി, ഡോ. കൃഷ്ണകിർവലേ:


മാർച്ച്‌ മാസത്തിന്റെ തിരശീല വീണത്‌ അത്യന്തം അപകടകരമായ കാലാവസ്ഥയെക്കുറിച്ച്‌ സൂചിപ്പിക്കുന്ന മൂന്നു നരഹത്യകൾ രേഖപ്പെടുത്തിക്കൊണ്ടാണ്‌.

ഇസ്ലാം മതത്തിന്റെ മതിൽക്കെട്ടിനു പുറത്തുവന്ന്‌ മനുഷ്യനെ മതാതീത സമൂഹമായി കാണണം എന്ന ചിന്തയിൽ വിശ്വസിച്ച യുവാവായിരുന്നു കോയമ്പത്തൂരിലെ ഫറൂക്ക്‌. കഴിഞ്ഞ പത്തു വർഷത്തോളമായി ഫറൂക്ക്‌ മതാതീത സംസ്കാരം പഠിക്കുകയും പ്രചരിപ്പിക്കുകയും ചെയ്തിരുന്നു. അങ്ങനെയുള്ള ഒരു വാട്സ്‌ആപ്‌ ഗ്രൂപ്പിൽ അദ്ദേഹം അംഗവുമായിരുന്നു. തമിഴ്‌നാട്ടിലെ ദ്രാവിഡ വിടുതലൈ കഴകം എന്ന റാഷണലിസ്റ്റ്‌ മൂവ്മെന്റായിരുന്നു ഫറൂക്കിന്റെ പ്രവർത്തനമേഖല.

സ്വന്തം വീട്ടിൽ ഈ ആശയങ്ങളൊന്നും തന്നെ അനുസരിക്കുവാൻ ഫറൂക്ക്‌ നിർബന്ധിച്ചിരുന്നില്ല. ഭാര്യയോടൊപ്പം അദ്ദേഹത്തിന്റെ കുഞ്ഞുങ്ങൾ മതാചാര പ്രകാരം തന്നെ ജീവിച്ചു. ചിലപ്പോഴൊക്കെ ഫറൂക്ക്‌ സ്വന്തം കുട്ടികളെ അയാൾ പങ്കെടുക്കുന്ന മീറ്റിങ്ങുകളിലേക്കും കൊണ്ടുപോയിരുന്നു. ഫറൂക്കിന്റെ മാതാപിതാക്കൾ തികഞ്ഞ മതവിശ്വാസികളായി ജീവിച്ചു.

അപ്പോഴാണ്‌ ഇസ്ലാം മതതീവ്രവാദികൾ ഫറൂക്കിന്റെ ജീവിതത്തിലിടപെടുന്നത്‌. ഫലം ഫറൂക്കിനെ കഴുത്തറുത്ത്‌ കൊല്ലുകയെന്നതായിരുന്നു. ആ കുടുംബം അനാഥമായി. കേരളത്തിൽ നിന്നും അവരെ സമാശ്വസിപ്പിക്കാൻ പോയ യു കലാനാഥൻ, സജീവൻ അന്തിക്കാട്‌, മധു ഒ നെഗറ്റീവ് തുടങ്ങിയവരോട്‌ ഫറൂക്കിന്റെ ഉമ്മ ചോദിച്ച ചോദ്യമിങ്ങനെ “ഞങ്ങളുടെ മകനല്ലേ ദൈവം ഇല്ല എന്നു വിശ്വസിച്ചുള്ളൂ, ഞങ്ങൾ ദൈവം ഉണ്ടെന്നാണല്ലോ വിശ്വസിച്ചത്‌. ഞങ്ങൾക്കിനി ആരുണ്ട്‌? ദൈവം ഞങ്ങളോട്‌ എന്തിനിത്‌ ചെയ്തു?”

കാസർകോട്‌ ജില്ലയിൽ പഴയ ചൂരിയിലെ മദ്രസ അധ്യാപകനായ റിയാസ്‌ മൗലവിയെ കുത്തിക്കൊന്നതായിരുന്നു ഞെട്ടിപ്പിച്ച മറ്റൊരു നരഹത്യ. ആരാധനാലയത്തിനടുത്തുള്ള വാസസ്ഥലത്ത്‌ ഉറങ്ങിക്കിടന്ന മതവിശ്വാസിയായ റിയാസ്‌ മൗലവിയെക്കൊന്നത്‌ ഹിന്ദുമത തീവ്രവാദികളായിരുന്നു.

കാസർകോട്‌ ജില്ലയിൽ ഇത്തരം ഹീനമായ കൊലപാതകങ്ങൾ പുത്തരിയല്ല. ഫഹദ്‌ എന്ന പിഞ്ചുബാലനെ പട്ടാപ്പകൽ പൊതുവഴിയിൽ വച്ച്‌ കൊലപ്പെടുത്തിയതിനു പിന്നിലും ഹിന്ദുമത ഭ്രാന്ത്‌ ആയിരുന്നല്ലോ.

ദൈവം രക്ഷിക്കുമെന്ന്‌ കുഞ്ഞുങ്ങളെ പഠിപ്പിച്ച റിയാസ്‌ മൗലവിയെ ദൈവം രക്ഷിച്ചില്ല. മതത്തിന്റെ പേരിൽ മനുഷ്യനെ കൊല്ലുന്നത്‌ തെറ്റാണെന്ന്‌, ഗീത ഉപദേശിച്ച ഹിന്ദുദൈവം മതഭ്രാന്തന്മാരെ പഠിപ്പിച്ചതുമില്ല. ദൈവത്തെക്കുറിച്ച്‌ വലിയ വായിൽ വർത്തമാനം പറയണോ എന്ന്‌ ആലോചിക്കേണ്ടിയിരിക്കുന്നു.

വർഗീയമായ കാരണങ്ങളില്ലാതെയാണ്‌ ദളിത്‌ എഴുത്തുകാരനും ചിന്തകനുമായിരുന്ന ഡോ. കൃഷ്ണ കിർവലേയെ കൊലപ്പെടുത്തിയത്‌. കൊൽഹാപ്പൂരിലെ ശിവാജി യൂണിവേഴ്സിറ്റിയിൽ മറാത്തിയുടെയും അംബേദ്ക്കർ സ്റ്റഡി സെന്ററിന്റെയും മേധാവിയായിരുന്നു അദ്ദേഹം.

ദളിത്‌ പശ്ചാത്തലമുള്ള നാട്ടുഭാഷ നിഘണ്ടു മറാത്തിഭാഷയ്ക്കും ദളിത്‌ എഴുത്തിനും അദ്ദേഹം നൽകിയ മഹത്തായ സംഭാവനയാണ്‌. വീട്ടുപകരണങ്ങൾ വാങ്ങിയതിലുള്ള കടം വീട്ടാതിരുന്നതിനാലാണത്രെ അദ്ദേഹത്തെ കൊന്നത്‌. പെട്ടെന്ന്‌ തന്നെ പരിഹരിക്കപ്പെടാവുന്ന ചെറിയൊരു കാര്യത്തിനുവേണ്ടി ചെയ്ത ഈ അവിവേകം ഇന്ത്യയിലെ സമുന്നതനായ ഒരു പണ്ഡിതനെ ഇല്ലാതാക്കുകയാണ്‌ ചെയ്തത്‌. ഘാതകനായ പ്രീതം പാട്ടീൽ കറകളഞ്ഞ മതവിശ്വാസിയായിരുന്നു. മതപാഠങ്ങളൊന്നും പ്രീതം പാട്ടീലിനെ നേർവഴിക്കുനയിച്ചില്ല.

നമ്മുടെ ജയിലുകളിൽ പാർപ്പിച്ചിരിക്കുന്ന കുറ്റവാളികളിൽ മതരഹിതരോ നിരീശ്വരവാദികളോ ഇല്ല.

Tuesday, 4 April 2017

പഠനയാത്ര

പഠനയാത്ര
വിദൂരദേശത്തേക്ക്
വയലുകാണുവാൻ
പോകുന്നു കുട്ടികൾ

മുടിവടിച്ചു ലോഹക്കുട ചൂടിച്ചു
മലകളെ തളച്ചിട്ടതും കണ്ട്
പൊടിയുമുഷ്ണവും തോളിൽ ചുമന്നുകൊണ്ട്
അതുവഴി വന്ന കാറ്റിൽ കുളിച്ച്‌
മലിനയാം പുഴ തീരത്തു തുപ്പിയ
കഠിനകാല കഫത്തിൽ ചവിട്ടി
ചിറകൊടിഞ്ഞു നിലത്തേക്കുവീണ
പറവ ചീറ്റും കരച്ചിലിൽ മുട്ടി
ഹരിതവക്ഷോജ നാസികാഛേദനം
മരമറിഞ്ഞ വിഷാദത്തിൽ മുങ്ങി

പഠനയാത്ര
വിദൂരദേശത്തേക്ക്
വയലുകാണുവാൻ
പോകുന്നു കുട്ടികൾ

എവിടെയെന്നു തിരക്കുന്നു കണ്ണുകൾ
അവിടെയെല്ലാം വരണ്ട നിശൂന്യത
ഒരു കിളിയൊച്ച കാക്കുന്നു കാതുകൾ
കൊടിയ മൗനം ജ്വലിപ്പിച്ചു ദിക്കുകൾ
ഒടുവിലായിരം കാതം കടക്കവേ
വയലുപോലൊരു സ്വപ്നം വിരിയുന്നു

വെയിലു തീയാട്ടമാടും കൃഷിയിടം
കറുകറുത്ത മനുഷ്യർ മനോഹരർ
വിവിധ വിത്തുകൾ ശേഖരിച്ചോർമിച്ചു
വിത നടത്തി വിളയിച്ച പോർനിലം
ചെറുമരാം മണ്‍തരികൾക്കു ജീവിതം
കരിയുമൊത്തു കലാശിച്ച കണ്‍തടം
കളപറിക്കുൻ ഞാറു നടാൻ ,ഇട-
ക്കിള നടത്താൻ പഠിച്ച വിദ്യാലയം
തലചരിച്ചും നിവർത്തിയും താഴ്ത്തിയും
ചെടികൾ പാൽക്കുടം കാറ്റത്തു തോറ്റിയും
ഇരുളിലും വെള്ളിവെട്ടമായ് മിന്നിയും
വിഭവസാഗരം തീർത്തു മദിക്കുന്നു

