നാടകം

ദ്രവിച്ച വടവൃക്ഷം

വറ്റുന്ന ജലാശയം

ഹൃദയം വരണ്ടപ്പോൾ

എത്തിയ തന്തച്ചെന്നായ്

തൊട്ടടുത്താട്ടിൻകുട്ടി

ധിക്കാരി

രാപ്പാതയിൽ ഒറ്റയ്ക്കു കാടും നാടും

കണ്ടുകണ്ടലഞ്ഞവൻ

പണ്ടത്തെ അതേ ചോദ്യം

ഉത്തരം:തയ്യാർ

എന്നെ തിന്നുകൊള്ളുക

വിശപ്പിത്തിരിയടങ്ങട്ടെ

തെറ്റുന്നു സംഭാഷണം

നാടകം തുടരുവാൻ

ഒക്കാതെ ചെന്നായ്

കർട്ടനിടുവാനാജ്ഞാപിക്കെ

ബുദ്ധവൃക്ഷത്തിൽ

തളിർനാക്കു പൊന്തുന്നു

ദാഹം വറ്റിയ തടാകത്തിൽ

വിസ്മയം നിറയുന്നു

ഒറ്റയാൾ മാത്രം

രംഗം വഷളായപ്പോൾ കൂവി

ഒറ്റയാൾ, ഒരേയൊരു കുറുക്കൻ

നിരൂപകൻ