ഉൾവാക്കുകൾ

ഞാനെൻ ശരീരം പരീക്ഷണശാലയിൽ
മേശപ്പുറത്തു കിടത്തി
വസ്ത്രങ്ങൾ നീക്കി, കൊടും കത്തിയാലതിൻ
ത്വക്കുടുപ്പും കൊത്തിമാറ്റി

നഗ്നം അതേ പൂർണനഗ്നം അകങ്ങളിൽ
അക്ഷരങ്ങൾ തെളിയുന്നു

അക്ഷരം വാക്കായി
വാക്കു വാക്യങ്ങളായ്
സ്വപ്നമേയല്ല യാഥാർത്ഥ്യം

കയ്പുകുടിച്ചു ചുവന്ന മസ്തിഷ്ക്കത്തിൽ
ഒറ്റവാക്കേയുള്ളു സ്നേഹം
കണ്ണുകൾക്കുള്ളിൽ നിലാവ്
ചെവിക്കുള്ളിൽ
മങ്ങിയ നെൽകൃഷിപ്പാട്ട്
അന്നനാളത്തിൽ വിശപ്പ്
തോളസ്ഥിയിൽ
ഒന്നിറങ്ങൂ എന്ന വീർപ്പ്

ഹൃദയഭിത്തിപ്പുറത്തവ്യക്തമായ് കണ്ടു
ഹരിതമഷിയിൽ പ്രണയം
ശ്വാസകോശത്തിന്റെയോരോ അറയിലും
വാസം പുക എന്ന വാക്യം
രക്തനാളത്തിൽ സമരം
ആമാശയശല്ക്കത്തിൽ തീരാദുരിതം
വൃക്കയിൽ മോഹങ്ങൾ
വൻകുടലിൽ സൂര്യൻ
വൃഷണത്തിനുള്ളിൽ അശാന്തി
മാലിന്യസഞ്ചിയിൽ ജീവിതം
താരാട്ടുപോരെന്നു തൊണ്ടയും കൈയ്യും


കരളിൽ ബിയർ
വാരിയെല്ലിൽ, നാട്ടു-
വഴിയിലെ പുല്ലിന്റെ പേര്
കാലസ്ഥിയിൽ കാട്ടുപക്ഷി
പാദങ്ങളിൽ
ചൂടിൽ നടന്ന കഥകൾ
വാക്കുകൾ നാക്കുകൾ തോരുന്നതേയില്ല
വാക്കിന്റെ പേമാരിയുള്ളിൽ