പഠനയാത്ര
വിദൂര പ്രദേശത്ത്‌
വയലു കണ്ടു
തരിക്കുന്നു കുട്ടികൾ

ഒരിടമങ്ങനെ കണ്ണെത്താദൂരത്ത്
മുളകുപാടങ്ങൾ കാത്തിരിക്കുന്നു
മറുവയൽവള്ളി ചുറ്റിപ്പുണരുന്ന
പയറുപൂക്കളാൽ നീലിച്ച താഴ് വര
മുതിര,ജീരകം,വെൺപരുത്തി,തിന
കതിരുവന്ന ഞവര,ചോളം,മല്ലി
മിഴികളിൽ മലർക്കാലം സ്വരൂപിച്ചു
പരിധിവിട്ടു കളിക്കുന്നു കുട്ടികൾ

ഇനിയുമിത്തിരിപ്പോയാൽ മാന്തോപ്പുകൾ
മധുകിനിയുന്ന പപ്പായത്തോട്ടങ്ങൾ
കൊടിനിറഞ്ഞപോൽ ചെഞ്ചീരക്കാടുകൾ
മധുരനാരകക്കാവുകൾ,വാഴകൾ
വഴുതന,ചേന,ചേമ്പ് കിഴങ്ങുകൾ
പവനണിഞ്ഞ പാവൽപ്പന്തൽ പ്ലാവുകൾ
മണിയടിച്ചു തിരിച്ചു വിളിച്ചിട്ടും
മതിവരാതെ നടക്കുന്നു കുട്ടികൾ

ഇനിയൊരിക്കൽ
വിദേശരാജ്യത്തേക്ക്
കടലുകാണാൻ
പോകുന്നു കുട്ടികൾ

Wednesday, 22 March 2017

മുല്ല


മുല്ല പൂക്കട്ടെ മനസ്സിൽ
അസ്ഥീ പൊട്ടിച്ച് തടത്തിൽ വളം ചേർത്ത്
രക്തത്തിനാൽ നനച്ചെന്നും സ്തുതിക്കുമീ 
മുല്ല പൂക്കട്ടെ മനസ്സിൽ

സങ്കടത്തിന്റെ സരോവരം തുള്ളുന്നു
നെഞ്ചിൽ കിനാവിൽ മദംപൊട്ടിയാർക്കുന്ന
വമ്പൻ കൊലക്കൊമ്പനെൻ തലച്ചോറിനായ്
പിന്നെയും പിന്നെയും ചിന്നംവിളിക്കുന്നു
ക്രൂരദുഖത്തിൻ മഹായോനിയിൽത്തന്നെ
വീഴുന്ന മോഹരേതസ്സായി
ജീവിതം മാറുന്നതിൻമുമ്പു
വാൾത്തുമ്പിനാലെന്റെ
നാവിൽ വരയ്കൂ ചിരന്തനച്ചിന്തുകൾ
അർത്ഥനയ്കെപ്പൊഴും വ്യർത്ഥഗന്ധം മാറി-
ലസ്ത്രങ്ങളെയ് വൂ കിരാതസംഘം തോറ്റു-
നിൽക്കുന്നു ഞാനെന്റെ പത്മവ്യൂഹങ്ങളിൽ
സത്യത്തിനൊപ്പം സ്വപ്നത്തിനൊപ്പം

ചില്ലുകൊട്ടാരം തകർന്ന വൃത്താന്തമേ
ചൊല്ലുവാനുള്ളൂ മുടിഞ്ഞൊരില്ലത്തിന്റെ
മുറ്റത്തുപൂത്തൂ മുളംകാടുകൾ ഭ്രാന്ത-
നൃത്തം നടത്തുന്നൂ കാറ്റും കരീലയും

കണ്ണീരിലിന്നു നനച്ചുകത്തിച്ചൊരീ
വെണ്ണിലാവിന്റെ തിരശ്ശീലയേന്തിയെൻ
കർമ്മവും കാലവും നീങ്ങുന്നു
തേങ്ങുന്നു പിന്നിൽനിന്നാരോ
മനസ്സോ മനീഷയോ?

പുല്ലും പുരാണവും മൂടിയ ചിന്തയിൽ
ഭംഗിവാക്കിൻ മൃതദേഹം കുഴിച്ചിട്ടു
കല്ലും കണക്കും കടിച്ചുനോവിച്ചൊരെ-
ന്നുള്ളിലീ മുല്ലക്കുരുന്നു നടുന്നൂ ഞാൻ

പുഷ്പങ്ങളൊക്കെ കറുത്തതാണെങ്കിലും
നിർഗ്ഗന്ധകാന്തി കലർന്നതാണെങ്കിലും
കയ്പുനീരുള്ളിലുറഞ്ഞതാണെങ്കിലും
മുല്ല പൂക്കട്ടെ മനസ്സിൽ.

മുത്തച്ഛനും പള്ളീലച്ചനും മുസലിയാരും


കേരളത്തിൽ സമീപകാലത്ത്‌ നടന്ന അസാംസ്കാരിക പീഡനക്കേസുകളിലെ പ്രതികളിൽ ഒരു മുത്തച്ഛനും പള്ളീലച്ചനും മുസലിയാരും പിടിക്കപ്പെട്ടിരിക്കുന്നു. ഏത്‌ തറവാട്ടിലേയും കാരണവരാണ്‌ മുത്തച്ഛൻ. ഭർത്താവുമായി പിണങ്ങിപ്പിരിഞ്ഞ മകൾക്ക്‌ അഭയം നൽകുന്നത്‌ മുത്തച്ഛനാണ്‌. മകളുടെ കുട്ടികളേയും മുത്തച്ഛൻ പരിരക്ഷിക്കും. കേരളത്തിന്റെ ഈ സാംസ്കാരിക പാരമ്പര്യത്തെ തച്ചുടച്ചുകൊണ്ട്‌ ഈ മുത്തച്ഛൻ സ്വന്തം പേരക്കിടാവിനെ അസാന്മാർഗികതയിലേയ്ക്ക്‌ നയിച്ച കഥയാണ്‌ കുണ്ടറയിലെ പൊലീസ്‌ പറയുന്നത്‌.

മുത്തച്ഛനാൽ പീഡിപ്പിക്കപ്പെട്ട പെൺകുഞ്ഞിന്റെ മൃതശരീരം ജനലഴികളിൽ തൂങ്ങിയതായി കാണുകയായിരുന്നു. സ്വപ്നങ്ങൾ കാണുവാനും സാക്ഷാത്കരിക്കുവാനുമുള്ള ആ പെൺകുഞ്ഞിന്റെ അവകാശത്തെയാണ്‌ രക്ഷകനാകേണ്ട മുത്തച്ഛൻ നശിപ്പിച്ചത്‌. വീട്ടിൽ മുത്തച്ഛനുണ്ട്‌ എന്നത്‌ സുരക്ഷയുടെ അടയാളമായിരുന്നു. ഒറ്റപ്പെട്ട സംഭവമാണെങ്കിൽക്കൂടിയും മുത്തച്ഛന്റെ ലൈംഗികപീഡനം ഒരു സാമൂഹിക പ്രശ്നമായി കാണേണ്ടതാണ്‌. വേലിതന്നെ വിളവുതിന്നുന്ന കാഴ്ചയാണ്‌ കുണ്ടറയിൽ നമ്മൾ കണ്ടത്‌.

വയനാട്ടിലെ പള്ളീലച്ചൻ സമൂഹത്തെ മുഴുവൻ ദൈവം രക്ഷിക്കുമെന്ന കുപ്രചരണം നടത്തുന്ന ആളായിരുന്നു. നിയമപ്രകാരം വിവാഹ പ്രായമെത്താത്ത ഒരു പെൺകുഞ്ഞിനെയാണ്‌ ഈ വികാരി ലിംഗവിശപ്പിന്‌ ഇരയാക്കിയത്‌. പെൺകുട്ടിയുടെ കുടുംബത്തെപോലും സ്വാധീനിക്കാൻ അയാൾക്ക്‌ കഴിഞ്ഞു. സ്വന്തം പെൺകുഞ്ഞിന്‌ മറിയയ്ക്കുണ്ടായതുപോലെ ദിവ്യഗർഭമാണുണ്ടായതെന്ന്‌ അവർ വിശ്വസിച്ചിട്ടുണ്ടാവും. കാനഡയിലേയ്ക്ക്‌ കടക്കാൻ ശ്രമിച്ച ഈ കുറ്റവാളിയെ നിയമപാലകർ പിടികൂടി ജയിലിലടയ്ക്കുമ്പോൾ ചില ചോദ്യങ്ങൾ നമ്മളിൽ അവശേഷിക്കുന്നുണ്ട്‌. ദൈവത്തിന്റെ ഈ പ്രതിപുരുഷനെ തെറ്റിൽ നിന്നും പിന്തിരിപ്പിക്കാൻ ദൈവത്തിന്‌ കഴിയാത്തത്‌ എന്തുകൊണ്ട്‌?

ഒന്നിലധികം പെൺകുഞ്ഞുങ്ങളെ പീഡിപ്പിച്ചതിനാണ്‌ മദ്രസയിലെ അധ്യാപകൻ അറസ്റ്റിലായത്‌. ദൈവം സർവവ്യാപിയാണെന്നും ദൈവഹിതമനുസരിച്ചാണ്‌ എല്ലാം നടക്കുന്നതെന്നുമാണ്‌ ഈ പ്രവാചക സുവിശേഷകൻ പ്രചരിപ്പിച്ചിരുന്നത്‌. മദ്രസാ അധ്യാപകരെ സംരക്ഷിക്കുവാൻ സമൂഹവും സർക്കാരും സദാ സന്നദ്ധരാണ്‌. ഇവിടെ ഉയരുന്ന ഒരു ചോദ്യം ഖുറാനിലെ പാഠങ്ങൾ വിശദീകരിക്കുന്ന ഈ മുസലിയാരെ നിയന്ത്രിക്കുവാൻ ഏകദൈവത്തിന്‌ കഴിയാത്തതെന്തുകൊണ്ട്‌ എന്നതാണ്‌. മുപ്പത്തിമുക്കോടി ദൈവങ്ങളും ജാഗരൂകരായി ഇരുന്നിട്ടും ഒരു മുത്തച്ഛന്‌ സ്വന്തം പേരക്കിടാവിനെ ചൂഷണം ചെയ്യാൻ കഴിഞ്ഞെങ്കിൽ ഏക ദൈവത്തിന്റെ അസൗകര്യം നമുക്ക്‌ മനസിലാക്കാവുന്നതേയുള്ളൂ.

