കണ്ണൂരെനിക്കേറെ ഇഷ്ടം
വിണ്ണില്‍ നിന്നും വീണ
നക്ഷത്രമുത്തു പോല്‍
മണ്ണില്‍ വേരോടിച്ച
കുങ്കുമച്ചാമ്പ പോല്‍
കണ്ണൂരെനിക്കേറെ ഇഷ്ടം
പൈതല്‍മല പോല്‍ കുമിഞ്ഞ സ്നേഹം
പയ്യന്നൂര്‍പ്പുഴ പോലെ വശ്യം
പയ്യാമ്പലത്തെ സ്മൃതിക്കടല്‍ ഗര്‍ജ്ജനം
കൃഷ്ണപ്പാട്ടായി പടര്‍ന്ന താരാട്ട്
ഏ വി നടന്ന വരമ്പ്
ഏ കെ ജിപ്പൂമരം
വീരപഴശ്ശി പറന്ന പോര്‍വീഥികള്‍
രക്തസാക്ഷിച്ചൂരുറഞ്ഞ തെയ്യങ്ങള്‍
ഏഴിമലക്കാറ്റ്, വേങ്ങക്കഥ
കല്ലൂക്കഫേ, വാഗ്ഭടാനന്ദമാടിയ
ചിന്തയും വാക്കും ജ്വലിച്ച മുറ്റങ്ങള്‍
കണ്ണൂരെനിക്കേറെ ഇഷ്ടം
ബ്രണ്ണന്‍, നിലാവിലെ മാടായിപ്പാറ
കണ്ണായ വെള്ളൂരെ ജവഹര്‍
കോത്തായിക്കഥകള്‍ തളിപ്പറമ്പില്‍ കേട്ട
പാട്ടുകള്‍, ചക്കരക്കല്ല്
പുഷ്പനില്‍ പൂക്കുന്ന ചെമ്പരത്തി
കാവുമ്പായിയിലെ വെടിക്കുന്ന്
കേളപ്പനുപ്പു കുറുക്കിയ സാഗര-
തീരം, കെ.കെ.ആര്‍ ശില്‍പ്പം
ഗാന്ധിമാവ്,ബീഡി വിളയുന്ന വായന
അറയ്ക്കല്‍ ചിറക്കല്‍ പെരുമ
കണ്ണൂരെനിക്കേറെ ഇഷ്ടം
നഷ്ടജന്മങ്ങള്‍ വിലാപങ്ങളായ് വന്നു
ചുറ്റി നില്‍ക്കുമ്പൊഴും
കണ്ണൂരെനിക്കേറെ ഇഷ്ടം.
No comments:
Post a Comment