മുണ്ടുടുക്കുമ്പോള്‍

 

മൂടൽമഞ്ഞാൽ മുണ്ടുടുത്ത

മകരമാസം-ദൂരെ

മേഘമുണ്ടാൽ മാനം കാക്കും 

കറുമ്പന്‍ മാനം 

കേരളൻ ഞാൻ മുണ്ടുടുത്തു

സഞ്ചരിക്കുമ്പോള്‍ - എന്റെ

നേരിലേറി നിറയാറു-

ണ്ടാദി മലയാളം

വേട്ടയാടാൻ പിറന്നോരുടെ

കാലുറകൾക്ക്

നാട്ടിലെല്ലാം നല്ലകാലം

നടപ്പുദീനം

കേരളൻ ഞാൻ കോന്തലക്കൽ

കൈകൊളുത്തുമ്പോൾ-എന്റെ

കാൽ വിരലില്‍ തുടങ്ങുന്നൂ

വടക്കൻപാട്ട്

മുണ്ടുരിഞ്ഞു പുതയ്ക്കുമ്പോൾ

കണ്ടറിഞ്ഞു കിടക്കുമ്പോൾ

ചുണ്ടില്‍ വന്നു തുടിയ്ക്കാറു-

ണ്ടിടയ്ക്കക്കൂട്ട്-കാതിൽ

നെഞ്ചുടഞ്ഞ ഞെരളത്തിൻ

പ്രണയപ്പാട്ട്

മുണ്ടലക്കിവെളുപ്പിക്കെ

വെയിൽത്തോളത്തുലർപ്പിക്കേ

പണ്ടുതൊട്ടേ മലർക്കാറു-

ണ്ടരുമപ്പൂവ്-എങ്ങും

തുമ്പയും പാലയും പൂത്തു

മദിക്കും കാട്

കേരളൻ ഞാൻ മുണ്ടുമാടി-

ക്കുത്തിയങ്ങനെ വയൽതോറും

ഞാറുകുത്തി നിവരുമ്പോൾ

കാരിരുമ്പിലടിക്കുമ്പോൾ

ചോരപോലെയൊഴുകുന്നു

കബനിപ്പെണ്ണ്-മണ്ണിൻ

വേരുപൊട്ടാതോർത്തു നിൽപൂ

ശബരിക്കുന്ന്. 

മുണ്ടുടുത്തു കയർക്കുമ്പോൾ

മുന്നണിയിൽ നടക്കുമ്പോൾ

കണ്ണിലൂറിത്തെളിയുന്നു

കടത്തനാട്-ചുറ്റും

വെണ്ണിലാവിൻ വേഷ്ടിയിട്ട

വള്ളുവനാട്

കേരളൻ ഞാൻ മുണ്ടൊതുക്കി-

ചെത്തിയിപ്പെരുവഴിച്ചാലിൽ

കേവലനായ് നിന്നിടുമ്പോൾ

കാവലായ് റബ്ബർ നീളുമ്പോൾ

നോവിൽനിന്നും പിറക്കുന്നു

ഭരണിത്തോറ്റം-കാലം

കാലിടറി വീണിടുന്ന

കരിങ്കൽക്കൂട്ടം