ദൈവവിശ്വാസവും ആധ്യാത്മികചിന്തയും മനുഷ്യരെ നല്ലവഴിയിലേയ്ക്ക്‌ നയിക്കുകയില്ല. ദൈവബിനാമികളുടെ അധാർമികത കേരളത്തിൽ പുതിയ കാര്യമൊന്നുമല്ല. ദൈവം പത്രം വായിക്കുമായിരുന്നെങ്കിൽ മുമ്പുതന്നെ ഇക്കാര്യത്തിൽ ഒരു മുൻകരുതലെടുക്കുമായിരുന്നു.

ധാർമികതയെ ബലപ്പെടുത്തി മനുഷ്യനെ നല്ല വഴിയിലേയ്ക്ക്‌ നയിക്കുവാൻ ആധ്യാത്മികതയ്ക്ക്‌ സാധിക്കുകയില്ല. ഒറ്റപ്പെട്ട സംഭവങ്ങൾ പോലും ഉണ്ടാകാൻ പാടില്ലാത്തതാണ്‌. ദൈവം സർവവ്യാപിയാണെന്നുള്ള കുപ്രചരണത്തിന്റെ അർത്ഥശൂന്യതയാണ്‌ ഈ സംഭവങ്ങൾ വെളിപ്പെടുത്തുന്നത്‌. ദൈവകേന്ദ്രീകൃതമായ മതങ്ങൾ മനുഷ്യനെ സന്മാർഗത്തിലേയ്ക്ക്‌ നയിക്കുകയില്ല. പ്രായപൂർത്തിയാകാത്ത പെൺകുട്ടികളെ ഭാര്യമാരാക്കുന്ന വിചിത്രസംഭവങ്ങൾ മതഗ്രന്ഥങ്ങളിൽ വായിക്കാവുന്നതാണ്‌.

ആരെയാണ്‌ നമുക്ക്‌ വിശ്വസിക്കാൻ കഴിയുക. സമീപകാല സംഭവങ്ങൾ ഈ ചോദ്യം ഉന്നയിക്കുന്നുണ്ട്‌.

Saturday, 18 March 2017

അവരോഹണം


ഇനി വിഷാദത്തിന്റെ മുടികെട്ടിയങ്ങനെ
പിരിയുക, പിരിയുക തകരാൻ പിറന്നൊരെൻ
കഥയറിയാതെ തുളുമ്പിയ സ്വപ്നമേ
പിരിയുക കരയാതെ വേഗം നടക്കൂക

മിഴിയൊഴുകുന്നതു കാണാതിരിക്കുവാൻ
ഇമകൾ ഇറുകിയടച്ചു നിൽക്കുന്നു ഞാൻ
മൊഴിമുള്ളുകൊണ്ടു നീയെറിയാതെ പോകണം
വഴിയിലൊരല്പവും തളരാതെ പോകണം
മുറിവേറ്റമൗനമുടച്ചു നീ പോകണം
മടിയിലെ മൗനം കൊറിച്ചു നീ പോകണം

കിളിവന്നു കൊത്തിയഴിച്ച കുപ്പായങ്ങളണിയുക
ഞാറപ്പഴം തിന്നു നീലിച്ച
മണിനാവിലിട്ടു
നുണഞ്ഞ മോഹത്തിന്റെ
മധുരം മറക്കുക കൈവെള്ളയിൽ തേച്ച-
മയിലാഞ്ചി മായ്ക്കുക
നെഞ്ചിലെപ്പൂക്കുടയൊഴിയുവാനെന്റെ
പൂവോരോന്നുമെറിയുക.

തണലില്ലിരിക്കുവാൻ
ഇനിയുള്ള ഗ്രീഷ്മങ്ങളിതിലും ഭയാനകം
സിരകളെരിയുന്നൊരാ
മണവുമായെത്തുന്നു കാറ്റിന്റെ കുട്ടികൾ
കരളുകളിലാഴ്ന്നിറങ്ങുന്നിരുൾ കത്തികൾ
ഇനിഗദ്ഗദത്തിന്റെ മുറി പൂട്ടിയങ്ങനെ
പിരിയുക പുകയാൻ പിറന്നൊരെൻ ജീവന്റെ
പൊരുളറിയാതെയിണങ്ങിയ സ്വപ്നമേ
പിരിയുക തളരാതെ വേഗം പറക്കുക

ഇവിടെ ഞാനഗ്നിശൈലത്തിൻ മുഖപ്പിലെ
കറുകയായ് നിന്നു നടുങ്ങുന്നു മാത്രകൾ
ഇനിയേഴുമാത്രമീഭൂമിയെ മറിക്കുന്ന
കിടിലം കുറിക്കുവാൻ തീച്ചോരയൊഴുകുവാൻ

ഇനിയാറു മാത്രകൾ മാത്രം മനസ്സിന്റെ
കതകടഞ്ഞീടാൻ വെളിച്ചം വിതയ്കുന്ന
പകലൊടുങ്ങീടാൻ ഇടിമുഴങ്ങീടാൻ

ഇനിയഞ്ചു മാത്രകൾ മാത്രം ഞരമ്പിന്റെ
തിരിപൂത്തു പൊട്ടുവാൻ മാംസം തെറിക്കുവാൻ

ഇനി നാലുമാത്രകൾ മാത്രമാണസ്ഥികൾ
കടലിന്നഗാഥഹ്രദത്തിൽ പതിക്കുവാൻ

ഇനിമൂന്നുമാത്രകൾ മാത്രമെന്നുള്ളിലെ
ചലനത്തിനവസാന ശൈത്യംകടിക്കുവാൻ

ഇനിരണ്ടുമാത്രകൾ മാത്രമീ നിസ്വന്റെ
കൊടികളിൽ തീപ്പക്ഷി പാറുവാൻ
സ്വപ്നമേ
ഇനിയൊറ്റമാത്ര....

Monday, 13 March 2017

വായനയെ കൊല്ലുന്ന പ്രസാധകർ


ഇത്‌ സാഹിത്യോത്സവങ്ങളുടെ കാലമല്ല ലിറ്റററി ഫെസ്റ്റിവലുകളുടെ കാലമാണ്‌. സാംസ്കാരിക രംഗത്ത്‌ പണമെറിഞ്ഞ്‌ പണം പിടിക്കുന്ന പണവ്യവസായികളുടെ പുഷ്ക്കര കാലം. ജോലിയുടെ ഭാഗമായി ചില അന്താരാഷ്ട്ര ബന്ധങ്ങളൊക്കെ ഒപ്പിക്കാൻ കഴിഞ്ഞ സാഹിത്യകാരന്മാരെ മുന്നിൽ നിർത്തിയാണ്‌ പണ വ്യവസായികൾ ലിറ്റററി ഫെസ്റ്റിവലുകൾ സംഘടിപ്പിക്കുന്നത്‌. അവിടേയ്ക്കു ക്ഷണിക്കപ്പെട്ട കേരളത്തിലെ ചില കവികൾ വണ്ടിക്കൂലി പോലുമില്ലാതെ വലഞ്ഞ കഥ നവമാധ്യമങ്ങളിലെ അങ്ങാടികളിൽ പാട്ടായിട്ടുണ്ട്‌.

ലിറ്റററി ഫെസ്റ്റുകൊണ്ടൊന്നും വായനയെ ഉത്തേജിപ്പിക്കാൻ കഴിയുകയില്ലെന്നും ഡിക്ഷ്ണറി വിപണം മാത്രമേ കാര്യമായി നടക്കാൻ സാധ്യതയുള്ളൂവെന്നുമാണ്‌ ഡിക്ഷ്ണറി മേളകൾ തെളിയിക്കുന്നത്‌. ഡിക്ഷ്ണറി വാങ്ങുന്നവർ മലയാള സാഹിത്യമല്ല വായിക്കുന്നത്‌. ഖസാക്കിന്റെ ഇതിഹാസത്തിലേയോ ആലാഹയുടെ പെൺമക്കളിലെയോ ചാവൊലിയിലേയോ ഗ്രാമീണ പദങ്ങളുടെ അർഥം ഒരു ഡിക്ഷ്ണറിയിലും ലഭിക്കുന്നതുമല്ല.

മാതൃഭൂമി ആഴ്ചപ്പതിപ്പിന്റെ മുൻ പത്രാധിപരായിരുന്ന എംടിയുടെ പുസ്തകങ്ങൾക്ക്‌ വായനക്കാരില്ല എന്നാണ്‌ മാതൃഭൂമി പത്രം തന്നെ പറയുന്നത്‌. കോഴിക്കോട്ട്‌ നടന്ന സംസ്ഥാന ലൈബ്രറി കൗൺസിലിന്റെ സർഗോത്സവത്തിൽ പങ്കെടുത്ത കുട്ടികൾ എം ടിയുടെ കഥാപാത്രങ്ങളെക്കുറിച്ച്‌ അറിവില്ലാത്തവരായിരുന്നു. അവർക്കാകെ അറിയാമായിരുന്നത്‌ ബഷീറിന്റെ പാത്തുമ്മായുടെ ആട്‌ മാത്രമായിരുന്നു. അത്‌ പാഠപുസ്തകത്തിലുണ്ടായിരുന്നതുകൊണ്ട്‌ മാത്രമായിരുന്നു.

വായനയെ സംബന്ധിച്ച വലിയ ആശങ്കകൾ മാതൃഭൂമി ദിനപത്രം മുഖപ്രസംഗത്തിലൂടെ പ്രകടിപ്പിച്ചു. സാംസ്കാരിക വിഷയങ്ങൾ അപൂർവമായി മാത്രമേ മുഖപ്രസംഗങ്ങൾക്ക്‌ വിഷയമാകാറുള്ളു. വായനയെ സംബന്ധിച്ച ഈ ആശങ്ക പ്രസാധകരുടെ വായനാ വിരുദ്ധ നിലപാടിനെക്കൂടി വെളിച്ചത്തുകൊണ്ടുവരുന്നു.

പാഠപുസ്തകക്കമ്മിറ്റിയിലെ കടൽക്കിഴവന്മാരെല്ലാം നാടുനീങ്ങിക്കഴിഞ്ഞു. ഇപ്പോൾ, പഠിക്കാനുള്ളവ തിരഞ്ഞെടുക്കുന്നത്‌ കോളജുകളിൽ അയ്യപ്പപ്പണിക്കരുടേയും കടമ്മനിട്ടയുടെയും കവിത കേട്ടു വളർന്ന തലമുറയിൽപ്പെട്ടവരാണ്‌. അധ്യാപകരായ അവർക്ക്‌ കുട്ടികളുടെ ഹൃദയസ്പന്ദനം അറിയാം.

