മുളന്തണ്ടിന് മൂളിപ്പാട്ട്
വരികെട്ടിപ്പോയ കുന്ന്
കുന്നിന് മോളില് കുട നീര്ത്തി
നിലകൊള്ളും പൂമരുത്
പൂമരുതിന് മുടിക്കെട്ടില്
വയലറ്റ് പൂക്കളിട്ട്
പൂക്കളുടെ പ്രണയത്തേന്
നുകരുന്ന ഫെബ്രുവരി
ഫെബ്രുവരിക്കാതിലുണ്ട്
വസന്തത്തിന് കേളികൊട്ട്
കൊട്ടിലുണ്ടൊരൂമയാട്ടം
കെട്ടിയാടുമറിയിപ്പ്
അറിയിപ്പില് നൃപനുണ്ട്
കലിയുണ്ട് കാടുമുണ്ട്
കാട്ടിനുള്ളില് പെരുമ്പാമ്പും
രാജ്ഞിയും ദു:ഖവുമുണ്ട്
ദു:ഖമാറ്റാനിലയെണ്ണി-
പ്പഠിക്കുമ്പോള് അശ്വവേഗം
വേഗതയില് പഠിപ്പിച്ചു
തടിയൂരിക്കടക്കേണം
കടക്കുമ്പോള് മാട്ടിറച്ചി
പചിക്കുവാനറിയേണം
അറിവിന്റെ സുഗന്ധത്താ-
ലൊരുമിക്കാന് വഴിയാകും
വഴിനീളെ ചെണ്ടുമല്ലി
തലയാട്ടിപ്പൊളി ചൊല്ലും
ചൊല്ലിലെല്ലാം പഴഞ്ചൊല്ല്
പല്ലിളിച്ചു പറക്കുന്നു
പറന്നെത്തും നീല്മരുതില്
കുരുവിയുടെ നാക്കേറ്
നാക്കേറില് കഥയൊളിച്ച
കാട്ടുപെണ്ണിന് മനസ്സുണ്ട്
മനസ്സില് മണ്കുടിലുണ്ട്
കാത്തിരിക്കും വിളക്കുണ്ട്
വിളക്കൂതി ചോറുരുട്ടാന്
വരുമല്ലോ കുംഭക്കാറ്റ്
കുംഭക്കാറ്റോ കണ്മഷിയും
കരിവളയും വാങ്ങുന്നു
വാങ്ങിയതിലില്ല പോലും
കുഞ്ഞുടുപ്പും കാല്ത്തളയും.
മനസ്സില് മണ്കുടിലുണ്ട്
ReplyDeleteകാത്തിരിക്കും വിളക്കുണ്ട്
വിളക്കൂതി ചോറുരുട്ടാന്
വരുമല്ലോ കുംഭക്കാറ്റ്...