അതിനാൽ കുട്ടികളുടെ രചനകൾ പോലും പാഠപുസ്തകങ്ങളിൽ ഉൾപ്പെടുത്തപ്പെട്ടു. വള്ളത്തോളിനേയും ഉള്ളൂരിനേയും മനപാഠമാക്കാൻ ശ്രമിച്ച്‌ കവിതയോട്‌ വെറുപ്പു തോന്നിയ വിദ്യാർഥി സമൂഹത്തിലെ പുതിയ തലമുറ റഫീക്ക്‌ അഹമ്മദിനേയും മോഹനകൃഷ്ണൻ കാലടിയേയും പഠിച്ചു.

കേരളത്തിൽ ഇന്ന്‌ വിവിധ തരത്തിലുള്ള പാഠ്യപദ്ധതികളുണ്ട്‌. അതിനുവേണ്ടി തയാറാക്കുന്ന പാഠപുസ്തകങ്ങളിലേക്ക്‌ കവിതയോ കഥയോ തിരഞ്ഞെടുത്താൽ പകർപ്പവകാശത്തിന്റെ പേരിൽ നിയമ നടപടികളുമായെത്തുന്ന പ്രസാധകർ കേരളത്തിലുണ്ട്‌. ഒരു കവിത പഠിക്കുമ്പോൾ ആ കവിതയിൽ സുഗന്ധമായി നിലനിൽക്കുന്ന വിഷയമാണ്‌ കുട്ടികളുടെ മനസിൽ അവശേഷിക്കുന്നത്‌. റഫീക്ക്‌ അഹമ്മദിനെ മറന്നാലും ഉമ്മുക്കുലുസുവിന്റെ പുള്ളിക്കുട പഠിച്ചവരാരും മറക്കുകയില്ല.

പ്രസാധകർ വിപണിയെ മാത്രമാണ്‌ ലക്ഷ്യം വയ്ക്കുന്നതെങ്കിൽ അത്‌ വായനാ സംസ്കാരത്തെ പ്രതികൂലമായി ബാധിക്കുക തന്നെ ചെയ്യും. പുസ്തകത്തിന്റെ മുഖവിലയുടെ 15 ശതമാനം മാത്രമാണ്‌ പ്രസാധകർ എഴുത്തുകാർക്ക്‌ നൽകുന്നത്‌.
85 ശതമാനവും പണവും വിതരണശൃംഖലയും ഉണ്ടെന്ന പേരിൽ പ്രസാധകർ തന്നെ കവർച്ച ചെയ്യുകയാണല്ലോ. അതു കൂടാതെയാണ്‌ പകർപ്പവകാശത്തിന്റെ പേരിൽ സാഹിത്യസൃഷ്ടികളുടെ വായനാവകാശത്തെ പ്രസാധകർ നിരാകരിക്കുന്നത്‌. ഇക്കാര്യത്തിൽ ഒരു പുനർവിചിന്തനം എഴുത്തുകാർക്കെങ്കിലും ഉണ്ടാകേണ്ടതാണ്‌.

Sunday, 5 March 2017

ഇരുട്ട്

മുടിയിലും മുഖത്തും
മുല്ലപ്പൂ ചൂടിയിരുന്ന
മുംതാസ് ബീഗം
ഒരു ദിനം
ഇരുട്ട് ധരിച്ചുവന്നു.

കഷ്ടിച്ച് ഊഹിക്കാം
കണ്ണടച്ചില്ല്.
ഇതെന്തേ ഇങ്ങനെ?

കത്തിയും ആസിഡും
ഓര്‍ത്തു കൊണ്ട്
മുംതാസ് പറഞ്ഞു,
ഞാന്‍
ദൈവത്തെ ഭയക്കുന്നു.

Sunday, 26 February 2017

തുമ്പപ്പൂവിന് ഒരു കത്ത്


പ്രിയപ്പെട്ട തുമ്പപ്പൂവേ

ക്ഷമിക്കുക.
കബളിപ്പിക്കപ്പെട്ട ഒരു
മഹാരാജാവിന്റെ
പ്രജയാണ് ഞാന്‍.
ഈ നപുംസകകാലത്തും
ഞാന്‍ നിരന്തരം
കബളിപ്പിക്കപ്പെടുന്നു.
വാമനന്റെ ബൂട്ടിനടിയിലെ
ഇരുമ്പുലാടം തറഞ്ഞ്‌
എന്റെ നെറ്റിയും മുറിഞ്ഞു.
നിന്‍റെ വെള്ളച്ചിരി
എനിക്കു ശാന്തിയല്ല.

ദുഃഖത്തോടെ
കുരീപ്പുഴ ശ്രീകുമാര്‍ 

കടലിന്റെ വീട്.


മല തുരന്നപ്പോൾ
കടൽച്ചിപ്പി കിട്ടി
ജലമൊഴി കേട്ടു നടുങ്ങി
പടിയിറങ്ങിപ്പോയ
കടലിന്റെ വീടിത്
ഒരു ദിനം കേരളം
കടലെടുക്കും

അകലെനിന്നേതോ
തിരക്കൂത്തിലെത്തിയ
അഭയാർത്ഥി നിൻ കേരവൃക്ഷം.

മലകടന്നെത്തിയ 
വാക്കുകൾ പക്ഷികൾ
അതിഥികൾ മരങ്ങൾ മൃഗങ്ങൾ

തകിടികൾ താണ്ടിയും
സമനിലം കോറിയും
പൊറുതിക്കലം വച്ച
ചെറുമർ നിന്നാദിമർ

മഴുവുമായ് പിന്നെ
വന്നാദിമനുഷ്യരെ
അടിമകളാക്കിയ സന്ധ്യയ്കു മുൻപേ
ഇവിടെ ഞാനുണ്ടായിരുന്നെന്നു ചിപ്പി
കടലുപ്പുതേക്കിയിറക്കി

ഇരുളിന്റെ ക്ഷോഭ-
ത്തിരവന്നു കീറുന്നു
ഹൃദയത്തിലെ കായലോരം

മൃതിയൊച്ചയായ്
കൊടുംസ്രാവുകൾ പായുന്നു
കടലാന കുത്തിമറിയുന്നു

മലയുടെ തലയിലേയ്കൊരു
രാക്ഷസത്തിര
മടവാളുമായ് കുതിക്കുമ്പോൾ
മറുപടി ചൊല്ലാൻ
മനസ്സിലെ മൺതരി
മലയാളമോർത്തു നിൽക്കുന്നു

കടലേറിടുമ്പോൾ
മറുവീടു തേടുന്ന
കിളികളുടെ ചിറകുകൾക്കൊപ്പം

പരദേശം
കുത്തിയോരാശ്രയക്കൂരയിൽ
കരുണയും രമണനും
കഞ്ഞിവെയ്കും

കടൽ
വീടു വീണ്ടെടുക്കുമ്പോൾ
എൻ മാനമേ
കരയുമോനീ മഴയായി

Thursday, 23 February 2017

ഉന്മാദി


അക്കരെ 
വന്മലത്തെങ്ങിൻ കുടന്നയിൽ 
കള്ളുകുടം പോലെ ചന്ദ്രൻ 

തെന്നിത്തെറിച്ച 
നുരപ്പൂക്കൾ താരകൾ 
കള്ളീച്ചകൾ പോൽ ഗ്രഹങ്ങൾ 

രാത്രിക്കിതെന്തൊരുന്മാദം 
വശംകെട്ടു പാട്ടുപാടുന്നു രാപ്പാടി

കാറ്റ് മരച്ചില്ല മാറിമാറിപ്പിടി-
ച്ചേറ്റുപാടിത്തകർക്കുമ്പോൾ 

മണ്ണിൻ മരപ്പാളി 
മൂടി മരിച്ചു ഞാൻ 
എങ്ങനെയില്ലാതെയാകും?

Wednesday, 22 February 2017

കാണ്ടാമനുഷ്യൻ


വെൺമുഖംമൂടിയിൽ
ചന്ദനം തൊട്ട്
ചിന്തയിൽ തന്ത്രം മെനഞ്ഞ്
കണ്ണിൽ കുറുക്കന്റെ
കൗശലക്കെണിവെച്ച്
മുന്നിൽ നിൽക്കും സത്വമേത്?

സത്യത്തിൻ നെറ്റിയിൽ
കാർക്കിച്ചു തുപ്പിയും
സ്വപ്നമുഖത്തേക്ക്
മാലിന്യമെറ്റിയും
മുറ്റത്തുതന്നെ പെടുത്തും
ചവർക്കുന്ന,ചർദ്ദിപുരണ്ട
പെരുംവാക്കു കോറിയും
കുത്തിമലർത്തികുലുങ്ങിച്ചിരിച്ചും
മതപ്പാടുപൊട്ടിയും
തോക്കാട്ടമാടിയും
നിൽക്കുന്നു കാണ്ടാമനുഷ്യൻ

അഭയമില്ലാതെ ഞാനോടുമ്പോൾ
എൻമുന്നിൽ
വലവെച്ചു കാണ്ടാമനുഷ്യൻ

ഇവനെ ഞാനിന്നലെ 
ഖദറിൽ പൊതിഞ്ഞ്
ഗുജറാത്തിത്തൊപ്പിയണിഞ്ഞ്
കപടസത്യാഗ്രഹക്കുറുപന്തലിൽവെച്ച്
തൊഴുകൈകളോടെ കണ്ടപ്പോൾ
ഇതുപോലെ വേഷം പകർന്നെന്റെ മുന്നിൽ
വരുമെന്നറിഞ്ഞതേ ഇല്ല


നിനവുകൾക്കപ്പുറം
നീൾനഖം നീട്ടി
ഇരുപുറം നോക്കാതെ
തീക്കണ്ണുരുട്ടി
നരലോകഘാതിയാം
വിശ്വരൂപം കാട്ടി
വളരുന്നു കാണ്ടാമനുഷ്യൻ

അരികിലൊരു
പ്രൈമറി സ്കൂളിലെ കുട്ടിയായ്
അതിജീവനാഗ്രഹം വന്ന്
തരികൊരു കൈത്തോക്ക്
എനിക്കുമച്ഛായെന്ന്
ചെറുമഴപോലെ ചാറുന്നു

Wednesday, 8 February 2017

മകൾ കൊളുത്തിയാലും ചിത കത്തും


മനുഷ്യന്റെ മരണവുമായി ബന്ധപ്പെട്ട്‌ യുക്തിരഹിതവും സംസ്ക്കാരശൂന്യവുമായ പല ചടങ്ങുകളും മതവിശ്വാസികൾക്കിടയിലുണ്ട്‌. അതിൽ പ്രധാനപ്പെട്ടത്‌ മൃതദേഹത്തെ കുളിപ്പിക്കുക എന്ന ചടങ്ങാണ്‌. ജീവിച്ചിരിക്കുമ്പോൾ സൂക്ഷ്മതയോടെ മറച്ചുവയ്ക്കുന്ന ശരീരഭാഗങ്ങൾ കുളിപ്പിക്കൽ എന്ന പേരിൽ മരണാനന്തരം അതിക്രമിച്ചു കാണുന്നത്‌ നിന്ദയായേ കണക്കാക്കാൻ കഴിയൂ.

വായ്ക്കരിയിടുക, മുണ്ടിന്റെ കോന്തലയ്ക്കൽ പണം കെട്ടിവയ്ക്കുക തുടങ്ങിയവയും യുക്തിക്ക്‌ നിരക്കുന്നതല്ല. പരലോകത്തേയ്ക്ക്‌ പോകുമ്പോഴുള്ള നദി കടക്കുവാൻ വഞ്ചിക്കൂലി എന്ന നിലയിലാണ്‌ പണം കെട്ടിവയ്ക്കുന്നത്‌. ഈ പ്രവൃത്തിയുടെ അർത്ഥശൂന്യത തിരിച്ചറിഞ്ഞതുകൊണ്ടോ പരലോകത്തെ പുഴയിൽ പാലം കെട്ടിയതുകൊണ്ടോ ആയിരിക്കാം ഇപ്പോഴാരും ആ ചടങ്ങ്‌ നടത്താറില്ല.

മൃതദേഹത്തിനരികിൽ ഇരുന്നു കരയുക എന്ന കർത്തവ്യമാണ്‌ സ്ത്രീകൾക്ക്‌ വിധിച്ചിട്ടുള്ളത്‌. സംസ്കരിക്കുന്ന സ്ഥലത്തേയ്ക്ക്‌ സ്ത്രീകൾ ചെല്ലാൻ പാടില്ല. ചിതയ്ക്ക്‌ തീ കൊളുത്തേണ്ടത്‌ ആൺമക്കളോ അനന്തരവന്മാരോ ആയിരിക്കണം.

കത്തുന്ന ചിതയ്ക്കരികിലേക്ക്‌ സ്ത്രീകൾക്ക്‌ പ്രവേശനമുണ്ടായിരുന്നത്‌ സതി അനുഷ്ഠിക്കേണ്ടിവരുമ്പോൾ മാത്രമാണ്‌. ഭർത്താവിന്റെ ചിതയിൽ ചാടി ഭാര്യയും മരിക്കണം എന്നതായിരുന്നു ആചാര്യവിധി. ഭാര്യയ്ക്ക്‌ ഇതിൽ താൽപര്യമില്ലെങ്കിൽ ഷെഹ്നായിയുടേയും ഡോലക്കിന്റേയും ഭ്രാന്തശബ്ദങ്ങളെ മറയാക്കി വിധവയെ ബലമായി ചിതയിലേക്ക്‌ വലിച്ചെറിയുമായിരുന്നു. അതിനുശേഷം അവരെ സതിയായി പ്രഖ്യാപിക്കുകയും ക്ഷേത്രം പണിയുകയും ചെയ്യും. രാജാറാംമോഹൻറോയിക്കുശേഷം സ്വതന്ത്ര ഇന്ത്യയിൽപോലും സതി അനുഷ്ഠിക്കപ്പെട്ടിട്ടുണ്ട്‌.

ഈ ആചാരത്തെ കവിതയിലൂടെ പരിഹസിച്ചത്‌ മഹാകവി ഉള്ളൂരാണ്‌. സതിക്കെതിരെ നിലപാടെടുത്ത സായിപ്പിനെ ഒരു കൂട്ടം ഹിന്ദുമത വിശ്വാസികൾ പോയി കാണുന്നു. സതി പവിത്രമായ ഹിന്ദുമത ആചാരമാണെന്നും ഇതിൽ ഇടപെടരുതെന്നും അവർ ആവശ്യപ്പെടുന്നു. അങ്ങനെ ചെയ്യുവാൻ സ്ത്രീകളെ നിർബന്ധിക്കുന്നവരെ വെടിവച്ചുകൊല്ലുന്ന ഒരു നിയമം യൂറോപ്പിലുണ്ടെന്നും അത്‌ നടപ്പാക്കുമെന്നും സായിപ്പ്‌ പറഞ്ഞപ്പോഴാണ്‌ കവിതയിൽ ആചാരാനുകൂലികൾ അപ്രത്യക്ഷരായത്‌.

കിളിമാനൂർ അടയമണിലുള്ള ബി ഹരിദാസ്‌ മരിച്ചപ്പോൾ അദ്ദേഹത്തിന്റെയും ഭാര്യയുടേയും ഹിതമനുസരിച്ച്‌ മകൾ ദിവ്യയാണ്‌ ചിതയ്ക്ക്‌ തീ കൊളുത്തിയത്‌. മരുമകൻ നെസിനും ഒപ്പം ചേർന്നു. മരുമകന്റെ മാതാപിതാക്കളായ ഞങ്ങളടക്കം ഒരു വലിയ ജനസമൂഹം ഈ അപൂർവ ദൃശ്യത്തിന്‌ സാക്ഷികളായി.

അച്ഛനും മകളും തമ്മിൽ വലിയ അടുപ്പമുണ്ടായിരുന്നു. ആശുപത്രിയിൽ പ്രവേശിപ്പിക്കപ്പെട്ട ദിവസം മുതൽ മരണദിവസം വരെ അദ്ദേഹത്തെ ശുശ്രൂഷിച്ചുകൊണ്ട്‌ അവർ അരികിൽത്തന്നെയുണ്ടായിരുന്നു. അച്ഛനെ നന്നായി പരിചരിച്ചു എന്ന ഉത്തമബോധ്യം അവർക്ക്‌ ഉണ്ടായിരുന്നതിനാൽ മരണാനന്തര ചടങ്ങുകളായ സഞ്ചയനവും കുളിയും വേണ്ടെന്നു വയ്ക്കുവാൻ അവർക്ക്‌ രണ്ടാമതൊന്ന്‌ ആലോചിക്കേണ്ടി വന്നില്ല. സമീപദിവസം തന്നെ ബന്ധുക്കളേയും സുഹൃത്തുക്കളേയും വിളിച്ചുകൂട്ടി അനുസ്മരണയോഗവും അവർ നടത്തി.

ദുരാചാര പ്രകാരം കുളിച്ചു പിരിഞ്ഞിരുന്നുവെങ്കിൽ അറിയാൻ സാധ്യതയില്ലാത്ത കുറേ കാര്യങ്ങൾ പരേതനെക്കുറിച്ച്‌ അറിയാൻ കഴിയുമായിരുന്നില്ല. യൂണിയൻ കാർബൈഡ്‌ ദുരന്തം ഉണ്ടായ സമയത്ത്‌ അദ്ദേഹവും കുടുംബവും ഭോപ്പാലിൽ ആയിരുന്നു. വാർത്താവിനിമയ ബന്ധങ്ങളും വെളിച്ചവും അടക്കം എല്ലാം തകർന്നപ്പോൾ ഹാം റേഡിയോ വിദഗ്ധനായ ഹരിദാസ്‌ അറിയിപ്പുകൾ കൊടുക്കാനും മറ്റ്‌ സംവിധാനങ്ങൾ സജ്ജമാക്കാനും പരമാവധി ആളുകളെ രക്ഷിക്കാനും കഠിന പരിശ്രമം നടത്തിയ കാര്യം സഹപ്രവർത്തകൻ രവിയുടെ വാക്കുകളിലൂടെ നാട്ടുകാരും ബന്ധുക്കളും അറിഞ്ഞു. കിളിമാനൂർ ഗവ. ഹയർസെക്കൻഡറി സ്കൂളിന്റെ പിടിഎ പ്രസിഡന്റായി സേവനമനുഷ്ഠിച്ചപ്പോൾ എല്ലാ ദിവസവും സ്കൂളിലെത്തി കെട്ടിടനിർമാണത്തിന്‌ മേൽനോട്ടം വഹിച്ച കാര്യം ഇപ്പോഴും പ്രബലമായി നിൽക്കുന്ന സ്കൂൾ കെട്ടിടത്തെ ഓർമിച്ചുകൊണ്ട്‌ അധ്യാപകനായ രാജേഷ്‌ സാക്ഷ്യപ്പെടുത്തി.

മകളുടെ വിവാഹം സ്പെഷ്യൽ മാര്യേജ്‌ ആക്ട്‌ അനുസരിച്ച്‌ താലി അടക്കമുള്ള മതാചാരങ്ങൾ ഒഴിവാക്കിക്കൊണ്ട്‌ നടത്തിയതും പരാമർശിക്കപ്പെട്ടു. വിവാഹസദ്യയ്ക്ക്‌ മത്സ്യം വിളമ്പി വ്യത്യസ്തത പുലർത്തിയതും ഓർമിക്കപ്പെട്ടു.

മരണാനന്തരം കുളി, സഞ്ചയനം തുടങ്ങിയ ദുരാചാരങ്ങൾ നടത്താതെ ബന്ധുക്കളും സുഹൃത്തുക്കളും ഒന്നിച്ചിരുന്ന്‌ മരിച്ചവരെ അനുസ്മരിക്കുന്നത്‌ നന്നായിരിക്കും. സ്ത്രീകളെ അബലകളാക്കി മാറ്റിനിർത്താതെ മരണത്തെത്തുടർന്നുള്ള എല്ലാ കാര്യങ്ങളിലും സഹകരിപ്പിക്കുന്നതും പ്രധാനപ്പെട്ട കാര്യമാണ്‌. സ്ത്രീ തീ കൊളുത്തിയാൽ അടുപ്പു മാത്രമല്ല, ചിതയും കത്തും.

Tuesday, 7 February 2017

പറക്കുംതളിക


ഹിമഗിരി
മരുവിരി
കടലോരം.

ഹരിതത്താഴ്വര
മുകില്‍മുറ്റം.

ബഹിരാകാശം
ഗ്രഹവീഥി
ചാന്ദ്രസമുദ്രം
ശനിമേഘം.

പറന്നു പറന്നു പറന്നു പോയി
പ്രണയത്തേന്‍തളിക.

അതിലൊരു ഞാനും നീയും
പിന്നൊരു നീയും ഞാനും.

നാഭിത്തീയില്‍
ചുണ്ടു കരിച്ചും
വിരലു പൊരിച്ചും
ചക്കരവള്ളിയെരിച്ചും
ഇന്നലെയെപ്പോല്‍.

എങ്ങു പറന്നാലെന്ത്
എങ്ങു പിറന്നാലെന്ത്?

Monday, 6 February 2017

മരുവാനം


മരമില്ല, ജലമില്ല
കിളിയില്ല, ചെടിയില്ല
മരുഭൂമി തന്നെയാണീ
വിശാലാകാശം.

ഇടയ്ക്കിടെ മണല്‍ക്കുന്നായ്
വെളുത്ത മേഘം
മരുപ്പച്ചയായ് ചിലപ്പോള്‍
കറുത്ത മേഘം.
ചെറു പാറക്കഷണമായ്
മിനുങ്ങും താരം
മനുഷ്യസങ്കല്‍പ്പമായി
മഴവില്‍ പാലം

അവിടേക്കു ദുര്‍ബലന്റെ
തലതട്ടിയുരുളുന്ന
കനകക്കാല്‍പ്പന്തു നോക്കി
ഇരിക്കും നേരം

മണല്‍പ്പാമ്പു പോലിഴഞ്ഞു
കടക്കുന്ന വിമാനമേ
എനിക്കു നിന്നോടസൂയ
പെരുക്കുന്നുണ്ട്.

കുടയില്ലാ മഴനാട്
വിളിക്കുന്നുണ്ട്.

Friday, 3 February 2017

ഉള്‍വാക്കുകള്‍


ഞാനെന്‍ ശരീരം പരീക്ഷണശാലയില്‍
മേശപ്പുറത്തു കിടത്തി
വസ്ത്രങ്ങള്‍ നീക്കി, കൊടും കത്തിയാലതിന്‍
ത്വക്കുടുപ്പും കൊത്തി മാറ്റി.

നഗ്നം, അതെ പൂര്‍ണനഗ്നം, അകങ്ങളില്‍
അക്ഷരങ്ങള്‍ തെളിയുന്നു
അക്ഷരം വാക്കായി
വാക്കു വാക്യങ്ങളായ്
സ്വപ്നമേയല്ല, യാഥാര്‍ത്ഥ്യം.

കയ്പ്പു കുടിച്ചു ചുവന്ന മസ്തിഷ്കത്തില്‍
ഒറ്റ വാക്കേയുള്ളൂ സ്നേഹം.
കണ്ണുകള്‍ക്കുള്ളില്‍ നിലാവ്
ചെവിക്കുള്ളില്‍
മങ്ങിയ നെല്‍കൃഷിപ്പാട്ട്
അന്നനാളത്തില്‍ വിശപ്പ്‌
തോളസ്ഥിയില്‍
ഒന്നിറങ്ങൂ എന്ന വീര്‍പ്പ്.

ഹൃദയഭിത്തിപ്പുറത്തവ്യക്തമായ് കണ്ടു
ഹരിത മഷിയില്‍ പ്രണയം.
ശ്വാസകോശത്തിന്റെയോരോ അറയിലും
വാസം പുകയെന്ന വാക്യം.
രക്തനാളത്തില്‍ സമരം
ആമാശയശല്ക്കത്തില്‍ തീരാദുരിതം
വൃക്കയില്‍ മോഹങ്ങള്‍
വന്‍കുടലില്‍ സൂര്യന്‍
വൃഷണത്തിനുള്ളില്‍ അശാന്തി.

മാലിന്യ സഞ്ചിയില്‍ ജീവിതം
താരാട്ടു പോരെന്നു തൊണ്ടയും കയ്യും
കരളില്‍ ബിയര്‍പാര്‍ലര്‍
വാരിയെല്ലില്‍, നാട്ടു-
വഴിയിലെ പുല്ലിന്‍റെ പേര്
കാലസ്ഥിയില്‍ കാട്ടുപക്ഷി
പാദങ്ങളില്‍
ചൂടില്‍ നടന്ന കഥകള്‍.

വാക്കുകള്‍ നാക്കുകള്‍ തോരുന്നതേയില്ല
വാക്കിന്‍റെ പേമാരിയുള്ളില്‍.

Sunday, 29 January 2017

പെങ്ങൾസ്ഥാനിലേക്ക്‌ പറക്കുന്ന ഇന്ത്യൻ പക്ഷികൾ


പ്രീഡിഗ്രിക്കാലത്ത്‌ ഇന്ത്യാ ചരിത്രം പഠിപ്പിച്ച ദിവാകരൻസാറാണ്‌ അവിശ്വസനീയമായ ആ വാർത്ത പറഞ്ഞത്‌. സിന്ധുനദി പാകിസ്ഥാനിലാണ്‌.
കൗമാരക്കാരനായ എനിക്ക്‌ അന്ന്‌ ഇന്ത്യ എന്റെ മാതൃരാജ്യവും പാകിസ്ഥാൻ ശത്രുരാജ്യവുമായിരുന്നു. ഒരു ബോംബു കിട്ടിയിരുന്നെങ്കിൽ റാവൽപ്പിണ്ടിയിലോ കറാച്ചിയിലോ കൊണ്ടു ചെന്നിട്ട്‌ ആ രാജ്യത്തെ മുഴുവൻ ചാമ്പലാക്കണമെന്നായിരുന്നു അവിവേകിയായിരുന്ന എന്റെ ആഗ്രഹം. അപ്പോഴാണ്‌ ദിവാകരൻ സാർ ഞെട്ടിക്കുന്ന, സിന്ധുനദിയുടെ പാകിസ്ഥാൻ പൗരത്വത്തെക്കുറിച്ച്‌ പറഞ്ഞത്‌.
സ്റ്റാഫ്‌ റൂമിൽ അദ്ദേഹം വിശ്രമിക്കുന്ന സമയത്ത്‌ അസ്വസ്ഥതയോടെ ഞാൻ ചെന്നു കണ്ടു. ഒരുപക്ഷേ അദ്ദേഹത്തിന്‌ തെറ്റിയതാണെങ്കിലോ. ഞാൻ ചോദിച്ചു, സാർ പറഞ്ഞത്‌ ശരിയാണോ സിന്ധുനദി പാകിസ്ഥാനിലാണോ. നിർവികാരനായി അദ്ദേഹം പറഞ്ഞു, സിന്ധുനദി പാകിസ്ഥാനിലാണ്‌. അതിനു നീ ഇത്ര വിഷമിക്കുന്നതെന്തിന്‌?
എന്റെ മുത്തശ്ശന്മാരായ ദ്രാവിഡന്മാർ മുങ്ങിക്കുളിച്ച നദിയാണ്‌. എനിക്ക്‌ അവകാശപ്പെട്ടത്‌. മാത്രമല്ല, അവർ സംസ്കാരസമ്പന്നമായ ഒരു ജീവിത വ്യവസ്ഥ കെട്ടിയുയർത്തിയ മോഹൻജദാരോ പാകിസ്ഥാനിലാണ്‌. രവീനദിയുടെ തീരത്തുണ്ടായിരുന്ന ഹാരപ്പ പാകിസ്ഥാനിലാണ്‌.
ഇന്ത്യൻ യുവതലമുറയെ എക്കാലത്തും ആവേശം കൊള്ളിക്കുന്ന ഭഗത്സിങ്ങിന്റെ ജന്മഗൃഹവും ശവകുടീരവും പാകിസ്ഥാനിലാണ്‌. കൊല്ലം കരുനാഗപ്പള്ളിയിലെ ലാലാജി ലൈബ്രറിയുടെ വേരുകൾ തേടിപ്പോയാൽ ഇന്ത്യൻ സ്വാതന്ത്ര്യസമരത്തിലെ വജ്രനക്ഷത്രമായ ലാലാ ലജ്പത്‌റായിയിലെത്തും. ലാലാ ലജ്പത്‌റായ്‌ അടികൊണ്ടുവീണ ലാഹോർ പാകിസ്ഥാനിലാണ്‌.
ഇന്ത്യൻ സ്വാതന്ത്ര്യസമരത്തിന്റെ ഉജ്ജ്വല അധ്യായങ്ങൾ രചിച്ച കറാച്ചി പാകിസ്ഥാനിലാണ്‌. ടാഗോറിന്റെ മനസിലേക്ക്‌ കാബൂളിവാല നടന്നുവന്ന വഴികൾ പാകിസ്ഥാനിലാണ്‌. സമരസംസ്കാരത്തിന്റെ അടയാളമായ പെഷ്‌വാർ പാകിസ്ഥാനിലാണ്‌. തക്ഷശിലപാകിസ്ഥാനിലാണ്‌.
ലോകത്തിലെ ഏറ്റവും സുന്ദരമായ സ്ഥലം ഇന്ത്യയാണെന്ന്‌ എഴുതിയ അല്ലാമ മുഹമ്മദ്‌ ഇഖ്ബാലിന്റെ ചിന്തയിൽ വിരിഞ്ഞ പരിശുദ്ധിയുടെ നാട്‌ എന്നർഥമുള്ള പാകിസ്ഥാൻ ഇന്ത്യയെ സംബന്ധിച്ച്‌ പെങ്ങൾസ്ഥാനാണ്‌.
യുദ്ധങ്ങൾ ഭരണകൂടങ്ങളുടെ ആവശ്യമാണ്‌. സാധാരണ ജനങ്ങളോ പട്ടാളകുടുംബങ്ങളോ യുദ്ധത്തെ അനുകൂലിക്കുന്നില്ല. ഓരോ ശവപ്പെട്ടി വീട്ടിലെത്തുമ്പോഴും ഇന്ത്യയിലേയും പാകിസ്ഥാനിലേയും അമ്മമാർ കരയുന്നത്‌ ഒരേ ഭാഷയിലാണ്‌. വെയിലിനോ കാറ്റിനോ നിലാവിനോ ഭരണകൂട ശത്രുതയില്ല. മേഘങ്ങൾക്കോ പക്ഷികൾക്കോ വൈദ്യുതീകരിച്ച കമ്പിവേലികൾ പ്രശ്നമല്ല.
1947 ന്‌ മുമ്പുള്ള പാകിസ്ഥാന്റെ ചരിത്രം ഇന്ത്യയുടെ ചരിത്രമാണ്‌. അന്നും ഇന്നും പ്രകൃതി ഇന്ത്യൻ വൻകരയുടേതാണ്‌.
പകയും കൊലയും നിലനിർത്തേണ്ടത്‌ ഇരു രാജ്യങ്ങളിലേയും ഹിന്ദു-ഇസ്ലാം മത തീവ്രവാദികളുടെ ആവശ്യമാണ്‌. സാധാരണ മതവിശ്വാസികൾക്കുപോലും ഇങ്ങനെയൊരു ആവശ്യമില്ല. മതവും രാഷ്ട്രീയവുമാണ്‌ ശത്രുത സൃഷ്ടിക്കുന്നത്‌.
ഹിന്ദുവർഗീയതയുടെ ഉസ്താദായിരുന്ന നാഥുറാം വിനായക ഗോഡ്സേയുടെ അനുയായികൾ ഇപ്പോഴും സൂക്ഷിക്കുന്നത്‌ അവിഭക്ത ഇന്ത്യയുടെ ഭൂപടമാണല്ലോ. ഗീതാപ്രഭാഷകനായിരുന്ന ചിന്മയാനന്ദന്റെ എബിസി സിദ്ധാന്തം പ്രസിദ്ധമായിരുന്നു. അഫ്ഗാനിസ്ഥാൻ, ബർമ, സിലോൺ എന്നീ രാജ്യങ്ങളെക്കൂടി ഉൾപ്പെടുത്തിക്കൊണ്ടുള്ള ഇന്ത്യൻ ത്രികോണമാണ്‌ ചിന്മയാനന്ദൻ വരച്ചിട്ടത്‌. അതൊക്കെ അംഗീകരിക്കുന്നവര്‍ വർഗീയ വിരുദ്ധരോട്‌ പാകിസ്ഥാനിൽ പോകാൻ പറയുന്നത്‌ ഗോഡ്സേ നിന്ദയും ചിന്മയാനന്ദ നിന്ദയുമാണ്‌.
പാകിസ്ഥാനിലെ തൊഴിലാളിവർഗ മുന്നേറ്റത്തിന്‌ നേതൃത്വം നൽകിയ കമ്യൂണിസ്റ്റു മഹാകവിയായിരുന്നു ഫെയ്സ്‌ അഹമ്മദ്‌ ഫെയ്സ്‌. ലെനിൻ സമാധാന സമ്മാനം നൽകി സോവിയറ്റ്‌ യൂണിയൻ അദ്ദേഹത്തെ ആദരിച്ചിരുന്നു. നോബൽ സമ്മാനത്തിനും ഫെയ്സ്‌ പരിഗണിക്കപ്പെട്ടു. ഉർദു ഗസലുകളിലൂടെ പാകിസ്ഥാൻ ജനതയുടെ ഹൃദയത്തിലെ പൂമരമായി നിലകൊള്ളുന്ന ഫെയ്സ്‌ അഹമ്മദ്‌ ഫെയ്സിന്റെ സ്വപ്നങ്ങൾ സഫലമായില്ല. സ്വപ്നങ്ങൾ അവശേഷിക്കുകയാണ്‌.
പാകിസ്ഥാന്‌ സ്വാതന്ത്ര്യം കിട്ടിയത്‌ ബംഗാളിലും ബോംബെയിലും നടന്ന ഉജ്ജ്വലസമരങ്ങൾ കൊണ്ടുകൂടിയാണ്‌. ഇന്ത്യയ്ക്ക്‌ സ്വാതന്ത്ര്യം കിട്ടിയത്‌ ലാഹോറിലും കറാച്ചിയിലും നടന്ന സമരങ്ങൾ കൊണ്ടുകൂടിയാണ്‌.
ഇന്ത്യാക്കാർ പാകിസ്ഥാൻ സന്ദർശിക്കുന്നതും പാകിസ്ഥാൻകാർ ഇന്ത്യ സന്ദർശിക്കുന്നതും പരസ്പരസൗഹൃദം മാത്രമല്ല ചരിത്രാവബോധവും ഉണ്ടാക്കിത്തരും.
സ്വതന്ത്ര ഇന്ത്യയിൽ ജനിച്ച എല്ലാവർക്കും എന്നേ ചൊടിച്ചു പിരിഞ്ഞ നേർപെങ്ങളാണ്‌ പാകിസ്ഥാൻ. ശത്രുതയ്ക്കപ്പുറം സ്നേഹത്തിന്റെ പതാകയാണ്‌ പാറേണ്ടത്‌. 

ബദാം പഗോഡ


കൊടും വെയില്‍
ബദാം പഗോഡയില്‍ ഒരു
കിളിക്കുടുംബത്തിന്‍
സ്വരസമ്മേളനം.

ഹരിതജാലകം തുളച്ച് ചൂടിലേ-
ക്കെറിയുന്നുണ്ടവ
തണുത്ത വാക്കുകള്‍.

അതു പെറുക്കി ഞാന്‍
തുടച്ചു നോക്കുമ്പോള്‍
മൊഴികളൊക്കെയും
പ്രണയസൂചകം.

ചിലതില്‍ ജീവിതം
ദുരിതമെന്നൊരു
പരിതാപത്തിന്റെ
കഠിനവാചകം.

ഒരു കുഞ്ഞിക്കിളി
കരീലത്തൂവലാല്‍
ചിതറുന്നുണ്ടേതോ
വിഷാദ ദ്രാവകം.

ചിലതില്‍ വാത്സല്യം
ചിലതില്‍ നൈര്‍മ്മല്യം
പലതിലും തലതിരിഞ്ഞ വിസ്മയം.

ഒരു കിളി
ബുദ്ധകഥകള്‍ ചൊല്ലുന്നു
മറുകിളി
യുദ്ധവ്യഥകള്‍ പെയ്യുന്നു.

ഉയര്‍ന്ന ചില്ലയിലൊരുത്തന്‍
ചെന്നിരുന്നടയാളപ്പാട്ടിന്‍
വരി കൊരുക്കുന്നു.

വളഞ്ഞ കൊമ്പിന്മേലൊരുത്തി
മുട്ടകള്‍ തുലഞ്ഞതോര്‍ക്കുന്നു
ചിലച്ചു തേങ്ങുന്നു.

പൊടുന്നനെ
ജീവഭയത്തിന്‍ കാഹളം
മനുഷ്യസാമീപ്യം
മഴുവിന്‍ സാന്നിദ്ധ്യം

Saturday, 21 January 2017

രക്തസാക്ഷിയുടെ മകള്‍


കരയ്ക്കും വരയ്ക്കും
ഇടയ്ക്കായ് പിടയ്ക്കും
കടല്‍ കണ്ടുനില്‍ക്കെ
പെരുങ്കാറ്റിരമ്പം.

കടല്‍
ചങ്ങലയ്ക്കിട്ടൊരസ്വസ്ഥ ജന്മം
തുടല്‍പ്പാടുരുമ്മുന്നു ദീര്‍ഘനിശ്വാസം.

തിരപ്പത്തി പൊട്ടിത്തെറിപ്പതും നോക്കി
കനല്‍ക്കണ്ണിലാപത്തു കത്തിച്ചു കാട്ടി
കരയ്ക്കുണ്ടൊരുത്തി.

കരിക്കട്ട കാലപ്പെരുക്കങ്ങള്‍ രാകി
കടുംവജ്രമാക്കി ജ്വലിപ്പിച്ച പോലെ
കരയ്ക്കുണ്ടൊരുത്തി.

ഇവള്‍
രക്തസാക്ഷിയുടെ ഓമനപ്പുത്രി.

ചരിത്രം ചവിട്ടിക്കുഴച്ചിട്ട മണ്ണില്‍
പവിത്രാക്ഷരങ്ങള്‍ കടിച്ചും ചവച്ചും
ചിലച്ചും ചലിച്ചും
നിഴല്‍ക്കൂത്തു പോലെ
മനുഷ്യാസ്ഥികൂടം ചിരിക്കുന്ന ചിത്രം
വരച്ചും തെളിച്ചും
കയര്‍ക്കുന്നൊരുത്തി.

ഇവള്‍
രക്തസാക്ഷിയുടെ ഓമനപ്പുത്രി.

ഇവള്‍ക്കില്ല കൂടം
ഉണക്കമീന്‍ പാടം മണക്കുന്ന വേനല്‍
ചലച്ചിത്രഗാനം ത്രസിക്കുന്ന
പെണ്ണുടല്‍ച്ചാനല്‍ പെരുംവല.

ഇവള്‍ക്കില്ല രക്ഷകന്‍ ക്രിസ്തു
പുറമ്പോക്കു വസ്തു
പശു, ചിട്ടി, പാട്ടം, പ്രമാണം.

ഇവള്‍ക്കില്ലുറങ്ങാനുമുണ്ണാനു മല്‍പ്പം
കുടിക്കാനുമില്ലൊന്നുടുക്കാനുമില്ല.
ഇവള്‍
രക്തസാക്ഷിയുടെ ഓമനപ്പുത്രി.

ജനിക്കാന്‍ വിശക്കാന്‍ മരിക്കാന്‍
മനുഷ്യര്‍ക്കിടംകൊണ്ട ഭൂവില്‍
ചുമച്ചും കിതച്ചും വിയര്‍ത്തും കലപ്പ-
ത്തലപ്പില്‍ പിടിച്ചും തിളയ്ക്കുന്ന നേരം
വിയര്‍ക്കാതെയന്നം ഭുജിക്കുന്നവര്‍ക്കായ്
കസേരക്കിടക്ക കൊടുക്കുന്ന രാവില്‍
എതിര്‍ത്തോനെയുന്നം പിഴയ്ക്കാതെ നിര്‍ത്തി
വെടിച്ചില്ലിലെല്ലാം തകര്‍ക്കുന്ന നാളില്‍
മുകില്‍നെറ്റി പൊട്ടിപ്പിളര്‍ന്നേറെ നേരം
കൊഴുക്കും മഴയ്ക്കും തഴയ്ക്കും ചളിക്കും
മനസ്സില്ലയെന്നു മറുത്തുഗ്രവാദ-
ക്കൊടിക്കൂറ കെട്ടിപ്പറത്തുന്നൊരുത്തി.

ഇവള്‍
രക്തസാക്ഷിയുടെ ഓമനപ്പുത്രി.

നെഞ്ചത്തു മുന്നോട്ടു മുന്നോട്ടു പായും
ജനങ്ങള്‍ മനങ്ങള്‍
ജ്വരത്തീവനങ്ങള്‍.
വീഴുന്നതഛന്‍
തലച്ചോറു കീറിത്തെറിക്കുന്നു ചോര
മണല്‍ക്കൂനയില്‍ നിന്നു
ചാലുചാലായിട്ടൊലിക്കു-
ന്നുണങ്ങാത്തൊരാ രക്തധാര.

ആര്‍ത്തലച്ചമ്മ വീണപ്പോള്‍ മുലക്കണ്ണി-
ലാര്‍ത്തിയോടെ ചുണ്ടമര്‍ത്തിക്കരഞ്ഞോള്‍
ഇവള്‍
രക്തസാക്ഷിയുടെ ഓമനപ്പുത്രി.

ഉപ്പും പരിപ്പും ഉഴക്കരിച്ചോറും
കപ്പയും മീനും മരുന്നും പിടിക്കാന്‍
അച്ഛന്‍ പടപ്പെട്ട ചാവേര്‍ ചരിത്രം
പൊട്ടിച്ചിരിച്ചു തിരസ്ക്കരിക്കുമ്പോള്‍
ഉള്ളില്‍ ഇറങ്ങിക്കറങ്ങിപ്പുറത്തേക്ക്
തെന്നി വീഴാറുണ്ട്‌ നൊമ്പരം പമ്പരം.
പമ്പരക്കാലില്‍ കുഴിഞ്ഞന്തി പൊട്ടി-
പ്പനയ്ക്കുന്ന ചോരയ്ക്കു സാക്ഷ്യപ്പെടുത്താന്‍
ഉറയ്ക്കാത്ത മണ്ണ് മറയ്ക്കാത്ത കണ്ണ്
തുലയ്ക്കെന്നു ചീര്‍ക്കുന്ന വാക്കിന്റെ മുള്ള്.

ഇവള്‍ക്കെന്റെ നേരിന്റെ
ജീവല്‍പ്പതാക
കൊടും നോവു പൊട്ടി-
ക്കിളിര്‍ക്കുന്ന ഗാഥ
ഇവള്‍ക്കെന്റെ പ്രാണന്റെ
വീരാഭിവാദ്യം-
തുടിക്കുന്ന ബോധക്കറുപ്പിന്റെ വാദ്യം.

കടല്‍
കുങ്കുമം വിറ്റ വ്യാപാരികള്‍ക്കായ്
ഇരുള്‍ക്കമ്പളങ്ങള്‍ വിരിച്ചലയ്ക്കുമ്പോള്‍
മുടിക്കെട്ടു കാറ്റത്തഴിച്ചിട്ടു ചിക്കി
വെടിക്കെട്ടു നെഞ്ചത്തമര്‍ത്തിച്ചിലമ്പി
കരയ്ക്കുണ്ടൊരുത്തി.

ഇവള്‍
രക്തസാക്ഷിയുടെ ഓമനപ്പുത്രി.

Friday, 13 January 2017

അവാർഡു തുകയായി വണ്ടിച്ചെക്കും ഭാഗ്യക്കുറി ടിക്കറ്റും



പുനലൂർ ബാലൻ അവാർഡ്‌ സമർപ്പണ സമ്മേളനത്തിൽ വച്ച്‌, കലയിലും സാഹിത്യത്തിലും അതീവ താൽപര്യമുള്ള കമ്യൂണിസ്റ്റ്‌ നേതാവ്‌ പന്ന്യൻ രവീന്ദ്രനാണ്‌ സദസിനെ ഞെട്ടിച്ച ആ വിവരം പുറത്തുവിട്ടത്‌. തലസ്ഥാനത്തെ ഒരു അവാർഡ്‌ കമ്മിറ്റി ഒരു പ്രമുഖ മാധ്യമ പ്രവർത്തകന്‌ അവാർഡ്‌ തുകയായി നൽകിയത്‌ വണ്ടിച്ചെക്കായിരുന്നു.

അവാർഡു കൈപ്പറ്റി ഒരു മാസത്തിനുശേഷം മാധ്യമപ്രവർത്തകൻ പന്ന്യൻ സഖാവിനെ വിളിക്കുന്നു. തുകയായി നൽകിയ 25000 രൂപ വണ്ടിച്ചെക്കായിരുന്നു എന്നറിയിക്കുന്നു. അദ്ദേഹം ഉടൻതന്നെ സംഘാടകരുമായി ബന്ധപ്പെടുകയും അഞ്ച്‌ ദിവസത്തിനുള്ളിൽ ബാങ്കിൽ പണം നിക്ഷേപിപ്പിച്ച്‌ പ്രശ്നം പരിഹരിക്കുകയും ചെയ്തു.

കേരളത്തിലുള്ള കാക്കത്തൊള്ളായിരം അവാർഡ്‌ കമ്മിറ്റിക്കാർ ഇത്തരം പണികൾ പറ്റിക്കാറുണ്ട്‌. ചിലരാകട്ടെ അവാർഡിന്‌ ഇരയാകുന്ന ആളുടെ തന്നെ ചെക്കു വാങ്ങി കവറിലിട്ട്‌ ഒട്ടിച്ച്‌ പ്രമുഖ വ്യക്തികളെക്കൊണ്ട്‌ മാന്യമായിത്തന്നെ തിരിച്ചു നൽകാറുമുണ്ട്‌.

എഴുത്തുകാർക്കും സാംസ്ക്കാരിക പ്രവർത്തകർക്കും അവാർഡുകളോട്‌ കലശലായ ആഭിമുഖ്യം ഉണ്ടെന്നു തോന്നുന്നു. വലിയ സ്വാധീനമുള്ള ആളുകൾ അവാർഡു കമ്മിറ്റിക്കാരെ സ്വയം നിർദേശിച്ച്‌ അവരാൽ സമ്മാനിതരാകാറുമുണ്ടത്രേ.

അവാർഡിന്റെ ആധിക്യമുണ്ടാവുകയും കമ്പോള നിലവാരം, ചരമം, ക്ലാസിഫെഡ്‌ പരസ്യങ്ങൾ തുടങ്ങിയവ പോലെ സ്ഥിരമായി അവാർഡ്‌ വാർത്ത കൊടുക്കേണ്ടി വരികയും ചെയ്ത ഘട്ടത്തിലാണ്‌ 5000 രൂപയെങ്കിലും തുകയില്ലാത്ത അവാർഡ്‌ വാർത്തകൾ ഒഴിവാക്കാൻ പത്രക്കാർ തീരുമാനിച്ചത്‌. ഇവിടെയും വേട്ടക്കാരനും ഇരയും തമ്മിൽ ഒരു ധാരണയുണ്ടാക്കി പത്രക്കാരെ കബളിപ്പിക്കാറുണ്ട്‌. അയ്യായിരം രൂപയെന്ന്‌ പ്രഖ്യാപിക്കും. കാലിക്കവർ സമ്മാനിക്കും. ഈ ഘട്ടത്തിലാണ്‌ എറണാകുളത്തെ ഫ്രീതോട്ട്‌ അവാർഡ്‌ കമ്മിറ്റിക്കാർ കവറില്ലാതെ നോട്ടുകൾ ഉയർത്തിക്കാട്ടി സമ്മാനിതർക്ക്‌ നൽകിക്കൊണ്ട്‌ മാതൃകയായത്‌.

ഒറ്റത്തവണ മാത്രം ആർഭാടത്തോടെ കൊണ്ടാടപ്പെടുന്ന അവാർഡുകളുണ്ട്‌. അവാർഡ്‌ ജേതാവ്‌ തന്നെയാണ്‌ ഇതിന്റെ പിന്നിലുള്ള സംഘാടകൻ. എല്ലാ എഡിഷനിലും വാർത്ത വരാനായി പത്രാധിപ സമിതിയിലുള്ളവർക്കു തന്നെ അവാർഡ്‌ പ്രഖ്യാപിക്കുന്ന വിദ്യയും നിലവിലുണ്ട്‌. ഉഴവുചാലിൽ ശശിസ്മാരക പുരസ്കാരം മുഖ്യപത്രാധിപർക്ക്‌ പ്രഖ്യാപിച്ചാൽ ഉഴവുചാലിൽ ശശിയും സംഘാടകരും ഒറ്റദിവസംകൊണ്ട്‌ മലയാളികളുടെ ശ്രദ്ധയിൽപ്പെടും. മുപ്പത്തിരണ്ട്‌ നാഴികകൊണ്ട്‌ ഈ അഭ്യാസം വിസ്മൃതപ്പെടും എന്നത്‌ വേറെ കാര്യം.

അവാർഡ്‌ പരിഗണനയ്ക്കായി പുസ്തകങ്ങൾ ക്ഷണിക്കുന്ന രീതിയാണ്‌ മറ്റൊന്ന്‌. അഭിമാനികളായ എഴുത്തുകാർ ആരും തന്നെ പുസ്തകം അയയ്ക്കും എന്നു തോന്നുന്നില്ല. അതിനാൽ സംഘാടകർ ഉദ്ദേശിച്ചവർക്ക്‌ തന്നെ അവാർഡുകൾ നൽകുകയും ചെയ്യാം.

ഒരു പ്രമുഖ കവിക്ക്‌ കോട്ടയത്തു നിന്നും ലഭിച്ച അവാർഡ്‌ കവർ തുറന്നു നോക്കിയപ്പോൾ തുകയ്ക്ക്‌ പകരം ഒരു ഭാഗ്യക്കുറി ടിക്കറ്റായിരുന്നു. അടിച്ചാൽ കോടികൾ കിട്ടും എന്നായിരുന്നു സംഘാടകരുടെ വിശദീകരണം.

എഴുത്തുകാരന്‌ പണം ആവശ്യമുണ്ട്‌. വിലയേറിയ പുസ്തകങ്ങൾ വാങ്ങി വായിച്ച്‌ സ്വയം നവീകരിക്കണമെങ്കിൽ പണം വേണം. പ്രായമായ എഴുത്തുകാരാണെങ്കിൽ ഔഷധം വാങ്ങാനും മറ്റും ഈ പണം ഉപകരിക്കും.

ജീവകാരുണ്യ പ്രവർത്തനങ്ങൾക്ക്‌ അവാർഡ്‌ തുക ചെലവഴിക്കുന്ന എഴുത്തുകാരുണ്ട്‌. അവർക്ക്‌ അങ്ങനെയുമാകാം. ജ്ഞാനപീഠ പുരസ്കാരം കിട്ടിയ തുക ഉപയോഗിച്ച്‌ ഓടക്കുഴൽ അവാർഡ്‌ സ്ഥാപിച്ച മഹാകവി ജി ശങ്കരക്കുറുപ്പ്‌ ഉദാത്ത മാതൃകയാണ്‌. എൻഡോസൾഫാൻ ദുരിത ബാധിതര്‍ക്കുവേണ്ടി പ്രവർത്തിക്കുന്ന എം എ റഹ്മാനെപ്പോലുള്ളവർക്ക്‌ അത്‌ ലഭിക്കുമ്പോൾ അവാർഡ്‌ തുകയുടെ മൂല്യം വിനിയോഗ മഹത്വംകൊണ്ട്‌ വർധിക്കുക തന്നെ ചെയ്യും.

പുനലൂർ ബാലൻ ഫൗണ്ടേഷൻ, മുഖ്യാതിഥിയായിരുന്ന പന്ന്യൻ രവീന്ദ്രന്റെ ആശങ്കകളെ അസ്ഥാനത്താക്കിക്കൊണ്ട്‌ അവാർഡ്‌ തുക നൽകുക തന്നെ ചെയ്തു.